संसद के बजट सत्र के दूसर चरण काली दस मार्च के सुरू हो जही अउ ए ह चार अप्रैल तक चलही। ए बेरा म सदन के बीस ठन बइठका होही अउ बछर दू हजार चौबीस-पच्चीस बर अनुदान मांग अउ विनियोग विधेयक उपर गोठ होही, फेर मतदान होही। एखर अलावा बैंकिंग कानून संशोधन विधेयक, तटीय नौवहन विधेयक, त्रिभुवन सहकारी विश्वविद्यालय विधेयक, आव्रजन अउ विदेसी विधेयक के संग रेलवे संसोधन विधेयक समेत कतकोन विधायी काम उपर बात होही अउ एला पारित करे जाही।
बजट सत्र के पहिली चरण इकतीस जनवरी ले तेरह फरवरी तक चले रिहीस। इही बेरा म केंद्रीय वित्त मंत्री निर्मला सीतारमन ह एक फरवरी के केंद्रीय बजट पेस करे रिहीन।
विधानसभा समाचार
राज्य विधानसभा म काली बजट सत्र के दसवां दिन मंत्री दयालदास बघेल, लखनलाल देवांगन अउ लक्षमी राजवाड़े के विभाग मनके अनुदान मांग उपर गोठ होही।
एखर पहिली, काली प्रश्नकाल के दउरान सत्तापक्ष अउ विपक्ष के सदस्य सवाल पूछही। एखरे संगेसंग ध्यानाकर्षण के माध्यम ले कांग्रेस सदस्य चातुरी नंद महासमुंद के धान खरीदी केंद्र मन म धान के उठाव नइ होय के मुद्दा उठाही। उहें, भाजपा विधायक मोतीलाल साहू रईपुर ग्रामीण विधानसभा क्षेत्र म पेयजल के समस्या कोति नगरीय प्रशासन मंत्री के धियान आकर्षित करही।
प्रधानमंत्री जन आरोग्य योजना
केंद्रीय श्रम मंत्रालय ह श्रमिक मनले आयुष्मान भारत प्रधानमंत्री जनआरोग्य योजना के लाभ उठाय बर खुद ल पंजीकृत कराय बर अनुरोध करीन। ए योजना के चलत कोनो संगठन के संग काम करइया श्रमिक मन ह ई-श्रम पोर्टल म अपन पंजीकरण ल ऑनलाइन करा सकत हे। ए योजना देस के इकतीस हजार ले जादा सार्वजनिक अउ निजी पैनल बध्द अस्पताल म दूसर अउ तीसर श्रेणी के स्वास्थ्य सेवा बर हरेक परिवार हर बछर पांच लाख रूपिया के कवरेज देथे।
मुख्यमंत्री-उद्यमिता आयोग
प्रदेस म उद्यमिता आयोग के गठन करे जाही। ए घोसना मुख्यमंत्री विष्णुदेव साय ह रईपुर म स्वदेसी जागरण मंच के अखिल भारतीय कार्यकारिणी परिषद के बइठका म करीन। उद्यमिता आयोग राज्य म उद्यमशीलता के संस्कृति ल मजबूत करके रोजगार सृजन के संभावना के अध्ययन करही। एखर चलत जवान लइका मनके कौशल विकास अउ रोजगार प्रसिक्षण बर काम करे जाही।
ए मउका म मुख्यमंत्री ह किहीन कि ‘‘विकसित छत्तीसगढ़ और विकसित भारत‘‘ के निर्माण बर हमन ल स्वदेसी ल अपनाना चाही। ओमन ह किहीन कि स्वदेसी जागरण मंच ह सुरू ले ही आत्मनिर्भरता अउ स्वदेसी उद्योग ल बढ़ावा देथे। मुख्यमंत्री ह माओवाद प्रभावित क्षेत्र म पुर्ननिर्माण अउ विकास बर स्वदेसी जागरण मंच के सक्रिय भागीदारी के आह्वान करीन। ए कारीकरम म कतकोन जघा के सफल उद्यमी मन ल ‘‘उद्यमिता प्रोत्साहन पुरस्कार‘‘ ले सम्मानित करे गीस।
वन मंत्री-किसान मेला
वन मंत्री केदार कश्यप ह नारायणपुर स्थित रामकृष्ण मिशन आश्रम म चलत दू दिवसीय किसान मेला म सामिल होइन। कारीकरम ल संबोधित करत हुए वन मंत्री ह किहीन कि राज्य सरकार ह किसान मन के आय ल बढ़ाय बर सरलग काम करत हे। ओमन ह किसान मनले आर्गेनिक खेती ल अपनाय के अपील करीन। किसान मेला ले किसान मन ल नवा कृषि तकनीक, जैविक खेती अउ आधुनिक साधन के उपयोग के जानकारी देके ओमन ल अच्छा किसानी बर प्रेरित करे गीस। एखर बाद वन मंत्री ह रामकृष्ण मिशन आश्रम म चलत कृषि प्रदर्सनी ल घलो देखिन।
कृषि सम्मेलन
