प्रधानमंत्री पारदर्शी कर प्रणाली
प्रधानमंत्री नरेंद्र मोदी ह आज ईमानदार करदाता मन ल सम्मानित करइया पारदर्शी कर प्रणाली के प्लेटफार्म के वीडियो काॅन्फे्रसिंग ले उद्घाटन करीन। ओमन कहिन हे कि एखर ले भारतीय कर प्रणाली म सुधार करे अउ एला सरल बनाये म मदद मिलही। प्रधानमंत्री कीहिन हे कि ईमानदार करदाता मनके राष्ट्र निर्माण म विशेष भूमिका हे।
प्रधानमंत्री ह कीहिन हे कि सरकार डहार ले करे गे सुधार ले पाछू छै-सात साल म रिटर्न फाइल करइया मनके संख्या करीबन ढाई करोड़ बाढ़ गेहे। ओमन यहू कीहिन हे कि कर के दर म बड़ मात्रा म कमी करे गेहे। अउ बिना काम के कागजी कार्रवाई ल घलो खतम कर दे गेहे।
उंहें विवाद ले विश्वास योजना के उल्लेख करत प्रधानमंत्री ह कीहिन कि ए योजना के लक्ष्य जादातार मामला ल न्यायालय के बाहिर सुलझाना हे। ओमन ह फेसलेस असेसमेंट यानि करदाता अउ जांच अधिकारी के पहिचान गुप्त राखे के बेवस्था के घलो बात करत कीहिन कि एखर ले करदाता आश्वस्त हो सकही कि विभाग डहार ले कोनो प्रकार के छानबीन निष्पक्ष, शिष्ट अउ तर्कसंगत तरीका ले करे जाही। प्रत्यक्ष कर के दिशा म करे जावत सुधार के उल्लेख करत प्रधानमंत्री कीहिन कि जीएसटी ह देश म सबले बड़ा कर सुधार आय।
इलेक्ट्रिक वाहन पंजीकरण/बिक्री
केंद्रीय सड़क परिवहन अउ राजमार्ग मंत्रालय ह बिना बैटरी के घलो इलेक्ट्रिक गाड़ी के पंजीकरण अउ बिक्री के मंजूरी दे देहे। जम्मों राज्य अउ केंद्र शासित प्रदेश के परिवहन सचिव मन ल लिखे चिट्ठी म मंत्रालय ह स्पष्ट करे हे कि जांच एजेंसी के प्रमाण-पत्र के आधार म बिना बैटरी वाले वाहन के बिक्री अउ पंजीकरण करे जा सकत हे। चिट्ठी म केहे गेहे कि पंजीकरण बर बैटरी के निर्माण, प्रकार या फेर अउ कोनो जानकारी देके जरूरत नइ हे ।
ृ खबर के मुताबिक देश म इलेक्ट्रिक गाड़ी ल बढ़ावा देके परयास करत हे। मंत्रालय ह केहे हे कि गाड़ी ले होवइया प्रदूषण अउ तेल आयात म कमी करे बर मिलके काम करे के बेरा आगे हे।
कोरोना मरीज
छत्तीसगढ़ म कोरोना संक्रमण के मामला सरलग बाढ़त हे। आज घलो आने आने जिला ले कोरोना संक्रमित नवा मरीज मिले के पुष्टि होय हे।
दुर्ग जिला म आज बीहनिया मिले रिपोर्ट के मुताबिक बारा नवा कोरोना संक्रमित मरीज मिले हे। एमा भिलाई के एके परिवार के चार झिन सदस्य सामिल हे।
उंहें रायगढ़ जिला म छठवीं बटालियन के करीबन चैदा झिन जवान कोरोना संक्रमित पाए गेहे।
एति जांजगीर-चंापा जिला के कोरोना संक्रमित एक झिन माइलोगिन के बिलासपुर सिम्स म इलाज के दउरान मउत होगे।
राज्य म काली रतिहा तक कोरोना संक्रमण केपांच सौ सड़सठ नवा मामला आगू आय रीहिस। एमा एक सौ बयासी मरीज रायपुर जिला ले मिले रीहिस। उंहें काली रायपुर म तीन अउ दुर्ग म दू मरीज समेत पांच झिन मनखे के मउत होगे रीहिस।
कोरोना जांच
राज्य सरकार प्रदेश म कोरोना वायरस जांच के सुविधा सरलग बढ़ावत हे। राज्य म हरएक दिन अब करीबन ग्यारा हजार कोरोना संदिग्ध मरीज मनके सैंपल ले जात हे। एम्स अस्पताल म रायपुर के संगेसंग प्रदेश के जम्मों छै सरकारी मेडिकल कालेज मन म आरटी-पीसीआर अउ सोला केंद्र म ट्रू नाॅट मशीन ले अउ जम्मों जिला मन म रैपिड एंटीजन किट ले सैंपल के जांच करे जावत हे।
कोरोना वायरस के चिन्हारी बर राज्य म पाछू गयारा अगस्त तक कुल तीन लाख अठासी हजार ले जादा सैंपल जांच बर ले गेहे।
प्रदेश म कोरोना वायरस के बिना लक्षण अउ हल्का लक्षण वाले मरीज मनके इलाज बर राज्य के एक सौ छिहत्तर कोविड केयर सेंटर म बीस हजार सात सौ पचास बिस्तर के बेवस्था करे गेहे। उंहें गंभीर मरीज मन बर चार सौ उनयासी वेंटीलेटर्स के संग चार सौ पैंतालिस आईसीयू अउ दू सौ छियानवे एच.डी.यू. बिस्तर के बेवस्था करे गेहे। एखरे संग स्वास्थ्य विभाग डहार ले संचालित एक सौ छियासठ क्वारंटाइन सेंटर म चार हजार दू सौ इकसठ बिस्तर के बेवस्था करे गेहे। संगेसंग रायपुर अउ बिलासपुर जिला म कोनो कोनो निजी अस्पताल म घलो कोरोना वायरस ले संक्रमित मरीज मनके इलाज के अनुमति दे गेहे।
