प्रवर्तन निदेशालय ईडी ह आज पूर्व मुख्यमंत्री भूपेश बघेल के घर छापा मार कार्रवाई करीन। आज बिहनिया ईडी के टीम ह ओखर पदुमनगर भिलाई स्थित घर म जाके कागजात के जांच करत हे। खबर हे कि भूपेश बघेल के बेटा चैतन्य बघेल के इंहा घलो छापा मारे गीस। संगेसंग ईडी ह भिलाई सहर जिला कांग्रेस कमेटी अध्यक्ष मुकेश चंद्राकर, दुरूग लोकसभा कांग्रेस प्रत्यासी राजेन्द्र साहू, बिल्डर अजय चौहान, मनोज राजपूत, ट्रांसपोर्टर संदीप सिंह अउ अभिषेक ठाकुर के जघा के संगेसंग चौदह ठिन आने जघा म छापा मारे गीस।
उहें, कांग्रेस के संचार विभाग के प्रमुख सचिव आनंद शुक्ला ह आरोप लगाय हे, कि ए कार्रवाई भाजपा के इसारा उपर करे जात हे। उहें, मुख्यमंत्री विष्णुदेव साय ह किहीन हे कि पाछू पांच साल म होय भ्रष्टाचार के जांच केंद्रीय जांच एजेंसी करत हे। ईडी ह घलो एक ठिन केंद्रीय जांच एजेंसी हरय, जउन अपन काम करत हे।
विधानसभा-ईडी
छत्तीसगढ़ विधानसभा के बजट सत्र के दसवां दिन आज पूर्व मुख्यमंत्री भूपेश बघेल उपर प्रवर्तन निदेशालय- ईडी के कार्रवाई के विरोध म कांग्रेस विधायक मन ह जमके हंगामा करीन। भाजपा सरकार के खिलाफ नाराबाजी करत विपक्षी विधायक मन ह गर्भगृह तक पहुंच गे जेखर बाद विधानसभा अध्यक्ष डॉक्टर रमन सिंह ह कांग्रेस विधायक मन ल निलंबित कर दीन। सदन म होय निलंबन के बाद नेता प्रतिपक्ष डॉक्टर चरणदास महंत ह कांग्रेस विधायक दल के बइठका बुलाइन। इही, बीच मंत्री रामविचार नेताम अउ वित्त मंत्री ओपी चौधरी ह विपक्षी विधायक मन ल मनाय के परयास करीन। फेर कांग्रेस ह सदन के कार्रवाई ले बर्हिगमन कर दीन। ईडी के छापा के विरोध म कांग्र्रेस विधायक मन ह विधानसभा के कार्रवाई के बहिष्कार करत गांधी प्रतिमा के आगू धरना प्रदर्सन करीन।
सदन म आज ध्यानाकर्षण के माध्यम ले भाजपा विधायक मोतीलाल साहू ह रईपुर ग्रामीण विधानसभा क्षेत्र म पेयजल समस्या के मुद्दा उठाइन। जवाब म उपमुख्यमंत्री अरूण साव ह किहीन कि रईपुर ग्रामीण विधानसभा क्षेत्र म पेयजल समस्या ल दूर करे के परयास करे जात हे।
उहें, विपक्ष के गैर-हाजिरी म खाद्य नागरिक आपूर्ति अउ उपभोक्ता संरक्षण मंत्री दयालदास बघेल ह विभाग मन के अनुदान मांग मन ल सदन म पारित कर दीन।
संसद बजट सत्र-दूसरा चरण
संसद के बजट सत्र के दूसर चरण आज ले सुरू होगे, जउन ह चार अप्रैल तक चलही। सत्र के दउरान बीस बइठका होही। सत्र म बछर दू हजार पचीस-छब्बीस बर अनुदान मांग अउ एखर ले जुड़े विनियोग विधेयक उपर चर्चा अउ मतदान होही। त उहें, वित्तीय कामकाज के संगेसंग आने जरूरी विधेयक उपर चर्चा होही। बजट सत्र के पहिली चरण इकतीस जनवरी ले सुरू होय रिहीस, जउन ह तेरह फरवरी तक चलिस।
प्रधानमंत्री-बिलासपुर दौरा
प्रधानमंत्री नरेंद्र मोदी ह तीस मार्च के बिलासपुर जिला के दउरा म अवइया हे। एला लेके बिलासपुर म प्रशासनिक तियारी जोर पकड़ लेहे। बिल्हा के गांव मोहभट्ठा म प्रधानमंत्री के बड़का आमसभा होही। ए सिलसिला म केंद्रीय आवासन अउ सहरी कार्य राज्यमंत्री तोखन साहू अउ उप मुख्यमंत्री अरूण साव ह काली प्रधानमंत्री के अवइया जघा म जाके तियारी ल लेके जरूरी निरदेस दीन। केंद्रीय राज्यमंत्री अउ उप मुख्यमंत्री ह मैदान के आने-आने जघा म पूरा बेवस्था के मुआयना करीन।
एनर्जी इंवेस्टर्स समिट
