दूसर पारी म छब्बीस हजार नौ सौ अठासी पंच, तीन हजार सात सौ चौहत्तर सरपंच, आठ सौ निन्यानवे जनपद सदस्य अउ एक सौ अड़तीस जिला पंचायत सदस्य पद के निर्वाचन बर मतदान होही।
राज्य निर्वाचन आयोग ह दूसर चरण के मतदान पूरा कराय बर तियारी कर लेहे। आज मतदान दल ल मतदान सामग्री देके भेजे गीस। मतदान साफगोई अउ सांतिपूर्ण रहय, एखर बर राज्य निर्वाचन आयोग ह सुरक्षा के चाक-चौबंद बेवस्था करे हे। पंचायत चुनाव म मतदाता मतपत्र ले वोट डारही अउ मतदान के बाद उहें, केंद्र म ही वोट के गनती होही।
खबर के मुताबिक पंचायत चुनाव म तिरपन विकासखंड म सत्रह फरवरी के पहिली चरण म वोट डारे गे रिहीस, अउ एखर नतीजा के घोसना हो गेहे। उहें, तीसर अउ अंतिम चरण म तेईस फरवरी के राज्य के पचास विकासखंड म मतदान कराय जाही।
बालोद-पुर्नमतदान
बालोद जिला के डौंडीलोहारा विकासखंड के ग्राम पंचायत सुरेगांव के वार्ड क्रमांक आठ म पंच पद बर तेईस फरवरी के पुर्नमतदान होही। पहिली चरण म सत्रह फरवरी के होय मतदान म वार्ड क्रमांक आठ म दू झिन उम्मीदवार के मतपत्र म गलत प्रतीक चिन्ह दे देगे रिहीस, एखर सेति ए वार्ड के पंच पद बर सत्रह फरवरी के होय मतदान ल सून्य घोसित कर दे गेहे। अब ए वार्ड म तेईस फरवरी के फेर ले मतदान कराय जाही।
जल विजन-2047-सम्मेलन
केंद्र सरकार के जल विजन-2047 म राज्य के जल संसाधन मंत्री मनके दूसर राष्ट्रीय सम्मेलन राजस्थान के उदयपुर म होइस। ए सम्मेलन म आने-आने राज्य के जल संसाधन मंत्री मन ह जल संरक्षण, प्रबंधन अउ भविष्य के जलनीति ल लेके गोठबात करीन। कारीकरम के अगुवई ओड़िसा के मुख्यमंत्री मोहन चरण मांझी ह करीन। सम्मेलन म केंद्रीय जल सक्ति मंत्री सीआर पाटिल, केंद्रीय राज्यमंत्री राजभूषण चौधरी, छत्तीसगढ़ के उप मुख्यमंत्री अरूण साव समेत आने राज्य के जल संसाधन मंत्री सामिल होइन।
ए मउका म छत्तीसगढ़ के जल संसाधन मंत्री केदार कश्यप ह बतइन कि जन भागीदारी जल संचय म छत्तीसगढ़ देसभर म पहिली स्थान म हवय। राज्य म जल संरक्षण अउ बढ़वार बर दू लाख ले जादा संरचना बनाय गेहे। राज्य म पानी के असंतुलन ल दूरिहा करे बर जल संरक्षण अउ प्रबंधन ल सबले पहिली प्राथमिकता दे जावत हे। श्री कश्यप ह बतइन कि जल विजन-2047 म राज्य सरकार ह कतकोन महत्वपूर्ण लक्ष्य तय करे हे।
विस बजट-सत्र
छत्तीसगढ़ विधानसभा के बजट सत्र चौबीस फरवरी ले सुरू होही। ए दउरान कुल सत्रह बइठका होही। वित्त मंत्री ओपी चौधरी संभावित रूप ले तीन मार्च के अवइया वित्तीय बछर दू हजार पच्चीस-छब्बीस बर प्रदेस के वार्षिक बजट विधानसभा म प्रस्तुत करही। बजट सत्र बर विधायक मन ह एक हजार आठ सौ बांसठ सवाल लगाय हे। एमा नौ सौ तैंतालीस तारांकित अउ आठ सौ इकहत्तर अतारांकित प्रश्न सामिल हे। बजट सत्र इक्कीस मार्च के सिराही।
दुकान/स्थापना-अधिनियम
राज्य सरकार ह छोटे दुकानदार मन ल राहत अउ करमचारी मनके अधिकार के रक्षा खातिर छत्तीसगढ़ दुकान अउ स्थापना अधिनियम दू हजार सत्रह अउ नियम दू हजार इक्कीस ल राज्य म लागू कर देहे। एखर संग जन्ना अधिनियम अउ नियम निरस्त होगे हे। नवा कानून सिरिफ दस या जादा करमचारी वाले दूकान म ही लागू होही। पहिली बिना कोनो करमचारी के सबो दुकान अधिनियम के दायरा म आत रिहीस। नवा अधिनियम के मुताबिक अब दुकान चौबीस घंटा अउ हफ्ता खुल्ला रही सकत हे, फेर करमचारी ल हफ्ता म छुट्टी दे जाय। जुन्ना बेवस्था म दुकान ल हफ्ता म एक दिन बंद रखना जरूरी रिहीस। नवा बेवस्था म कुछेक नियम सरत के संग महिला करमचारी मन रात म घलो काम कर सकत हे। सबो नियोजन ल अपन करमचारी मनके रिकॉर्ड इलेक्ट्रानिक रूप म रखे बर पड़ही। नवा अधिनियम म जुर्माना के रकम बढ़ाय गेहे।
