केन्द्र सरकार ह अवइया तीन साल म देस के हर जिला म ‘‘डे केयर कैंसर सेंटर‘‘ खोलही। आज राज्यसभा म एक पूरक प्रश्न के उत्तर देवत केन्द्रीय स्वास्थ्य मंत्री जे.पी. नड्डा ह कहिन कि बछर दू हजार पच्चीस-छब्बीस म दू सौ डे केयर सेंटर खोले जाही। हालेच म आय एक ठिन रिपोर्ट के हवाला देवत श्री नड्डा ह बतईन कि आयुष्मान भारत-पीएम जन आरोग्य योजना ले कैंसर रोगी मनके स्क्रीनिंग के तीस दिन के भीतर इलाज सुरू हो जथे। ओमन कहिन कि सरकार ह राष्ट्रीय स्वास्थ्य मिशन म सुघ्घर अउ बने ढंग ले स्वास्थ्य सेवा प्रदान करे बर काम करत हे।
उड़द दाल-आयात
केन्द्र सरकार ह उड़द दाल के सुल्क मुक्त आयात ल अवइया बछर इकतीस मार्च तक बर बढ़ा देहे। विदेश व्यापार महानिदेशालय के एक ठिन अधिसूचना म ए जानकारी दे गेहे। पहिली ए प्रावधान ए बछर मार्च के आखिरी तक बर लागू रिहीस। ए पहल ले घरेलू बाजार म उड़द के कीमत ल स्थिर करे म मदद मिलही।
विस-महतारी वंदन योजना/धान नीलामी
विधानसभा के बजट सत्र के ग्यारहवां दिन आज प्रश्नकाल म कांग्रेस विधायक विक्रम मंडावी ह महतारी वंदन योजना के तहत पात्र हितग्राही मनके संख्या के बारे म जानकारी मांगीन। ओमन कहिन कि महतारी वंदन योजना म तीन हजार नौ सौ इकहत्तर हितग्राही मन ल एको किश्त के भुगतान नइ करे गेहे। जवाब म महिला अउ बाल विकास मंत्री लक्ष्मी राजवाड़े ह कहिन कि उनहत्तर लाख ले जादा माईलोगिन मन ल ए योजना के फायदा मिलत हे। जउन हितग्राही मन के आधार कार्ड, बैंक अकाउंट ले लिंक नइ होय हे या फेर कोनों कारण ले ओ हितग्राही मन ल पइसा के भुगतान नइ हो पाय हे। श्रीमती राजवाड़े डहार ले दे गे जानकारी ले कांग्रेस विधायक संतुष्ट नइ होइस अउ ओमन सदन ले बाहिर चल दीन।
सदन म आज विपक्षी सदस्य मन ह धान निष्पादन म स्थगन प्रस्ताव लईन। पूर्व मुख्यमंत्री भूपेश बघेल अउ नेता प्रतिपक्ष डॉक्टर चरणदास महंत ह धान के नीलामी ले प्रदेस ल आठ हजार करोड़ रूपिया के नुकसान के बात कहिन। ओमन कहिन कि पाछु बछर घलो धान के निष्पादन नइ हो पाय रिहीस। केन्द्र सरकार उपर छत्तीसगढ़ के अनदेखी करे के आरोप लगावत श्री बघेल ह राज्य सरकार ल केन्द्र सरकार ले अनुरोध करे बर कहिन। उहें, डॉक्टर महंत ह चर्चा के दौरान कहिन कि छत्तीसगढ़ के किसान अउ गरीब मन ल उंखर हक के रासि मिलना चाही।
खाद्य मंत्री दयालदास बघेल ह सरकार कोति ले स्थगन प्रस्ताव उपर जवाब दीन। एखर बाद, विधानसभा अध्यक्ष डॉक्टर रमन सिंह कांग्रेस विधायक के स्थगन प्रस्ताव ल खारिज कर दीन। स्थगन प्रस्ताव म चर्चा नइ कराय के आरोप लगावत विपक्षी सदस्य मन ह गर्भगृह म जाके सरकार के खिलाफ नाराबाजी करीन। एमा विधानसभा अध्यक्ष ह कांग्रेस के जम्मों विधायक मन ल निलंबित कर दीन। बाद म सबो विधायक मनके निलंबन खतम कर दीस। एखर बाद सदन के कार्यवाही दस मिनट बर स्थगित कर दे गीस।
अनुदान मांग-पारित
राज्य विधानसभा म आज वाणिज्य अउ उद्योग मंत्री लखनलाल देवांगन के विभाग ले जुड़े अनुदान मांग ल ध्वनिमत ले पारित कर दे गीस।
उहें, महिला अउ बाल विकास अउ समाज कल्याण मंत्री लक्ष्मी राजवाड़े के विभाग ले जुड़े अनुदान मांग ल घलो आज सदन म ध्वनिमत ले पारित करे गीस।
डीएमएफ घोटाला मामला-रिमांड
जिला खनिज निधि-डीएमएफ घोटाला मामला म आरोपी रानू साहू, सौम्या चौरसिया, सूर्यकांत तिवारी, माया वारियर अउ मनोज द्विवेदी ल आज एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के विशेष कोर्ट म पेस करे गीस। कोर्ट ह मामला के सुनवाई करत जम्मों आरोपी मनके न्यायिक रिमांड बेरा ल उन्नीस मार्च तक बढ़ा देहे।
