स्वतंत्रता दिवस-01
देस म काली 74वां स्वतंत्रता दिवस मनाय जाही। प्रधानमंत्री नरेन्द्र मोदी नई दिल्ली के ऐतिहासिक लाल किला ले तिरंगा झंडा फहराही अउ देस ल संबोधित करही।
ऐति, छत्तीसगढ़ म घलो स्वतंत्रता दिवस के आयोजन के तैयारी लगभग पूरा होगे हे। राज्यपाल अनुसुईया उइके राजभवन परिसर म ध्वजारोहण करही। कोरोना संक्रमण ल देखत ए बछर राजभवन म ‘एट होम‘ कारीकरम के आयोजन नइ करे जाय।
उहें, प्रदेस के मुख्य कार्यक्रम राजधानी रायपुर के पुलिस परेड मैदान म आयोजित करे जाही, जिहां मुख्यमंत्री भूपेश बघेल ध्वजारोहण करके परेड के सलामी लीहीं। एखर बाद मुख्यमंत्री जनता के नाम संदेस दीही। कार्यक्रम म कोरोना योद्धा मन ल सम्मानित घलो करे जाही।
ओति, कोरबा म विधानसभा अध्यक्ष डाॅक्टर चरणदास महंत ह झंडा फहराही। उहें, गृह मंत्री ताम्रध्वज साहू ह महासमुंद म, स्वास्थ्य मंत्री टी.एस. सिंहदेव ह बलौदाबाजार म, कृषि मंत्री रविन्द्र चैबे ह दुरूग म अउ वन मंत्री मोहम्मद अकबर ह राजनांदगांव म झंडा फहराही। अइसने, महिला अउ बाल विकास मंत्री अनिला भेड़िया ह रायगढ़ म, स्कूल शिक्षा मंत्री डाॅक्टर प्रेमसाय सिंह टेकाम ह बस्तर म, आबकारी मंत्री कवासी लखमा ह धमतरी म अउ नगरीय प्रसासन मंत्री डाॅक्टर शिवकुमार डहरिया ह सरगुजा म झंडा फहरा के परेड के सलामी लीहीं। एखर अलावा खाद्य मंत्री अमरजीत भगत ह बालोद म उच्च सिक्षा मंत्री उमेश पटेल ह बिलासपुर म, राजस्व मंत्री जयसिंह अग्रवाल ह गौरेला-पेण्ड्रा-मरवाही म अउ लोक स्वास्थ्य यांत्रिकी मंत्री गुरू रूद्रकुमार ह जांजगीर-चांपा जिला म आयोजित समारोह म झंडा फहरा के मुख्यमंत्री के संदेस वाचन करही।
इही प्रकार, आने-आने जिला मन म संसदीय सचिव, विधायक, अउ आने-आने जनप्रतिनिधि म मुख्य अतिथि के रूप म सामिल होके ध्वजारोहण करही।
स्वतंत्रता दिवस-02
राज्य सरकार ह कोरोना संक्रमण ल ध्यान म राखत ए बछर स्वतंत्रता दिवस के कार्यक्रम म विशेष सावधानी बरते के निर्देश देहे। सामान्य प्रशासन विभाग डहार ले जारी आदेश के अनुसार राज्य, जिला, ब्लाॅक अउ पंचायत स्तर म आयोजित होवइया कार्यक्रम म स्कूली लइका मन ल नइ बलाय जाय। संगेसंग तहसील अउ जनपद स्तर म सार्वजनिक समारोह आयोजित नइ करे जाय। एखर अलावा स्वतंत्रता दिवस म आयोजित होवइया कार्यक्रम म अवइया लोगन मन ल मास्क पहिरना अउ सामाजिक दूरी के पालन करना जरूरी होही।
राष्ट्रपति-संबोधन
राष्ट्रपति रामनाथ कोविंद 74वां स्वतंत्रता दिवस के पहिली संझा म आज देस ल संबोधित करही। ए संबोधन हिन्दी म संझा 07 बजे ले आकशवाणी के सबो नेटवर्क अउ दूरदर्शन के सबो चैनल म प्रसारित करे जाही। हिन्दी के बाद अंग्रेजी म एखर प्रसारण करे जाही। आकाशवाणी ले राष्ट्रपति के संबोधन ल प्रादेशिक भाषा मन म क्षेत्रीय नेटवर्क म रतिहा साढ़े नौ बजे प्रसारण करे जाही।
सुनइया मन ल बतादन कि, आज रायपुर आकाशवाणी केन्द्र ले प्रसारित होवइया प्रादेशिक समाचार बुलेटिन के समय म बदलाव करे गेहे। आज ए समाचार बुलेटिन संझा 07 बजके 08 मिनट के बजाय रतिहा 09 बजे प्रसारित करे जाही।
