वित्तमंत्री ह बतइन कि बजट म सकल राज्य घरेलू उत्पाद म बारह प्रतिसत वृध्दि अनुमानित हरय। प्रति व्यक्ति आय म नौ प्रतिसत वृध्दि, बिना नवा कर लगाय राजस्व म ग्यारा प्रतिसत वृध्दि अउ राजस्व अधिसेस दू हजार आठ सौ चार करोड़ रूपिया रहय के अनुमान हे। बजट म राज्य के पूंजीगत व्यय छब्बीस हजार तीन सौ इकतालीस करोड़ रूपिया प्रस्तावित हरय।
व्यापारी मन ल राहत दे के उद्देस्य ले बजट म कर के बोझहा ल कम करे बर ई-वे बिल सीमा पचास हजार रूपिया ले बढ़ाके एक लाख रूपिया करे गेहे। नवा बजट म पच्चीस हजार रूपिया तक के वैट देनदारी ल माफ करे गेहे। जेखर ले चालीस हजार ले जादा व्यापारी मन ल राहत मिलही। उहें, अचल संपत्ति लेनदेन उपर स्टांप सुल्क उपकर हटा दे गेहे।विस-बजट-02
वित्तमंत्री ह बजट म दस नवीन योजना मनके घोसना करीन हे, जेमा मुख्यमंत्री नगरोत्थान योजना, मुख्यमंत्री मोबाइल टावर योजना, मुख्यमंत्री परिवहन योजना, मुख्यमंत्री बायपास अउ रिंग रोड निर्माण योजना, मुख्यमंत्री गृह प्रवेस सम्मान योजना, मुख्यमंत्री गवर्नेस फेलोशिप, सियान केयर योजना, पीएम सूर्य घर मुफ्त बिजली योजना, अटल सिंचाई योजना, छात्र स्टार्टअप अउ नवाचार नीति अउ राष्ट्रीय स्टॉक एक्सचेंज के संघरा छात्र कौशल कारीकरम अउ वित्तीय निवेस प्रशिक्षण योजना सामिल हरय।
वित्तमंत्री ह बजट पेट्रोल म वैट कटौती करत पेट्रोल के कीमत एक रूपिया प्रति लीटर कम करे के घोसना करीन हे, जउन एक अप्रैल ले लागू होही।
बजट भाषण के दउरान वित्तमंत्री ह शासकीय कर्मचारी मनके महंगाई भत्ता ल तिरपन प्रतिसत करे अउ मार्च महिना के वेतन, जउन अप्रैल म दे जाही ओला बाढ़े महंगाई भत्ता के संग देके घोसना करीन। वित्तमंत्री ह पत्रकार मनले जुड़े घोसना घलो बजट के दउरान करीन। ओमन रईपुर प्रेस क्लब के पुर्ननिर्माण अउ विस्तार बर एक करोड़ रूपिया दे जाय के संघरा पत्रकार सम्मान निधि ल दस हजार ले बढ़ाके बीस हजार रूपिया करे के घोसना करीन।बजट-03
बजट म सहरी क्षेत्र मन म एक सौ पचास, आंगनबाड़ी भवन अउ ग्रामीण क्षेत्र मन म एक हजार बारह सौ आंगनबाड़ी भवन निर्माण बर चालीस करोड़ रूपिया के प्रावधान करे गेहे। वित्तमंत्री ह किहीन कि प्रदेस म सत्रह ठिन नवा नालंदा पुस्कालय मनके मंजूरी दे जाही। एखर अलावा बलौदाबाजार, भाठापारा, धमतरी, महासमुंद,जांजगीर-चांपा अउ जशपुर म पांच ठिन नवा साइबर पुलिस थाना अउ कोरबा, जांजगीर-चांपा अउ सूरजपुर म तीन ठन नवा महिला पुलिस थाना स्थापित करे जाही। नवा रईपुर म एकीकृत कमांड अउ नियंत्रण केंद्र के उन्नयन, संचालन अउ रख-रखाव बर चालीस करोड़ रूपिया अउ एक ठिन नवा पावर सब स्टेसन बर बीस करोड़ रूपिया के प्रावधान करे गेहे।
बजट म रईपुर म राष्ट्रीय स्तर के एकीकृत खाद्य अउ औषधि प्रयोगसाला के स्थापना बर सैंतालीस करोड़ रूपिया के प्रावधान घलो करे गेहे।
बजट-04
वित्तमंत्री ह बतइन कि बारह नर्सिंग कॉलेज भवन के स्थापना, छै ठिन नवा फिजियोथैरेपी कालेज भवन के स्थापना, चौबीस ठन सरकारी पॉलीटेक्निक कालेज, आईटीआई के उन्नयन के संघरा ही विवेकानंद तकनीकी विश्वविद्यालय के अधोसंरचना विकास बर घलो बजट म प्रावधान हे।
