राष्ट्रीय टीकाकरण दिवस
आज देस भर म राष्ट्रीय टीकाकरण दिवस मनाय जात हे। ए दिन टीकाकरण के महत्ता बताय अउ लोगन ल जागरूक करे खातिर हर बछर सोला मार्च के मनाय जाथे। केंद्रीय स्वास्थ्य मंत्रालय ह सोसल मीडिया पोस्ट म बताय गेहे हे कि देस के हरेक लइका के स्वास्थ्य सुरक्षा के लक्ष्य हासिल करे बर टीकाकरण जरूरी हे। मंत्रालय ह बताय हे कि राज्य सरकार अउ समर्पित अग्रिम पंक्ति के स्वास्थ्य कार्यकर्ता मन संग मिलके सरकार लइका मनके रोग-प्रतिरोधक क्षमता बढ़ाय बर प्रतिबध्द हवय।
संपूर्ण टीकाकरण के तेजी ले बढ़वार बर बछर दू हजार चौदह म मिसन इंद्र धनुष के सुरूआत करे गे रिहीस। एखर उद्देस्य नान्हे लइका मनके मृत्युदर म कमी लाना अउ सबो लइका म टीकाकरण ल प्रभावी बनाना रिहीस।
प्रसार भारती-हॉकी पुरस्कार
नई दिल्ली म काली हॉकी इंडिया के सातवां वार्षिक पुरस्कार म प्रसार भारती ल बछर दू हजार चौबीस म हॉकी के प्रसारण अउ संवर्धन ह योगदान दे खातिर जमनलाल शर्मा पुरस्कार ले सम्मानित करे गीस। समारोह म पचास बछर पहिली पंद्रह मार्च के ही कुआलालम्पुर म भारत ल विश्वकप जीतइया अजीतपाल सिंह के अगुवई वाले भारतीय टीम ल पचास लाख रूपिया नगद रकम के संग ध्यानचंद लाइफटाइम अचीवमेंट पुरस्कार दे गीस।
पेरिस ओलंपिक म कांस्य पदक जीतइया भारतीय हॉकी टीम के कप्तान हरमनप्रीत सिंह ल बछर दू हजार चौबीस के सर्वश्रेष्ठ पुरूष खिलाड़ी के पुरस्कार मिलिस अउ महिला हॉकी टीम के गोल कीपर सविता पूनिया ल सर्वश्रेष्ठ महिला खिलाड़ी के बलबीर सिंह सीनियर पुरस्कार दे गीस।
मुख्यमंत्री-विमान उड़ान प्रशिक्षण
मुख्यमंत्री विष्णुदेव साय ह आज जशपुर म विमान उड़ान प्रसिक्षण के सुभारंभ करीन। ए दउरान मुख्यमंत्री ह आगडीह हवई पट्टी म तीन सीजी एयर स्क्वाड्रन एनसीसी रईपुर के कैडेट मन ले भेंट करके उंखर उछाह ल बढ़ाइन। ओमन कैडेट मनके अनुभव सुने अउ जशपुर म पहिली घांव सुरू होय विमान उड़ान प्रसिक्षण ल ए ऐतिहासिक पहल बतइन। ओमन किहीन कि जशपुर अब सिरिफ पर्यटन अउ प्रकृति के सुघरई के केंद्र नो हे, भलूक विमानन प्रसिक्षण के नवा हब बनत हे। मुख्यमंत्री ह किहीन कि अब युवा पायलेट बने के सपना साकार कर सकत हे। जेखर बर सरकार हर संभव मदद देवाही। मुख्यमंत्री ह ए मउका म माइक्रोलाइट एयर स्क्वाड्रन विमान ल देखिन अउ ओखर तकनीकी जानकारी दीन।
खबर के मुताबिक जशपुर जिला म सात मार्च ले कैडेट मन ल विमान उड़ाय के प्रसिक्षण दे जात हे। ए दउरान विमान आकाश म उड़ान भरे के बाद सुरक्षित लैंड करत हे। जेखर ले कैडेट मन ल व्यावहारिक अनुभव मिलथे। रईपुर के संगेसंग जशपुर जिला म भी अइसन कीसम के प्रसिक्षण कारीकरम राखे गेहे।
उहें, मुख्यमंत्री ह आज जिला व्यवहार न्यायालय जशपुर म जिला अधिवक्ता संघ के नवा बने पदाधिकारी मनके सपथ ग्रहण समारोह म संघरीन। ए बेरा म मुख्यमंत्री ह बार काउंसिल के जीर्णोध्दार ई-लाइब्रेरी बनाय बर एक करोड़ रूपिया देके घोसना करीन।
मुख्यमंत्री-जशपुर शपथ ग्रहण
