राज्य विधानसभा के बजट सत्र के बारहवां दिन आज सदन म विपक्ष ह भारतमाला परियोजना म गड़बड़ी के मुद्दा उठाइन। नेता प्रतिपक्ष डॉक्टर चरणदास महंत ह किहीन कि ए मामला के सीबीआई जांच कराय जाना चाही। ओमन किहीन कि जिम्मेदार अधिकारी मन उपर एफआईआर दर्ज करे जाय। संगेसंग ओमन विधायक मनके समिति बनाके मामला के जांच कराय के मांग घलो करीन।
जवाब म राजस्व मंत्री टंकराम वर्मा ह किहीन कि भारतमाला परियोजना म रईपुर, बिलासपुर अउ कोरबा म भूमि अधिग्रहण अउ मुआवजा बांटे म होय गड़बड़ी ल लेके कोनो-कोनो अधिकारी मनके खिलाफ कार्रवाई करे गेहे। ओमन भारतमाला परियोजना म गड़बड़ी के मामला मानत किहीन कि अधिसूचना के बाद रकबा के तुकड़ा करे गीस अउ ले गे भुंईया मनके दुबारा भू-अर्जन करे गीस। ए मामला म डिप्टी कलेक्टर, एसडीएम, तहसीलदार अउ पटवारी उपर कार्रवाई करे गेहे। राजस्व मंत्री ह सदन म भारतमाला परियोजना के तहत होय भूमि अधिग्रहण म करे गे गड़बड़ी के जांच संभागीय आयुक्त के अध्यक्षता म बने समिति ले कराय के घोसना करीन। जवाब ले अंसतुष्ट होके विपक्ष ह हाईकोर्ट जाय के बात किहीन अउ संगेसंग सदन ले बहिर्गमन कर दीन।
प्रश्नकाल म आज पूर्व मुख्यमंत्री भूपेश बघेल अउ कांग्रेस विधायक उमेश पटेल ह केलो प्रोजेक्ट म भू-अर्जन म गड़बड़ी के मुद्दा उठाइन। ओमन विधानसभा समिति ले ए मामला के जांच कराय के मांग करीन। ए बात उपर विभागीय मंत्री टंकराम वर्मा ह बतइन कि परियोजना के अस्सी प्रतिसत काम पूरा हो चुके हे। प्रोजेक्ट म तेईस ठिन प्रकरण लंबित होय के आने-आने कारण हे। ए मामला के विभागीय जांच कराय जाही। ए बात उपर विपक्षी सदस्य मन ह नाराबाजी करत सदन ले बहिर्गमन कर दीन।
विस-विधेयक पेश/अनुदान मांग
राज्य विधानसभा म आज तीन ठिन विधेयक मन ल सदन के पटल म राखे गीस। एमा मुख्यमंत्री विष्णुदेव साय ह छत्तीसगढ़ लोकतंत्र सेनानी सम्मान विधेयक ल सदन के पटल म रखिन। त उहें, उप मुख्यमंत्री विजय शर्मा ह छत्तीसगढ़ पंचायत राज संशोधन विधेयक के संगेसंग संसदीय कार्य मंत्री केदार कश्यप ह छत्तीसगढ़ विधानसभा सदस्य वेतन भत्ता अउ पेंसन संसोधन विधेयक ल सदन म पेस करीन।
सदन म आज मंत्री रामविचार नेताम के विभाग ले जुड़े अनुदान मांग उपर चर्चा सुरू होइस। कांग्रेस विधायक व्यास कश्यप ह अनुदान मांग उपर चर्चा के सुरूआत करीन। ए चर्चा म भाजपा विधायक धरमलाल कौशिक अउ धरमजीत के संगेसंग कांग्रेस विधायक दिलीप लहरिया ह भाग लीन। जेखर बाद विधानसभा अध्यक्ष डॉक्टर रमन सिंह ह सदन के कार्रवाई ल सत्रह मार्च बिहनिया ग्यारा बजे तक बर स्थगित कर दीन।
