नगरीय निकाय चुनाव के तहत प्रदेस म काली पंद्रह फरवरी के मतगणना होही। राज्य निर्वाचन आयोग ह एखर जम्मो तियारी पूरा कर लेहे। मत के गिनती काली बिहनिया नौ बजे ले सुरू होही। सबले पहिली डाकमत पत्र मन के गिनती करे जाही। एखर आधा घंटा बाद ईव्हीएम म डाले गे मत मनके गणना सुरू होही। मंझनिया तक जम्मो निकाय अउ वार्ड मनके रूझान स्पष्ट रूप ले मिले लगही। नगरीय निकाय चुनाव के नतीजा कलेच घोसित कर दे जाही।
रईपुर जिला के जम्मो ग्यारा नगरीय निकाय मन म मतगणना के प्रशासनिक तियारी पूरा कर ले गेहे। रईपुर नगर पालिक निगम के मतगणना सेजबहार स्थित शासकीय इंजीनियरिंग कालेज म कड़ा सुरक्षा बेवस्था के बीच होही। इंहा मतगणना बर एक सौ चौदह टेबल लगाय गे हे। एमा ले एक सौ चार टेबल म ईव्हीएम म डाले गे मत मनके गिनती होही, जबकि दस टेबल मन म डाकमत पत्र गिने जाही। रईपुर नगर निगम के सत्तर वार्ड मनके मतगणना एके संग करे जाही। हरेक वार्ड बर एक-एक ठिन टेबल के बेवस्था करे गेहे। मतगणना बर करीबन चार सौ मतगणना कर्मी मनके ड्यूटी लगाय गेहे।
बतादन कि प्रदेस के दस नगर पालिक निगम, उनचास नगर पालिका परिषद अउ एक सौ चौदह नगर पंचायत समेत एक सौ तिहत्तर नगरीय निकाय मन म पाछू ग्यारा फरवरी के मतदान संपन्न होय रिहीस। ए नगरीय निकाय चुनाव म उनयासी महापौर प्रत्यासी समेत दस हजार एक सौ दस प्रत्यासी मनके भाग के फइसला काली हो जही। ए दारी छै सौ चार प्रत्यासी अध्यक्ष पद बर अउ नौ हजार चार सौ सत्ताईस प्रत्यासी पार्षद पद बर चुनाव मैदान म मौजूद रिहीन। एखर अलावा तीन वार्ड मन म होय उप चुनाव छै झिन प्रत्यासी मनके घलो काली फइसला हो जाही।
आदि महोत्सव
राष्ट्रपति द्रौपदी मुर्मु सोलह फरवरी के नई दिल्ली के मेजर ध्यानचंद स्टेडियम आदि महोत्सव-2025 के उद्घाटन करही। ए महोत्सव जनजातीय समुदाय के उद्यमिता, हस्तसिल्प, संस्कृति अउ खानपान अउ वाणिज्यिक जनजीवन ले लोगन मन ल परिचित कराथे। नई दिल्ली म मीडिया ले बातचीत म जनजातीय कार्य राज्यमंत्री दुर्गादास उइके ह बतइन कि महोत्सव जनजातीय सिल्पकार अउ उद्यमी मन ल अपन उत्पाद अउ कृति मन ल आने-आने राज्य के आगू प्रदर्सन करे के अवसर देथे।
उच्च न्यायालय-विधिक परिषद चुनाव
छत्तीसगढ़ राज्य विधिक परिषद के चुनई नइ होय के सेति उच्च न्यायालय के मुख्य न्यायाधीश रमेश सिन्हा ह नाराजगी जतावत एक महिना के अंदर चुनाव प्रक्रिया पूरा करे के निरदेस दीन हे। मुख्य न्यायाधीश ह राज्य शासन , बार काउंसिल ऑफ इंडिया अउ छत्तीसगढ़ स्टेट बार काउंसिल के अधिवक्ता मन ले पूछिन कि काउंसिल के चुनाव कब तक होवत हे। डिवीजन बैंच ह चुनाव प्रक्रिया के संबंध म सपथ पत्र के संग जानकारी मांगिन। एखर बर कोर्ट ह एक हफ्ता के समय देहे। जनहित याचिका के अगला सुनवाई बर कोर्ट ह अट्ठारा फरवरी के तारीख तय करे हे।
