राज्य विधानसभा के बजट सत्र के चौथा दिन आज वित्त मंत्री ओपी चौधरी ह आर्थिक सर्वेक्षण दू हजार चौबीस-पच्चीस ल सदन के पटल म रखिन। आर्थिक सर्वेक्षण म एसो छत्तीसगढ़ के आर्थिक बढ़वार दर सात दसमलव पांच एक प्रतिसत रहे के अनुमान लगाय गेहे। सर्वेक्षण म छत्तीसगढ़ के कुल आर्थिक उत्पादन माने सकल राज्य घरेलू उत्पाद-जीएसडीपी म एसो बने बढ़वार देखे बर मिल सकत हे। पाछू बछर राज्य के जीएसडीपी तीन लाख छै हजार करोड़ रूपिया ले जादा रिहीस। उहें, एसो तीन लाख उनतीस हजार करोड़ रूपिया तक पहुंचे के संभावना हरय। आर्थिक सर्वे म एसो उद्योग क्षेत्र म छै दसमलव नौ दू प्रतिसत के बढ़वार होय के संभावना हरय।
वित्त मंत्री ओपी चौधरी ह बतइन कि ए बछर कृषि, पशुपालन अउ वन क्षेत्र म पांच दसमलव तीन आठ प्रतिसत के बढ़वार होय के अनुमान हे। एखर ले किसान मनके आमदनी बाढ़ही अउ ग्रामीण अर्थव्यवस्था मजबूत होही। ओमन बतइन कि बैंकिंग, टूरिज्म अउ आईटी सेक्टर म बड़ उछाल देखे बर मिल सकत हे। एखर संगेसंग ए बछर सेवा क्षेत्र म आठ दसमलव पांच-चार प्रतिसत के बढ़वार होय के अनुमान हे। वित्त मंत्री ह किहीन कि राज्य म प्रति व्यक्ति आय म नौ दसमलव तीन-सात प्रतिसत के वृध्दि दर हे। उहें, देस म प्रति व्यक्ति आय वृध्दि दर आठ दसमलव छै-छै प्रतिसत रेहे हे।
विधानसभा-कांग्रेस प्रदर्शन
विधानसभा म आज नेता प्रतिपक्ष डॉक्टर चरणदास महंत अउ आने कांग्रेस विधायक मन ह प्रश्नकाल म कांग्रेस प्रदेस अध्यक्ष दीपक बैज के घर रेकी कराय के मुद्दा उठाइन। ए मुद्दा म सत्ता पक्ष अउ विपक्ष के बीच हंगामा सुरू होगे। जेखर बाद विधानसभा अध्यक्ष डॉक्टर रमन सिंह ह सदन के कार्रवाही दस मिनट बर स्थगित कर दीन। सदन के कार्रवाई, फेर ले सुरू होइस त, कांग्रेस विधायक गर्भगृह म पहुंच के नाराबाजी करे लगिस। जेखर ले ओमन खुदे निलंबित होगे। पाछू विधानसभा अध्यक्ष ह विधायक मनके निलंबन खतम करीन। एखर बाद घलो कांग्रेस के विधायक सदन के कार्रवाही म सामिल नइ होइन अउ सदन के बाहिर गांधीजी के प्रतिमा के आगू प्रदर्सन करीन।
विधानसभा म आज भाजपा विधायक रिकेश सेन ह रीवा-बिलासपुर एक्सप्रेस ल दुरूग तक चलाय बर अशासकीय संकल्प ल सदन के पटल म राखिन, जेला विपक्ष के अनुपस्थिति म सर्वसम्मति ले पास कर दे गीस। एखर संगेसंग ओमन दुर्ग नौतनवा ट्रेन ल अयोध्या होके चलाय बर अशासकीय संकल्प लाइन, वहू ल सर्वसम्मति ले पारित कर दे गीस।
उहें, सदन म आज राज्यपाल के अभिभाषण म धन्यवाद प्रस्ताव म चर्चा होइस, जेमा मुख्यमंत्री विष्णुदेव साय, विधायक किरण सिंह देव, पुन्नूलाल मोहले अउ आने भाजपा विधायक सामिल होइन।
विधानसभा-साइबर ठगी
विधानसभा म आज डिजीटल अरेस्ट अउ साइबर ठगी के मामला गुंजिस। भाजपा विधायक अजय चंद्राकर ह साइबर ठगी के रकम के संगेसंग पीड़ित मन ल लहुटाय गे रकम म सवाल करीन। एमा गृहमंत्री विजय शर्मा ह बतइन कि एक सौ अड़सठ करोड़ रूपिया के ठगी के रकम म करीबन पांच करोड़ बीस लाख रूपिया के रकम पीड़ित मन ल लहुटाय गेहे। गृहमंत्री ह बतइन कि डिजीटल अरेस्ट के बारह प्रकरण आगू आय हे, अउ ए सबो प्रकरण म कार्रवाई करे गेहे।
गृहमंत्री ह किहीन कि डिजीटल ट्रांजिक्सन के संगेसंग साइबर क्राइम घलो बाढ़हे हे। राज्य म जउन मामला कार्रवाई बर बांचे हे, ओखर खिलाफ जल्दी कार्रवाई करे जाही। गृहमंत्री ह बतइन कि पांच संभाग रेंज म थाना ल साइबर थाना म बढ़वार करे गेहे। सबो थाना म साइबर सेल खोले जात हे। इंडियन साइबर क्राइम सेंटर ले एक सौ उनतीस लोगन ल परसिक्षित करे गेहे।
माओवादी-गिरफ्तार