रईपुर म आज ‘छत्तीसगढ़ एनर्जी इंवेस्टर्स समिट‘ के आयोजन करे गीस, जेमा कतकोन बड़का कंपनी मन ह तीन लाख करोड़ रूपिया ले जादा के निवेस के एलान करीन। ए निवेस ले राज्य म परमाणु, थर्मल, सौर अउ पंप्ड स्टोरेज जइसन क्षेत्र म बिजली उत्पादन के नवा प्रोजेक्ट सुरू होही। परमाणु ऊर्जा के क्षेत्र म एनटीपीसी ह अस्सी हजार करोड़ रूपिया के लागत ले बयालिस सौ मेगावार्ट क्षमता के न्यूक्लियर पॉवर प्रोजेक्ट लगाय के योजना बनाय हे। एखर ले छत्तीसगढ़ म परमाणु ऊर्जा ले बिजली उत्पादन के सुरूआत होही। त उहें, थर्मल पावर क्षेत्र म अडानी पावर ह छैंसठ हजार सात सौ बीस करोड़ रूपिया खर्चा करके कोरबा, रायगढ़ अउ रईपुर म सोलह-सोलह सौ मेगावार्ट के तीन ठिन थर्मल पॉवर प्लांट लगाही। एखरे संग जिंदल पॉवर रायगढ़ म सोलह सौ मेगावॉट के बिजली उत्पादन बर बारह हजार आठ सौ करोड़ रूपिया के निवेस करही अउ संगेसंग सरदा एनर्जी रायगढ़ म छै सौ साठ मेगावाट क्षमता के प्लांट बर पांच हजार तीन सौ करोड़ रूपिया लगाही।
कारीकरम ल संबोधित करत मुख्यमंत्री विष्णुदेव साय ह किहीन कि छत्तीसगढ़ म ऊर्जा के क्षेत्र म ए निवेस ह राज्य के बिजली उत्पादन क्षमता ल नवा ऊंचाई तक दे जाही।
माओवादी-आत्मसमर्पण
गरियाबंद जिला म आज तीन झिन इनामी माओवादी मन ह पुलिस के आगू आत्मसमर्पण करे हे। हमर संवाददाता ले मिले जानबा के मुताबिक ए माओवादी गरियाबंद के उदंती, सीतानदी अउ नवापड़ा जइसन जघा म अपन डेरा डारे रिहीन। एसडीके एरिया कमेटी के डिप्टी कमांडर दिलीप उर्फ संतु ह ऑटोमेटिक हथियार के संग आत्मसमर्पण करीन। संगेसंग दू झिन माईलोगिन माओवादी मन ह घलो आत्मसमर्पण करे हे। ए माओवादी मन ह अतिरिक्त पुलिस महानिदेसक विवेकानंद सिन्हा, रईपुर के पुलिस महानिरीक्षक अमरेश मिश्रा अउ सीआरपीएफ अधिकारी मनके उपस्थिति म आत्मसमर्पण करीन। ए तीनों झिन माओवादी मन उपर पंद्रह लाख रूपिया के इनाम राखे गे रिहीस।
कृषि फसल-अग्रिम अनुमान
केंद्रीय कृषि अउ किसान कल्याण मंत्रालय ह बछर दू हजार चौबीस-पच्चीस बर मुख्य कृषि फसल खरीफ अउ रबि के उत्पादन के दूसर अग्रिम अनुमान जारी कर देहे। केंद्रीय कृषि अउ किसान कल्याण ग्रामीण विकास मंत्री शिवराज सिंह चौहान ह मुख्य कृषि फसल के आंकड़ा ल मंजूरी देवत बतइन कि प्रधानमंत्री के अगुवई म केंद्र सरकार डहार ले खेती के विकास बर सरलग काम करे जात हे। ओमन किहीन कि कृषि मंत्रालय डहार ले कतकोन योजना के माध्यम ले किसान मन ल मदद अउ प्रोत्साहन दे जात हे।
पुलिस अकादमी-कार्यक्रम
रईपुर जिला के चंदखुरी स्थित नेताजी सुभाषचंद्र बोस राज्य पुलिस अकादमी म आज नौनियुक्त उपनिरीक्षक संवर्ग के अधिकारी मनके बुनियादी प्रसिक्षण कारीकरम सुरू होइस। प्रसिक्षण कारीकरम के सुभारंभ मुख्यमंत्री विष्णुदेव साय ह करीन। ए मउका म उप मुख्यमंत्री अउ गृहमंत्री विजय शर्मा, विधायक खुशवंत साहेब के संगेसंग पुलिस विभाग के अधिकारी मन आय रिहीन।
अग्निवीर भर्ती-अधिसूचना
भारतीय सेना म अग्निवीर मनके भर्ती बर अधिसूचना जारी कर दे गेहे। सेना भर्ती कार्यालय रईपुर ले मिले जानबा के मुताबिक अग्निवीर के भर्ती जनरल, तकनीकी, कलर्क, ट्रेडमेन, महिला सैन्य पुलिस अउ रेगुलर कैडर, धर्मगुरू, नर्सिंग सहयोगी अउ सिपाही फार्मा के पद म भर्ती करे जाही। इच्छुक युवा मन एखर बर ऑनलाइन अर्जी बारह मार्च ले दस अप्रैल तक कर सकथे। पूरा जानबा युवा सेना भर्ती कार्यालय रईपुर के टेलीफोन नंबर-सून्य सात सात एक-दू नौ छै पांच दू एक दू अउ सून्य सात सात एक- दू नौ छै पांच दू एक चार म संपर्क कर सकथे।
भाजपा-निष्कासन
भारतीय जनता पार्टी के प्रदेस अध्यक्ष किरण सिंह देव ह कोरबा नगर निगम के नवा सभापति नूतन सिंह ठाकुर ल पार्टी ले छै साल बर निष्कासित कर देहे। जानबा के मुताबिक आठ मार्च के कोरबा नगर निगम म सभापति पद बर चुनई होय रिहीस। ए चुनाव म भाजपा ह हितानंद अग्रवाल ल अधिकृत प्रत्यासी बनाय रिहीन। फेर भाजपा नेता नूतन सिंह ठाकुर ह बगावत करके निर्दलीय चुनाव लड़के चुनाव जितिन। भाजपा ह एला अनुशासनहीनता मानत छै साल बर पार्टी ले निष्कासित कर देहे।