केन्द्र सरकार ह पन्द्रहवां वित्त आयोग के अंतर्गत छत्तीसगढ़ समेत पंजाब अउ उत्तराखंड म ग्रामीण स्थानीय निकाय बर पांच सौ बैसठ करोड़ रूपिया ले जादा के अनुदान जारी करे हे। केन्द्रीय पंचायती राज मंत्रालय ह कहिन कि पंचायती राज संस्थान अउ ग्रामीण स्थानीय निकाय मन ल दे जाने वाला ए अनुदान रासि जमीनी स्तर म लोकतंत्र ल मजबूत करे म बिसेस भूमिका निभाथे। छत्तीसगढ़ म ग्रामीण स्थानीय निकाय बर दू सौ चवालीस करोड़ रूपिया ले जादा के रासि जारी करे गेहे। ए रासि राज्य के ग्यारह हजार पांच सौ अड़तालीस पात्र ग्राम पंचायत, एक सौ छियालीस ब्लॉक पंचायत अउ सत्ताईस जिला पंचायत मन बर हवय।
चुनाव आयुक्त-नियुक्ति
देस के निर्वाचन आयुक्त ज्ञानेश कुमार ल मुख्य चुनाव आयुक्त नियुक्त करे गेहे। ओमन राजीव कुमार के जघा लीहीं, जेखर कार्यकाल आज खतम होवत हे। ज्ञानेश कुमार केरल कैडर के उन्नीस सौ अट्ठायासी बैच के पूर्व आईएएस अधिकारी हवय। ओमन संसदीय कार्य मंत्रालय के सचिव घलो रेहे हे।
उहें, डॉक्टर विवेक जोशी ल नवा चुनाव आयुक्त बनाय गेहे। ओमन भारतीय प्रशासनिक सेवा के उन्नीस सौ नवासी बैच के हरियाणा कैडर के अधिकारी हवय। राष्ट्रपति द्रौपदी मुर्मु ह दूनों चुनाव आयुक्त मनके नियुक्ति करे हे।
पंचायत चुनाव-पहला चरण
प्रदेस म त्रिस्तरीय पंचायत चुनाव के तहत काली होय पहिली चरण के मतदान म इक्यासी प्रतिशत ले जादा मतदाता मन ह अपन मताधिकार के प्रयोग करे हे। राज्य निर्वाचन आयोग के मुताबिक पहिली चरण म राज्य के तिरपन विकासखंड म मतदान होइस। सबो जगह मतगणना सांतिपूर्ण ढंग ले होइस अउ कोनों जघा कोनों किसम के घटना के सिकायत नइ मिले हे। आयोग के अधिकारी मन ह बतईन कि त्रिस्तरीय पंचायत चुनाव के पहिली चरण म सत्ताईस हजार दू सौ दस पंच, तीन हजार छह सौ पांच सरपंच, नौ सौ ग्यारह जनपद सदस्य अउ एक सौ उनचास जिला पंचायत सदस्य बर चुनाव होय हे।
त्रिस्तरीय पंचायत चुनाव के तहत बीस फरवरी के दूसर चरण म तिरालीस विकासखंड म मतदान होही। तीसर अउ आखिरी चरण म तेईस फरवरी के पचास विकासखंड म वोट डारे जाही।
सिविल जज-भर्ती आवेदन
छत्तीसगढ़ लोक सेवा आयोग-पीएससी डहार ले सिविल जज के संतावन पद म भर्ती करे जाना हे। एखर बर तेईस फरवरी तक आवेदन करे जा सकत हे। सिविल जज भर्ती बर अइसन अभ्यर्थी घलो आवेदन कर सकत हे, जउन मन सिरिफ विधि स्नातक हवय। पहली लॉ ग्रेजुएट होय के संगेसंग अधिवक्ता के रूप म घलो नामांकित होना जरूरी रिहीस, अब ए सर्त ल हटा दे गेहे। पीएससी कोति ले जारी निरदेस म केहे गेहे कि हाईकोर्ट के अंतरिम आदेस के परिपालन म ए सर्त हटाय गेहे।
हाईकोर्ट-बस किराया
