विधानसभा म आज भाजपा विधायक अजय चंद्राकर ह प्रदेस म कराय जावत धर्मांतरण के मुद्दा उठाइन। ओमन ह ध्यानाकर्षण के माध्यम ले एनजीओ डहार ले कराय जावत धर्मांतरण म विदेसी फंडिंग के आरोप लगाइन। जवाब म गृहमंत्री विजय शर्मा ह बतइन कि विदेसी फंडिंग के जांच अउ कार्यवाही के अधिकार केंद्र सरकार तीर हे। छत्तीसगढ़ म तीन सौ चौंसठ संस्था रिहीस, जांच के बाद चौरासी ठन संस्था के फंडिंग ल रोके गीस अउ एक सौ सत्ताईस संस्था के वैद्यता ल खतम कर दे गीस।
अजय चंद्राकर ह पूछिन कि नवा कानून बनाय बर सरकार कोनो प्रावधान करत हे या नइ, एमा गृहमंत्री विजय शर्मा ह किहीन कि छत्तीसगढ़ म धर्म, स्वातंत्रय विधेयक लागू हे, जल्दीच एमा नवा प्रावधान सामिल करे जाही।
चर्चा के दउरान सत्ता पक्ष के ही विधायक सुशांत शुक्ला, केशकाल विधायक नीलकंठ टेकाम अउ रईपुर पश्चिम के विधायक राजेश मूणत ह अपन-अपन क्षेत्र म कराय जावत धर्मांतरण के जानकारी गृहमंत्री ल दीन। ओमन ह एखर उपर पुलिस प्रशासन डहार ले कोनो भी कार्रवाही नइ करे जाय के सिकायत घलो करीन।
उहें, सदन म एक ठन दूसर ध्यानाकर्षण के माध्यम ले कांग्रेस विधायक रामकुमार यादव ह चंद्रपुर विधानसभा म किसान मन ल सिचाई बर पानी नइ दे जाय के मुद्दा उठाइन।
विस-भारतमाला परियोजना
विधानसभा म आज सून्यकाल के दउरान नेता प्रतिपक्ष डॉक्टर चरणदास महंत ह भारतमाला परियोजना म गड़बड़ी के जांच ईओडब्ल्यू ले कराय जाय के मामला उठाइन। ओमन किहीन कि अगर जांच के बाद सदन म ही करे जातिस तो जादा अच्छा रतिस। एमा विधानसभा अध्यक्ष डॉक्टर रमन सिंह ह किहीन कि अगर सदन म मामला चलत रिहीस तो कोनो फइसला ले जाय के पहिली सदन ल सूचना देना रिहीस। एखरे संग ओमन ह राजस्व मंत्री टंकराम वर्मा ल ए मामला म सदन म वक्तव्य देबर निरदेस दीन।
विस-जल जीवन मिशन
विधानसभा म आज प्रश्नकाल के दउरान नेता प्रतिपक्ष डॉक्टर चरणदास महंत ह जल जीवन मिसन म बछर दू हजार पचीस तक केंद्रांस के रूप म मिले रासि के जानकारी मांगिन। जवाब म उपमुख्यमंत्री अरूण साव ह बतइन कि फरवरी दू हजार चौबीस तक एक सौ इंक्यानवे करोड़ उनसठ लाख रूपिया केंद्रास मिले हे। उहें, राज्यांश रासि के रूप म एक सौ सत्यासी करोड़ बारह लाख रूपिया के मंजूरी दे गेहे। श्री साव ह किहीन कि केंद्र सरकार ह दू हजार अट्ठाईस तक जल जीवन मिसन के अवधि बढ़ाय हे। जल जीवन मिसन के काम पचास ले साठ प्रतिसत तक पूरा होय हे। एखरे अनुसार राज्य सरकार ल रासि मिले हे।
विस-विधेयक
राष्ट्रपति द्रौपदी मुर्मू चौबीस मार्च के छत्तीसगढ़ दउरा म आवत हे। छत्तीसगढ़ विधानसभा के रजत जयंती बछर के मउका म ओमन ह विधानसभा सदस्य मन बर प्रबोधन कारीकरम म सामिल होही। राष्ट्रपति के कारीकरम सभा भवन म कराय जाही। जेखर बर सभा भवन के उपयोग के अनुमति के प्रस्ताव ल आज विधानसभा म सर्वसम्मति ले पास करे गीस।
उहें, छत्तीसगढ़ लोक परिसर-बेदखली संसोधन विधेयक, छत्तीसगढ़ विधानसभा वेतन, भत्ता अउ पेंशन संसोधन विधेयक अउ भारतीय स्टाम्प संसोधन विधेयक आज सदन म पेस करे गीस।
इही बीच, कृषि अउ अनूसूचित जाति-जनजाति, पिछड़ा वर्ग अउ अल्पसंख्यक विभाग मंत्री रामविचार नेताम के विभाग के अनुदान मांग उपर आज सदन म चर्चा होइस। एमा सत्ता पक्ष अउ विपक्ष के सदस्य मन ह भाग लीन।
राज्यपाल-बैठक
राज्यपाल रमेन डेका ह अपन कोरबा दउरा म अधिकारी मनके बइठका लेके आने-आने योजना के बारे म जरूरी निरदेस दीन। ओमन ह सड़क दुर्घटना रोके बर, आदिवासी मनके जीवन ल आगू बढ़ाय के दिसा म काम करे के, पर्यावरण ल सहेजे के, नोनी मन ल अउ श्रम ले जुड़े लइका मन ल शिक्षा ले जोड़े के, मादक पदार्थ के तस्करी अउ नसा के रोकथाम बर निरदेस दीन।