राज्यपाल-शुभकामनाएं
राज्यपाल अनुसुईया उइके ह स्वाधीनता दिवस के अवसर म प्रदेसवासी अउ सेना के जवान मन ल बधाई अउ शुभकामना दीन। ओमन ह अपन संदेस क किहिन कि कतको स्वाधीनता सेनानी मनके बलिदान ले देस ल आजादी मिले हे। एला बनाय राखे बर सेना अउ पुलिस के जवान मन अपन सहादत देहे। राज्यपाल ह प्रदेसवासी मन ले आजादी के ए परब म देस ल कोरोना वायरस ले मुक्ति देवाय के संकल्प ले बर किहीन। संगेसंग आधुनिक तकनीक अउ स्थानीय संसाधन मनके उपयोग करके जादा ले जादा रोजगार के अवसर पैदा करके नवा भारत के निर्माण डहार आगू बढ़े के आग्रह करीन।
पुलिस-पुरस्कार
केन्द्रीय गृह मंत्रालय ह स्वतंत्रता दिवस के मउका म 926 पुलिस कर्मी मन ल पदक भेंट करके सम्मानित करे के घोसना करे हे। एमा छत्तीसगढ़ के 14 पुलिसकर्मी मनके नाव सामिल हे। कोरबा के पुलिस अधीक्षक अभिषेक मीणा सहित 3 अधिकारी मन ल राष्ट्रपति के पुलिस वीरता पदक, उहें, सहायक पुलिस महानिरीक्षक राजेश अग्रवाल अउ 7वीं वाहनी के सेनानी विजय अग्रवाल के संग 11 पुलिसकर्मी मन ल सराहनीय सेवा बर पुलिस पदक दे जाय के घोषणा करे गेेहे। ए सबो अधिकारी मन ल 26 जनवरी 2021 के राजधानी रायपुर म आयोजित गणतंत्र दिवस समारोह म सम्मानित करे जाही।
मुख्यमंत्री भूपेश बघेल, गृहमंत्री ताम्रध्वज साहू अउ पुलिस महानिदेशक डी.एम. अवस्थी ह पदक पवइया सबो पुलिसकर्मी मन ल बधाई अउ शुभकामना देहे।
धान खरीदी-निर्णय
प्रदेस के खाद्य मंत्री अमरजीत भगत ह किहीन कि अवइया बेरा म धान खरीदी के अंतर के रासि के निर्णय मंत्रिमंडल लीही। ओमन किहीन कि धान खरीदी अउ राजीव गांधी किसान न्याय योजना के अलग-अलग उप समिति हे, अउ कृषि मंत्री रविन्द्र चैबे के अध्यक्षता म बने उप समिति के अनुंससा म मंत्रिमंडल आखिरी निर्णय लीही। श्री भगत ह किहीन कि चालू सीजन बर राज्य सरकार ह तैयारी कर लेहे। ओमन बतईन कि ए साल गिरदावरी पाछु एक अगस्त ले सुरू होगे हे, जउन 20 अगस्त तक चलही। उहें, पंजीयन अवइया 17 अगस्त ले 31 अक्टूबर तक करे जाही।
ऐति, मुख्य सचिव आर.पी. मंडल ह सबो जिला के प्रभारी सचिव मन ल एक महीना के भीतर गिरदावरी के काम बिना कोन्हों गलती के करे के निर्देश देहे। श्री मंडल ह सबो प्रभारी सचिव मन ल भेजे गे चिट्ठी म किहिन कि अवइया एक महीना म जिला के दौरा करके एखर समीक्षा करके प्रारूप के अनुसार प्रतिवेदन प्रस्तुत करे।
तृतीय लिंग अनुकम्पा नियुक्ति
राज्य सरकार ह अनुकम्पा नियुक्ति बर आवेदन करइया थर्ड जेंडर के लोगन मन ल घलो नियुक्ति देके निर्णय लेहे। ए संबंध म सामान्य प्रशासन विभाग डहार ले दिशा-निर्देश जारी करे जाही।
बतादन कि अइसे शासकीय सेवक जिखर लइका या आश्रित थर्ड जेंडर के हे, ओमन ल उंखर अभिभावक के सरकारी नौकरी करत बेरा मउत होय म अनुकम्पा नियुक्ति देके कोनो नियम नइ रिहीस।
ईको रिसाॅर्ट-उद्घाटन
