रायपुर के स्वामी विवेकानंद विमानतल ले इंदौर, भोपाल, विशाखापट्टनम अउ प्रयागराज बर तीस अउ इकतीस मार्च ले नवा उड़ान सेवा शुरू होही। ए संबंध म इंडिगो एयरलाइंस ह उड़ान मनके समय निर्धारित कर देहे। एखरे संगेसंग ट्रैवल ऑपरेटर्स मन ल टिकट बुकिंग बर स्लॉट आवंटित कर दे गेहे। ए फ्लाईट प्रयागराज बर हफ्ता म दू दिन सनिवार अउ रविवार के बिहनिया आठ बजके पचास मिनट म रायपुर ले रवाना होही अउ बिहनिया दस बजके पच्चीस मिनट म प्रयागराज पहुंचही। वापिस म ए विमान प्रयागराज ले बिहनिया दस बजके पचास मिनट म रवाना होही अउ मंझनिया साढ़े बारह बजे रायपुर पहुंच जही।
अइसने, रायपुर ले विशाखापट्टनम बर घलो फ्लाइट हफ्ता म दू घांव सोमवार अउ सुक्रवार के संचालित होही। ए विमान बिहनिया आठ बजके पचास मिनट म रवाना होके दस बजके बीस मिनट म विशाखापट्टनम पहुंचही। वापसी म ए फ्लाईट ग्यारह बजे रवाना होही, जउन ह साढ़े बारह बजे रायपुर पहुंचही। उहें, इंदौर ले हर दिन विमान बिहनिया साढ़े छह बजे रवाना होही, जउन ह साढ़े आठ बजे रायपुर पहुंचही। मंझनिया बारह बजके पचास मिनट म ए विमान रायपुर ले रवाना होके दू बजके पैंतालीस मिनट म इंदौर पहुंचही। एखर अलावा भोपाल के फ्लाईट हफ्ता म चार दिन – सोमवार, बुधवार, सुक्रवार अउ रविवार के बिहनिया नौ बजके चालीस मिनट म रवाना होही, जउन ह बिहनिया ग्यारह बजके दस मिनट म रायपुर पहुंचही। वापसी म ए विमान बिहनिया ग्यारह बजके तीस मिनट म रायपुर ले भोपाल बर रवाना होही, जउन ह एक बजे भोपाल पहुंचही।
हाईकोर्ट-डीएड भर्ती
छत्तीसगढ़ उच्च न्यायालय ह प्रदेस के प्राइमरी स्कूल मन म डीएड डिप्लोमाधारी मन ल नियुक्ति दे म राज्य सरकार डहार करे जात देरी ल गंभीरता से लेहे। ए संबंध म स्कूल शिक्षा सचिव ल नोटिस जारी कर कोर्ट म उपस्थित होय बर केहे गेहे। ए मामला के अगला सुनवाई अब एक अप्रैल के होही। एखर पहिली, कोर्ट ह राज्य सरकार ल डीएड डिप्लोमाधारी याचिकाकर्ता मनके प्राइमरी स्कूल म नियुक्ति देके निरदेस देहे।
उहें, हाईकोर्ट के निरदेस के बाद भी कार्रवाई न होय उपर प्रकाश साहू अउ दूसर मन अपन अधिवक्ता मनके माध्यम ले हाईकोर्ट म राज्य सरकार के खिलाफ अवमानना याचिका दायर करे हे। याचिका म कोर्ट के निरदेस के पालन नइ करे के सिकायत करे गेहे।
उपभोक्ता अधिकार दिवस
आज विश्व उपभोक्ता अधिकार दिवस आय। ए दिवस ल हर बछर पन्द्रह मार्च के उपभोक्ता मनके मूल अधिकार ल बढ़ावा दे अउ ओला संरक्षित करे बर बनाय जाथे। ए बछर विश्व उपभोक्ता अधिकार दिवस के बिसय आय – ‘‘सत्त जीवन शैली के लिए न्यायोचित परिवर्तन‘‘।
केन्द्रीय उपभोक्ता मामला के मंत्री प्रहलाद जोशी ह आज एक ठन वेबिनार ल वीडियो कॉन्फ्रेंसिंग के माध्यम ले संबोधित करत हुए कहिन कि सरकार ए सुनिश्चित करे बर प्रतिबद्ध हे कि उपभोक्ता मन भ्रामक दावा मनके खिलाफ पूरी तरह ले जागरूक अउ सुरक्षित होवय। ओमन किहीन कि सरकार ह न केवल उपभोक्ता मनके संरक्षण, बल्कि उपभोक्ता मनके समृद्धि उपर घलो ध्यान केन्द्रित करत हे।
पद्म पुरस्कार-नामांकन
अवइया बछर गणतंत्र दिवस के अवसर म घोषित करे जाने वाला पद्म पुरस्कार बर ऑनलाइन नामांकन आज ले सुरू होगे हे। नामांकन करे के अंतिम तिथि इकतीस जुलाई हे। पद्म पुरस्कार बर नामांकन अउ सिफारिस केवल राष्ट्रीय पुरस्कार पोर्टल म ऑनलाइन स्वीकार करे जाही।
पद्म पुरस्कार मतलब पद्मश्री, पद्मभूषण अउ पद्मविभूषण देस के सर्वोच्च नागरिक सम्मान मन म सामिल हे। पद्म पुरस्कार कला, साहित्य अउ सिक्षा, खेल, चिकित्सा, समाज सेवा, विज्ञान अउ इंजीनियरिंग, लोक कार्य, सिविल सेवा, व्यापार अउ उद्योग, जइसे सबो क्षेत्र अउ बिसय म विशिष्ट अउ असाधारण उपलब्धि बर प्रदान करे जाथे।
