छत्तीसगढ़ विधानसभा के बजट सत्र के पांचवा दिन काली वित्त मंत्री ओपी चौधरी अवइया वित्तीय बछर बर प्रदेस के बजट प्रस्तुत करही। आकाशवाणी समाचार ले गोठबात करत श्री चौधरी ह किहीन कि ए हमर सरकार के दूसर बजट होही, जउन छत्तीसगढ़ ल नवा ऊंचाई म ले जाही। ओमन किहीन कि पाछू बछर के बजट ले जादा बड़े होही। एखर ले सबो क्षेत्र म आर्थिक बढ़वार होही।
मंत्रिमंडल-बैठक
मुख्यमंत्री विष्णुदेव साय के अगुवई म मंत्रालय म ए बखत राज्य मंत्रिमंडल के बइठका चलत हे, जेमा कतकोन महत्वपूर्ण फइसला ले जाय के संभावना हवय।
अंबिकापुर-महापौर शपथ ग्रहण
नगर पालिक निगम अंबिकापुर के नवा बने महापौर अउ पार्षद मनके सपथ ग्रहण समारोह आज अंबिकापुर म पीजी कालेज हॉकी स्टेडियम म होइस। मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह के मौजूदगी म कलेक्टर विलास भोसकर ह महापौर मंजूषा भगत अउ पार्षद मन ल आठ-आठ के समूह म सपथ देवाइन। ए मउका म मुख्यमंत्री ह किहीन कि नगर सरकार ‘‘अटल विश्वास पत्र‘‘ म करे गे सबो वादा ल पूरा करे बर प्रतिबध्द हवय। ओमन किहीन कि जनता ह जउन विस्वास संग महापौर अउ पार्षद ल चुने हे, ओ ओमा खरा उतरही। ओमन किहीन कि अंबिकापुर ल स्वच्छ स्मार्ट अउ समृध्द नगर बनाय बर सबो ल एकजुट होके काम करे बर पड़ही।
निर्वाचन आयोग-पहचान पत्र
निर्वाचन आयोग ह ए स्पष्ट करे हे कि एके नंबर के दू मतदाता फोटो पहिचान पत्र-ईपीआईसी के अरथ ए नइ हे, कि पहिचान पत्र फर्जी हे। आयोग ह एक बयान म ए बात किहीन। एखर पहिली मीडिया के खबर म दू आने-आने राज्य म मतदाता मन के एके नंबर के मतदाता फोटो पहिचान पत्र के मुद्दा उठे रिहीस। आयोग ह ए स्पष्ट करीन कि मतदाता मनके ईपिक नंबर एक हो सकत हे, फेर जन खांख्यिकीय, विधानसभा निर्वाचन क्षेत्र अउ मतदान केंद्र जइसन आने जानकारी अलग होथे। निर्वाचन आयोग ह केहे हे कि मतदाता जउन राज्य या केंद्रशासित प्रदेस के मतदाता सूची म नामांकित हे, उंहा ओमन अपन निर्वाचन क्षेत्र म तय मतदान केंद्र म ही वोट डार सकथे। कहू अउ वोट नइ डार सकय। निर्वाचन आयोग ह यहू केहे हे कि पंजीयन होय मतदाता मन ल बिसिष्ट ईपिक नंबर देके फइसला ले गेहे।
चकरभाठा-उप तहसील
राज्य शासन ह मुंगेली जिला के गांव चकरभाठा ल उप तहसील बनाय के घोसना करे हे। एखर ले तीर-तखार के बांसठ गांव के हजारों ग्रामीण मन ल प्रशासनिक सुविधा के फासदा मिलही। चकरभाठा उप तहसील म ग्यारा पटवारी हल्का के राजस्व काम होही। एमा आरआई सर्किल टेमरी के दस अउ मुंगेली ग्रामीण के एक पटवारी हल्का ल सामिल करे गेहे। उप तहसील बने ले अब गांव के लोगन ल भू-अधिकार पत्र, नामांतरण, विभाजन, खसरा-खतौनी जइसन राजस्व काम बर जिला मुख्यालय नइ जाय बर पड़य।
खबर के मुताबिक भारतीय किसान संघ जिला मुंगेली ह चकरभाठा ल उप तहसील बनाय के मांग करे रिहीस।
माओवादी शिनाख्त
सुकमा जिला के गुंडराजगुड़े म मारे गे माओवादी के पहिचान पामेड़ एरिया कमेटी के सक्रिय महिला माओवादी सोड़ीलिंगे एसीएम अउ पुरूष माओवादी पोड़ियाम हड़मा एसीएम कैडर के रूप म होय हे। ए माओवादी मन उपर दस लाख रूपिया के इनाम घोसित रिहीस। मुठभेड़ जघा ले एक बीजीएल लॉन्चर बारह बोर के रायफल समेत बड़ मात्रा म बिस्फोटक जिनिस, नक्सल साहित्य अउ रोजमर्रा के उपयोग म अवइया कतकोन जिनिस बरामद करे गेहे।
अबूझमाड़ पीस हाफ मैराथन
नारायणपुर जिला म आज अबूझमाड़ पीस हाफ मैराथन के आयोजन करे गीस। जिला के हाईस्कूल मैदान ले बिहनिया साढ़े पांच बजे हाफ मैराथन के सुरूआत होइस, जेमा हजारों धावक मन भाग लीन। अबूझमाड़ के बासिंग म मैराथन सिराइस। एमा करीबन दस हजार धावक मन ह रजिस्ट्रेसन कराय रिहीस, जेमा देस-विदेस के एथलिट सामिल रिहीन। पीस हाफ मैराथन म उत्तर प्रदेस के धावक अक्षय कुमार ह अव्वल स्थान बनाय हे। उहें, अंतर्राष्ट्रीय धावक मनके भागीदारी म यूथोपिया के एथलिट थ्रोमस आर्ट्स ह दूसर स्थान बनाइन। महिला वरग म यूथोपिया के वटोटा ह अव्वल स्थान अउ उत्तर प्रदेस के रेणुका ह दूसर स्थान म जघा बनाइन।