छत्तीसगढ़ उच्च न्यायालय म बस मन म किराया के जानकारी नइ दे अउ राउंड फिगर के नाम म उपरहा पइसा वसूली के मामला म काली सुनवाई होइस। मुख्य न्यायाधीश रमेश सिन्हा अउ न्यायाधीश रविन्द्र कुमार अग्रवाल के बेंच ह ए मामला म राज्य सरकार ले जानकारी मांगे हे। एखर पहिली, न्यायालय ह प्रदेस के जम्मों बस स्टैंड म किराया सूची लगाय, बस म डिस्प्ले बोर्ड लगाय अउ किराया म पुनर्विचार करे बर घलो केहे रिहीस। एमा राज्य सरकार कोति ले पन्द्रह अक्टूबर के होय सुनवाई म महाधिवक्ता यशवंत सिंह ठाकुर ह न्यायालय ल बतईन कि सरकार डहार ले एक हलफनामा पेस करे गेहे। ओमन बतईन कि किराया म पुनर्विचार बर चिट्ठी गलती ले विधि विभाग ल भेज दे गे रिहीस। अब ए बारे म कैबिनेट म निर्णय होही। ए मामला के अवइया सुनवाई सत्रह मार्च के होही।
रायपुर-रोजगार मेला
जिला रोजगार अउ स्वरोजगार मार्गदर्शन केन्द्र, रायपुर डहार ले कलेक्टारेट स्थित मल्टीलेवल पार्किंग म आज ले रोजगार मेला के आयोजन करे जावत हे। बीस फरवरी तक चलइया ए रोजगार मेला बिहनिया ग्यारह बजे ले मंझनिया तीन बजे तक राखे जाही। एखर माध्यम ले पांच सौ ले जादा पद म भर्ती करे जाही। एमा निजी क्षेत्र के नियोजक टेक्नोटॉस्क बी.पी.ओ. डहार ले न्यूनतम बारहवीं पास आवेदक मनके भर्ती करे जाही।
रेलवे स्टेशन-अलर्ट
रेलवे स्टेसन म हादसा अउ भगदड़ के घटना ल रोके बर रेलवे प्रसासन ह देसभर के जम्मों स्टेसन मन म अलर्ट जारी कर देहे। दुर्ग ले प्रयागराज महाकुंभ म सामिल होय बर श्रद्धालु मनके भीड़ फेर बाढ़त हे। एला देखत रेलवे डहार ले दुर्ग अउ गोंदिया ले दू ठिन महाकुंभ मेला स्पेशल ट्रेन तीन फेरा बर आज अट्ठारह, इक्कीस अउ तेईस फरवरी के चलाय जावत हे। भीड़ ल कंट्रोल करे बर दुर्ग रेलवे स्टेसन म रेलवे सुरक्षा बल-आरपीएफ अउ जीआरपी सुरक्षा बल डहार ले ट्रेन म बइठे म यात्री मनके मदद करे जावत हे।
दुर्ग आरपीएफ पोस्ट प्रभारी संजीव सिन्हा ह आकाशवाणी समाचार ल बतईन कि रेलवे यात्री मनके सुरक्षा ल देखत रेलवे स्टेसन म कड़ा कदम उठाय गेहे।
प्रधानमंत्री फसल बीमा योजना
प्रधानमंत्री फसल बीमा योजना के आज नौ बछर पूरा होगे हे। प्रधानमंत्री नरेन्द्र मोदी ह बछर दू हजार सोलह म ए योजना के सुरूआत करे रिहीन। योजना के उद्देश्य प्राकृतिक आपदा ले होवइया फसल हानि अउ नुकसान ले पीड़ित किसान मन ल वित्तीय मदद देवाना हे। ए योजना ह नवा कृषि तकनीक ल अपनाय ल बढ़ावा देवत किसान मनके आय ल स्थिर करे म बिसेस भूमिका निभाय हे।
हाईकोर्ट-मेडिकल पीजी पाठ्यक्रम
प्रदेस म मेडिकल पीजी पाठ्यक्रम के प्रवेस प्रक्रिया म गड़बड़ी ल लेके दायर याचिका म सुनवाई करत छत्तीसगढ़ उच्च न्यायालय ह आज होवइया काउंसलिंग म रोक लगा देहे। मुख्य न्यायाधीश रमेश सिन्हा अउ न्यायमूर्ति रवीन्द्र कुमार अग्रवाल के खंडपीठ म काली ए मामला के सुनवाई होइस। ए मामला के अवइया सुनवाई अब पच्चीस फरवरी के होही।
