केंद्रीय मंत्रिमंडल ह पशुधन स्वास्थ्य अउ रोग नियंत्रण कारीकरम म संशोधन ल मंजूरी दे देहे। आज नई दिल्ली म मीडिया ल जानबा देवत सूचना अउ प्रसारण मंत्री अश्विनी वैष्णव ह बतइन कि सरकार ह पशुधन स्वास्थ्य अउ रोग के निपटारा बर तीन हजार आठ सौ अस्सी करोड़ रूपिया के घोसना करे हे। ओमन किहीन कि टीकाकरण ए कारीकरम के प्रमुख क्षेत्र होही अउ एखर ले किसान मन ल मदद मिलही। ओमन किहीन कि पशु औषधि के माध्यम ले बढ़िया गुणवत्ता वाले अउ सस्ता जेनेरिक पशु चिकित्सा दवई देवाय जाही।
आईएएस-तबादला
राज्य सरकार ह दू ठिन जिला के कलेक्टर के संगेसंग भारतीय प्रशासनिक सेवा के पांच अधिकारी मनके प्रभार म बदलाव करे हे। जारी आदेस के मुताबिक अभिजीत िंसंह ल दुरूग जिला के कलेक्टर बनाय गेहे। त उहें, अबिनाश मिश्रा ल धमतरी जिला के कलेक्टर के रूप म पदस्थ करे गेहे। संगेसंग रेना जमील ल लोक सेवा आयोग के सचिव के उपराहा प्रभार सौंपे गेहे। विश्वदीप ल रईपुर नगर निगम के आयुक्त के संगेसंग स्मार्ट सिटी के प्रबंध संचालक के उपराहा जिम्मेवारी दे गेहे। उहें, कुमार विश्व रंजन ल रईपुर जिला पंचायत के मुख्य कार्यपालन अधिकारी बनाय गेहे।
केंद्रीय राज्यमंत्री कोंडागांव-बैठक
केंद्रीय रेल अउ जल शक्ति राज्यमंत्री व्ही. सोमन्ना ह कोंडागांव म आधिकारी मन ले बइठका लेके आकांक्षी जिला कारीकरम के समीक्षा करीन। ए दउरान केंद्रीय मंत्री ह शिक्षा, स्वास्थ्य, कृषि, महिला अउ बालविकास, कौशल विकास के संगेसंग कतकोन विभाग मन डहार ले चलाय जात योजना के बारे म जानबा लीन। ओमन किहीन कि कोंडागांव म आकांक्षी जिला कारीकरम के तहत जउन लक्ष्य राखे गेहे, ओखर उपर धियान देके काम करे जाय। केंद्रीय मंत्री ह प्रधानमंत्री विश्वकर्मा योजना ल जिला म लागू करके जम्मो जरूरतमंद मन ल फायदा देके के निरदेस दीन।
केंद्रीय राज्यमंत्री-कार्यक्रम
केंद्रीय पंचायती राज राज्यमंत्री प्रोफेसर एस.पी.सिंह बघेल अउ स्वास्थ्य परिवार कल्याण राज्य मंत्री अनुप्रिया पटेल ह आज नई दिल्ली म होय एक ठिन राष्ट्रीय सम्मेलन म पंचायती राज मंत्रालय के ‘आदर्स महिला-अनुकूल ग्राम पंचायत‘ पहल के सुरूआत करीन। ए पहल मंत्रालय के अंतर्राष्ट्रीय महिला दिवस समारोह के भाग हरय। सरकार ह माईलोगिन मनके भागीदारी ल बढ़ाय के उद्देस्य ले ए पहल के सुरूआत करे हे। एखर उद्देस्य हरेक जिला म कम ले कम एक ठिन आदर्स महिला-अनुकूल ग्राम पंचायत के स्थापना करना हे।
विधानसभा-सर्पदंश/सिकलसेल
