मुख्यमंत्री विष्णुदेव साय ह छत्तीसगढ़ म काम करत कुछ गैर-सरकारी संगठन मन ल होय फंडिंग के दुरूपयोग ल लेके चिंता जताय हे। एखरे संग ओमन अधिकारी मन ल राज्य म विदेसी फंड लेवइया एनजीओ के जांच करे के निरदेस दीन हे। मुख्यमंत्री ह किहीन कि कई ठिन अइसे एनजीओ हे, जउन हेल्थ एजुकेसन के नांव म विदेसी सहायता लेथे। हेल्थ एजुकेसन के नांव म धर्मांतरण करे जात हे जउन ठीक नइ हे, अउ एला बंद होना चाही।
मुख्यमंत्री ह यहू किहीन कि धर्मांतरण जइसे अवैध गतिविधि करइया कोनो भी संगठन के खिलाफ कड़ा कार्रवाई करे जाही।
प्रधानमंत्री किसान सम्मान निधि
प्रधानमंत्री नरेंद्र मोदी चौबीस फरवरी के बिहार के भागलपुर म प्रधानमंत्री किसान सम्मान निधि के उन्नीसवां किस्त जारी करही।
आज नई दिल्ली म संवाददाता सम्मेलन ल संबोधित करत केंद्रीय कृषि अउ किसान कल्याण मंत्री शिवराज सिंह चौहान ह किहीन कि देसभर के दू करोड़ पचास लाख किसान ए कारीकरम म सामिल होही।
पंचायत चुनाव-दूसरा चरण
त्रिस्तरीय पंचायत चुनई के दूसरइया चरण म राज्य के तिरालीस विकासखंड मन म काली मतदान होइस। एमा इक्यासी प्रतिसत ले जादा महिला अउ पुरूष मतदाता मन अपन मताधिकार के उपयोग करीन। अइसन म राज्य म मतदान के औसत इक्यासी प्रतिसत ले जादा रिहीस।
राज्य निर्वाचन आयोग के अधिकारी मन बतइन कि दूसरइया चरण म पंच पद बर पैंसठ हजार सात सौ सोलह, सरपंच पद बर पंद्रह हजार दू सौ सत्रह, जनपद सदस्य बर तीन हजार आठ सौ पचास अउ जिला पंचायत सदस्य बर छै सौ निन्यानवे प्रत्यासी चुनाव मैदान म रिहीन। छब्बीस हजार नौ सौ अठासी पंच, तीन हजार सात सौ चौहत्तर सरपंच, आठ सौ निन्यानवे जनपद सदस्य अउ एक सौ अड़तीस जिला पंचायत सदस्य पद म निर्वाचन बर मतदान होइस। दूसरइया चरण के मतदान बर नौ हजार सात सौ अड़तीस मतदान केंद्र बनाय गे रिहीस।
त्रिस्तरीय पंचायत चुनाव के तहत तीसरा अउ अंतिम चरण के मतदान तेईस फरवरी के होही।
बलौदाबाजार आरोपी-जमानत
बलौदाबाजार म आगजनी अउ तोड़फोड़ के मामला म जेल म बंद एक सौ बारह आरोपी मन ल आज छत्तीसगढ़ उच्च न्यायालय ले जमानत मिल गेहे। आरोपी मन अपन अधिवक्ता मनके माध्यम ले हाईकोर्ट म जमानत याचिका दायर करे रिहीन। जेमा जस्टिस एन. के. व्यास के सिंगल बेंच म सुनवाई होइस।
सुनवाई के दउरान कोर्ट ह आरोपी मन ल कुछेक सर्त के संग जमानत देके आदेस दीन। जमानत बर हरेक आरोपी ल पच्चीस हजार रूपिया के बांड भरना होही। एखर अलावा ट्रायल कोर्ट म गैर-हाजिरी के स्थिति म जमानत स्वतः रद्द माने जाही।
बतादन कि बलौदाबाजार के कलेक्टोरेट अउ पुलिस अधीक्षक कार्यालय म आगजनी अउ तोड़फोड़ के घटना म सामिल कई लोगन मन ल पुलिस ह गिरफ्तार करे रिहीस, जेखर बाद जम्मो आरोपी न्यायिक हिरासत म रिहीन।
जवान घायल
नारायणपुर जिला के छोटे डोंगर थाना क्षेत्र म माओवादी मन डहार ले लगाय गे आईईडी के चपेट म आय ले डिस्ट्रीक्ट रिजर्व गार्ड- डीआरजी के एक जवान घायल होगे हे।
मिले जानकारी कि अनुसार थाना छोटे डोंगर ले जिला पुलिस बल अउ डीआरजी के संयुक्त टीम रोड सिक्युरिटी ऑपरेसन बर रवाना होय रिहीस। इही दउरान तोयमेटा अउ कवानार के बीच जंगल म आईईडी के चपेट म आय ले डीआरजी के एक जवान घायल होगे। घायल जवान के हालत खतरा ले बाहिर हे। एला बेहतर इलाज बर एयरलिफ्ट करे जात हे।
बातों-बातों में
अंतर्राष्ट्रीय मातृभाषा दिवस