वेव्स-बैटल ऑफ द बैंड्स
विश्व आडियो विजुअल अउ मनोरंजन शिखर सम्मेलन वेव्स एक ले चार मई तक मुंबई म आयोजित करे जाही। भारत पहिली घांव ए कीसम के सम्मेलन के मेजबानी करही। ए सम्मेलन के पहिली देसभर म रचनात्मक प्रतिभा ल आगू लाय बर कतकोन आयोजन करे जात हे। एमा वेव्स अब बैटल ऑफ द बैंड्स के ग्लोबल संस्करण देवत हे। एमा युवा पीढ़ी ल संगीत के सुघरइ ल बताय जाही। ए कारीकरम प्रतिभागी बैंड्स ल अपन प्रतिभा देखाय बर मंच देथे।
गबन आरोपी-गिरफ्तार
बलरामपुर जिला के जल संसाधन विभाग ह आठ करोड़ सतासी लाख रूपिया ले जादा के गबन के मामला म पुलिस ह फरार आरोपी योगेश्वर स्वरूप भटनागर ल अंबिकापुर ले गिरफ्तार कर लेहे। आरोप हवय कि तत्कालीन एसडीओ संजय कुमार ग्रायकर, वरिष्ठ लेखा लिपिक मिथलेश कुमार पांडेय, डाटा एंट्री ऑपरेटर संजीव कुमार सिंह अउ संभागीय अधिकारी नीरज अभिषेक एक्का ह बछर दू हजार बाईस म सरकारी रकम ल फर्जी दस्तावेज ले प्राइवेट खाता म ट्रांसफर कर दे रिहीस, जेमा आरोपी योगेश्वर स्वरूप भटनागर ह अपन खाता म एक करोड़ छप्पन लाख रूपिया ले रिहीस। जांच के बाद आरोपी ल गिरफ्तार करके पूछताछ करे गीस, जेमा ओह गबन म सामिल होय के बाद मंजूर करीन। एखर बाद आरोपी ल न्यायालय म पेस करे गीस। जिहां ले ओला न्यायिक रिमांड म जेल भेज दे गेहे।
समाजसेवी-एफआईआर
रईपुर पुलिस ह कथित समाजसेवी ममता शर्मा अउ ओखर पति संजय शर्मा के खिलाफ धोखाधड़ी, गाली-गलौज अउ गाड़ी हड़पे के मामला दरज करे गेहे। खड़गवा निवासी अनिल कुमार साहू ह पुलिस म धोखाधड़ी करे के सिकइत दरज कराय हे। जेखर आधार म पुलिस ह दूनों आरोपी के खिलाफ कार्रवाई सुरू करे देहे।
बीजापुर-बस सेवा
माओवाद प्रभावित बीजापुर जिला के पामेड़ समेत सात ठिन पंचायत म रद्दा रिहीस, फेर दूरिहा तक जाय बर गांव के लोगन ल बड़ परेसानी होवत रिहीस हे। अब इंहा बस सेवा सुरू होगे हे। एखर बर ए क्षेत्र के रहवइया मन ल पचास बछर अगोरा करे बर पड़िस। पहिली गांव के लोगन मन ल तेलंगाना ले होवत अपन गांव जाय बर पड़त रिहीस हे, बस सेवा सुरू होय ले अब ओमन बीजापुर ले सोज्झे पामेड़ पहुंचत हे। ए बड़े बदलाव इंहा खोले गे सुरक्षा बल के कैंप अउ राज्य सरकार कोति ले करे गे रद्दा के बढ़वार के सेति होय हे।
रमजान
रमजान के पवित्र महिना आज ले सुरू होगे। बड़ संख्या म लोगन काली रतिहा मस्जिद म बिसेस नमाज तरावीह अदा करे बर पहुंचिन। रमजान इस्लामिक कैलेंडर के नौवां महिना हे, अउ महिना के आखिर म ईद-उल-फितर मनाय जाथे। प्रधानमंत्री नरेंद्र मोदी ह रमजान सुरू होय म लोगन ल बधई दीन हे।
संजू यादव-कबड्डी चैंपियनशिप
कोरबा जिला के केरा कछार-पाली गांव के कबड्डी खिलाड़ी संजू यादव के चयन भारतीय टीम म एशियन कबड्डी चैंपियनसिप बर होय हे। संजू यादव अंतर्राष्ट्रीय स्तर म खेलइया छत्तीसगढ़ के पहिली कबड्डी खिलाड़ी बन गेहे। चार ले नौ मार्च के तक ईरान के तेहरान म होवइया ए प्रतियोगिता म संजू भारतीय टीम म भाग लिही। मुख्यमंत्री विष्णुदेव साय ह संजू यादव ल एखर बर बधई अउ सुभकामना दीन हे।
अब मौसम के हाल…
मौसम विभाग ले मिले जानकारी के मुताबिक प्रदेस के तापमान म एक घांव फेर थोरिक गिरावट के दउर सुरू हो सकत हे। मौसम विज्ञानी एच.पी. चंद्रा ह बतइन कि काली तीन मार्च ले दक्षिण ले हवा के अवई कमजोर होय के संभावना हे, जेखर परभाव ले प्रदेस म न्यूनतम अउ अधिकतम तापमान म कोनो बिसेस फेरबदल होय के संभावना नइ हे। फेर तापमान म थोरिक गिरावट सुरू हो सकत हे, जउन पांच मार्च तक रहे के संभावना जताय गेहे।