बीजापुर जिला म सुरक्षा बल ह आने-आने जघा ले अट्ठारा झिन माओवादी मन ल गिरफ्तार करे हे। खबर के मुताबिक केंद्रीय रिजर्व पुलिस बल- सीआरपीएफ के टीम तलासी अभियान म निकले रिहीस। इही दउरान गुंजेपर्ती के जंगल ले दस झिन माओवादी मन ल गिरफ्तार करे गीस। उहें, इही जिला के बासागुड़ा थाना क्षेत्र के कोबरा बटालियन के टीम ह जब जंगल म कुछेक संदिग्ध लोगन ले पूछताछ करीन त, उंखर माओवादी होय के पता चलिन। एखर बादे सात झिन माओवादी ल गिरफ्तार करे गीस। उंखर तीर ले दू ठन टिफिन बम अउ आने बिस्फोटक जिनिस बरामद करे गेहे। अइसने भैरमगढ़ क्षेत्र म घलो सुरक्षा बल ह एक झिन माओवादी ल गिरफ्तार करे हे।
दूसर कोति, बीजापुर जिला म ही तीन झिन माओवादी मन ह आत्मसमर्पण करे हे। जिला के डीएसपी शरद जायसवाल ह बतइन कि ए माओवादी मन ल पच्चीस-पच्चीस हजार रूपिया के प्रोत्साहन रासि दे गेहे।
उहें, सुकमा जिला म घलो एक माओवादी दंपत्ति समेत सात झिन ईनामी माओवादी मन ह आत्मसमर्पण करीन हे। ए माओवादी म दू पुरूष अउ एक महिला माओवादी उपर आठ-आठ लाख रूपिया, एक महिला अउ तीन पुरूष माओवादी उपर दू-दू लाख रूपिया के इनाम घोसित रिहीस। ए कीसम ले ए माओवादी मन उपर कुल बत्तीस लाख रूपिया के इनाम रिहीस।
हाईकोर्ट-मेडिकल स्नातकोत्तर रद्द
छत्तीसगढ़ उच्च न्यायालय ह प्रदेस म मेडिकल स्नातकोत्तर-पीजी म प्रवेस के प्रक्रिया ल निरस्त कर दे गेहे। प्रवेस के काम म गड़बड़ी ल लेके दायर याचिका म सुनवाई के बाद हाईकोर्ट ह मेडिकल पीजी म नवा सिरा ले दाखिला के काम सुरू करे अउ एखर फायदा सबो संबंधित उम्मीदवार मन ल देके आदेस जारी कर देहे। याचिका म सुनवाई न्यायाधीस रमेश सिन्हा अउ न्यायामूर्ति रविन्द्र कुमार अग्रवाल के डिवीजन बेंच म होइस। मेडिकल पीजी म दाखिला ल लेके डॉक्टर यशवंत राव अउ डॉक्टर पी. राजशेखर ह हाईकोर्ट म याचिका दायर करे रिहीन। ओमन अपन याचिका म केहे हे कि अधिकारी मन ह सेवा अवधि के गणना कटऑफ तारीख के बाद तक बढ़ा दीन। एखर ले अइसन उम्मीदवार मन ल घलो सेवारत श्रेणी म सामिल कर ले गीस, जउन एखर पात्र नइ रिहीस। ए मामला म सिकइत होय के बाद कोनो कीसम के कार्रवाई नइ होय म हाईकोर्ट म याचिका दायर करे गे रिहीस।
बोर्ड परीक्षा
छत्तीसगढ़ माध्यमिक शिक्षा मंडल के दसवीं अउ बारहवीं बोर्ड परीक्षा काली एक मार्च ले सुरू होही। एखर बर सबो जरूरी तियारी पूरा कर ले गेहे। बारहवीं बोर्ड के परीक्षा एक मार्च ले सुरू होके अट्ठाईस मार्च तक चलही। उहें, दसवीं बोर्ड के परीक्षा तीन मार्च ले चौबीस मार्च तक चलही। ए परीक्षा बिहनिया नौ बजे ले सवा बारह बजे तक होही।
राष्ट्रीय विज्ञान दिवस
आज राष्ट्रीय विज्ञान दिवस मनाय जात हे। प्रधानमंत्री नरेंद्र मोदी ह राष्ट्रीय विज्ञान दिवस के मउका म सबो ल सुभकामना दीन हे। छत्तीसगढ़ के मुख्यमंत्री विष्णुदेव साय ह आज जशपुर जिला के बगिया म राखे गे कारीकरम म युवा मन ल विज्ञान अउ नवाचार ले विकसित भारत के निर्माण म योगदान दे खातिर प्रेरित करीन।
उहें, रईपुर के शासकीय छत्तीसगढ़ कालेज म विकसित भारत के लिए स्वदेसी तकनीक बिसय म गोठबात के संग वाद-विवाद अउ चित्रकला प्रतियोगिता राखे गीस।
बिलासपुर-शपथ ग्रहण
बिलासपुर के नवा बने महापौर पूजा विधानी अउ पार्षद मन ह आज बिलासपुर के मुंगेली नाका मैदान म पद अउ गोपनीयता के सपथ लीन। कलेक्टर अवनीश शरण ह महापौर अउ सबो पार्षद मन ल सपथ देवाइन। कारीकरम म उपमुख्यमंत्री अरूण साव, केंद्रीय सहरी विकास राज्य मंत्री तोखन साहू, भाजपा के राष्ट्रीय प्रवक्ता प्रेम शुक्ला, विधायक धरमलाल कौशिक, अमर अग्रवाल, धरमजीत सिंह, सुशांत शुक्ला अउ भाजपा के प्रदेस उपाध्यक्ष भूपेन्द्र सवन्नी समेत कतकोन बड़का नेता मौजूद रिहीन।
बातों-बातों में