स्वतंत्रता दिवस तैयारी
प्रदेश के जम्मों जिला म स्वतंत्रता दिवस के आयोजन के तियारी पूरा होगे हे। रायपुर समेत जम्मों जिला मुख्यालय म आज फुल ड्रेस रिहर्सल करे गीस।
उंहें जगदलपुर, दुर्ग समेत आने आने जिला मनले स्वतंत्रता दिवस के तियारी के खबर मिले हे। खबर के मुताबिक राज्य सरकार ह ए बछर कोरोना संक्रमण ल धियान म राखत विशेष सावधानी राखे के निर्देश दीन हे। सामान्य प्रशासन विभाग डहार ले जारी आदेश के मुताबिक राज्य, जिला, ब्लाॅक अउ पंचायत स्तर म होवइया कार्यक्रम म स्कूली लईका मन ल इकट्ठा नइ करे के संगेसग सांस्कृतिक कार्यक्रम घलो नइ करे जाही। उंहें तहसील अउ जनपद स्तर म घलो सार्वजनिक समारोह नइ करे जाही। स्वतंत्रता दिवस म होवइया कार्यक्रम म अवइया लोगन मन ल मास्क पहिरना अउ सामाजिक दूरी के पालन करना जरूरी होही।
कोविड स्पेशल फोर्स
राजधानी रायपुर म जिला प्रशासन ह कोरोना वायरस संक्रमण ले बचाव बर जागरूकता अभियान चलावत हे। ए अभियान म स्वयंसेवी संस्था घलो मदद बर आगू आवत हे। अभियान म जिला प्रशासन के कोविड स्पेशल फोर्स बाजार, गली-मोहल्ला अउ आवासीय परिसर म जाके लोगन मन ल मास्क लगाये के संगेसंग सोशल डिस्टेंसिंग के नियम के पालन करे के संदेस देवत हे।
पत्रकार सम्मान
मुख्यमंत्री भूपेश बघेल ह काली रायपुर म होवइया एक ठिन कार्यक्रम म वरिष्ठ पत्रकार ई.वी. मुरली ल वसुंधरा सम्मान ले सम्मानित करही। ये कार्यक्रम म लोक जागरण के पत्रिका वसुंधरा के उनचासवंा अंक के लोकार्पण घलो करे जाही।
खबर के मुताबिक स्वर्गीय देवीप्रसाद चैबे के सुरता म राखे गे ये सम्मान पाछू बीस बछर ले लोक जागरण बर दे जावत हे।
होम हर्बल गार्डन योजना
राज्य म चलाए जावत लोक स्वास्थ्य परंपरा संवर्धन अभियान म निशुल्क म दवई वाले पौधा बांटे के काम चलत हे। इही कड़ी म आज अउ काली बिलासपुर जिला के संजीवनी मार्ट वन कार्यालय परिसर म बीहनिया ग्यारा बजे ले संझा चार बजे तक जीवन रक्षक औषधीय पौधा बांटे जाही।
खबर के मुताबिक ए योजना के तहत गिलोय, अडूसा, तुलसी, पीपली, अश्वगंधा, सहजन, घृतकुमारी, आंवला अउ सतावर जइसन आने आने कई ठिन जीवनरक्षक औषधीय पौधा बांटे जात हे।
मौसम
प्रदेश म अवइया चैबीस घंटा के दउरान कतकोन जगा म हल्का ले मध्यम बरसा होय के संभावना हे। उंहें कुछएक जगा म गरज-चमक के संग सीटीर साटर पानी गिर सकत हे।
मौसम विभाग ले मिले खबर के मुताबिक उत्तर-पश्चिम बंगाल के खाड़ी अउ ओडिशा के तटीय क्षेत्र म बने कमती दबाव के सेती अवइया चैबीस घंटा के दउरान प्रदेश के उत्तरी हिस्सा म एक-दू जगा म झमाझम बरसा होय के संभावना हे।
मनरेगा
राज्य के ग्रामीण अउ पशुधन विकास विभाग अब चारागाह बनाये के काम ल मिलके करही। केंद्रीय ग्रामीण विकास, पशुपालन अउ डेयरी विभाग डहार ले एखर बर संयुक्त दिशा-निर्देश जारी करे हे। राज्य मनरेगा आयुक्त कार्यालय ह जम्मों कलेक्टर मन ल परिपत्र जारी करके मनरेगा के तहत चारागाह, पशुधन अउ डेयरी विकास के काम ल प्राथमिकता ले सामिल करे के निर्देश देहे।
अउ अब थोरकुन समाचार सार म-
– राज्य सरकार ह समाज कल्याण विभाग के आठ झिन अधिकारी मनके नवा पदस्थापना के आदेश जारी करे हे।
– दुर्ग संभाग के आयुक्त टी.सी. महावर ह आज राज्य सहकारी दुग्ध महासंघ मर्यादित रायपुर के प्राधिकृत अधिकारी के पदभार घलो लीन।
– कोंडागांव जिला के राष्ट्रीय राजमार्ग क्रमांक तीस म आवराभाटा के तीर होय सड़क दुर्घटना म तीन मनखे मनके मउत होगे।
अउ
– जांजगीर चंापा जिला म कीटनाशक बिक्री म उन्नीस करोड़ रूपिया के धोखाधड़ी के मामला म कंपनी के दू झिन अधिकारी ल पुलिस ह तीन दिन के रिमंाड म लेहे।