मुख्यमंत्री/महापौर-पार्षद मुलाकात
मुख्यमंत्री विष्णुदेव साय ले आज रायपुर म दुर्ग अउ धमतरी जिला के नव-निर्वाचित महापौर समेत पार्षद मन ह भेंट करीन। ए दउरान मुख्यमंत्री ह महापौर अउ पार्षद मन ल सुभकामना देवत कहिन कि वार्ड के सबो विकास करना उंखर प्राथमिकता होना चाही। जनसुविधा ल सुघ्घर बनाय बर हरसंभव प्रयास करे जाय, जेखर ले नागरिक मन ल बुनियादी सुविधा मिल सकय। श्री साय ह कहिन कि जम्मों पार्षद मन अपन वार्ड के लोगन ले सरलग मिलत राहय अउ उंखर समस्या के तुरते समाधान करयं।
डिजिटल ब्रांड पहचान-नियमावली
केन्द्र सरकार ह सरकारी वेबसाइट अउ डिजिटल प्लेटफॉर्म म एकरूपता लाने बर डिजिटल ब्रांड पहिचान नियमावली जारी करे हे। इलेक्ट्रॉनिक्स अउ सूचना प्रौद्योगिकी राज्यमंत्री जितिन प्रसाद ह नई दिल्ली म नियमावली के सुभारंभ करीन। ए मउका म श्री प्रसाद ह विश्वास जतईन कि ए पहल ह देस के डिजिटल तंत्र ल मजबूत करही अउ तकनीकी नवाचार ल बढ़ावा दीहीं।
दुर्घटना
रायगढ़ जिला के जूटमिट थाना क्षेत्र म एक ठिन ट्रेलर ह फटफटी सवार युवक मन ल टक्कर मार दीस। ए हादसा म एक झिन युवक के मउकाच म मउत होगे। उहें, एक झिन युवक के इलाज के दउरान मउत होगे। घटना के बाद गुस्साय मनखे मन ह ए रद्दा म चक्काजाम कर दीन। जिला प्रसासन के समझाय के बाद लोगन मन ह चक्काजाम ल खतम करीस।
उहें, बलौदाबाजार जिला के कडार गांव स्थित भाटापारा-निपनिया रद्दा म ट्रक के चपेट म आय ले रद्दा पार करत एक झिन माईलोगिन मउत होगे। ए हादसा के बाद गांव वाले मन ह भाटापारा-निपनिया रद्दा म अवई-जवई बंद कर दीस। जिला प्रसासन डहार ले गांव वाले मन ले गोठबात करे जावत हे।
अउ अब थोरकुन समाचार सार म –
– प्रधानमंत्री नरेन्द्र मोदी ह आज स्वामी रामकृष्ण परमहंस के जयंती म ओमन ल श्रद्धांजलि अर्पित करे हे।
– काली उन्नीस फरवरी के छत्रपति शिवाजी महाराज के जयंती हरय। ए मउका म मुख्यमंत्री विष्णुदेव साय ह ओमन ल नमन करत कहिन हे कि शिवाजी महाराज सिर्फ एक योद्धा ही नइ, बल्कि एक दूरदर्शी शासक, उत्कृष्ट रणनीतिकार अउ कुशल प्रसासक घलो रिहीन।
– मुख्यमंत्री विष्णुदेव साय के पगरइति म बाईस फरवरी के बिहनिया साढ़े ग्यारह बजे ले मंत्रालय म राज्य मंत्रिपरिषद के बइठका होही।
– त्रिस्तरीय पंचायत चुनाव के दउरान लापरवाही बरते के आरोप म जिला पंचायत के सीईओ ह मुंगेली विकासखंड के दू झिन पंचायत सचिव मन ल निलंबित कर देहे।
अउ
– परिचालन संबंधी कारण ले उन्नीस अउ इक्कीस फरवरी के दुर्ग-छपरा-दुर्ग सारनाथ एक्सप्रेस रद्द रइही।