प्रधानमंत्री नरेंद्र मोदी ह आज आकाशवाणी ले प्रसारित अपन रेडियो कारीकरम ‘मन की बात‘ म किहीन कि आर्टिफिशियल इंटेलिजेंस के क्षेत्र म भारत तेजी ले अपन मजबूत पहिचान बनावत हे। ओमन किहीन कि आर्टिफिशियल इंटेलिजेंस के क्षेत्र म दुनिया भारत के बढ़वार के प्रशंसा करत हे।
प्रधानमंत्री ह किहीन कि युवा मनके भागीदारी ले अंतरिक्ष अउ आर्टिफिशियल इंटेलिजेंस जइसन आने-आने क्षेत्र म नवा क्रांति आवत हे। ओमन ए बात म गरब जतइन कि देस ह पाछू महिना इसरो ले अपन सौंवा राकेट छोड़िस। ओमन किहीन कि एखर ले पता चलथे कि राष्ट्र दिन ब दिन अंतरिक्ष विज्ञान म नवा ऊंचाई छूवत हे।
प्रधानमंत्री ह अंतरिक्ष वैज्ञानिक मनके टीम म नारी सक्ति के भागीदारी बढ़े म संतोष जतइन। श्री मोदी ह आठ मार्च के अंतर्राष्ट्रीय महिला दिवस मनाय जाय म गोठबात करीन। प्रधानमंत्री ह घोसना करीन कि एसो महिला दिवस म ओमन एक अइसन पहल करइया हे, जउन नारी सक्ति ल समर्पित होही। मन की बात कारीकरम म प्रधानमंत्री ह बोर्ड के परीक्षा म भाग लेवत विद्यार्थी मन ल अपन सुभकामना दीन।
मन की बात-छत्तीसगढ़
प्रधानमंत्री के ‘‘मन की बात‘‘ कारीकरम आज छत्तीसगढ़ के आने-आने जघा म सुन गीस। भारतीय जनता पार्टी के क्षेत्रीय संगठन मंत्री अजय जामवाल ह रईपुर के गीतांजलि नगर के जगन्नाथ मंदिर म ‘मन की बात‘ कारीकरम ल सुनिन। ए मउका म रईपुर उत्तर के विधायक पुरंदर मिश्रा, महापौर मीनल चौबे, जिलाध्यक्ष रमेश ठाकुर अउ रईपुर के सबो साठ पार्षद समेत भाजपा के नेता अउ कार्यकर्ता मौजूद रिहीन।
त्रिस्तरीय-पंचायत चुनाव
प्रदेस म त्रिस्तरीय पंचायत चुनई म आज तीसर अउ आखिरी चरण म राज्य के पचास विकासखंड म वोट डारे गीस। वोट डारे के बेरा बिहनिया सात बजे ले मंझनिया तीन बजे तक रिहीस। मुख्यमंत्री विष्णुदेव साय ह जशपुर जिला के अपन गृहग्राम बगिया के प्राथमिक शाला मतदान केंद्र म परिवार समेत वोट डारिन। वोट डारे के बाद मुख्यमंत्री ह लोगन ले मतदान करे के अपील करीन।
उहें, बस्तर संभाग म बिहनिया छै बजके पैंतालीस मिनट ले मंझनिया दू बजे तक वोट डारे गीस। सुकमा जिला म कोंटा ब्लाक के माओवाद प्रभावित पूवर्ती गांव म आजादी के बाद पहिली घांव इंहा के लोगन मतदान करीन। ए दउरान गांव के लोगन म गजबे उछाह देखे गीस। सांतिपूर्ण ढंग ले मतदान कराय बर इंहा अउ गांव के तीर-तखार म सुरक्षा के चाक-चौबंद बेवस्था करे गे रिहीस।
उहें, बीजापुर जिला के जनपद पंचायत भैरमगढ़ के साठ ग्राम पंचायत के नवासी मतदान केंद्र म वोट डारे गीस। जिला म पहिली घांव मतदान दल ल दूपहिया अउ चौपहिया गाड़ी ले भेजे गीस। हेलीकाप्टर के सेवा नइ ले गीस।
