देसभर म आज ले जनऔषधि जनचेतना सप्ताह के सुरूआत होइस। ए कारीकरम सात मार्च तक चलही। ए मउका म आज नई दिल्ली म केंद्रीय स्वास्थ्य अउ परिवार कल्याण मंत्री जगत प्रकाश नड्डा ह प्रधानमंत्री भारतीय जनऔषधि परियोजना के रथ अउ दस दूसर वाहन ल झंडा दिखाके रवाना करीन। श्री नड्डा ह लोगन ले प्रधानमंत्री भारतीय जनऔषधि परियोजना ल जनआंदोलन बनाय के आग्रह करीन।
प्रधानमंत्री-कृषि-ग्रामीण समृध्दि
प्रधानमंत्री नरेंद्र मोदी ह किहीन कि ए बछर के केंद्रीय बजट के उद्देस्य कृषि क्षेत्र ल जादा समृध्द बनाना हे। प्रधानमंत्री ह आज कृषि अउ ग्रामीण समृध्दि उपर बजट के बाद वेबीनार म किहीन कि देस के विकसित भारत के लक्ष्य डहार बढ़े के संकल्प स्पष्ट हवय। ओमन किहीन कि कृषि ल विकास के पहिली इंजन मानत सरकार ह किसान मन ल गौरव के जघा देहे। श्री मोदी ह किहीन कि सरकार ह केंद्रीय बजट म ‘पीएम धन धान्य कृषि योजना‘ के घोसना करे हे, जेमा देस म सबले कम कृषि उत्पादकता वाले सौ ठन जिला के विकास बर धियान केंद्रित करे जाही। श्री मोदी ह किहीन कि ए ह ‘‘बीज से बाजार तक‘‘ जइसन कारीकरम के सरकार के पहल के माध्यम ले संभव होय हे।
प्रधानमंत्री ह यहू किहीन कि फल अउ सब्जी मनके उत्पादन ल बढ़ाय बर कतकोन कारीकरम लागू करे जावत हे।
महापौर/पार्षद-शपथ ग्रहण
नगर पालिक निगम जगदलपुर के नवनिर्वाचित महापौर संजय पांडेय संघरा तीस झन पार्षद मन ह आज पद अउ गोपनीयता के सपथ लीन। सपथ ग्रहण समारोह के मुख्य अतिथि उप मुख्यमंत्री अरूण साव ह नवनिर्वाचित महापौर अउ पार्षद मन ल बधई देवत किहीन कि आपमन सबो झन ल मिलजुलके जगदलपुर ल विकास के नवा ऊंचाई तक पहुंचाना हे। कारीकरम म वनमंत्री केदार कश्यप, सांसद महेश कश्यप अउ विधायक किरण सिंह देव मौजूद रिहीन।
उहें, धमतरी नगर पालिक निगम के नवनिर्वाचित महापौर रामू रोहरा अउ चालीस झन पार्षद मन घलो आज पद के सपथ लीन। राजस्व मंत्री टंकराम वर्मा के मौजूदगी म होवत कारीकरम म कलेक्टर नम्रता गांधी ह जनप्रतिनिधि मन ल सपथ देवाइन।
अइसने, दुरूग नगर पालिक निगम के नवनिर्वाचित महापौर अल्का बाघमार अउ साठ झन पार्षद मन ल कलेक्टर ऋचा प्रकाश चौधरी ह पद अउ गोपनीयता के सपथ देवाइन। ए मउका म उपमुख्यमंत्री विजय शर्मा अउ सांसद विजय बघेल घलो मौजूद रिहीन।
मुख्यमंत्री-छत्तीसगढ़ राजभाषा सम्मेलन