मुख्यमंत्री विष्णुदेव साय के मौजूदगी म नगर पालिका परिषद, जशपुर नगर के नवा बने अध्यक्ष अरविंद भगत अउ बीस ठिन वार्ड के पार्षद मनके सपथ ग्रहण समारोह आज जशपुर म होइस। ए मउका म मुख्यमंत्री ह किहीन कि नगर के साफ-सफाई बेवस्था करे बर पार्षद अपन मिहनत अउ जिम्मेवारी के संग काम करय। मुख्यमंत्री ह नवा बने पार्षद मनले स्वच्छता बुनियादी सुविधा अउ स्मार्ट सहर बनाय म अपन महत्ता के भूमिका निभाय के आह्वान करीन। ओमन किहीन कि स्थानीय प्रशासन अउ नागरिक मनके मदद ले जशपुर नगर ल आदर्स नगर बनाय जाही।
राज्यपाल-दौरा
राज्यपाल रमेन डेका दू दिन के दउरा म आज कोरबा पहुंचिन। एनटीपीसी गेस्ट हाउस कावेरी भवन म कलेक्टर अजीत बसंत अउ पुलिस अधीक्षक सिध्दार्थ तिवारी ह उंखर सुवागत करीन। ए दउरान राज्यपाल ल गार्ड ऑफ ऑनर दे गीस।
राज्यपाल रमेन डेका सत्रह अउ अट्ठारा मार्च के जांजगीर-चांपा जिला के दउरा म रइही।
ट्रेन-हादसा
कोरबा जिला के दीपका एसईसीएल साइडिंग म आज रेलवे क्रासिंग म जावत मालगाड़ी ल एक तेज रफ्तार ट्रक ह टक्कर मार दीस। ए टक्कर के बाद मालगाड़ी के गार्ड ब्रेक के डिब्बा पटरी ले उतर गे। ए घटना म ट्रक ड्राइवर गंभीर रूप ले घायल होगे हे। ए घटना के सूचना मिलतेच कोरबा रेलवे प्रबंधन अउ रेलेव पुलिस मउका म पहुंचिन अउ मामला के जांच म जुटे हे।
दुर्घटना
कोरिया जिला के सोनहत थाना क्षेत्र के कटगोड़ी गांव तीर दू फटफटी सवार के बीच होय टक्कर म चार झिन युवक मनके मउत होगे। ए घटना काली संझा के हरय। बताय जात हे कि ए फटफटी म तीन झन दूसर फटफटी म दू झिन बइठे रिहीन। दूनों फटफटी के बीच टक्कर होइस, जेमा चार झन के मउकच म मउत होगे। उहें, एक युवक गंभीर रूप ले घायल हे, जउन ल अस्पताल म भर्ती कराय गेहे। मउत होय लोगन कछार मधला अउ कुसमहा गांव के रहवइया बताय गेहे।
उहें, दुरूग जिला म चौदह तारिख के होय रद्दा दुर्घटना म भाजपा महिला मोर्चा जिलाध्यक्ष के घायल बेटी के रईपुर के एक प्राइवेट अस्पताल म इलाज चलत रिहीस हे, जिहां आज ओखर मउत होगे।
गांजा-बरामद
रईपुर पुलिस ह एक बिसेस अभियान के दउरान छै तस्कर मन ल गिरफ्तार करे के संगेसंग उंखर तीर ले करीबन सात कुंटल गांजा जब्त करे हे। पुलिस के मुताबिक ए गांजा ओडिसा के रायगड़ा ले इंहा लात रिहीन हे। जब्त करे गे गांजा के कीमत करीबन सत्तर लाख रूपिया बताय गेहे।
आबकारी आरक्षक भर्ती
छत्तीसगढ़ आबकारी विभाग म दू आबकारी आरक्षक के भर्ती के कामकाज जल्दी सुरू होवइया हे। व्यवसायिक परीक्षा मंडल कोति ले ए भर्ती बर लिखित परीक्षा ले जाही। व्यापम कोति ले जल्दीच अर्जी लेके काम अउ परीक्षा के तारीख के घोसना घलो करे जाही।
प्रधानमंत्री-मन की बात
प्रधानमंत्री नरेन्द्र मोदी तीस मार्च के आकाशवाणी ले ‘‘मन की बात‘‘ कारीकरम म देश-विदेश के लोगन संग अपन बिचार साझा करही। ए मासिक रेडियो कारीकरम के एक सौ बीसवां कड़ी होही। लोगन मन ए कारीकरम बर अपन बिचार अउ सुझाव टोल फ्री नंबर – एक आठ शून्य शून्य – एक एक – सात आठ शून्य शून्य ले दे सकत हे। अपन सुझाव नरेन्द्र मोदी ऐप या माय जीओवी ओपन फोरम ले ऑनलाइन घलो साझा कर सकत हे। सुझाव ए महिना के अट्ठाईस तारीख तक मंजूर करे जाही।
होली-बीएसएफ
ओमन किहीन कि सीमा सुरक्षा बल के ए आयोजन अपन जवान मन ल सामाजिक अउ सांस्कृतिक जुड़ाव के अनुभव देके परयास हे। ए कारीकरम म बीएसएफ के उप महानिरीक्षक ओमप्रकाश अउ आने बड़का अधिकारी मौजूद रिहीन।