अंतर्राष्ट्रीय महिला दिवस के मउका म काली आठ मार्च के राष्ट्रपति द्रौपदी मुर्मु ह नई दिल्ली म राष्ट्रीय सम्मेलन के उद्घाटन करही। केंद्रीय महिला अउ बाल विकास मंत्रालय डहार ले आयोजित ए सम्मेलन के बिसय हे–‘‘नारी शक्ति से विकसित भारत‘‘।
अंतर्राष्ट्रीय महिला दिवस म काली छत्तीसगढ़ म घलो कतकोन कारीकरम कराय जाही।
रईपुर के सांईंस कालेज मैदान म ‘‘सशक्त महिला-समृध्द महिला‘‘ थीम उपर राखे गे पांच दिन के राज्य स्तरीय महिला मड़ई के काली समापन होही। समापन कारीकरम म मुख्यमंत्री विष्णुदेव साय सामिल होही। महिला मड़ई म राज्य के सबो तैंतीस जिला ले सत्यासी ठन महिला स्व-सहायता समूह डहार ले स्टाल लगाय गेहे।
गृह राज्यमंत्री-जनजातीय
केंद्रीय गृह राज्यमंत्री नित्यानंद राय ह काली नई दिल्ली म जनजातीय युवा आदान-प्रदान कारीकरम म करीबन दू सौ आदिवासी युवा मन ले गोठबात करीन। छत्तीसगढ़ अउ ओडिसा के आदिवासी युवा मन संग गोठबात म श्री राय ह किहीन कि देस के उग्रवाद प्रभावित जिला म कतकोन विकास काम होय हे। ओमन बतइन कि ए जिला म सड़क अउ रेलवे के नेटवर्क विकसित करे गेहे अउ नवा स्कूल खोले गेहे। ओमन किहीन कि आदिवासी समुदाय ह देस के स्वतंत्रता संग्राम अउ एखर संस्कृति ल सहेजे म अपन योगदान देहे। ओमन युवा मन ले बछर दू हजार सैंतालीस तक भारत ल विकसित राष्ट्र बनाय म अपन योगदान देके अपील करीन।
खबर के मुताबिक केंद्रीय गृह मंत्रालय पाछू पंद्रह बछर ले आदिवासी युवा आदान-प्रदान कारीकरम करत हे। ए कारीकरम म उग्रवाद ले सबले जादा प्रभावित क्षेत्र के आदिवासी समुदाय के युवक-युवती मन ल देस के प्रमुख सहर मन म ले जाय जाथे।
विस-अनुदान मांग पारित
राज्य विधानसभा म आज उपमुख्यमंत्री अरूण साव के विभाग बर पंद्रह हजार तीन सौ छियासी करोड़ बियासी लाख रूपिया ले जादा के अनुदान मांग पारित करे गीस। एमा लोक स्वास्थ्य यांत्रिकी विभाग बर दू हजार सात सौ तिरानवे करोड़ साठ लाख रूपिया ले जादा, नगरीय प्रशासन विभाग बर चौबीस करोड़ अड़तीस लाख रूपिया, लोक निर्माण विभाग बर चार हजार छै सौ चौसठ करोड़ रूपिया, न्याय प्रशासन विभाग बर आठ सौ चौरानवे करोड़ पैंतालीस लाख रूपिया सामिल हे। उहें, अवइया वित्तीय बछर म मुख्यमंत्री नगरोत्थान अउ मुख्यमंत्री गृह प्रवेस सम्मान योजना सुरू होही। एखर बर कुल छै करोड़ रूपिया के प्रावधान करे गेहे।
आज विधानसभा म मंत्री केदार कश्यप के वन एवं जलवायु परिवर्तन, जल संसाधन, कौशल विकास अउ सहकारिता विभाग के अनुदान मांग उपर चर्चा जारी हे।
विस-पीएम आवास
