राष्ट्रपति द्रौपदी मुर्मू ह कार्यबल म माईलोगिन मनके जादा भागीदारी उपर जोर दिन हे। ओमन किहीन कि भारत के विश्व के तीसरा बड़का अर्थव्यवस्था बने कोति आगू बढ़त हुए ए बहुते जरूरी हे। आज नई दिल्ली म अंतर्राष्ट्रीय महिला दिवस के मउका म ‘‘नारी सक्ति से विकसित भारत‘‘ उपर एक दिन के सम्मेलन के उद्घाटन करत हुए ओमन किहीन कि देस के बेटी मन विकसित भारत के सपना ल साकार करे म अपन भूमिका निभावत हे। ओमन माईलोगिन के तरक्की म जरूरी वातावरण बनाय म समाज के महत्व ल बल दीस।
प्रधानमंत्री-लखपति दीदी संवाद
प्रधानमंत्री नरेंद्र मोदी ह किहीन हे कि उंखर सरकार ह माईलोगिन के सशक्तिकरण बर समर्पित हे। ओमन महिला मनके जीवन ल सुघ्घर बनाय बर करे जावत काम उपर प्रकाश डालिन। आज अंतर्राष्ट्रीय महिला दिवस के मउका म गुजरात के नवसारी म राखे गे ‘लखपति दीदी सम्मेलन‘ म गोठियात हुए श्री मोदी ह जोर दिन कि भारत, महिला-अगुवई वाले विकास के दिसा म आगू बाढ़त हे।
प्रधानमंत्री ह ए लखपति दीदी सम्मेलन म पच्चीस हजार ले जादा स्वयं सहायता समूह के माईलोगिन मन ल पांच सौ पचास करोड़ रूपिया के वित्तीय सहायता घलो करीन। श्री मोदी ह पांच लखपति दीदी मन ल लखपति दीदी प्रमाण पत्र देके उंखर मान बढ़ाइन।
एखर पहिली, प्रधानमंत्री ह ‘लखपति दीदी‘ योजना के दस लाभार्थी मन ले गोठबात करीन अउ उंखर अनुभव घलो सुनिन।
महिला दिवस-छत्तीसगढ़-01
अंतर्राष्ट्रीय महिला दिवस के मउका म प्रदेस म घलो आने-आने कारीकरम आयोजित करे जावत हे। इही म रईपुर म राखे गे महतारी वंदन सम्मेलन म सामिल होय मुख्यमंत्री विष्णुदेव साय ह महतारी वंदन योजना के तेरहवां किस्त जारी करीन। एमा राज्य के लगभग सत्तर लाख माईलोगिन के बैंक खाता म छै सौ पचास करोड़ रूपिया ले जादा के पइसा डाले गीस।
ए मउका म मुख्यमंत्री ह किहीन कि विकसित छत्तीसगढ़ के संकल्प ल साकार करे म माईलोगिन मनके भागीदारी जरूरी हे। इही ल धियान म राखत राज्य सरकार ह महतारी वंदन योजना जइसन पहल सुरू करे हे। जेखर ले प्रदेस के लाखों माईलोगिन ल आर्थिक संबल मिलत हे, अउ ओमन आत्मनिर्भरता कोति आगू बढ़त हे। श्री साय ह किहीन कि राज्य सरकार ह महिला मन ल हर क्षेत्र म बराबर मउका देबर संकल्पित हे। मुख्यमंत्री ह समाज के हर मनखे ले माईलोगिन मन ल आगू बढ़ाय बर समानता, सम्मान अउ सुरक्षा के वातावरण बनाय के अपील करीन।
सम्मेलन म मुख्यमंत्री ह आंगनबाड़ी कार्यकर्ता अउ सहायिका मनके मानदेय भुगतान बर ‘‘सम्मान सुविधा प्रणाली‘‘ के सुभारंभ करीन।