खबर के मुताबिक तीसर चरण म तीस हजार नौ सौ नब्बे पंच, तीन हजार आठ सौ दू सरपंच, एक हजार एक सौ बाईस जनपद सदस्य अउ एक सौ पैंतालीस जिला पंचायत सदस्य के पद बर मतदान होइस। ए चुनाव म पंच पद के छिहत्तर हजार एक सौ निन्यानवे, सरपंच पद के सत्रह हजार एक सौ निन्यानवे, जनपद सदस्य के चार हजार छै सौ उनसठ अउ जिला पंचायत सदस्य के आठ सौ उनतालीस उम्मीदवार चुनाव मैदान म हवय। तीसर चरण के मतदान बर ग्यारा हजार चार सौ तीस। मतदान केंद्र बनाय गे रिहीस।
चुनाव कार्य-कार्रवाई
त्रिस्तरीय पंचायत चुनाव के बेरा कोरबा जिला म ड्यूटी के बेरा तैनात पुलिस उप निरीक्षक ल निलंबित कर दे गेहे। आरोप हे कि ग्राम पंचायत पाली के नुनेरा गांव म चुनाव ड्यूटी के बेरा ओ ह प्रत्यासी के घर दारू पिये बर चल दे रिहीस। अइसने कोरिया जिला म घलो चुनाव ड्यूटी के बेरा नसा हालत म पाय गे सोनहत म पदस्थ लिपिक प्रताप मिंज उपर निलंबन के कार्रवाई करे गेहे। उहें, गौरेला-पेण्ड्रा-मरवाही जिला म चुनाव के काम म बाधा डारे के आरोप म कलेक्टर लीना कमलेश मंडावी ह मरवाही के पटवारी जवाहर राम चौधरी ल निलंबित कर देहे।
ओति, कांकेर जिला म चुनाव के कामकाज म कोताही बरते के आरोप म कलेक्टर नीलेश कुमार महादेव क्षीरसागर ह बोड़ागांव माध्यमिक स्कूल के शिक्षक रूपचंद साहू ल निलंबित कर दे गेहे।
प्रधानमंत्री किसान सम्मान निधि
प्रधानमंत्री नरेंद्र मोदी काली चौबीस फरवरी के बिहार के भागलपुर म प्रधानमंत्री किसान सम्मान निधि के उन्नीसवां किस्त के रूप म तीन लाख अड़सठ हजार करोड़ रूपिया किसान मनके खाता म जमा करहीं। ए कारीकरम म देसभर के दू करोड़ पचास लाख किसान सामिल होही।
खबर के मुताबिक प्रधानमंत्री किसान सम्मान निधि योजना म सोज्झे छै हजार रूपिया तीन किस्त म किसान मनके खाता म भेजे जात हे, अउ अभी तक तीन करोड़ छियालीस लाख रूपिया किसान मनके खाता म डारे गेहे।
विधानसभा-बजट सत्र
छत्तीसगढ़ विधानसभा के बजट सत्र काली चौबीस फरवरी ले सुरू होही। ए सत्र म कुल सत्रह बइठका होही। बजट सत्र के सुरूआत काली बिहनिया ग्यारा बजे राज्यपाल रमेन डेका के अभिभाषण ले होही। पहिली दिन काली सदन म पूर्व प्रधानमंत्री मनमोहन सिंह ल श्रध्दांजलि दे जाही। एखर बाद सबो विधायक नवा रईपुर अटल नगर के छत्तीसगढ़ विधानसभा के नवा बने भवन के निरीक्षण करही। काली सदन म चालू वित्तीय बछर बर तीसर अनुपूरक अनुमान पेस करे जाही। एखर उपर पच्चीस फरवरी के सदन म चर्चा होही। उहें, राज्यपाल के अभिभाषण म गोठबात सत्ताईस अउ अट्ठाईस फरवरी के होही।
वित्तमंत्री ओपी चौधरी तीन मार्च के मंझनिया साढे़ बारह बजे अवइया वित्तीय बछर बर राज्य के बजट पेस करही। बजट म चार अउ पांच मार्च के चर्चा होही।
