महाकुंभ ल एकता के महायज्ञ बतात हुए प्रधानमंत्री नरेंद्र मोदी ह आज किहीन कि भारत ल अपन विरासत उपर गरब हे अउ ओ ह नवा ऊर्जा के संग आगू बाढ़त हे। प्रधानमंत्री ह प्रयागराज महाकुंभ के सफलता के सराहना करत हुए किहीन कि ए आधुनिक प्रबंधन पेसेवर अउ नीति बिसेसज्ञ बर पढ़े के बिसय हे। ओमन किहीन कि दूनिया म कहू भी अतना बड़े पैमाना के कोनो आयोजन नइ होय हे। ए ब्लाग पोस्ट म श्री मोदी ह किहीन कि दूनिया ह आश्चर्य ले देखिस कि कइसे तेरह करोड़ लोगन प्रयागराज म संगम के तट म संघरा होइन, फेर लोगन मन ल कोनो औपचारिक निमंत्रण नइ मिले रिहीस। एखर बावजूद करोड़ो लोगन मन अपन मर्जी ले महाकुंभ आइन अउ संगम म पवित्र स्नान करीन। प्रधानमंत्री ह किहीन कि माईलोगन, सियान, दिव्यांग मनके संग लोगन मन ह संगम तक पहुंचे के रद्दा ढूंढ लीन।
महापौर/पार्षद-शपथ
मुख्यमंत्री विष्णुदेव साय के मौजूदगी म आज रईपुर के नवनियुक्त महापौर मीनल चौबे अउ सत्तर पार्षद ह पद अउ गोपनीयता के सपथ लीन। राजधानी रईपुर के इंडोर स्टेडियम म आयोजित सपथ ग्रहण समारोह म कलेक्टर डॉक्टर गौरव कुमार सिंह ह सबले पहिली महापौर अउ एखर बाद पार्षद मन ल सपथ दिलाइन। कारीकरम म मुख्य अतिथि के रूप म मुख्यमंत्री विष्णुदेव साय मौजूद रिहीन। उहें, विधानसभा अध्यक्ष डॉक्टर रमन सिंह ह कारीकरम के अध्यक्षता करीन। अतिविशिष्ट अतिथि के रूप म उप मुख्यमंत्री अरूण साव अउ विजय शर्मा, केंद्रीय राज्यमंत्री तोखन साहू, सांसद बृजमोहन अग्रवाल, मंत्री केदार कश्यप, रामविचार नेताम अउ ओपी चौधरी उपस्थित रिहीन। उहें, विशिष्ट अतिथि के रूप म प्रदेस भाजपा अध्यक्ष किरण सिंह देव के संग रईपुर विधानसभा क्षेत्र के विधायक मन मौजूद रिहीन।
बिलासपुर नगर निगम के नवनिर्वाचित महापौर पूजा विधानी अउ पार्षद काली सपथ लिही।
उहें, कोरबा नगर निगम के नव नियुक्त महापौर संजुदेवी राजपुत तीन मार्च के सपथ ग्रहण करही। सपथ ग्रहण समारोह म नवनिर्वाचित पार्षद मन ल घलो सपथ दिलाय जाही।
राज्यपाल-सहायता राशि
राज्यपाल रमेन डेका ह आज राजभवन म होवइया कारीकरम म स्वेच्छा अनुदान मद ले रैनबसेरा निर्माण बीमार सियान मनके देखभाल, दृष्टिबाधित लइका, दिव्यांग अउ वनवासी मनके कल्याण बर काम करत आने-आने संस्था मन ल पंद्रह लाख इकतीस हजार रूपिया के आर्थिक सहायता रासि दीन। एखर अलावा राज्यपाल ह धमतरी, राजनांदगांव, गरियाबंद अउ बस्तर जिला के टी.बी. मरीज मन बर घलो दू लाख पच्चीस हजार रूपिया के आर्थिक सहायता दीन।
ए बेरा म राज्यपाल ह किहीन कि प्रधानमंत्री टी.बी. मुक्त भारत अभियान के तहत देस अउ प्रदेस ल दू हजार पच्चीस तक टी.बी. मुक्त करे के लक्ष्य राखे गेहे। श्री डेका ह टी.बी. मरीज मन बर हर संभव मदद के बात किहीन। ओमन ह किहीन कि राज्य ल टी.बी. मुक्त बनाय बर समुदाय ल जोड़े के परयास करे जाही।