ए पहिली बार होइस हे कि मुख्यमंत्री ह खुद आंगनबाड़ी कार्यकर्ता अउ सहायिका मन ल डिजीटल अउ केंद्रीयकृत प्रणाली ले सीधा मानदेय के पइसा दीस हे। एखर अलावा श्री साय ह बाल विवाह मुक्त छत्तीसगढ़ अभियान के पोर्टल, इंफ्रा पोर्टल के सुभारंभ घलो करीन। संगेसंग महिला सुरक्षा ल अउ प्रभावी बनाय बर सखी वन स्टाफ सेंटर के मानक संचालन वन प्रणाली माने-एसओपी के विमोचन करीन। एखरे संग छत्तीसगढ़ देस के पहिली राज्य बन गेहे, जेन ह सखी वन स्टाफ सेंटर के संचालन बर एसओपी लागू करे हे।
महिला दिवस-छत्तीसगढ़-02
कारीकरम म मुख्यमंत्री ह राज्य के बत्तीस उत्कृष्ट आंगनबाड़ी कार्यकर्ता तीन सबले बढ़िया सखी वन स्टाफ सेंटर दू नवा बिहान योजना के महिला संरक्षण् अधिकारी समेत महिला सशक्तिकरण म बिसेस उपलब्धि वाले माईलोगिन ल सम्मानित करीन।
सम्मेलन म गोठियात हुए महिला और बाल विकास मंत्री लक्ष्मी राजवाड़े ह किहीन कि राज्य सरकार ह माईलोगिन के सम्मान अउ सुरक्षा ल लेके सजग हे।
ओति, राजनांदगांव म विधानसभा अध्यक्ष डॉक्टर रमन सिंह ह महिला पुलिस थाना के लोकार्पण करीन।
आकाशवाणी के प्रादेशिक समाचार एकांश डहार ले अंतर्राष्ट्रीय महिला दिवस म बिसेस कारीकरम के प्रसारण आज रतिहा आठ बजे ले करे जाही। एला छत्तीसगढ़ स्थित आकाशवाणी के सबो केंद्र एके संघरा रिले करही।
दिलीप सिंह जूदेव-जयंती
मुख्यमंत्री विष्णुदेव साय ह आज स्वर्गीय दिलीप सिंह जूदेव के जयंती के मउका म ओमन ल सुरता कर के श्रध्दांजलि अर्पित करीन। ए मउका म मुख्यमंत्री ह किहीन कि श्री जूदेव ह जल, जंगल, जमीन अउ जनजातीय मान के रखवार रिहीन। छत्तीसगढ़ के वनांचल क्षेत्र म आदिवासी समाज ल उंखर मान अउ पहिचान लहुटाय बर श्री जूदेव ह सरलग मेहनत करीन।
मुख्यमंत्री ह आज जशपुर जिला के बाजारडांड, कुनकुरी म स्वर्गीय दिलीप सिंह जूदेव के मूर्ति म माला पहिरा के उंहला सुरता करीन अउ श्री जूदेव के छायाचित्र प्रदर्सनी के अवलोकन घलो करीन।
उहें, कुनकुरी के सलियाटोली म राखेगे स्वास्थ्य परीक्षण सिविर म सामिल होइन। ए मउका म लोगन मन का स्वास्थ्य सिविर के जादा ले जादा लाभ उठाय बर किहीन। श्री साय ह आयुष्मान अउ वंदना कार्ड बांटिन संगेसंग निक्षय मित्र मन ल सम्मानित घलो करीन।
राष्ट्रीय लोक अदालत
प्रदेस के सबो जिला अउ व्यवहार न्यायालय म आज राष्ट्रीय लोक अदालत लगाय गीस। राज्य विधिक सेवा प्राधिकरण कोति ले आयोजित ए लोक अदालत म अब्बड़ अकन प्रकरण के आपसी समझौता ले निपटारा करे गीस। एमा मोटर दुर्घटना, चेक बाउंस, बर बिहाव के झगरा, संपत्ति कर, जल कर, जमीन विवाद, ट्रैफिक चालान, भाड़ा नियंत्रण, आबकारी, बैंक अउ बिजली ले जुड़े प्रकरण सामिल रिहीन।