विस-ई-वे बिल
सदन म आज ध्यानाकर्षण के माध्यम ले भाजपा विधायक अनुज शर्मा ह ई-वे बिल म जांच के नांव उपर वसूली करे के मुद्दा उठाइन। ओमन किहीन कि ई-वे बिल के नांव उपर भ्रष्टाचार करे जात हे। ओमन बतइन कि ई-वे बिल के नांव उपर गाड़ी मन ल रोक के पइसा वसूले जाथे अउ संगेसंग व्यापारी मन ल घलो परेसान करे जात हे। ए बात उपर वित्त मंत्री ओपी चौधरी ह किहीन कि जांच के नांव उपर अवैध वसूली के कोनो सिकयत नइ मिले हे। ऐप के माध्यम ले गाड़ी मनके जांच करे जात हे। बिल नइ पाय जाय उपर विभाग के अधिकारी मन ह वीडियो अपलोड करके व्हाट्सएप म सूचना देथे। वित्त मंत्री ह बतइन कि प्रदेस म ई-वे बिल के जांच बर पंद्रह ठिन टीम बनाय गेहे।
जनजाति सलाहकार परिषद बैठक
मुख्यमंत्री विष्णुदेव साय के अगुवई म छत्तीसगढ़ जनजाति सलाहकार परिषद के पुर्नगठन के बाद काली पहिली बइठका विधानसभा परिसर स्थित समिति कक्ष म होइस। बइठका म जनजातीय समुदाय के सशक्तिकरण, शिक्षा, सामाजिक-आर्थिक, उन्नयन, प्रशासनिक सुधार जइसन मुद्दा उपर गोठबात करे गीस। मुख्यमंत्री ह अधिकारी मन ले किहीन कि जनजातीय समुदाय के जाति प्रमाण पत्र ले जुड़े गलती के निपटारा बर जरूरी काम करे जाय। उहें, जनजातीय आस्था वाले जघा के विकास बर देवगुड़ी के संगेसंग सरना स्थल मन ल घलो सामिल करे के बेवस्था करे जाय।
माओवादी-गिरफ्तार
बीजापुर जिला म सर्चिंग अभियान म निकले कोबरा अउ सीआरपीएफ के सुरक्षा बल के जवान मन ह मारूड़बाका के जंगल ले पांच झिन माओवादी मन ल गिरफ्तार करे हे। ए माओवादी मनके तीर ले माओवादी संगठन के प्रचार वाले जिनिस के संगेसंग बैटरी अउ दूसर प्रतिबंधित जिनिस बरामद करे गेहे।
निर्वाचन आयोग-सुझाव
भारत निर्वाचन आयोग ह चुनावी कामकाज ल नियम के मुताबिक करवाय बर आने-आने पार्टी अध्यक्ष अउ बड़का नेता मन के संग गोठबात करे के बात केहे हे। एखर बर आयोग ह जम्मों राष्ट्रीय अउ राज्य स्तरीय राजनीतिक दल मन ले तीस अप्रैल तक सुझाव मांगे हे। राजनीतिक दल मन ल जारी एक ठिन चिट्ठी म आयोग ह यहू प्रस्ताव राखे हे, पार्टी अध्यक्ष अउ बड़का नेता मन के संग मिलके बेरा-बेरा म बात करे जाही। जेखर ले चुनावी कामकाज बने ढंग ले हो सकही।
बस्तर पंडुम
आदिवासी परंपरा, लोककला अउ रीति-रिवाज ल सहेजे बर आज ले ‘‘बस्तर पंडुम‘‘ के कारीकरम होवत हे। मुख्यमंत्री विष्णुदेव साय ह आज विधानसभा परिसर स्थित समिति कक्ष म बस्तर पंडुम के लोगो के अनावरण करीन। ए मउका म ओमन किहीन कि बस्तर पंडुम के माध्यम ले बस्तर के लोक जीवन अउ लोक संस्कृति ल सहेजे के सहभागी बनबो। ए मउका म मुख्यमंत्री ह बस्तर पंडुम के बुकलेट के घलो विमोचन करीन।