राजिम कुंभ मेला-समापन
गरियाबंद जिला म महानदी, पैरी अउ सोंढूर नदी के त्रिवेणी संगम म होवइया राजिम कुंभ कल्प मेला के काली संझा समापन होइस। समापन समारोह ल संबोधित करत मुख्यमंत्री विष्णुदेव साय ह किहीन कि राजिम कुंभ कल्प आधायत्मिक चेतना, सामाजिक समरसता अउ सांस्कृतिक एकता के प्रतीक हे। कारीकरम ल खाद्यमंत्री दयालदास बघेल अउ वन मंत्री केदार कश्यप ह घलो संबोधित करीन।
पाली महोत्सव
कोरबा जिला के केराझरिया गांव म काली दू दिन के पाली महोत्सव क सुरूआत हो गेहे। उद्योग मंत्री लखनलाल देवांगन ह ए महोत्सव के सुरूआत करीन। ए दउरान कोरबा सांसद, ज्योत्सना चरणदास महंत के संग आने बिसेस पहुना मौजूद रिहीन।
एकलव्य आदर्श आवासीय विद्यालय-परीक्षा
प्रदेस म संचालित एकलव्य आदर्स आवासीय विद्यालय म अवइया शिक्षण सत्र के तहत कक्षा छटवीं म प्रवेस बर प्राक्चयन परीक्षा दू मार्च के होही। ए परीक्षा प्रदेस के छब्बीस जिला मन म स्थित एक सौ इंक्यावन परीक्षा केंद्र मन म आयोजित करे जाही। एखर बर लगभग बयालिस हजार छात्र मन ह पंजीयन कराय हे। परीक्षा बिहनिया दस बजे ले मंझनिया बारह बजे तक होही। वर्तमान म प्रदेस म पचहत्तर एकलव्य आदर्स आवासीय विद्यालय संचालित हे। जेमा दस कन्या, छै बालक अउ उनसठ संयुक्त विद्यालय सामिल हे।
विधानसभा-धन्यवाद प्रस्ताव
छत्तीसगढ़ विधानसभा के बजट सत्र के दउरान आज ले सदन म राज्यपाल के अभिभाषण म धन्यवाद प्रस्ताव उपर चर्चा सुरू होगे हे। चर्चा के सुरूआत भारतीय जनता पार्टी के बिल्हा विधायक धरमलाल कौशिक ह करीन। ओमन ह किहीन कि मुख्यमंत्री विष्णुदेव साय के सरकार लगातार नवा ऊंचाई ल पावत हे। काली घलो सदन म राज्यपाल के अभिभाषण म धन्यवाद प्रस्ताव उपर चर्चा चलत रइही।
विधानसभा-बहिर्गमन
राज्य विधानसभा म आज प्रश्नकाल के दउरान जल जीवन मिसन योजना म गड़बड़ी के मुद्दा गंुजिस। कांग्रेस विधायक सावित्री मनोज मंडावी ह कांकेर जिला के चारामा, भानूप्रतापपुर अउ दुर्गुकोंदल विकासखंड म तीन सौ पचपन गांव म जलजीवन मिसन के तहत टंकी बनाय अउ देगे नल कनेक्सन म अनियमितता के आरोप लगात हुए विभागीय मंत्री ले सवाल पूछिन। जवाब म जल संसाधन मंत्री अरूण साव ह किहीन कि जिहां भी गड़बड़ी के सिकायत मिलत हे, उंहा कार्रवाई होवत हे। विभागीय मंत्री के जवाब ले असुंष्ट विपक्षी सदस्य मन ह सदन ले बाहिर चल दीस।
जेखर बाद म पत्रकार मनले चर्चा करत पूर्व मुख्यमंत्री भूपेश बघेल ह आरोप लगाय हे कि प्रदेस म जलजीवन मिसन के स्थिति बहुत खराब हे। नल-जल विभाग म कोनो काम नइ होवत हे।