बजट म माओवाद प्रभावित जिला के दू सौ बीस करोड़ रूपिया, प्रधानमंत्री जन-जातीय उन्नत ग्राम अभियान योजना बर पचास करोड़ रूपिया, धरती आबा जन-जातीय ग्राम उत्कर्ष अभियान बर तीस करोड़ रूपिया, पाम आयल के खेती ल बढ़ावा दे बर पच्चीस करोड़ रूपिया के प्रावधान करे गेहे। अइसने, बस्तर म युवा मनके भागीदारी ल बढ़ाय बर बस्तर ओलंपिक के आयोजन करे जात हे। उंहे, बस्तर के सांस्कृतिक विरासत के खुशी मनाइन अउ शारीरिक फिटनेस ल बढ़ावा देबर बस्तर मैराथन अउ बस्तर मड़ई बर रासि के प्रावधान करे गेहे। एखर अलावा बस्तर म मोबाइल विज्ञान प्रयोगशाला, विज्ञान पार्क अउ होम स्टे के विकास करे जाही। जनजातीय क्षेत्र मन म सुविधा ल बढ़ाय बर बजट म दू सौ इक्कीस करोड़ रूपिया के प्रावधान करे गेहे। आदिवासी विकासखंड म अंत्योदय योजना के तहत चना वितरण करे बर चार करोड़ रूपिया के प्रावधान करे गेहे। बजट म नियद नेल्लानार योजना के तहत सत्तर ठिन गावं म विद्युतीकरण करे बर बीस करोड़ रूपिया के प्रावधान हे। उहें, प्रधानमंत्री जन-मन सड़क निर्माण योजना के तहत अत्यधिक पिछड़ा आदिवासी क्षेत्र मन ल मुख्य सड़क ले जोड़े बर पांच सौ करोड़ रूपिया आवंटित करे गेहे।
बजट-प्रतिक्रिया
बजट म अपन प्रतिक्रिया जतावत मुख्यमंत्री विष्णुदेव साय ह किहीन कि ए बजट ले विकास अउ जन-कल्याण के कार्य ल तेजी ले आगू बढ़ाय बर मदद मिलही। ए बजट राज्य ल तेजी ले विकास के पथ म ले जाने वाला अउ बछर दू हजार तीस के लक्ष्य कोति अग्रसर करे के संकल्प हरय। एखर ले नवाचार अधोसंरचना अउ समावेसी विकास ल बढ़ावा मिलही अउ राज्य अर्थव्यवस्था मजबूत होही।
दूसर कोति, कांग्रेस ह ए बजट ल निरासाजनक बजट बताय हे। पूर्व मुख्यमंत्री भूपेश बघेल ह सोसल मीडिया म लिखिन हे कि ए बजट म कुछू नइ हे, न किसान मन बर कोनो योजना हे, न बेरोजगार मन बर कोनो योजना हे, अउ न ही महंगाई कम करे बर कोनो कार्य योजना हे।
कोयला घोटाला आरोपी-जमानत
कोयला घोटाला अउ मनी लांड्रिंग मामला म गिरफ्तार निलंबित आईएएस रानू साहू, सौम्या चौरसिया अउ व्यवसायी सूर्यकांत तिवारी ल सुप्रीम कोर्ट ह अंतरिम जमानत दे देहे। तभो ले रानू साहू अउ सौम्या चौरसिया के उपर डीएमएफ घोटाला मामला म ईओडब्ल्यू डहार ले दरज मामला म दूनों ल जमानत नइ मिले हे।
आज कोयला घोटाला अउ मनी लांड्रिंग मामला म सुप्रीम कोर्ट ह किहीन कि एखर जांच म काफी बेरा लगही, जेला धियान म राखत हुए याचिकाकर्ता मन ल जमानत देना उचित हे।
कांग्रेस-प्रदर्शन
प्रवर्तन निदेशालय-ईडी डहार ले करे गे कार्रवाई के विरोध म प्रदेस अध्यक्ष दीपक बैज के अगुवई म कांग्रेस के पदाधिकारी अउ कार्यकर्ता मन ह आज राजधानी रईपुर म ईडी आफिस के आगू धरना प्रदर्सन करीन। दूसर डहार ईडी ह आज कांग्रेस के प्रभारी महामंत्री मल्कित सिंह गैंदू ले कांग्रेस भवन निर्माण बर उपयोग करे गे रासि के संबंध म पूछताछ करिस।