मुख्यमंत्री भूपेश बघेल ह आदिवासी क्षेत्र मन म पर्यटन ल बढावा दे बर 3 ईको रिसाॅर्ट के उद्घाटन करीन। श्री बघेल ह बिलासपुर जिला के कुरदर हिल ईको रिसाॅर्ट, कबीरधाम जिला के सरोधा-दादर बैगा एथनिक रिसाॅर्ट अउ कोंडागांव जिला के धनकुल एथनिक रिसाॅर्ट के वीडियो कान्फ्रेंसिंग के माध्यम ले ई-लोकार्पण करीन।
हाईकोर्ट-जमानत
छत्तीसगढ़ उच्च न्यायालय ह प्रवर्तन निदेशालय डहार ले अखिल भारतीय सेवा के अधिकारी आलोक शुक्ला अउ अनिल टुटेजा के खिलाफ दर्ज मामला म उंखर अग्रिम जमानत याचिका ल मंजूर कर लेहे।
जानकारी के अनुसार प्रवर्तन निदेशालय डहार ले बछर 2019 म अधिकारी मनके खिलाफ मनी लाॅन्ड्रिग के मामला दर्ज करे गे रिहीस। उहें, राज्य सरकार के एंटी करप्शन ब्यूरो अउ आर्थिक अपराध अन्वेषण शाखा ह घलो एक ठिन मामला दर्ज करे रिहीस। जेमा ए अधिकारी मन ल पहिली ही जमानत मिल चुके हे।
इही बीच, छत्तीसगढ़ उच्च न्यायालय ह जांजगीर-चांपा जिला के पूर्व कलेक्टर जनक पाठक के दुष्कर्म मामला म अग्रिम जमानत याचिका ल मंजूर कर लेहे।
मौसम
प्रदेश म अवइया 24 घंटा म अधिकतर जगह मन म हल्का ले मध्यम बरसात होय या फेर गरज-चमक के संग पानी गिर सकथे।
मौसम विभाग ले मिले जानकारी के अनुसार प्रदेश के सीमा ले लगे राज्य के आसपास बने कम दबाव के क्षेत्र के सेती प्रदेस के ज्यादातर जगह म बरसात होय के संभावना हे। उहें, मौसम विभाग ह प्रदेश के मध्य अउ उत्तरी हिस्सा के एक-दो जगह म भारी ले अतिभारी बरसा होय के चेतावनी देहे।
अनाज-वितरण
आत्मनिर्भर भारत योजना के तहत पंजीकृत प्रवासी मनखे अउ मजदूर मन ल मई अउ जून महीना के बाचे अनाज 31 अगस्त तक दे बर केहे गेहे। सरकार के चिट्ठी के मुताबिक प्रदेस के अड़तालीस प्रतिसत परिवार मन ल चना अउ करीबन दो तिहाई परिवार मन ल चाउर दे दे गेहे। फेर बीजापुर अउ सुकमा जिला म अभी तक 10 प्रतिसत ले कम परिवार मन ल अनाज दे गेहे।
वनौषधि-पौधा वितरण
प्रदेश म लोक स्वास्थ्य परंपरा संवर्धन अभियान के तहत फोकट म वनौषधि पौधा मनके वितरण करे जात हे। इही कड़ी म आज बिलासपुर म 10 हजार वनौषधि पौधा मन ल फोकट म बांटे गीस। ए बेरा म बिलासपुर विधायक शैलेष पांडेय ह लोगन मन ले जादा ले जादा संख्या म पेड़ लगाय के अपील करीन।
न्यूज-वेबसाइट इम्पेनल
राज्य के न्यूज वेबसाइट अउ पोर्टल ल विज्ञापन दे बर इंपैनल करे जाही। जनसंपर्क विभाग डहार ले ए बारे म अधिसूचना जारी कर दे गेहे। जउन राजपत्र म प्रकासित तारीख ले लागू हो जही।
आधिकारिक जानकारी के अनुसार राज्य के अइसे न्यूज वेबसाइट अउ पोर्टल जेखर डी.ए.वी.पी. म इंपैनलमेंट नइ हे, ओमन ल इंपैनल करे जाही। एखर बर पाछु 6 महीना के औसत यूजर संख्या ल देखे जाही। संगेसंग न्यूज वेबसाइट कम से कम एक बछर जुन्ना अउ सक्रिय होना चाही।
फिट इंडिया फ्रीडम रन
केन्द्रीय खेल मंत्री किरेन रिजिजू ह आज देस के सबले बड़का दउड़ ‘‘फिट इंडिया फ्रीडम रन‘‘ के सुभारंभ करीन। एखर आयोजन 74वां स्वतंत्रता दिवस के मउका म 15 अगस्त ले महात्मा गांधी के 151वां जयंती 02 अक्टूबर तक करे जाही। ए आयोजन म हिस्सा लेवइया मनखे अउ संगठन मन ह फिट इंडिया के वेबसाइट म अपन पंजीयन करा सकथे।