होली-मुख्यमंत्री
मुख्यमंत्री विष्णुदेव साय अपन धर्मपत्नी कौशल्या साय के संग जशपुर जिला के ग्राम टाटीडांड पहुंचीन अउ ओमन दुर्गा देवी संत समाज डहार ले आयोजित वार्षिक अनुष्ठान में हिस्सा लीन। ए दौरान मुख्यमंत्री ह भगवान राधा-कृष्ण के पूजा अर्चना कर प्रदेसवासी मनके सुख-समृद्धि अउ खुसहाली के कामना करीन। ए अवसर म मुख्यमंत्री ह किहीन कि होली केवल रंग के नहीं, बल्कि प्रेम, सौहार्द अउ भाईचारा के तिहार आय। ओमन किहीन कि टाटीडांड म सनातन समाज डहार ले आयोजित ये अनुष्ठान, परंपरा अउ सांस्कृतिक मूल्य ल संजोय राखे के माध्यम आय।
श्री साय अपन गृहग्राम बगिया घलो पहुंचीन अउ ओमन ग्रामीण मनके संग होली खेलीन। ए मौका म नितेश कच्छप अउ उंखर टीम ह होली के पारंपरिक लोकगीत मनके सुंदर प्रस्तुति दीन।
आगजनी
कोरबा जिला के दर्री स्थित हसदेव ताप विद्युत संयंत्र म स्थित एक ठन ट्रांसफार्मर म आज बिहनिया आगी लग गे। आगी इतना तेजी ले फइलीस कि देखते-देखत स्विचयार्ड के प्लांट तक पहुंच गे अउ ए ह दू ठन दूसर ट्रांसफार्मर ल घलो अपन चपेट म ले लीस। घटना के सूचना मिलते ही फायर बिग्रेड के पांच ठन टीम मउका म पहुंचीन अउ घंटो के मशक्कत के बाद आग म काबू पईस। आगी लगे के कारण अभी तक पता नइ चल सके हे। फिलहाल ए मामला के जांच करे जात हे।
उहें, सरगुजा जिला के मैनपाट स्थित टाईगर प्वाइंट म पाछु रतिहा आगी लगे ले दर्जनभर दुकान जलके खाक होके। ए आगजनी ले कोई जनहानि होय के सूचना नइ मिले हे।
दुर्घटना
कोरबा जिला म आज होय एक ठन सड़क हादसा म तीन झन युवक मनके मौत होगे। मिले जानकारी के अनुसार तीन झन युवक एक ठन मोटरसायकल म सवार होके जटगा चौकी के खोडरी गांव करा ले गुजरत रिहीन, इही दउरान विपरीत दिसा ले आवत कार अउ मोटर साइकिल म जोरदार टक्कर होय ले मोटरसाइकिल सवार तीनों युवक मनके घटनास्थल म ही मौत होगे। मृतक युवक मन ग्राम बरबसपुर बस्ती के रहइया रिहीन।
उहें, दुरूग जिला म पाछु रतिहा होय एक ठन सड़क हादसा म भाजपा महिला मोर्चा के जिला अध्यक्ष के बेटी अउ तीन झिन युवक गंभीर रूप ले घायल होगे हे। जिला अध्यक्ष के बेटी के इलाज रायपुर के एक ठिन निजी अस्पताल म चलत हे। ए हादसा दुर्ग-राजनांदगांव बाईपास मार्ग करा होय हे।
ऐति, झारखंड के विधायक के दामाद धर्मेन्द्र सिंह के आज भिलाई म होय एक ठन सड़क हादसा म मौत होगे हे। मृतक बिहार के औरंगाबाद जिला के चटेवा के रहइया रिहीन अउ भिलाई के एक ठिन फैक्ट्री म काम करत रिहीन।
डूबने से मौत
सक्ती जिला के करही गांव म तालाब म डूबे ले बारहवीं कक्षा के एक झन छात्र के मौत होगे। बताय जात हे कि होली खेले के दउरान गांव के कुछेक युवक मन तालाब म फेंक दीन, जेखर ले ओखर मउत होगे।
उहें, बालोद जिला के गुंडरदेही स्थित तांदुला नदी म डूबे ले एक झन युवक के मौत होगे। ए युवक होली खेले के बाद अपन दोस्त मन संग नहाय बर तांदुला नदी गे रिहीस। ग्रामीण मनके मदद ले युवक के सव ल बाहर निकाल ले गेहे।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए दारी के अंक म ‘‘कांकेर‘‘ जिला के गतिविधि के उपर जानकारी दे जाही।
हाथी विचरण
रायगढ़ जिला के धरमजयगढ़ क्षेत्र म ए बखत करीब एक सौ चवालीस हाथी मनके दल विचरण करत हे। ए दल म हाथी मनके सावक घलो हवय। काली संझा तेरह हाथी के दल ह क्रोंधा मुख्य मार्ग ले सड़क पार करत देखे गेहे। सूचना मिले के बाद वनकर्मी अउ हाथी मित्र दल ह लोगन मन ल सतर्क रेहे बर मुनादी कराय हे। संगेसंग ग्रामीण मन ल केहे गेहे कि ओमन जंगल डहार अकेल्ला झन जाय। हाथी मित्र दल डहार ले हाथी मनके निगरानी ड्रोन कैमरा के माध्यम ले करे जात हे। हाथी के दल ह किसान मनके फसल ल घलो नुकसान पहुंचाय हे।