मुख्यमंत्री विष्णुदेव साय ह आज रईपुर म राखे गे छत्तीसगढ़ राजभाषा आयोग के आठवां प्रांतीय सम्मेलन म सामिल होइन। कारीकरम म मुख्यमंत्री ह किहीन कि राज्य सरकार छत्तीसगढ़ी भाखा के विकास बर संकल्पित हे। सरकार के परयास हे कि हमर भाखा बोली के मान बढ़य अउ छत्तीसगढ़वासी मन ह अपन भाखा उपर गर्व करय। ओमन किहीन कि छत्तीसगढ़ म जउन साहित्य के रचना होवत हे, ओला स्कूल के पुस्तकालय तक पहुंचाय के परयास करे जाही। ए मउका म छत्तीसगढ़ी भाखा म साहित्य के रचना करइया साहित्यकार मनके सम्मान घलो होइस।
अरूण साव-बैठक
नगरीय प्रशासन मंत्री अरूण साव ह प्रदेस के सबो नगरीय निकाय ल केंद्रीय आवासन अउ सहरी कार्य मंत्रालय के ‘‘स्वच्छ सर्वेक्षण-दू हजार चौबीस‘‘ म अच्छा रैंकिंग पाय बर पूरा तियारी राखे के निरदेस दीन हे। श्री साव ह काली रईपुर म राखे गे विभागीय समीक्षा बइठका म किहीन कि ए महिला के पहिली हफ्ता म सर्वेक्षण दल डहार ले नगरीय निकाय म ओडीएफ अउ जीएफसी प्रमाणीकरण के काम सुरू करे जाही। श्री साव ह सर्वेक्षण के दउरान मूल्यांकन के सब्बो बिन्दु उपर जरूरी तियारी राखे बर किहीन। ओमन किहीन कि एमा कोनो तरीका के लापरवाही बर्दास्त नइ करे जाही। श्री साव ह सब्बो नगरीय निकाय ल पंद्रह दिन के अंदर सिटी डेवलपमेंट प्लांट बनाके संचालनालय ल भेजे बर निरदेस दीन हे।
एकलव्य आदर्श आवासीय विद्यालय-परीक्षा
प्रदेस म चलत एकलव्य आदर्स आवासीय विद्यालय म अवइया शिक्षा सत्र म कक्षा छठवीं म भर्ती बर परीक्षा काली दू मार्च के होही। ए परीक्षा बिहनिया दस बजे ले मंझनिया बारह बजे तक होही। जेखर बर प्रदेस के छब्बीस ठन जिला म एक सौ इंक्यावन केंद्र बनाय गे हवय। परीक्षा म सामिल होय बर करीबन बयालिस हजार लइका मन ह पंजीयन कराय हे।
माओवादी मुठभेड़
सुकमा जिला म आज सुरक्षा बल संग होय मुठभेड़ म एक महिला संघरा दू झन माओवादी मन मारे गेहे। जिला के पुलिस अधीक्षक किरण चौहान ह बतइन कि किस्टाराम इलाका म बड़ संख्या म माओवादी मनके मौजूदगी के सूचना मिले के बाद डिस्ट्रिक्ट रिजर्व गार्ड-डीआरजी अउ कोबरा बटालियन के संयुक्त टीम रवाना होय रिहीस। इही दउरान गुंडराजगुंडेम जंगल तीर पहिली ले घात लगाके बइठे माओवादी मन ह जवान मन उपर फायरिंग सुरू कर दीन। सुरक्षा बल डहार ले करे गे जवाबी कार्रवाई के बाद माओवादी मन ह जंगल के फायदा उठाके भाग गीन। बाद म मउका के तलासी म सुरक्षा बल ह दू झन माओवादी मनके सव ल बरामद करीन। संगेसंग हथियार अउ माओवादी जिनिस घलो जब्त करे गेहे। इलाका म अभी घलो सर्च अभियान जारी हे।
रमजान
हिजरी साल चौदह सौ छियालीस के रमजानुल मुबारक के पहिली रोजा काली दू मार्च के होही। छत्तीसगढ़ अउ पडो़सी राज्य म कोनो जघा चांद नइ दिखे के सेति पहिली रोजा काली दू मार्च के राखे जाही अउ पहला तरावीह के नमाज़ अदा करे जाही।
अबूझमाड़ पीस हाफ मैराथन