बतादन कि छत्तीसगढ़ राज्य अधिवक्ता परिषद म प्रदेसभर के करीबन पैंतीस हजार के अधिवक्ता पंजीकृत हे। पाछू छै साल ले ए अधिवक्ता काउंसिल के चुनावी प्रक्रिया म हिस्सा नइ ले पात हे। चुनाव नइ होय के सेति अधिवक्ता वेलफेयर समेत दूसर जरूरी काम घलो अटके हे।
पुस्तक घोटाला-नोटिस
लोक शिक्षण संचालनालय ह पुस्तक घोटाला मामला के जांच पूरा होय के बाद घोटाला म संलिप्त पाय गे शिक्षा अधिकारी अउ कर्मचारी मन ल कारण बताओ नोटिस जारी करे हे। लोक शिक्षण संचालनालय ह राजनांदगांव, सूरजपुर, धमतरी, जशपुर जिला के शिक्षा अधिकारी-कर्मचारी मन ले सात दिन के अंदर जवाब मांगे हे, ए जम्मो झन ल नोटिस म केहे गे हे कि सात दिन के अंदर जवाब नइ दे म, एकतरफा कार्रवाई करे जाही।
बतादन कि रईपुर के सिलयारी स्थित पेपर मिल के कबाड़ म लाख अकन किताब मन मिले रिहीस। एमा सरकार कोति ले प्रदेस के जम्मो स्कूल म बांटे जाने वाला किताब घलो सामिल रिहीस।
राष्ट्रीय खेल
उत्तराखंड म चलत अड़तीसवां राष्ट्रीय खेल आज सिरा गेहे। छत्तीसगढ़ ह ए प्रतियोगिता म पांच स्वर्ण, चार रजत अउ ग्यारा कांस्य पदक समेत कुल बीस पदक पाय हे। दल के उप प्रमुख प्रशांत सिंह रघुवंशी ह आकाशवाणी समाचार ल बतइस कि राष्ट्रीय खेल म नोनी मन ए दारी बढ़िया प्रदर्सन करके पदक जीते हे। उहें, ए दारी छत्तीसगढ़ ह नेशनल गेम्स म पच्चीसवां रैंकिंग हासिल करे हे।
मुख्यमंत्री विष्णुदेव साय ह छत्तीसगढ़ के बालिका मनके टीम के प्रदर्सन उपर खुसी जतइन हे। ओमन किहीन कि रोप अउ पोल मलखंभ इवेंट म बालिका मनके टीम ह सानदार प्रदर्सन करत कांस्य पदक जीते हे। छै सदस्यीय ए टीम के पांच झिन बालिका नारायणपुर अउ एक झिन जांजगीर-चांपा जिला के हे। जेखर उपलब्धि ले छत्तीसगढ़ गौरवान्वित होय हे।
माशिम-हेल्पलाइन नंबर
प्रदेस म एक मार्च ले दसवीं अउ बारहवीं बोर्ड के परीक्षा सुरू होही। एखर बर छत्तीसगढ़ माध्यमिक शिक्षा मंडल डहार ले विद्यार्थी, शिक्षक अउ अभिभावक मन के परीक्षा अउ बिसय संबंधी समस्या के समाधान बर काली ले हेल्पलाइन सुरू करे जाही। मंडल के अध्यक्ष रेणु जी.पिल्ले अउ सचिव पुष्पा साहू के निरदेस म ए पहल करे गेहे। बिहनिया साढ़े दस बजे ले संझा पांच बजे तक मंडल के टोल फ्री नंबर- एक आठ सून्य-सून्य दू-तीन-तीन-चार-तीन-छै-तीन ले समाधान ले सकत हे।