इही बीच, सौम्या चौरसिया अउ रानू साहू ह जमानत याचिका दायर करे हे। कोर्ट म जमानत याचिका उपर सत्रह मार्च के सुनवाई होही।
बस्तर पंडुम
छत्तीसगढ़ के आदिवासी संस्कृति अउ परंपरा ल जीवंत बनाय राखे के उद्देश्य ले काली बाहर मार्च ले ‘‘बस्तर पंडुम‘‘ के आयोजन करे जाही। एखर माध्यम ले बस्तर के समृद्ध विरासत ल संजोय अउ नवा पीढ़ी तक पहुंचाय के कोसिस करे जाही।
‘‘बस्तर पंडुम‘‘ म जनजातीय नृत्य, गीत, नाट्य, वाद्ययंत्र, पारंपरिक वेशभूषा अउ आभूषण, शिल्प-चित्रकला, जनजातीय व्यंजन अउ पांरपरिक पेय ले जुड़े प्रतियोगिता राखे जाही। ए प्रतियोगिता तीन चरण म होही। जनपद स्तरीय प्रतियोगिता बारह ले बीस मार्च तक, जिला स्तरीय प्रतियोगिता इक्कीस ले तेईस मार्च तक अउ संभाग स्तरीय प्रतियोगिता दंतेवाड़ा म एक ले तीन अप्रैल तक होही। ए आयोजन म समाज प्रमुख, जनप्रतिनिधि अउ वरिष्ठ नागरिक मन ल विशेष अतिथि के रूप म नेवता दे जाही। ए महोत्सव ह सिरिफ बस्तर के प्रतिभाशाली कलाकार मन ल एक मंच प्रदान करही, बल्कि उंखर कला ल नवा पहिचान घलो दीहीं।
सुकमा-क्षेत्रीय सरस मेला
सुकमा जिला म आज ले तीन दिवसीय क्षेत्रीय सरस मेला सुरू होगे हे। मेला के सुभारंभ कार्यक्रम म वन मंत्री केदार कश्यप अउ भाजपा के प्रदेस अध्यक्ष किरण सिंह देव सामिल होइन। ए मेला म बस्तर संभाग के जम्मों जिला के स्व-सहायता समूह डहार ले बनाय गे सामान मनके प्रदर्सनी लगाय गेहे। सरस मेला के दउरान दू दिन के किसान मेला के घलो आयोजन करे जावत हे। संगेसंग जैविक कृषि उत्पाद मनके प्रदर्सनी घलो लगाय गेहे। किसान मेला म प्रधानमंत्री किसान सम्मान निधि, प्रधानमंत्री फसल बीमा योजना, किसान क्रेडिट कार्ड अउ एग्री स्टेक किसान मनके पंजीयन करे जावत हे।
अग्निवीर-आवेदन प्रक्रिया
भारतीय सेना म अग्निवीर के भर्ती बर काली बारह मार्च ले ऑनलाइन आवेदन के प्रक्रिया सुरू होही, जउन ह दस अप्रैल तक चलही। अग्निवीर के भर्ती जनरल, तकनीकी, क्लर्क, ट्रेडमेन, महिला सैन्य पुलिस अउ रेगुलर कैडर भर्ती धर्मगुरू, नर्सिंग सहयोगी अउ सिपाही फार्मा के पद म करे जाही। ए बारे म अउ जादा जानकारी बर अभ्यर्थी, सेना भर्ती कार्यालय रायपुर के टेलीफोन नंबर- सून्य सात सात एक-दू नौ छै पांच दू एक दू अउ सून्य सात सात एक- दू नौ छै पांच दू एक चार म संपर्क कर सकथे। सेना के अधिकारी मन बतईन कि भारतीय सेना म चुनई निष्पक्ष, पारदर्शी अउ सिरिफ योग्यता के आधार म करे जाथे, एखर सेती अभ्यर्थी कोनो भी गलत मनखे के झांसा म मत आवय।
भाजपा-जांच समिति
कोरबा नगर पालिक निगम म सभापति चुनाव म भाजपा ले अलग होके नूतन सिंह ठाकुर ह सभापति के चुनाव लड़े रिहीन। उंखर जीत के बाद उद्योग मंत्री लखनलाल देवांगन ह पत्रकार मन ले गोठबात करत नूतन सिंह ठाकुर ल बधाई दे रिहीन। ए मामला ल गंभीरता ले लेवत भारतीय जनता पार्टी के प्रदेस अध्यक्ष किरण सिंह देव ह मंत्री लखनलाल देवांगन ल कारण बताओ नोटिस जारी करे हे। संगेसंग ए मामला के जांच बर तीन सदस्यीय टीम के गठन करे गेहे। समिति के संयोजक पूर्व विधानसभा अध्यक्ष गौरीशंकर अग्रवाल ल बनाय गेहे। ए समिति सात दिन के भीतर अपन रिपोर्ट सौंपही।
गैंगस्टर अमन साव-मौत
रायपुर ले झारखंड ले जावत गैंगस्टर अमन साव के पुलिस के संग होय मुठभेड़ म मउत होगे हे। ए घटना झारखंड के पलामू जिला के रामगढ़ थाना क्षेत्र म होइस। बताय जात हे कि एनटीपीसी के डीजीएम के हत्या अउ रांची म ट्रांसपोर्टर ल गोली मारे के घटना के बारे म पूछताछ बर अमन साव ल रायपुर ले रांची ले जाय जावत रिहीस। इही दउरान ओ ह पुलिस उपर फायरिंग करत भागे के कोसिस करीन। पुलिस डहार ले जवाबी कार्रवाई म अमन साव मारे गीस।