नीति आयोग-रिपोर्ट
नीति आयोग कोति ले जारी अध्ययन रिपोर्ट के मुताबिक राजकोषीय स्वास्थ्य सूचकांक छत्तीसगढ़ देस म दूसर स्थान म हवय। ए सरलग तीसर घांव हे, जब प्रदेस दूसर नंबर म आय हे। पांच आने-आने सूचकांक के आधार म जारी रैंकिंग म छत्तीसगढ़ ल पचपन दसमलव दू अंक मिले हे। भारत म राज्य मनके राजकोषीय स्वास्थ्य के संबंध म समझ बनाय खातिर नीति आयोग कोति ले ए पहल करे गेहे। नीति आयोग के रैंकिंग म देस के अट्ठारा प्रमुख राज्य ल सामिल करे गेहे। ए राज्य भारत के जीडीपी छत्तीसगढ़ के खनिज ले राजस्व जुटाय म सरलग बने प्रदर्सन जन सांख्यकीय कुल सार्वजनिक व्यय राजस्व अउ राजकोषीय स्थिरता म ओखर योगदान के भारतीय अर्थव्यवस्था ल आगू बढ़ात हे।
चैम्बर ऑफ कॉमर्स चुनाव
छत्तीसगढ़ सराफा ऐसोसिएसन ह छत्तीसगढ़ चैंबर ऑफ कॉमर्स चुनाव बर बनाय गे नियम बर भेदभाव के आरोप लगाय हे। सराफा एसोसिएसन के कहना हे कि चुनावी कामकाज ल सिरिफ रईपुर ल केंद्र बनाके आने जिला के व्यापारी मन ल बाहिर राखे जात हे, जेखर ले चुनाव के निष्पक्षता म सवाल उठत हे। एसोसिएसन के अध्यक्ष कमल सोनी ह ए मुद्दा ल लेके चैंबर के चुनाव अधिकारी अउ सहायक चुनाव अधिकारी ल लिखित सिकइत भेजे हे, जेमा चुनाव के कामकाज ल साफगोई अउ निष्पक्ष रूप ले कराय के मांग करे गेहे।
शिवरीनारायण-महोत्सव
जांजगीर-चांपा जिला के शिवरीनारायण म आज ले चार दिवसीय शिवरीनारायण महोत्सव सुरू होगे। उप मुख्यमंत्री अरूण साव ह, ए महोत्सव के सुभारंभ करीन। ए महोत्सव म सांसद कमलेश जांगड़े, पूर्व नेता प्रतिपक्ष नारायण चंदेल ह, पामगढ़ विधायक शेषराज हरबंश अउ भाजपा जिलाध्यक्ष अंबेश जांगड़े मौजूद रिहीन। महोत्सव के दउरान लोक कलाकार अपन रंगारंग प्रस्तुति दीही।
जशपुर फुटबॉल प्रतियोगिता
मुख्यमंत्री विष्णुदेव साय आज जशपुर के रणजीता स्टेडियम म राखे गे स्वर्गीय दिलीप सिंह जुदेव स्मृति अखिल भारतीय गोल्ड कप फुटबॉल प्रतियोगिता के समापन समारोह म संघरीन। ए दउरान ओमन स्टेडियम के जीर्णोध्दार अउ खेल ले जुड़े सुविधा के बढ़वार करे के घोसना करीन। श्री साय ह किहीन कि छत्तीसगढ़ शासन खेलो इंडिया योजना म ओलंपिक म स्वर्ण पदक जीतइया खिलाड़ी मन ल तीन करोड़, रजत पदक जीतइया खिलाड़ी मन ल दू करोड़ अउ कांस्य पदक जीतइया मन ल एक करोड़ रूपिया के इनाम दे जाही। ए फुटबॉल प्रतियोगिता म सोलह राज्य के राष्ट्रीय स्तर के फुटबॉल टीम ह भाग लीन।
अउ अब मौसम के हाल…
मौसम विभाग के मुताबिक प्रदेस के न्यूनतम तापमान म एक घांव फेर थोरिक गिरावट हो सकत हे। मौसम वैज्ञानी एच.पी.चन्द्रा ह आकाशवाणी समाचार ल बतइन कि प्रदेस के अधिकतम तापमान म कोनो कीसम के फेरबदल होय के संभावना नइ हे।