राज्य विधानसभा म आज जशपुर अउ बिलासपुर जिला म सांप चाबे ले होय मउत म मुआवजा के नांव उपर घोटाला के मामला गुंजिस। भाजपा विधायक सुशांत शुक्ला ह किहीन कि जशपुर म छियानवे अउ बिलासपुर म चार सौ इकतीस लोगन मन के सांप डसे ले मउत होय हे। ओखर परिवार मन ल दे जाय मुआवजा म करोड़ो रूपिया के फर्जीवाड़ा होय हे। ओमन आरोप लगइन कि राजस्व अउ स्वास्थ्य विभाग के अधिकारी मन के मिली भगत ले करोड़ो रूपिया के घोटाला होय हे। जवाब म राजस्व मंत्री टंकराम वर्मा म किहीन कि सिकायत मिले उपर जांच अउ कार्रवाई करे जाही। संगेसंग राजस्व मंत्री ह सदन म बिलासपुर म सांप डसे ले चार सौ इकतीस लोगन मनके मउत के जांच कराय के घोसना घलो करीन।
सदन म आज ध्यानाकर्षण के माध्यम ले भाजपा विधायक अजय चंद्राकर ह सिकलसेल संस्थान म मरीज मन बर इलाज के सुविधा नइ होय के मामला उठाइन। ओमन किहीन कि प्रदेस म सिकलसेल बीमारी ले पच्चीस लाख लोगन मन पीड़ित हे, एखर इलाज सिरिफ रईपुर म हो सकथे, जिहां बने ढंग ले बिसेसज्ञ डॉक्टर नइ हे। ए बात उपर स्वास्थ्य मंत्री श्याम बिहारी जायसवाल ह किहीन कि राज्य के सरकारी अस्पताल मन म सिकलसेल प्रबंधन सेल सुरू करे गेहे। डॉक्टर मनके नियुक्ति करे जात हे। ओमन बतइन कि सिकलसेल सेंटर ऑफ एक्सिलेंस म बोनमैरो ट्रांसप्लांट के बेवस्था के सुरूआत करे जात हे।
महिला मड़ई
राजधानी रईपुर के साईंस कालेज मैदान म पांच दिन तक चलइया महिला मड़ई के काली महिला अउ बालविकास मंत्री लक्ष्मी राजवाड़े ह सुभारंभ करीन। ए मउका म ओमन महिला समूह मन डहार ले लगाय गे स्टाल मन ल देखिन अउ कोनो-कोनो जिनिस के खरीददारी घलो करीन। ए दउरान श्रीमती राजवाड़े ह पद्मश्री जागेश्वर यादव के सम्मान करीन। मड़ई मेला म सांस्कृतिक संध्या राखे गेहे। ए मड़ई के थीम ‘सशक्त महिला-समृध्द महिला‘ हे।
महिला मड़ई म लगाय गे स्टाल मन ल मंझनिया बारह बजे ले रतिहा दस बजे तक देखे जा सकथे। मड़ई म सेल्फी जोन घलो बनाय गेहे अउ संगेसंग लइका मन बर प्ले जोन बनाय गेहे।
गिरौदपुरी मेला
बलौदाबाजार-भाटापारा जिला के गिरौदपुरी म काली ले तीन दिन तक चलइया गिरौदपुरी मेला सुरू होगे हे। मेला के पहिली दिन मुख्यमंत्री विष्णुदेव साय ह गुरू गद्दी के दर्सन अउ पूजा-पाठ करके प्रदेस के लोगन मनके खुशहाली के कामना करीन। ए मउका म मुख्यमंत्री ह गिरौदपुरी मेला के पइसा ल पचीस लाख ले बढ़ाके पचास लाख करे अउ मेला परिसर के बड़का दरवाजा ले मंदिर तक जाय बर सेड बनाय के घोसना करीन। गिरौदपुरी मेला छै मार्च तक चलही।
कांडागांव वार्षिक मेला