आज अंतर्राष्ट्रीय मातृभाषा दिवस हरय। ए मउका म मुख्यमंत्री विष्णुदेव साय ह प्रदेसवासी मन ल बधई अउ सुभकामना दीन हे। मुख्यमंत्री ह किहीन कि छत्तीसगढ़ के पहिचान एखर समृध्द भाषा विरासत अउ बहुभाषीय संस्कृति म निहित हरय। छत्तीसगढ़ी, गोण्डी, हल्बी, सरगुजिया, कुडुख, भतरी समेत बहुत अकन लोकभाषा इंहा के सांस्कृतिक आत्मा ल संजो के रखे हे। अंतर्राष्ट्रीय मातृभाषा दिवस हमन ल अपन मातृभाखा के संरक्षण संवर्धन अउ विकास बर जागरूक करथे। मुख्यमंत्री ह किहीन कि मातृभाखा सिरिफ संवाद के माध्यम नइ हे, बल्कि हमर समाज के जड़ ले जुड़े के पुलिया घलो हरे। मुख्यमंत्री ह प्रदेसवासी मनले अपील करीन कि ओमन अपन मातृभाषा ल बढ़ावा देवय।
मुख्यमंत्री-इसरो चेयरमैन मुलाकात
मुख्यमंत्री विष्णुदेव साय ले काली नई दिल्ली म भारतीय अंतरिक्ष अनुसंधान संगठन के चेयरमैन वी. नारायणन ह भेंट करीन। ए दउरान छत्तीसगढ़ म अंतरिक्ष प्रौद्योगिकीय के उपयोग ले कृषि अउ दूसर क्षेत्र मन म नवाचार ल बढ़ावा देबर चर्चा करे गीस। बइठका म छत्तीसगढ़ म सेटेलाइट आधारित सर्वेक्षण, भू-मानचित्रण, प्राकृतिक संसाधन मनके संरक्षण अउ स्मार्ट एग्रीकल्चर ल बढ़ावा दे जइसे बिसय मन म बिसेस जोर दे गीस।
बइठका म बताय गीस कि इसरो के एक ठिन बिसेसज्ञ दल जल्द ही छत्तीसगढ़ के दउरा करही अउ राज्य म सेटेलाइट इमेजरी, जीआईएस तकनीक अउ डेटा विश्लेषण के माध्यम ले आने-आने क्षेत्र मनके अध्ययन करही।
मुख्यमंत्री-पीटी उषा मुलाकात
मुख्यमंत्री विष्णुदेव साय ले काली नई दिल्ली म भारतीय ओलंपिक संघ के अध्यक्ष अउ राज्यसभा सांसद पीटी उषा ह सौजन्य भेंट करीन। ए दउरान छत्तीसगढ़ म खेल के विकास, युवा खिलाड़ी मनके प्रसिक्षण, खेल अधोसंरचना के सुदृढ़ीकरण अउ ओलंपिक स्तर के प्रतिस्पर्धा बर राज्य के तियारी ल लेके चर्चा होइस।
बइठका के दउरान पीटी उषा ह छत्तीसगढ़ म खिलाड़ी मनके मार्गदर्सन बर भारतीय ओलंपिक संघ डहार ले एक बिसेस प्रतिनिधिमंडल भेजे के बात किहीन। ओमन किहीन कि ए दल म आने-आने खेल मन के अनुभवी कोच अउ बिसेसज्ञ सामिल होही जउन मन स्थानीय खिलाड़ी मन ल ओलंपिक स्तर के प्रतिस्पर्धा बर प्रसिक्षित करही अउ ओमन के खेल तकनीक ल निखारे म सहायता करही।
मुख्यमंत्री-जन्मदिन
आज छत्तीसगढ़ के मुख्यमंत्री विष्णुदेव साय के जनमदिन हरय। ए मउका म मुख्यमंत्री अपन गृहग्राम बगिया पहुंचिन अउ स्कूली लइका मन संग न्यौता भोज करके अपन जनमदिन मनाइन।
मुख्यमंत्री के जनमदिन म प्रधानमंत्री नरेंद्र मोदी केंद्रीय गृहमंत्री अमित शाह, केंद्रीय परिवहन मंत्री नितिन गडकरी, उत्तरप्रदेस के मुख्यमंत्री योगी आदित्यनाथ समेत कई नेता मन ओमन ल बधई दीन।
एखर पहिली, आज बिहनिया रईपुर म राज्यमंत्री मंडल के सदस्य, मुख्य सचिव अमिताभ जैन अउ पुलिस महानिदेसक अरूण देव गौतम ह मुख्यमंत्री निवास पहुंच के श्री साय ल जनमदिन के बधई दीन।
स्कूल-बच्ची घायल
बिलासपुर के एक निजी स्कूल म विस्फोट होय ले चौथी कक्षा के एक बच्ची झुलस गेहे। जानकारी के मुताबिक ए बिस्फोट सोडियम के सेति होय हे। ए सोडियम स्कूल के सौचालय म रखे गे रिहीस। घटना के सूचना मिलतेच सिविल लाइन थाना पुलिस मउका म पहुंचिस अउ जांच म जुट गे। घायल लइका ल अस्पताल म भर्ती कराय गेहे।
अउ अब थोरकुन समाचार सार म –
– परिचालन कारण मनके सेति बाईस ले छब्बीस फरवरी तक दुरूग ले चलने वाला दुर्ग-छपरा-दुर्ग सारनाथ एक्सप्रेस रद्द रइही। अइसने छब्बीस फरवरी के दुरूग ले चलइया दुर्ग-नौतनवा एक्सप्रेस घलो रद्द रइही।
अउ
– जांजगीर-चांपा जिला के शिवरीनारायण म चार दिन के शिवरीनारायण महोत्सव तेईस फरवरी ले सुरू होही।