राज्य विधानसभा म आज प्रधानमंत्री आवास योजना के मुद्दा गुंजिस। प्रश्नकाल म पूर्व मुख्यमंत्री भूपेश बघेल ह प्रधानमंत्री ग्रामीण आवास के बारे म जानकारी मांगिन। पंचायत मंत्री विजय शर्मा ह बतइन कि बछर दू हजार सोलह ले दू हजार पचीस तक जनवरी ले दिसंबर तक जानकारी मांगे गेहे। वित्तीय बछर के आधार म जानकारी दे गेहे। एखर उपर श्री बघेल ह किहीन कि आंकड़ा म बताय गे हवय कि अट्ठारा लाख आवास दे गीस। फेर पाछू सरकार के काम ल छिपाय गे हवय। ओमन किहीन कि सदन के सदस्य मन ल दे गे जानकारी दूसर हे। एखर बाद श्री बघेल अउ श्री शर्मा के बीच तीखा नोक-झोंक होइस। बाद म विभागीय मंत्री के जवाब ले असंतुष्ट विपक्षी सदस्य मन ह सदन ले बर्हिगमन कर दीन।
केंद्रीय मंत्री- लक्ष्मी राजवाड़े-मुलाकात
केंद्रीय महिला अउ बाल विकास मंत्री अन्नपूर्णा देवी ले नई दिल्ली म छत्तीसगढ़ के महिला अउ बाल विकास मंत्री लक्ष्मी राजवाड़े ह मुलाकात करीन। ए दउरान केंद्रीय मंत्री ह किहीन कि छत्तीसगढ़ म महिला अउ बाल विकास के कारीकरम बर कोनो भी प्रकार के कमी नइ होही। केंद्रीय मंत्री ह श्रीमती राजवाड़े ले छत्तीसगढ़ म माईलोगिन अउ लइका मन बर चलत कारीकरम, भविष्य के योजना अउ नीति उपर घलो चर्चा करीन। ओमन ह केंद्र अउ राज्य सरकार के योजना के समन्वय ले महिला सशक्तिकरण, बाल संरक्षण अउ पोषण अभियान ल अउ जादा प्रभावी बनाय बर बड़े सुझाव दीन।
माओवादी आत्मसमर्पण/आईईडी विस्फोट
नारायणपुर जिला म ग्यारा झन ईनामी माओवादी मन ह पुलिस के आगू आत्मसमर्पण करीन। उत्तर-बस्तर अउ माड़ डिवीजन म सक्रिय ए सबो माओवादी मन उपर चालीस लाख रूपिया के इनाम रिहीस। आत्मसमर्पण करइया मन म सात झन माहिला माओवादी मन घलो सामिल हे। आत्मसमर्पण करइया सबो माओवादी मन ल राज्य सरकार के पुनर्वास नीति म पचीस-पचीस हजार रूपिया के प्रोत्साहन रासि दे गीस।
उहें, नारायणपुर जिला के छोटे डोंगर थाना क्षेत्र के अमदईघाटी डम्प एरिया म आज माओवादी मन डहार ले लगाय गे प्रेशर आईईडी के चपेट म आय ले एक झन ग्रामीण के मउत होगे। उहें, एक झन दूसर ग्रामीण घायल होगे हवय। छोटे डोंगर निवासी दूनों ग्रामीण अमदई निको कंपनी के कर्मचारी बताय जात हवय। जिला के पुलिस अधीक्षक प्रभात कुमार ह ग्रामीण मन ले अपील करीन कि क्षेत्र म आईडी के जानकारी मिले म एखर सूचना तत्काल पुलिस ल दे जाय। ओमन किहीन कि आईईडी के सही जानकारी देवइया मनखे ल पांच हजार रूपिया इनाम म दे जाही अउ उंखर पहिचान गुप्त राखे जाही।
इही बीच, बीजापुर जिला के पुजारी कांकेर इलाका म सुरक्षा बल ह एक ठन माओवादी स्मारक ल ध्वस्त कर देहे।
