राज्य विधानसभा म आज उन्नीस हजार सात सौ बैसठ करोड़ बारह लाख बयालीस हजार पांच सौ तेईस करोड़ रूपिया के अनुपूरक राशि तृतीय अनुपूरक अनुदान ल आज सदन म ध्वनिमत ले पास करे गीस। तृतीय अनूपूरक अनुमान के अनुदान मांग उपर चर्चा कांग्रेस विधायक उमेश पटेल ह सुरू करीन। भारतीय जनता पार्टी के विधायक अजय चंद्राकर अउ दूसर विधायक घलो ए चर्चा म सामिल होइन। वित्त मंत्री ओ.पी. चौधरी ह सदन म तृतीय अनुपूरक अनुमान के अनुदान मांग उपर चरचा म सरकार कोति ले जवाब दीन।
सदन म आज छत्तीसगढ़ विनियोग विधेयक घलो ध्वनिमत ले पास होगे हे।
विधानसभा-ध्यानाकर्षण
राज्य विधानसभा म आज विपक्ष ह ध्यानाकर्षण के जरिया बिलासपुर जिला के लोफंदी म मादक पदार्थ के सेवन ले लोगन मनके मउत के मुद्दा उठईन। नेता प्रतिपक्ष डॉक्टर चरणदास महंत ह किहीन कि प्रदेस म अवैध सराब के बिक्री होवत हे, जेला पीये ले नौ मनखे मनके मउत होय हे। जवाब म उपमुख्यमंत्री विजय शर्मा ह किहीन कि ए मामला म उचित कार्रवाई करे जात हे। उपमुख्यमंत्री के जवाब ले असंतुष्ट विपक्षी सदस्य मन ह हंगामा करत सदन ले बहिर्गमन कर दीन।
ध्यानाकर्षण के जरिया ही सत्ता पक्ष के विधायक मन अरपा नदी के दूषित होय के मुद्दा उठईन। बिल्हा के विधायक धरमलाल कौशिक समेत दूसर विधायक मन किहीन कि बिलासपुर सहर के लगभग सत्तर नाली मनके गंदा पानी बिना ट्रिटमेंट के अरपा नंदिया म पहुंचत हे, जेखर सेती नदी के पानी गंदा होवत हे। एमा उपमुख्यमंत्री अउ नगरीय प्रसासन मंत्री अरूण साव ह सदन म घोषणा करीन कि अरपा नंदियां ल प्रदूषण ले बचाय बर परियोजना बनाके काम करे जाही।
विधानसभा-भारतमाला परियोजना
विधानसभा म आज प्रश्नकाल के दौरान भारतमाला परियोजना म मुआवजा के मुद्दा घलो गूंजीस। नेता प्रतिपक्ष डॉक्टर चरणदास महंत ह एक प्रश्न के जरिया पूछीन कि कतका भू-स्वामी अउ शासकीय भूमि के मुआवजा के वितरण कर दे गेहे।
सदन म आज विपक्षी विधायक मन ह प्रदेस म होवत अघोषित बिजली कटौती के मुद्दा म स्थगन प्रस्ताव लईन। नेता प्रतिपक्ष डॉक्टर चरणदास महंत ह आरोप लगईन कि पूरा प्रदेस म अघोषित बिजली कटौती चलत हे, जेखर सेती किसान परेसान होवत हे। ओमन ए मुद्दा म स्थगन प्रस्ताव के जरिया चरचा कराय के मांग करीन। बाद म ऐला विधानसभा अध्यक्ष डॉक्टर रमन सिंह ह अग्राह्य कर दीन।
विधानसभा-राजस्व निरीक्षक भर्ती
राज्य विधानसभा म आज सत्तापक्ष के विधायक राजेश मूणत ह पाछु साल राजस्व निरीक्षक भर्ती परीक्षा म होय अनियमितता उपर सवाल करीन। एमा विभागीय मंत्री टंकराम वर्मा ह जवाब देवत सदन ल बतईन कि ए मामला म पांच सदस्यीय दल के जांच रिपोर्ट आ चुके हे, जेखर कुछ बिन्दु मन उपर गृह विभाग ले जांच कराय जात हे।