उहें, अब दुकान अउ स्थापना मनके पंजीयन नगरीय निकाय के जघा म श्रम विभाग कोति ले करे जाही अउ एखर पंजीयन सुल्क ल करमचारी मनके संख्या के आधार म तय करे गेहे। नवा अधिनियम के लागू होय के छै महिना के भीतरी सबो पात्र दुकान अउ स्थापना के पंजीयन कराना जरूरी होही। करमचारी राज्य बीमा अउ भविष्य निधि म पहिली ले पंजीकृत दुकान नवा अधिनियम म अपने आप सामिल होही। पहिली ले पंजीयन होय दुकान ल छै महिना के भीतरी श्रम पहिचान संख्या मिले बर अर्जी करे बर पड़ही। फेर एखर बर ओमन ल कोनो कीसम के अलग ले सुल्क दे बर नइ पड़य।
अंबिकापुर-डिजिटल भू-प्रबंधन
अंबिकापुर नगर निगम क्षेत्र म डिजिटल भू-प्रबंधन के दिसा म एक ऐतिहासिक कदम बढ़ात नक्सा परियोजना के सुरूआत करे गीस। केंद्रीय अउ कृषि अउ ग्रामीण विकास मंत्री शिवराज सिंह ह मध्यप्रदेस के रायसेन ले ए परियोजना के वर्चुअल सुभारंभ करीन। एमा ड्रोन सर्वे ले सहरी भू-संपत्ति के सही रिकॉर्ड तियार करे जाही, जेखर ले संपत्ति विवाद के तुरते समाधान होही अउ जेखर भी भुंईया होही, ओ संबंध म रिकॉर्ड सही बनही।
ए बेरा म केंंद्रीय मंत्री ह किहीन कि ए परियोजना सहरी भूमि प्रबंधन ल आधुनिक बनाही अउ संपत्ति के स्वामित्व ले जुड़े समस्या ल सुलझाय म मदद करही। ओमन बतइन कि ड्रोन तकनीक ले संपत्ति के हवई सर्वे करके फोटो अउ वीडियो डेटा इकट्ठा करे जाही, जेखर ले भविष्य म सरकारी दस्तावेज अउ भुंईया के रिकॉर्ड जाने बर बउरे जाही।
ए परियोजना देस के छब्बीस राज्य अउ तीन केंद्रशासित प्रदेस के एक सौ इकतालीस जिला म लागू करे जात हे, जेमा छत्तीसगढ़ के अंबिकापुर, जगदलपुर अउ धमतरी सामिल हे।
अंबिकापुर म राखे गे कारीकरम म सरगुजा सांसद, चिंतामणि महाराज, राज्य युवा आयोग के अध्यक्ष विश्व विजय सिंह तोमर, कलेक्टर विलास भेसकर समेत कतकोन जनप्रतिनिधि अउ अधिकारी संघरीन।
गांजा तस्कर-संपत्ति जब्त
मुंबई के सफेमा कोर्ट ह बिलासपुर जिला म गांजा तस्करी के मामला म गिरफ्तार जीआरपी के आरक्षक समेत चार झिन आरोपी मन कोति ले कमाय गे करीबन डेढ़ करोड़ रूपिया के अवैध संपत्ति ल जब्त करे के आदेस जारी करे हे। ए मामला तेईस अक्टूबर दू हजार चौबीस के हे। जीआरपी पुलिस ह गांजा तस्करी के दूनों आरोपी ल गिरफ्तार करके उंखर तीर ले बीस किलो गांजा जब्त करे रिहीस। जांच के दउरान जीआरपी थाना म पदस्थ चार आरक्षक गांजा तस्करी के कारोबार म सामिल पाय गीन। पुलिस ह आरोपी मनके बैंक खाता के जांच म पाइस कि आरोपी मन ह गांजा तस्करी ले कमाय अवैध रकम ल अपन अउ बेनामी खाता म जमा करे हे। एनडीपीएस एक्ट म आरोपी मनके संपत्ति ल जब्त करे गे रिहीस।
दुर्ग शराब-जब्त
दुरूग जिला म आबकारी विभाग के टीम ह रतिहा कुन गस्त के बेरा नंदिनी नगर थाना क्षेत्र के नंदिनी खुंदिनी म अवैध सराब लेगत दू ठिन गाड़ी ले अंठावन पेटी सराब जब्त करे हे। एखर कीमत करीबन दस लाख रूपिया आंके गेहे। ए मामला म दू झिन आरोपी ल गिरफ्तार करे हे।