रईपुर के इंदिरा गांधी कृषि विश्व विद्यालय अउ एक ठिन निजी संस्था कोति ले काली प्राकृतिक अउ जैविक कृषि सम्मेलन के आयोजन करे गीस। ए सम्मेलन म प्रदेस के सबो जिला ले आय किसान मन ल प्राकृतिक अउ जैविक प्रणाली के बारे म बिसेसज्ञ मन कोति ले जानकारी दे गीस। ए बेरा म किसान मन ल छत्तीसगढ़ म तिलहन फसल के उत्पादन के बारे म घलो बताय गीस।
एंटी करप्शन ब्यूरो-एसीबी अउ आर्थिक अपराध अन्वेसन शाखा-ईओडब्ल्यू के टीम ह आज बीजापुर अउ सुकमा जिला म कतकोन जघा म छापामार कार्रवाई करीन। जानबा के अनुसार ए टीम ह वित्तीय गड़बड़ी अउ डीएमएफ के रासि म अनियमितता के मामला म बीजापुर म सहायक आयुक्त आनंद सिंह के सरकारी आवास समेत कतकोन ठिकाना म दबिस दीन। उहें, सहायक आयुक्त के जगदलपुर के धरमपुरा स्थित मकान अउ ओखर दू झिन रिस्तेदार मनके बैलाबाजार अउ धरमपुरा के मकान म घलो छापा मारिन। एखर संगेसंग टीम ह तेंदू पत्ता घोटाला मामला के जांच बर सुकमा के वन मंडल अधिकारी अशोक पटेल के सुकमा अउ रायगढ़ के घर म घलो छापा मारिन। उहें, कतकोन आने कारोबारी मनके ठिकाना म घलो टीम ह दबिस दीन। समाचार लिखे जाय तक कोंटा अउ छिंदगढ़ ब्लाक म घलो कार्रवाई होवत हे।
दुर्घटना
सूरजपुर जिला के ओड़गी थाना क्षेत्र म आज होय रद्दा हादसा म भटगांव के पूर्व विधायक अउ कांग्रेस नेता पारस नाथ राजवाड़े ह घायल होगे हे। घटना के बाद ओमन ह अस्पताल पहुंचिन। जिहां इलाज के बाद अभी उंखर मनके हालत स्थिर बताय जात हे। जानबा के अनुसार श्री राजवाड़े ह नगर पालिका अध्यक्ष के सपथ ग्रहण समारोह म सामिल होय बर जात रिहीन। इही बेरा म उंखर कार ह अनियंत्रित होके रद्दा किनारे गड्ढा म उतर गीस। ए घटना के सीसीटीवी फुटेज घलो मिले हे।
ऐति कबीरधाम जिला के पलानीपाट गांव करा काली देर संझा एक ठिन तेज रफ्तार मालवाहक गाड़ी ह अनियंत्रित होके पलट गे। ए हादसा म दू झिन माईलोगिन मनके मउत होगे। जबकि, करीबन पैंतीस लोगन मन घायल होगे हे। घायल मन ल इलाज बर जिला अस्पताल म भर्ती कराय गेहे। ए सबो लोगन सिंघनपुरी के रहइया हरय अउ बिहाव कारीकरम म सामिल होय बर सहसपुर-लोहारा जात रिहीन।
ऐति, दुरूग जिला के बिरझापुर गांव म पाछू रतिहा तेज रफ्तार मोटर साइकिल के टक्कर ले घर के बाहिर खड़े एक झिन माईलोगिन के मउत होगे।
आईटीबी-स्वास्थ्य शिविर
मोहला-मानपुर जिला के माओवाद प्रभावित दोरबा गांव म भारत-तिब्बत सीमा पुलिस बल-आईटीबीपी कोति ले निसुल्क स्वास्थ्य सिविर लगाय गीस। ए बेरा म आईटीबीपी के चिकित्सा अधिकारी अउ मेडिकल टीम ह ग्रामीण मनले स्वास्थ्य के जांच करके ओमन ल निसुल्क दवई दीन। संगेसंग ग्रामीण मन ल मच्छरदानी घलो बांटे गीस। ए सिविर म आईटीबीपी के अधिकारी जवान मन ह युवा मन ल नसा ले दूर रहे अउ स्वच्छता के प्रति जागरूक करीन।
महतारी वंदन अभिनंदन कार्यक्रम
मुख्यमंत्री विष्णुदेव साय ह रईपुर स्थित अपन निवास कार्यालय म आयोजित महतारी वंदन अभिनंदन कार्यक्रम म महिला पत्रकार मन ल सम्मानित करीन। संगेसंग ओमन ल अंतर्राष्ट्रीय महिला दिवस के सुभकामना दीन। ए बेरा म मुख्यमंत्री ह महिला पत्रकार मनले गोठ घलो करीन।
चैम्पियन ट्रॉफी-फाइनल
ऐति, अंतर्राष्ट्रीय मास्टर्स लीग ट्वेंटी-ट्वेंटी क्रिकेट टूर्नामेंट के चलत काली रईपुर के सहीद वीरनारायण सिंह अंतर्राष्ट्रीय क्रिकेट स्टेडियम म खेले गे मुकाबला म इंडिया मास्टर्स ह वेस्टइंडीज मास्टर्स ल सात रन ले हरा दीन।
अउ अब मौसम के हाल…
पश्चिमी विक्षोभ के असर ले तेरह मार्च तक प्रदेस के तापमान बाढ़े के संभावना हे। मौसम विज्ञानी एच.पी.चंद्रा आकाशवाणी समाचार ल बतइन कि तेरह मार्च ले कुछेक जिला म हल्का बादर कर सकत हे।