जनऔषधि दिवस
आज जनऔषधि दिवस हरय। जेनेरिक दवई मनके उपयोग ल बढ़ावा दे जाय बर ए दिन ल मनाय जाथे। केंद्रीय रसायन अउ उर्वरक मंत्रालय ह ए पहल के समर्थन करे बर पूरा देस म हफ्ता भर के गतिविधि करत हे।
प्रधानमंत्री नरेंद्र मोदी ह किहीन हे कि जनऔषधि दिवस लोगन ल बने अउ सस्ता दवई देवाय बर सरकार के प्रतिबध्दता ल देखाथे। सोसल मीडिया म एक ठिन पोस्ट म श्री मोदी ह किहीन कि गुणवत्ता वाले दवई अब देस के कोना-कोना म पहुंचत हे अउ जनऔषधि मॉडल अब दुनिया ल प्रेरित करत हे।
आज जन औषधि दिवस के मउका म केंद्रीय आवासन अउ सहरी कार्य राज्य मंत्री तोखन साहू ह बिलासपुर के जिला अस्पताल के जनऔषधि केंद्र के निरीक्षण करीन। ए दउरान ओमन ह हितग्राही मनले संवाद घलो करीन। ओमन ह किहीन कि जनऔषधि केंद्र म जनता ल सस्ता अउ गुणवत्ता वाले दवई देवाय जाथे, जउन ह आम लोगन बर संजीवनी के काम करत हे।
राष्ट्रीय लोक अदालत
देसभर संघरा छत्तीसगढ़ के सबो जिला अउ व्यवहार न्यायालय म काली आठ मार्च के राष्ट्रीय लोक अदालत के आयोजन करे जाही। राज्य विधिक सेवा प्राधिकरण डहार ले होवइया ए लोक अदालत म लंबित मोटर दुर्घटना दावा ले जुड़े प्रकरण, चेक बाउंस, मेट्रो मोनियल डिस्प्युट के अलावा जलकर, संपत्तिकर, राजस्व ले जुड़े प्रकरण, ट्रैफिक चालान, भाड़ा नियंत्रण, आबकारी अउ बैंक अउ विद्युत ले जुड़े प्री-लिटिगेशन प्रकरण के आपसी समझौता के संग निपटारा करे जाही।
हिदायतुल्लाह विवि-दीक्षांत समारोह
रईपुर के हिदायतुल्लाह राष्ट्रीय विधि विश्वविद्यालय म काली आठ मार्च के दीक्षांत समारोह के आयोजन करे जाही। विश्व विद्यालय के कुलपति प्रोफेसर डॉक्टर वीसी विवेकानंदन ह आकाशवाणी समाचार ल बतइन कि समारोह के मुख्य अतिथि सुप्रीम कोर्ट के न्यायमूर्ति पी.एस.नरसिम्हा होही। उहें, मुख्यमंत्री विष्णुदेव साय, सुप्रीम कोर्ट के न्यायमूर्ति प्रशांत कुमार मिश्रा अउ उप मुख्यमंत्री अरूण साव विसिष्ट अतिथि के रूप म मौजूद रइही। ए मउका म विद्यार्थी मन ल उपाधि दे जाही। एखर अलावा सुघ्घर प्रदर्सन करइया तेरह झन विद्यार्थी मन ल उंखर उपलब्धि बर छब्बीस ठन स्वर्ण पदक दे जाही।
अउ अब मौसम के हाल…
मौसम विभाग ले मिले जानकारी के अनुसार काली आठ मार्च ले उत्तर ले अवइया हवा के असर कम होय के सेति अउ पूरब ले अवइया हवा के प्रबल होय के सेति तापमान म तेरह मार्च तक बढोत्तरी होय के संभावना हे। मौसम विज्ञानी एच.पी.चन्द्रा ह आकाशवाणी समाचार ल बतइन कि तेरह मार्च के प्रदेस के कुछेक जिला म हल्का बादल रहि सकत हे।