अग्निवीर-आवेदन प्रक्रिया
भारतीय सेना म अग्निवीर के भर्ती बर आज ले ऑनलाइन अर्जी के काम सुरू होगे हे। अर्जी करइया उम्मीदवार मन दस अप्रैल तक अर्जी कर सकथे।
अग्निवीर के भर्ती जनरल, तकनीकी, क्लर्क, ट्रेडमेन, महिला सैन्य पुलिस अउ रेगुलर कैडर भर्ती धर्मगुरू, नर्सिंग सहयोगी अउ सिपाही फार्मा के पद म करे जाही। ए बारे म अउ जादा जानबा बर अभ्यर्थी मन, सेना भर्ती कार्यालय रायपुर के टेलीफोन नंबर- सून्य सात सात एक-दू नौ छै पांच दू एक दू अउ सून्य सात सात एक- दू नौ छै पांच दू एक चार म संपर्क कर सकथे। सेना के अधिकारी मन बतईन कि भारतीय सेना म चुनई निष्पक्ष, पारदर्शी अउ सिरिफ योग्यता के आधार म करे जाथे, अभ्यर्थी मन कोनो भी गलत मनखे के झांसा म झन आवय।
किसान-एआई तकनीक
दंतेवाड़ा जिला के किसान मन अब-खेती किसानी म ए बेरा के तकनीक के परयोग कर सकही। रईपुर म होय कार्यसाला म किसान अउ कृषि अधिकारी मन ल आर्टिफिशियल इंटेलिजेंस- एआई के परयोग के बारे म जानबा दे गीस। ए कार्यसाला म फसल के देखरेख ले लेके आबदा प्रबंधन तक म एआई तकनीक के परयोग के महत्ता उपर जोर दे गीस। बिसेसज्ञ मन ह बतइन कि ‘सैटेलाइट इमेजिंग‘ अउ ‘ड्रोन एआई‘ तकनीक के माध्यम ले फसल स्वास्थ्य स्थिति, मिट्टी के गुणवत्ता अउ पानी के जरूरत के बढ़िया ढंग ले विस्लेषण करे जा सकथे।
होलिका दहन/होली मिलन
काली होलिका दहन मनाय के संग होली तिहार के सुरूआत हो जही। ए तिहार ल देखत लोगन मन म जम्मों कोति उछाह देखे जात हे। बाजार मन म पिचकारी रंग-गुलाल अउ मिठई के दुकान सज गेहे। उहें, होलिका जलाय बर गली मोहल्ला अउ चौक-चौराह मन म लकड़ी सकेले के काम चलत हे।
एखर पहिली, आज रईपुर के संगेसंग प्रदेस के कतकोन जघा म होली मिलन कारीकरम चलत हे। आज रईपुर प्रेस क्लब म घलो होली मिलन कारीकरम राखे गीस। जेमा मुख्यमंत्री, उपमुख्यमंत्री, वन मंत्री के संगेसंग महापौर अउ कतकोन विधायक मन सामिल होइन।
रायपुर पुलिस-रकम बरामद
रईपुर पुलिस ह पाछू रतिहा जांच के दउरान एक ठिन गाड़ी ले करीबन दू करोड़ रूपिया बरामद करे हे। पुलिस के मुताबिक गाड़ी म ड्राइवर के संगेसंग तीन झिन लोगन बइठे रिहीन। ए गाड़ी नागपुर कोति जावत रिहीस। इही दउरान पुलिस चेकिंग म सीट के नीचे पइसा ल लुका के राखे गे रिहीस। पुलिस ह तीनों आरोपी मन ले पूछताछ करत हे।