हिदायतुल्लाह विवि-दीक्षांत समारोह
नवा रईपुर म स्थित हिदायतुल्लाह राष्ट्रीय विधि विश्वविद्यालय म आज आठवां दीक्षांत समारोह के आयोजन करे गीस। ए मउका म मुख्य अतिथि के रूप म सुप्रीम कोर्ट के न्यायधीश पी.एस.नरसिम्हा ह बढ़िया प्रदर्सन बर तेरह झन विद्यार्थी मन ल छत्तीस ठन स्वर्ण पदक परदान करीन। उहें, एक सौ इकसठ विद्यार्थी मन ल डिग्री घलो दीन। एखरे जइसन एल.एल.एम. के नब्बे स्नातक पढ़इया मन ल उपाधि दे गीस अउ एक झन शोधार्थी ल पीएचडी के उपाधि घलो दे गीस। कारीकरम म सुप्रीम कोर्ट के न्यायधीश प्रशांत कुमार मिश्रा, छत्तीसगढ़ उच्च न्यायालय के मुख्य न्यायधीश रमेश सिन्हा अउ उपमुख्यमंत्री अरूण साव विसिष्ट अतिथि के रूप म जुरे रिहीन।
बस्तर पुरस्कृत
नीति आयोग ह बस्तर जिला के शिक्षा के गुणवत्ता म सुधार अउ नवा-नवा शैक्षणिक तकनीक के सफल क्रियान्वयन म बढ़िया प्रदर्सन बर तीन करोड़ रूपिया के पुरस्कार ले सम्मानित करीस हे। ए उपलब्धि बर मुख्यमंत्री विष्णुदेव साय ह बस्तर जिला के अधिकारी अउ कर्मचारी मन ल बधई दीन हे। ओमन किहीन कि विद्यार्थी मनके मेहनत, गुरू जी मनके समर्पण अउ सरकार के गुणवत्तापूर्ण शिक्षा बेवस्था के प्रति प्रतिबध्दता ह जिला ल नवा ऊंचाई तक पहुंचाय हे। मुख्यमंत्री ह किहीन कि ए सम्मान पूरा प्रदेस बर प्रेरणादायक हे। ए पुरस्कार ह आकांक्षी जिला म बुनियादी शिक्षा ल अच्छा करे अउ शिक्षा के समावेसी अउ ओमा नवा नीति ल आगू बढ़ाय बर राज्य सरकार के परयास के सफलता के प्रमाण हे।
वेब्स-बैठक
केंद्रीय सूचना और प्रसारण मंत्रालय के सचिव संजय जाजू ह मनोरंजन, रचनात्मकता अउ संस्कृति के दुनिया ल एके संग लाय वाले वैश्विक शिखर सम्मेलन-वेव्स के तियारी ल देखे बर मुंबई म एक ठिन बइठका करीन।
ए मउका म श्री जाजू ह वेव्स के महत्तव ल समझात हुए किहीन कि एखर उद्देस्य भारत के आध्यात्मिक विरासत ल बढ़ावा देना अउ देस ल वैश्विक सामग्री केंद्र अउ निर्यातक बनाना हवय। भारत के सांस्कृतिक अउ भाषाई विविधता ल बचाना, भारतीय मीडिया के उपस्थिति ल विश्व म फैलाना अउ अंतर्राष्ट्रीय निवेसक मन ल आकर्षित करना हे।
केंद्रीय सूचना और प्रसारण मंत्रालय ह महाराष्ट्र सरकार के सहयोग ले, एक ले चार मई तक मुंबई के जियो वर्ल्ड कन्वेंशन सेंटर म ए शिखर सम्मेलन के आयोजन करही।