प्रदेस म त्रिस्तरीय पंचायत चुनई के तहत आज पहिली चरण म राज्य के तिरपन विकासखंड म वोट डारे गीस। एखर बर नौ हजार आठ सौ तिहत्तर मतदान केंद्र बनाय गे रिहीस। मतदन बिहनिया सात बजे ले मंझनिया तीन बजे तक होइस। सिरिफ बस्तर संभाग म बिहनिया छै बजके पैंतालीस मिनट ले मंझनिया दू बजे तक वोट डारे गीस। स्थानीय सरकार चुने बर मतदाता मन म भारी उछाह देखे गीस। आज बिहनिया ले ही मतदान केंद्र म वोटर मनके लंबा लाइन लगे रिहीस। प्रदेस म एक बजे तक करीबन छियालिस प्रतिसत मतदान होय हे। पहिली चरण म पंच के साठ हजार दू सौ तीन, सरपंच के चौदह हजार छै सौ छियालिस, जनपद पंचायत सदस्य के चार हजार पांच सौ सत्यासी अउ जिला पंचायत सदस्य के सात सौ दू उम्मीदवार चुनाव मैदान म रिहीस।
मतदान निष्पक्ष अउ सांतिपूर्ण तरीका ले कराय बर राज्य निर्वाचन आयोग डहार ले सुरक्षा के व्यापक प्रबंध करे गीस। बस्तर संभाग के माओवाद प्रभावित क्षेत्र मन म घलो पंचायत चुनाव म सुरक्षा व्यवस्था के बिसेस धियान राखे गीस। त्रिस्तरीय पंचायत चुनाव म मतदान करे बर बस्तर अंचल के मतदाता मन म काफी उछाह देखे गीस। पोलिंग बूथ म बिहनिया ले मतदाता मनके लंबा लाइन लगे रिहीस। पंचायत चुनाव के तहत तीनों चरण के मतदान बैलेट पेपर ले होही।
ओति, बालोद जिला के डौंडी विकासखंड के धोतिमटोला म चुनाव ले पहिली तनावपूर्ण स्थिति बन गीस। पंचायत भवन ल दूसर गांव म स्थापित करे के सेति गांव वाले मन म भारी नाराजगी रहिस। अब ए मामला म पुलिस ह दस ले जादा ग्रामीण मनके खिलाफ एफआईआर दर्ज करे हे।
आदि महोत्सव
नई दिल्ली म काली ले आदि महोत्सव सुरू होगे हे। राष्ट्रपति द्रौपदी मुर्मु ह ए महोत्सव के सुभारंभ करीन। उद्घाटन समारोह म कलाकार डहार ले जनजाति नृत्य के प्रस्तुति दे गीस। एमा छत्तीसगढ़ के गौर मारिया नाच घलो सामिल रिहीस। ए महोत्सव म छै सौ ले जादा आदिवासी कारीगर, सिल्पकार अउ पांच सौ कलाकार मन भाग लेवत हे। महोत्सव म आने-आने राज्य अउ केंद्रशासित प्रदेस के पच्चीस आदिवासी खाद्य स्टाल लगाय गेहे, जउन ह उंहा के खाद्य परंपरा ल दिखावत हे।
ए मउका म राष्ट्रपति ह किहीन कि देस म जनजाति लोगन के परंपरा अउ जीवन सैली देस के संस्कृति ल अउ बढाथे। ओमन किहीन कि ए बछर बजट म आदिवासी कल्याण बर आवंटन रासि म तीन गुना बढ़ोत्तरी करे गेहे। आदिवासी समाज के उत्थान होही, तभे देस विकसित होही। आदि महोत्सव के उद्देस्य भारत के आदिवासी समुदाय के जीवंत संस्कृति, विरासत अउ आर्थिक क्षमता के उत्सव बनाना अउ ओला प्रदर्सित करना हे। आदि महोत्सव के समापन चौबीस फरवरी के होही।
विस बजट सत्र-प्रश्न
छत्तीसगढ़ विधानसभा के बजट सत्र चौबीस फरवरी ले सुरू होही। सत्र के दउरान कुल सत्रह बइठका होही। ए दउरान राज्य सरकार डहार ले वित्तीय बछर दू हजार पच्चीस-छब्बीस के बजट पेस करे जाही।
बजट सत्र ले पहिली ही विधायक मन ह आने-आने मुद्दा उपर सवाल दाखिल करे हे। सत्ता पक्ष अउ विपक्ष के विधायक मन ह कुल एक हजार आठ सौ बैंसठ सवाल लगाय हे, जेमा ले जादातर ऑनलाइन माध्यम ले प्रस्तुत करे गेहे। एमा नौ सौ तिरालीस तारांकित अउ आठ सौ इकहत्तर अतारांकित सवाल सामिल हे।
सत्र के पहिली दिन राज्यपाल रमेन डेका के अभिभाषण होही। बजट सत्र के समापन इक्कीस मार्च के होही।
रेलवे-होल्डिंग एरिया
दिल्ली म होय हादसा के बाद रेलवे ह देसभर के साठ रेलवे स्टेसन म यात्री मनके सुविधा बर स्थाई होल्डिंग एरिया बनाय के योजना बनाय हे। एखर अंतर्गत रेलवे अत्याधुनिक प्रौद्योगिकीय के उपयोग करत बिसेस मउका म भीड़ नियंत्रण बर काम करही। मंत्रालय डहार ले ए निर्णय बिसेस मउका म यात्री मनके भारी भीड़ ल संभाले बर ले गेहे।
दुग्ध उत्पादन-पायलट प्रोजेक्ट