माध्यमिक शिक्षा मंडल के सचिव पुष्पा साहू ह बतइन कि ए सुविधा दू चरण म प्रदान करे जाही। पहिली चरण पंद्रह फरवरी ले सत्ताईस फरवरी अउ दूसरइया चरण अट्ठाईस फरवरी ले सत्ताईस मार्च तक होही। ए हेल्पलाइन नंबर म बिसय बिसेसज्ञ, मनोचिकित्सक अउ मंडल के अधिकारी परीक्षार्थी मन के परीक्षा के डर अउ परीक्षा तनाव संबंधी समस्या मन के निराकरण करही।
उहें, लोक शिक्षण संचालनालय प्रदेस म होवइया पांचवी अउ आठवीं केंद्रीय कृत परीक्षा के समय म बदलाव करे हे। ए परीक्षा बिहनिया आठ बजे के जघा अब नौ बजे ले आयोजित करे जाही। ए संबंध म लोक शिक्षण संचालनालय ह आदेस जारी कर देहे। वार्षिक परीक्षा म अनुपस्थित लइका मन ल पूरक परीक्षा म बइठे के मउका दे जाही।
ट्रेन-परिचालन
दक्षिण पूर्व रेलवे के चक्रधरपुर मंडल के अंतर्गत बन्डामुन्डा स्टेसन म बारह फरवरी ले तेरह दिन बर नॉन इंटरलॉकिंग के काम करे जात हे। एखर सेति कुछेक ट्रेन मनके परिचालन प्रभावित रइही। एमा टाटानगर-नेताजी सुभाषचंद्र बोस इतवारी-टाटानगर एक्सप्रेस, टाटानगर-बिलासपुर-टाटानगर, दुर्ग-आरा साउथ बिहार एक्सप्रेस अउ आरा-दुर्ग साउथ बिहार एक्सप्रेस ल रद्द करे गेहे। उहें, पुणे-शालीमार एक्सप्रेस, नांदेड़-शालीमार एक्सप्रेस, सिकंदराबाद-रक्सौल स्पेसल, एलटीटी-शालीमार एक्सप्रेस, पुणे-हावड़ा आजाद हिन्द एक्सप्रेस, शालीमार-एलटीटी एक्सप्रेस, हटिया-दुर्ग स्पेसल अउ हावड़ा मुंबई गीतांजलि एक्सप्रेस देरी ले रवाना होही।
शिक्षक-निलंबित
नगरीय निकाय चुनाव कार्य म लापरवाही बरते के आरोप म रायगढ़ कलेक्टर कार्तिकेया गोयल ह दू झिन शिक्षक ल निलंबित कर देहे। दूनो शिक्षक मतदान सामग्री वितरण के दउरान अनुपस्थित पाय गीन। उहें, अनुपस्थित एक सौ अट्ठारा अधिकारी अउ कर्मचारी मन ल कारण बताओ नोटिस जारी करके जवाब मांगे गेहे।
अउ अब थोरकुन समाचार सार म –
– मुख्यमंत्री विष्णुदेव साय ह जम्मू-कश्मीर के पुलवामा म चौदह फरवरी दू हजार उन्नीस म होय आंतकी हमला म सहीद वीर जवान मन ल नमन करीन हे।
– प्रदेस के गृह विभाग ह विभागीय परीक्षा के कारीकरम जारी कर देहे। एखर तहत परीक्षा तीन ले दस मार्च तक रईपुर, दुरूग, बिलासपुर, जगदलपुर अउ अंबिकापुर म आयोजित करे जाही।
– रईपुर जिला के ग्राम नीनवा के शासकीय स्कूल म काली पंद्रह फरवरी के रेडियो किसान दिवस के आयोजन करे जाही।
– धमतरी जिला के पथर्रीडीह स्थित एकलव्य आवासीय विद्यालय ले भागे छै आदिवासी लइका मन संझा तीर के गांव म ही मिल गे। डीईओ ह ए मामला के जांच बर एक ठन टीम बनाय हे।
अउ
– कोरबा जिला के कटघोरा वनमंडल के बोकरामुड़ा गांव म दू ठिन दंतैल हाथी मन जमके उत्पात मचाइन अउ साग-भाजी के फसल मन ल नष्ट कर दीन।