नारायणपुर जिला म काली दू मार्च के अबूझमाड़ पीस हाफ मैराथन के आयोजन करे जाही। ए मैराथन नारायणपुर के परेड मैदान ले बिहनिया साढ़े पांच बजे ले सुरू होही। खेल अउ युवा कल्याण विभाग, जिला प्रशासन, भिलाई स्टील प्लांट, एनएमडीसी अउ दूसर संस्थान के मदद ले ए मैराथन म बड़ संख्या म धावक मन सामिल होही। इक्कीस, दस अउ पांच किलो मीटर लंबा मैराथन के विजेता मन ल पंद्रह लाख चौरासी हजार रूपिया के पुरस्कार दे जाही।
एक्सआर क्रिएटर हैकथॉन
क्रिएट इन इंडिया चैलेंज सीजन-एक म ‘एक्सआर क्रिएटर हैकथॉन‘ के आयोजन काली अट्ठाईस फरवरी के इंदौर म करे गीस। ए हैकथॉन म आने-आने सत्र के माध्यम ले वेव समिट दू हजार पच्चीस, ऑगमेंटेड रियलिटी, वर्चुअल रियलिटी अउ मिक्स्ड रियलिटी के बारे म विस्तार ले जानकारी दीन। कारीकरम म बिसेसज्ञ वक्ता के रूप म ओटीटीएनओ डॉट टेक के सह संस्थापक शिखा मेहता अउ एक्वानेमस टेक के संस्थापक उर्जित दवे सामिल होइन। सूचना अउ प्रसारण मंत्रालय के मदद ले वेवलैप्स, एक्सडीजी अउ भारत एक्सआर डहार ले आयोजित ए हैकथॉन के उद्देस्य एक्सटेंडेड रियलिटी प्रौद्योगिकी म नवाचार ल बढ़ावा देना हे। हैकथॉन म बताय गे हवय कि विश्व ऑडियो विजुअल अउ मनोरंजन शिखर सम्मेलन अवइया एक ले चार मई तक मुंबई म होही।
वेव्स कॉमिक क्रॉनिकल्स प्रतियोगिता म भाग लेबर प्रतिभागी मन ह पंद्रह मार्च तक पंजीयन करा सकत हे। इंटरनेट एंड मोबाइल एसोसिएसन ऑफ इंडिया डहार ले सूचना अउ प्रसारण मंत्रालय के मदद ले होवत ए प्रतियोगिता म बड़ संख्या म पंजीकरण होगे हवय। प्रतियोगिता म पहिली, दूसर अउ तीसर स्थान लेवइया विजेता मन ल वेव्स शिखर सम्मेलन म अपन कॉमिक प्रस्तुत करे के मउका मिलही। उहें, पच्चीस झिन प्रतिभागी मन ल गूगल प्ले अउ डैशटून डहार ले राखे गे एक गुडी बैगे के संगेच उत्कृष्टता अउ मान्यता के प्रमाण पत्र दे जाही।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म काली दू मार्च के मंत्रालय म राज्य मंत्रिपरिषद के बइठका होही।
– गरियाबंद जिला के चिचिंया गांव के प्रगतिसील किसान अवनीश पात्र ल भारतीय कृषि अनुसंधान परिषद-आईसीएआर डहार ले नई दिल्ली म आयोजित कृषि विज्ञान मेला म नवोन्मेषी किसान के रूप म सम्मानित करे गेहे।
– रईपुर के चंगोराभाठा क्षेत्र म काली रतिहा सड़क म केक काटके जनमदिन मनाय अउ आतिशबाजी करे के मामला म डीडी नगर थाना पुलिस ह रईपुर महापौर मीनल चौबे के बेटा समेत पंद्रह झन लोगन मनके खिलाफ अपराध दर्ज करे हे।
अउ
– रायगढ़ जिला के पुसौर विकासखंड के गांव रेंगालपाली म खेत म कीटनासक दवई छिडके के दउरान करंट के चपेट म आय ले दू झन मनखे के मउत होगे।