कोंडागांव जिला म काली ले वार्षिक मेला के सुरूआत होगे हे। छै दिन तक चलइया ए मेला ह नौ मार्च तक चलही। करीबन सात सौ साल जुन्ना ए मेला म कोंडागांव के संगेसंग बस्तर अउ नारायपुर जिला के गांव के लोगन मन सामिल होथे। मेला के सुभारंभ मउका म बस्तर सांसद महेश कश्यप, कोंडागांव विधायक लता उसेंडी के संगेसंग प्रशासनिक अधिकारी मन ह माता गुड़ी स्थल म देवी-देवता मनके पूजा-पाठ करीन। मेला स्थल म गांव पलारी के माता डोली अउ लाट, देव विग्रह ह परिक्रमा करीन। जेखर बाद आने गांव के देवी-देवता मनके पूजा-पाठ करीन। पारंपरिक छत्र, डंगई लाट अउ देव विग्रह के संगेसंग ढोल-नंगाड़ा, मोहरी अउ आने पारंपरिक वाद्ययंत्र ले मेला क्षेत्र म भक्तिभाव बने हवय।
पीएससी-परीक्षा कार्यक्रम
छत्तीसगढ़ लोकसेवा आयोग ह स्टीम इंस्पेक्टर-वाष्पयंत्र निरीक्षक अउ सिविल जज के परीक्षा कारीकरम घोसित कर देहे। स्टीम इंस्पेक्टर के परीक्षा चार मई अउ सिविल जज के परीक्षा अट्ठाईस मई के होही। पीएससी के मुताबिक वाष्पयंत्र निरीक्षक के परीक्षा सिरिफ रईपुर म होही।
अउ अब मौसम के हाल…
उत्तर ले आवत ठंडा हवा के सेति प्रदेस के न्यूनतम तापमान म थोरकुन गिरावट होय के संभावना हे। संगेसंग अधिकतम तापमान म घलो हल्का गिरावट दरज करे जा सकथे। मौसम विभाग ले मिले जानबा के मुताबिक पश्चिमी विक्षोभ के असर समाप्त होगे हे। जेखर सेति प्रदेस के लोगन मन ल गर्मी ले थोरकुन राहत मिलही। फेर सात मार्च ले तापमान एक घांव फेर बाढ़े लगही।
अउ अब थोरकुन समाचार सार म –
– जांजगीर-चांपा के प्रभारी सिविल सर्जन दीपक जायसवाल के खिलाफ स्टाफ ले गलत व्यवहार करे के मामला के जांच बर तीन सदस्यीय दल बनाय गेहे।
– कबीरधाम जिला के ग्राम पंचायत परसवारा म महिला पंच मनके पति मन ह पंच पद के सपथ लेके मामला म जिला पंचायत सीईओ अजय कुमार त्रिपाठी ह परसवारा के सचिव प्रणीवर सिंह ठाकुर ल निलंबित कर देहे।
– सरगुजा जिला के गुमगराखुर्द बरतीपारा प्राथमिक स्कूल के गुरूजी शैलेन्द्र सिंह पोर्ते ल जिला शिक्षा अधिकारी ह निलंबित कर देहे। एखर मन उपर आरोप हे कि, एमन सराब के नसा म स्कूल आके लइका मन ले गलत व्यवहार करीन।
– जिला रोजगार अउ स्वरोजगार मार्गदर्सन केंद्र राजनांदगांव म काली छै मार्च के बिहनिया साढे़ दस बजे ले प्लेसमेंट कैंप के आयोजन करे जाही।
– बलरामपुर कलेक्टर राजेन्द्र कटारा के अगुवई म काली छै मार्च के जल-जीवन अउ स्वच्छता मिसन के बइठका होही।
अउ
– कोरबा जिला के भैसमा बाजार चौक के तीर एक ठिन ट्रक ह स्कूटी सवार मनखे ल टक्कर मार दीस, जेखर ले ओखर मउत होगे।