प्रदेस ल दुग्ध उत्पादन म आत्मनिर्भर बनाय बर राष्ट्रीय डेयरी विकास बोर्ड के मदद ले एक ठिन पायलट प्रोजेक्ट तियार करे गेहे। एखर ले डेयरी उद्योग ल बढ़ावा मिलही। मुख्यमंत्री विष्णुदेव साय ह किहीन कि छत्तीसगढ़ म श्वेत क्रांति के तर्ज म डेयरी उद्योग ल सशक्त बनाय अउ किसान पशुपालक मनके ेआय ल दुगुना करे के दिसा म राज्य सरकार ह प्रभावी कदम उठाय हे। मुख्यमंत्री श्री साय ह आज मंत्रालय म आयोजित बइठका म पशुपालन विभाग के समीक्षा बइठक लीन। बइठका म ओमन ह किहीन कि छत्तीसगढ़ के जादा आबादी कृषि ले जुड़े ह अउ जादा आमदनी बर पशुपालन के काम घलो करथे। ओमन बतइन कि राष्ट्रीय डेयरी विकास बोर्ड के बिसेसज्ञता म तियार पायलट प्रोजेक्ट के प्रभावी क्रियान्वयन बर राज्य सरकार लगभग पांच करोड़ रूपिया के निवेस करत हे। ए योजना म छत्तीसगढ़ के छै जिला ल सामिल करे गहे। सफल क्रियान्वयन के बाद पूरा प्रदेस म विस्तारित करे जाही।
गांजा तस्कर-गिरफ्तार
जशपुर पुलिस ह राजआमा पुलिया के तीर एक ठिन वाहन ले गांजा ले जात एक झन आरोपी ल गिरफ्तार करे हे। एखर तीर ले चालीस लाख रूपिया कीमत के करीबन एक कुंटल गांजा बरामद करे गेहे। पुलिस ह बतइन कि ए आरोपी ले फर्जी आधार कार्ड अउ गाड़ी के कतकोन फर्जी नंबर प्लेट जब्त करे गेहे। गिरफ्तार आरोपी रायगढ़ जिला के लैलुंगा थाना क्षेत्र के रहइया हरय।
स्वामी रामकृष्ण परमहंस
काली अट्ठारा फरवरी के स्वामी रामकृष्ण परमहंस के जयंती हे। ए मउका म मुख्यमंत्री विष्णुदेव साय ह ओमन ल नमन करीन। मुख्यमंत्री ह किहीन कि स्वामी रामकृष्ण परमहंस ह अपन जीवन के माध्यम ले भक्ति, प्रेम, त्याग अउ मानवता के उच्च आदर्स ल चरितार्थ करीन। किहीन कि स्वामी रामकृष्ण परमहंस जी मानवता के सच्चा उपासक रिहीन। उंखर बिचार ले प्रेरित होके स्वामी विवेकानंद ह पूरा विश्व ल भारतीय संस्कृति के आध्यात्मिक जीवनमूल्य के परिचय करात मानव सेवा के संदेस दीन।
कोरबा-दुर्घटना
प्रयागराज म होय दुर्घटना म मारे गे कोरबा के दस लोगन के आज एक संग अंतिम संस्कार करे गीस। एखर पहिली निकाले गे आखिरी यात्रा म बड़का संख्या म लोगन सामिल होइन। श्रम मंत्री लखनलाल देवांगन संग भाजपा अउ कांग्रेस के कतकोन नेता ह मृतक के परिजन ले भेंट कर दुख जतइन।
उहें, श्रम मंत्री लखनलाल देवांगन ह मृतक मनके परिजन ल एक-एक लाख रूपिया के सहायता रासि दे के घोसना करे हे।
जिला अध्यक्ष/उपाध्यक्ष-गिरफ्तार
रईपुर पुलिस ह बीते रतिहा सड़क ल घेर के जनम दिन मनाय के मामला म यूथ कांग्रेस रईपुर के जिला अध्यक्ष अउ उपाध्यक्ष संग दस लोगन ल गिरफ्तार करे हे। यूथ कांग्रेस के पदाधिकारी मन डहार ले आधा रात के बीच सड़क म केके कांट के जमके आतिसबाजी करे गे रिहीस। ए दउरान सड़क म जाम घलो लग गे रिहीस। वीडियो के वायरल होय के बाद रईपुर पुलिस ह कार्रवाई करत दस लोगन ल पकड़े हे। आतिसबाजी अउ पार्टी के वीडियो आगू आय के बाद डीडी नगर थाना म प्रतिबंधात्मक धारा के तहत अउ आम रद्दा ल रोके के अपराध म दर्ज करे गेहे।
अउ अब मौसम के हाल…
मौसम विभाग डहार ले हवा के दिसा म परिवर्तन होय ले प्रदेस के अधिकतम अउ न्यूनतम तापमान म उतार-चढ़ाव के स्थिति अवइया दू-तीन दिन तक बने रइही। ए दउरान मौसम सुष्क रइही। उन्नीस फरवरी ले एक ठिन पश्चिमी विक्षोभ के प्रभावसील होय के संभावना हे।
अउ अब थोरकुन समाचार सार म –
– दुरूग जिला के भिलाई म कूटरचित दस्तावेज के आधार म एके ठन जमीन ल सात लोगन ल बेचने वाला के गिरोह ल स्मृति नगर पुलिस ह पर्दाफास करे हे। ए मामला म एक झिन पुरूष अउ एक झिन माईलोगिन ल गिरफ्तार करे गेहे।
अउ
– सारंगढ़-बिलाईगढ़ जिला के चुनाव ड्यूटी म अनुपस्थित रहे के सेति दू शिक्षक मन ल निलंबित कर दे गेहे। उहें, कबीरधाम जिला म मतदान समान बांटे के दउरान अनुपस्थित रहइया सत्रह अधिकारी अउ करमचारी मन ल कारण बताओ नोटिस जारी करे गेहे।