दूसरइया चरण बर 20 फरवरी के प्रदेस के 43 विकासखंड अउ तीसरइया चरण म 23 फरवरी के 50 विकासखंड म वोट डारे जाही। पंचायत चुनई के तहत पहलइया चरण के मतदान होय के बाद उहीच दिन मतगणना घलो होही।
त्रिस्तरीय पंचायत चुनई के तहत जिला पंचायत सदस्य के 433, जनपद सदस्य के दू हजार नौ सौ तिहत्तर, सरपंच के ग्यारा हजार छै सौ बहत्तर अउ वार्ड पंच के एक लाख साठ हजार एक सौ अस्सी पद बर वोट डारे जाही। बतादन कि पंचायत चुनई बर इकतीस हजार इकतालीस मतदान केंद्र बनाय गेहे। जेमा सात हजार एक सौ अट्ठाईस संवेदनसील अउ दू हजार एक सौ इकसठ अति-संवेदनसील मतदान केंद्र हें।
नगरीय निकाय चुनाव-वोट फीसदी
प्रदेस म होय नगरीय निकाय चुनई म भारतीय जनता पार्टी ल महापौर अउ अध्यक्ष पद बर करीबन 56 फीसदी वोट मिले हें। उहें, कांग्रेस ल 31 फीसदी ले जादा वोट मिल पाइस। ऐति, भाजपा के पार्षद प्रत्यासी मन ल करीबन 47 फीसदी अउ कांग्रेस पार्षद प्रत्यासी मन ल करीबन 33 फीसदी वोट मिले हे।
बतादन कि छत्तीसगढ़ म ए दरी अध्यक्ष अउ महापौर के चुनई प्रत्यक्ष प्रणाली ले कराय गीस। प्रदेस के जउन दस नगर निगम म चुनई होय हे, उंहा महापौर पद बर भाजपा प्रत्यासी मन के जीत होइस। उहें, प्रदेस के 49 नगर पालिका म ले 35 अउ एक सौ चौदह नगर पंचायत म ले इकयासी म घलो भाजपा उम्मीदवार मन जीतिन।
निलंबन
चुनई कारज म लापरवाही के सेति कोरिया जिला के सोनहत तहसील के दू झन करमचारी मन उपर कारवाही करे गीस। बतादन कि प्रणव भट्टाचार्य अउ रामसेवक धुर्वे ल निलंबित कर दे गेहे।
उहें, बलौदाबाजार म घलो चुनई कारज म लापरवाहिच के सेति दू सौ छिहत्तर शिक्षक अउ करमचारी मन ल नोटिस जारी करे गेहे। ए सबो करमचारी मन मतदान दल के प्रसिक्षण के बेरा सूचना देय बिगर गैर-हाजिर रिहीन, ते पाय के कलेक्टर दीपक सोनी ह नोटिस भेजके चौबीस घंटा के भीतर जवाब मांगे हे।
दुर्घटना
कोरबा जिला के डोडकाखार गांव के तिर टरक के चपेट म आय ले फटफटी सवार दू लोगन के मउत होगिस। मिले जानकारी ले टरक ह डेम ले राखड़ जोर के उरगा डहार जावत रिहीस, इही बेरा पुलिया तिर फटफटी सवार दू मनखे ल टक्कर मार दीस। ए हादसा म दूनों झन के मउका म मउत होगिस। घटना के बाद घुस्साय लोगन म चक्काजाम करके विरोध जतइन। एखर पाछू अधिकारी मन मउका पहुंचिन अउ ग्रामीण मन ल समझाइन, तेखर बाद प्रदर्सन खतम करिन।
ऐति, राजधानी रइपुर के आरंग इलाका के पारागांव तिर घलो बिहनिया दू ठन टरक के बीच जोरदार टक्कर होइस। जेखर बाद दूनों गाड़ी म आगी लग गे। ए हादसा म एक झन चलइया के मउत होगे। मिले जानकारी ले एक ठन टरक के टायर फटे रिहीस, त चलइया मन गाड़ी ले उतरे रिहीन, तभे पाछू डहार ले अवइया दूसरइया टरक ह जोरदार टक्कर मार दीस।
ओति, राजनांदगांव जिला के पार्रीकला गांव के तिर काली रतिहा दू ठन गाड़ी टकराय ले छै लोगन घायल होगिन हें। एमा ले तीन झन के हालत गंभीर बताय जावत हे। घायल मन ल इलाज बर अस्पताल म भर्ती कराय गेहे।
ठगी आरोपी-गिरफ्तार
रइपुर पुलिस ह पांच करोड़ रूपिया ठगइया गिरोह के एक झन अउ सदस्य ल गिरफ्तार करे हे। जउन नौकरी देवाय के नांव म करोड़ों रूपिया ठगे रिहीन। पुलिस ह ए मामला म छै आरोपी मन ल पहिलिच गिरफ्तार कर चुके हे। मिले जानकारी ले बीते 29 जनवरी के दिन एक झन युवती ह सरकारी नौकरी लगाय के नांव म ठगी के रिपोर्ट दर्ज कराय रिहीस, ओखरे आधार म पुलिस ह कारवाही करे हें। ए मामला म अब तक करीबन 25 ले जादा पीड़ित मन के चिन्हारी हो चुके हे। उहें, पुलिस ह आरोपी मन के बैंक खाता के करीबन 15 लाख रूपिया ल घलो रोकवाय हे।
श्रीमंत झा-सिल्वर पदक
नॉर्वे म आयोजित पैरा-आर्म रेसलिंग कप म छत्तीसगढ़ के पैरा-एथलीट श्रीमंत झा ह 85 किलो वर्ग म रजत पदक जितिस। 13 ले 15 फरवरी तक आयोजित ए प्रतियोगिता म श्रीमंत झा ह पोलैंड के मार्सिन कैप्लिकी ल हराके पदक जितिस। बतादन कि श्रीमंत झा भिलाई के रहवइया हें। ओमन एखर ले पहिली घलो कतकोन राष्ट्रीय अउ अंतरराष्ट्रीय प्रतियोगिता म अपन प्रतिभा दिखाके स्वर्ण पदक जीत चुके हें।
टीबी मुक्त भारत अभियान
केंद्र सरकार डहार ले सौ दिवसीय ‘‘टीबी मुक्त भारत अभियान‘‘ चलाय जावत हे। एखर तहत बिलासपुर रेलवे टेसन म घलो जागरूकता अभियान चलाय गिस। ए बेरा भारत स्काउट-गाइड के लइका मन नुक्कड़ नाटक करके टीबी बीमारी के लक्षण, बचाव अउ इलाज के बारे म बतइन। कारीकरम म बिलासपुर रेलमंडल के वाणिज्य प्रबंधक अनुराग सिंह सामिल होइन।
अउ अब मौसम के हाल…
मौसम विभाग ले मिले जानकारी के मुताबिक एक घांव फेर हवा के दिसा बदले के सेति कमती अउ जादा तापमान म थोरकिन बाढ़त रइही। 18 फरवरी के बाद तापमान म गिरावट के कोनो संभावना नइ हे।