ए दउरान राज्यपाल ह कलेक्टर परिसर म ‘‘एक पेड़ मां के नाम‘‘ अभियान म बादाम के पौधा लगाइन। ए मउका म ओमन ह पर्यावरण संरक्षण अउ धरती ल हरा-भरा बनाय बर सबो झन ल पउधा लगाय बर प्रेरित करीन।
माओवादी-आत्मसमर्पण
बीजापुर जिला म आज उन्नीस झन माओवादी मन ह आत्मसमर्पण करीन हे। पुलिस अधीक्षक जितेन्द्र यादव ह बतइन कि ए सबो माओवादी मन उपर कुल उनतीस लाख रूपिया के इनाम रिहीस, जेमा सबले जादा आठ-आठ लाख रूपिया के इनाम एक झन माओवादी दंपत्ति उपर रिहीस। आत्मसमर्पण करइया सबो माओवादी मन ल पामेड़ एरिया कमेटी के सदस्य बताय जात हवय। ए सब्बो माओवादी मन ल राज्य सरकार के पुनर्वास नीति म पच्चीस-पच्चीस हजार रूपिया के प्रोत्साहन रासि दे गे हवय।
उहें, कोंडागांव जिला म आज एक लाख रूपिया के इनामी माओवादी ह पुलिस के आगू आत्मसमर्पण करे हे। ए माओवादी ह बस्तर डिवीजन के बेड़मा अउ बारसूर म मिलिसिया सदस्य अउ एलओएस सदस्य के रूप म सक्रिय रिहीस। एखर उपर कोंडागांव, नारायणपुर, बस्तर अउ दंतेवाड़ा के सीमावर्ती क्षेत्र म आने-आने घटना म सामिल रेहे के आरोप हे। आत्मसमर्पित माओवादी ल राज्य सरकार के पुनर्वास नीति म पचीस हजार रूपिया के प्रोत्साहन रासि दे गे हवय।
ओति, दंतेवाड़ा जिला के मालेवाही क्षेत्र म तलासी अभियान म निकले सीआरपीएफ अउ जिला पुलिस बल के जवान मन ह पांच किलो के आईईडी बरामद करीन, जेला मउकाच म निष्क्रिय कर दे गीस।
जवान-मौत
रईपुर जिला के खरोरा थाना क्षेत्र के मुड़ीपार के भारत तिब्बत सीमा पुलिस बल आईटीबीपी के कैंप म तैनात एक झन जवान ह अपनेच वरिष्ठ अधिकारी एएसआई देवेंद्र सिंह दहिया ल गोली मार दीस, जेखर ले मउकाच म उंखर मउत होगिस। घटना रातकून ओतका बखत होइस जब सिपाही अउ एएसआई के बीच कोनो बात के सेति विवाद होइस। विवाद अतका बाढ़गे कि सिपाही ह अपन सर्विस रिवॉल्वर ले एएसआई उपर गोली चला दीस। गोली लगते साठ एएसआई के मउकाच म मउत होगे। मृतक के एएसआई के पहिचान पुलिस विभाग म काम करइया एक बड़े अधिकारी के तौर म होय हे। आरोपी जवान ल कैंप म ही गिरफ्तार कर ले गीस।
सब स्टेशन-आगजनी
रायगढ़ जिला के कोतरा रोड के विद्युत सब स्टेसन म आज भीषण आग लग गीस। सब स्टेसन म राखे सैकड़ो ट्रांसफार्मर अउ दूसर बिजली के उपकरण मन घलो आगी के चपेट म आगिन। सूचना मिलतेसाठ फायर ब्रिगेड के टीम ह मउका म पहुंचिन अउ भीषण आग म काबू पाय के परयास करे गीस। ए आगजनी म करोड़ो रूपिया के नुकसान होय के अनुमान हे। सार्ट सर्किट के सेति ए सब स्टेसन म आगजनी के आसंका जताय जावत हे।
‘‘बस्तर पंडुम‘‘
राज्य सरकार डहार ले बस्तर के जनजातीय कला अउ संस्कृति ल सम्मान देवाय खातिर ‘‘बस्तर पंडुम‘‘ के आयोजन करे जावत हे। इही कड़ी म आज ले ‘‘बस्तर पंडुम‘‘ के विकासखंड स्तर के कारीकरम सुरू हो गेहे। कोंडागांव जिला के स्थानीय ऑडिटोरियम म आज जनजातीय, नृत्य अउ वेशभूषा अउ आभूषण के प्रदर्सन करे गीस। काली अट्ठारा मार्च के जनजातीय गीत-संगीत अउ वाद्ययंत्र के प्रदर्सन करे जाही। उहें, उन्नीस मार्च के जनजातीय नाट्य, सिल्प अउ चित्रकला संघरा जनजातीय व्यंजन के प्रदर्सन करे जाही। संगेसंग जनपद पंचायत माकड़ी के मंडी प्रांगण म घलो आज ले बस्तर पंडुम के ब्लॉक स्तर के कारीकरम कराय जावत हे।
कांग्रेस-बैठक
अखिल भारतीय कांग्रेस कमेटी के महासचिव अउ राज्य प्रभारी मनके बइठका काली अट्ठारा मार्च के नई दिल्ली म होही। ए बइठका ऑल इंडिया कांग्रेस कमेटी के मुख्यालस इंदिरा भवन म काली संझा पांच बजे ले होही। मिले जानकारी के अनुसार कांग्रेस अध्यक्ष मल्लिकार्जुन खड़गे ह ए बइठका के अध्यक्षता करही। बइठका म लोकसभा म विपक्ष के नेता राहुल गांधी घलो सामिल होही।
ए बइठका के उद्देस्य संगठनात्मक मजबूती अवइया चुनाव के रणनीति अउ पार्टी के भविष्य के दिसा तय करना हे।