उहें, सत्तापक्ष के ही विधायक धरमलाल कौशिक ह सदन म राज्य प्रशासनिक सेवा के अधिकारी मनके खिलाफ भ्रष्टाचार के मामला ल लेके सवाल करीन। ए दउरान ओमन अभियोजना के स्वीकृति म देरी ल लेके घलो सवाल उठईन। श्री कौशिक के सवाल के जवाब म मुख्यमंत्री विष्णुदेव साय ह किहीन कि राज्य प्रशासनिक सेवा के दू सौ पचपन पद स्वीकृत हरय। एमा ले दू सौ इंक्यावन पद भरे जा चुके हे अउ चार पद रिक्त हवय। ओमन किहीन कि राज्य सरकार जीरो टालरेंस के नीति म काम करत हे अउ कोनों भी भ्रष्टाचारी नइ बख्शे जाही। श्री साय ह बतईन कि राज्य प्रशासनिक सेवा के चार अधिकारी मनके खिलाफ विभागीय जांच के प्रक्रिया चलत हे। एमा सीजीपीएससी के तत्कालीन परीक्षा नियंत्रक आरती वासनिक, निलंबित उप सचिव सौम्या चौरसिया, पाठ्य-पुस्तक निगम के तत्कालीन महाप्रबंधक प्रेमप्रकाश शर्मा अउ अभनपुर के तत्कालीन एसडीओ निर्भय कुमार सामिल हे।
एखर पहिली आज सदन म पूर्व प्रधानमंत्री डॉक्टर मनमोहन सिंह ल श्रद्धांजलि घलो दे गीस।
नशा कारोबार-कार्रवाई
राजधानी रायपुर अउ तीर-तखार के जघा मन म नसा के कारोबार करइया लोगन मन उपर कार्रवाई करत पुलिस ह उंखर करीबन सवा चार करोड़ रूपिया के संपत्ति जब्त करे हे। ए मामला म पुलिस ह स्मगलर एंड फारेन एक्सचेंज मेनुपुलेटर्स एक्ट-सफीमा के तहत मामला दरज करे हे।
ईडी-कांग्रेस भवन छापा
आबकारी घोटाला मामला के जांच करे बर प्रवर्तन निदेशालय-ईडी के टीम आज रायपुर स्थित कांग्रेस के प्रदेश कार्यालय राजीव भवन पहुंचीस। सूचना मिलतेच कांग्रेस के लीगल टीम घलो कांग्रेस भवन पहुंच गे। ईडी के टीम ह कांग्रेस के प्रभारी महामंत्री मलकीत सिंह गैदू ले पूछताछ करीस। सूत्र के मुताबिक ईडी ह पूर्व आबकारी मंत्री कवासी लखमा के बयान के आधार म प्रारंभिक जांच म पाय गीस कि आबकारी घोटाला मामला के पइसा के इस्तेमाल सुकमा म कांग्रेस भवन बनाय बर करे गे रिहीस।
दूसर कोति, प्रदेस कांग्रेस के संचार विभाग के प्रमुख सुशील आनंद शुक्ला ह कहिन कि ईडी के ए कार्रवाई केन्द्र अउ राज्य सरकार के इसारा म होवत हे। ओमन कहिन कि कांग्रेस ह विपक्ष म रहत जन-सहयोग ले ए कार्यालय बनाय रिहीस।
माओवादी आत्मसमर्पण