प्रश्नकाल म ही नेता प्रतिपक्ष चरणदास महंत ह प्रदेस के बंद कारखाना के मजदूर मन ल मुआवजा भुगतान बर उद्योग मंत्री लखनलाल देवांगन ले सवाल करीन। डॉक्टर महंत ह जानना चाहिन कि जनवरी दू हजार चौबीस ले जनवरी दू हजार पच्चीस तक कतना उत्पादन केंद्र बंद होय हे। जवाब म उद्योग मंत्री ह बतइन कि वित्तीय कारण ले पांच उद्योग बंद होय हे, जेला सरकार के योजना के अनुरूप अनुदान दे गे रिहीस। ओमन किहीन कि नियम के अनुसार ही मजदूर मन ल भुगतान करे जात हे।
विस-राजस्व प्रकरण
आज राज्य विधानसभा म लंबित राजस्व प्रकरण मन ल लेके सत्ता पक्ष के विधायक अजय चंद्राकर अउ शकुंतला पोर्ते ह विभागीय मंत्री ले सवाल करीन। अजय चंद्राकर ह स्थिति के गंभीरता के जिक्र करत हुए किहीन कि ‘भुईया पोर्टल‘ भगवान भरोसा हे। विपक्षी सदस्य उमेश पटेल ह घलो ए मामला ल उठाइस। एमा विधानसभा अध्यक्ष डॉक्टर रमन सिंह ह संज्ञान लेवत हुए विभागीय मंत्री ले राजस्व प्रकरण के स्थिति दुरस्त करे ल किहीन।
जवाब म राजस्व मंत्री टंकराम वर्मा ह किहीन कि भू-अभिलेख म त्रुटि सुधार के अधिकार एसडीएम अउ तहसीलदार तीर हे।
एमा अजय चंद्राकर ह किहीन कि लोकसेवा गारंटी अधिनियम के राजस्व विभाग पालन नइ करत हे। राजस्व मंत्री ह बतइन कि बजट सत्र के बात राजस्व पखवाड़ा म लंबित प्रकरण के सुनवाई होही।
मेघा भगत-स्वर्ण पद
दुबई म होवइया एशियन बेंच प्रेस एंड डेडलिफ्ट प्रतियोगिता म रायगढ़ जिला के घरघोड़ा क्षेत्र के मेघा भगत ह स्वर्ण पदक जीते हे। ए प्रतियोगिता म ईरान, दुबई अउ मालदीव के खिलाड़ी मन ल पछाड़त हुए ओमन ह जीत हासिल करीन। मेघा भगत के ए उपलब्धि म वित्त मंत्री ओपी चौधरी ह ओमन ल बधई अउ सुभकामना दीन।
सरगुजा-लूट
सरगुजा जिला के नवापारा थाना क्षेत्र म पाछू रतिहा तीन नाकाब पोस हथियार बंद आरोपी मन ह किराना कारोबारी के परिवार ल बंधक बनाके करीब तीस लाख रूपिया लूट लीन। जानबा के मुताबिक आरोपी पच्चीस लाख रूपिया के जेवरात के संग नगद पइसा लूट के फरार होगिस। ए घटना उंहा लगे सीसीटीवी कैमरा म कैद होय हे, जेखर आधार म पुलिस आरोपी मनके तलास म जुट गेहे।
छावा-टैक्स फ्री
मुख्यमंत्री विष्णुदेव साय ह हिंदी फिलिम ‘छावा‘ ल राज्य म टैक्स फ्री करे के घोसना करे हे। मुख्यमंत्री ह किहीन कि छावा फिलिम ल टैक्स फ्री करे के उद्देस्य प्रदेस के जनता ल देस के गौरवसाली इतिहास ले जोड़े अउ युवा पीढ़ी म राष्ट्रप्रेम के संग सौर्य के भावना जगाना हे। ओमन किहीन कि ए फिलिम युवा वर्ग ल प्रेरित करही अउ छत्रपति संभाजी महाराज के सौर्य, बलिदान अउ नेतृत्व ल व्यापक रूप ले प्रस्तुत करही। ओमन ह लोगन मनले ए फिलिम देखे के अपील करे हे।