बीजापुर जिला म आज नौ झन माओवादी मन पुलिस के आगू आत्मसमर्पण करीन हे। एमा ले चार माओवादी मन उपर कुल तेईस लाख रूपिया के इनाम घोसित रिहीस। आत्मसमर्पित माओवादी मन म पीएलजीए बटालियन के पार्टी सदस्य, एओबी डिवीजन के एसीएम, जगरगुंडा एरिया कमेटी के एसीएम, दक्षिण सब जोनल ब्यूरो के एसीएम, मिलिशिया सेक्शन प्लाटून सदस्य, सीएनएम उपाध्यक्ष, जनताना सरकार सदस्य, मिलिशिया प्लाटून सदस्य अउ मिलिशिया सदस्य सामिल हरय। आत्मसमर्पण करइया माओवादी मन किहीन कि ओमन अब समाज के मुख्यधारा ले जुड़ना चाहत हे। ए जम्मों माओवादी मन ल राज्य सरकार के पुनर्वास नीति के तहत पच्चीस-पच्चीस हजार रूपिया के सहायता राशि दे गीस।
कैदी-गंगाजल स्नान
उपमुख्यमंत्री विजय शर्मा के निर्देश म आज प्रदेस के पांच सेंट्रल जेल, बीस जिला जेल, अउ आठ ठिन सब-जेल म बंद कैदी मन बर प्रयागराज ले लाय गे गंगाजल उपलब्ध कराय गीस, जेखर ले कैदी म स्नान करीन। आयोजन ल लेके कैदी मन म बड़ उछाह देखे गीस, ओमन सामूहिक प्रार्थना म घलो हिस्सा लीन। ए दउरान जेल प्रशासन डहार ले कैदी मन बर बिसेस व्यवस्था करे गे रिहीस।
ए मउका म उपमुख्यमंत्री ह कहिन कि ए आयोजन कैदी मनके मानसिक अउ आध्यात्मिक उत्थान के उद्देश्य ले करे गीस, जेखर ले ओमन म आत्म सुद्धि अउ सकारात्मक सोच विकसित हो सकय। ओमन किहीन कि एक सौ चवालीस साल बाद आयोजित होवत महाकुंभ के पुण्य लाभ समाज के हर वर्ग ल मिलना चाही। एखर सेती राज्य सरकार ह जेल मन म ए बिसेस पहल करे हे।
सीडी कांड मामला-सुनवाई
प्रदेस के कथित सेक्स सीडी कांड मामला म आज रायपुर कोर्ट म सुनवाई होइस। सुनवाई के दउरान पूर्व मुख्यमंत्री भूपेश बघेल अउ उंखर सलाहकार विनोद वर्मा समेत मुख्य आरोपी कैलाश मुरारका, विजय पंडया अउ विजय भाटिया मौजूद रिहीन। सुनवाई के बाद बचाव पक्ष के वकील फैजल रिजवी ह बतईन कि आज कोर्ट म सीबीआई बनाम कैलाश मुरारका अउ दूसर के मामला म बहस होइस। सीबीआई ह अपन दलील पूरा कर लेहे। चार मार्च के आरोपी मनके बचाव पक्ष के वकील अपन दलील पेस करही। ओमन कहिन कि ए मामला ले जुड़े लगभग जम्मों आरोपी कोर्ट म पेस हो चुके हे।
रिजर्व बैंक-वित्तीय साक्षरता
वित्तीय साक्षरता ल बढ़ावा दे बर भारतीय रिजर्व बैंक डहार ले काली ले वित्तीय साक्षरता सप्ताह मनाय जात हे, जउन अट्ठाईस फरवरी तक चलही। भारतीय रिजर्व बैंक के गवर्नर संजय मल्होत्रा ह काली वित्तीय साक्षरता हफ्ता के सुभारंभ करीन। ए साल के बिसय हे – ‘‘वित्तीय समझदारी-समृद्धनारी। कार्यक्रम के दउरान गृहणी मन बर वित्तीय योजना, कामकाजी महिला मन बर बचत अउ जोखिम प्रबंधन के संगेसंग महिला उद्यमी मन बर ऋण ले बर एफ.एल.डब्ल्यू के उप विषय ल कवर करने वाला तीन पोस्टर जारी करे गीस। ए पोस्टर ब्रेल लिपि म घलो उपलब्ध कराय गेहे। भारतीय रिजर्व बैंक ह ए संदेस म आधारित भारतीय सांकेतिक भाषा वाले वीडियो घलो जारी करे हे।