राज्य मंत्रिमंडल-प्रयागराज
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह संघरा राज्य मंत्रिमंडल के सदस्य मन ह आज प्रयागराज के अरेल घाट के त्रिवेणी संगम म पहुंच के आस्था के डुबकी लगईन। ए मउका म राज्यपाल ह कहिन कि सनातन के ए महापरब के मउका म डुबकी लगाना परम सौभाग्य के बात हे। अइसन पुण्य क्षण के लाभ लेना अत्यंत सुखद अउ मन ल सांति प्रदान करने वाला होथे।
उहें, मुख्यमंत्री ह किहीन कि त्रिवेणी संगम म तीन करोड़ छत्तीसगढ़वासी मनके सुख-समृद्धि अउ खुसहाली बर ओमन ह डुबकी लगाय हे। ओमन किहीन कि महाकुंभ सनातन धर्म के आध्यात्मिक ऊर्जा के महापर्व हे।
राजिम कुंभ कल्प मेला-शुभारंभ
गरियाबंद जिला के राजिम म काली ले राजिम कुंभ कल्प मेला सुरू होगे हे। मेला के उद्घाटन राज्यपाल रमेन डेका ह करीन। ए मउका म राज्यपाल ह अपन संबोधन म किहीन कि राजिम कुंभ कल्प छत्तीसगढ़ के धार्मिक आस्था अउ पंरपरा के प्रतीक हे। ओमन किहीन कि ए बछर के राजिम कुंभ एखर सेती घलो बिसेस हे कि काबर कि एखर आयोजन ओ समय होवत हे जब प्रयागराज म महाकुंभ के भव्य आयोजन होवत हे। प्रयागराज म जिहां गंगा-जमुना अउ सरस्वती के संगम हे। उहें, राजिम म महानदी, पैरी अउ सोंढूर के संगम होथे। एखर बर एला छत्तीसगढ़ के प्रयाग करे जाथे। राज्यपाल ह किहीन कि ए मेला प्रदेस के धार्मिक पर्यटन ल बढ़ावा देके साथ-साथ आर्थिक विकास म घलो बड़े भूमिका निभाथे। मेला के सुभारंभ मउका म राज्यपाल संघरा साधु-संत अउ अतिथि मन ह भगवान राजीव लोचन के प्रतिमा उपर फूल चढ़ाके प्रदेस के खुसहाली के कामना करीन।
नगरीय निकाय-मतगणना तैयारी
प्रदेस म नगरीय निकाय चुनाव म पाछु ग्यारह फरवरी के होय मतदान के बाद राज्य निर्वाचन आयोग ह पन्द्रह फरवरी के होवइया मतगणना के तैयारी सुरू कर देहे। राज्य निर्वाचन आयुक्त अजय सिंह ह आज वीडियो कॉन्फ्रेंसिंग के माध्यम ले मतगणना के पहिली के तैयारी ल लेके बइठका लीन, जेमा सबो जिला के उप जिला निर्वाचन अधिकारी अउ रिटर्निंग अधिकारी मन ह हिस्सा लीन। बइठका के उद्देश्य मतगणना के पहिली के तैयारी के समीक्षा करना, मतगणना प्रक्रिया ल निष्पक्ष अउ पारदर्सी बनाय बर जरूरी निरदेस देना अउ संभावित चुनौती उपर चर्चा करना रिहीस। ए दउरान श्री सिंह ह किहीन कि चुनाव प्रक्रिया के पारदर्सिता अउ निष्पक्षता निश्चित करना आयोग के प्राथमिकता हे।
हाईकोर्ट-अरपा नदी उत्खनन
अरपा नदी म रेत के अवैध उत्खनन अउ परिवहन ल लेके छत्तीसगढ़ उच्च न्यायालय ह नाराजगी जतावत नियम तोड़ने वाला मनके खिलाफ सख्त कार्रवाई करे बर किहीन हे। कोर्ट ह केहे हे कि राज्य सासन ह एखर बर कड़ा नियम बनाना चाही अउ ओमा अमल करना चाही। कोर्ट ह कहिन कि अरपा नदी ले लोगन ल पानी नइ मिलत हे। अवैध उत्खनन के सेती नदी खोखला होगे हे।
राज्य सासन डहार ले एडिशनल एडवोकेट जनरल ह जवाब पेस करत बतईन कि बारह फरवरी के नगर निगम आयुक्त ह सपथ पत्र पेस करके जानकारी दीन हे कि बिलासपुर स्मार्ट सिटी लिमिटेड ह नाला मनके साठ प्रतिसत सीवरेज पानी ल ही ट्रीटमेंट कर सकत हे। वर्तमान म मौजूद संसाधन के अतके क्षमता हे। कोर्ट ह कलेक्टर के ए रिपोर्ट म नाराजगी जतावत किहीस कि पाछु दू-तीन बछर म अरपा नदी म अवैध उत्खनन के मामला म बाढ़े हे। कोर्ट ह अवैध उत्खनन करइया मनके खिलाफ अपराध दर्ज करे के निरदेस घलो देहे।
ब्राडगेज लाइन-निरीक्षण
दक्षिण पूर्व मध्य रेलवे रायपुर मंडल म अभनपुर ले राजिम के बीच नवा बनत ब्राडगेज लाइन म आज ले परीक्षण अउ निरीक्षण के काम सुरू होगे हे। रेलवे ह लोगन ले संबंधित रेललाइन ले पर्याप्त दूरी बनाय अउ समपार फाटक ल ट्रेन नइ आय म ही पार करे के अपील करे हे। संगेसंग कोनों भी मनखे ल प्लेटफॉर्म म टहले, अनाधिकृत रूप ले लाइन पार करे अउ पसु ल लाइन के तीर चराय ले मना करे हे।
राष्ट्रीय खेल
उत्तराखंड म चलत राष्ट्रीय खेल म छत्तीसगढ़ ह आज दू ठन पदक जीते हे। तलवारबाजी अउ नेटबॉल म छत्तीसगढ़ ह कांस्य पदक हासिल करे हे। छत्तीसगढ़ अभी तक ए प्रतियोगिता म पांच स्वर्ण, चार रजत अउ ग्यारह कांस्य पदक संघरा कुल बीस ठन पदक जीत चुके हे। अड़तीसवां राष्ट्रीय खेल के काली चौदह फरवरी के समापन होही।
विश्व रेडियो दिवस
आज विश्व रेडियो दिवस हरय। लोगन ल रेडियो के महत्व के बारे म बताय बर हर बछर तेरह फरवरी के विश्व रेडियो दिवस मनाय जाथे। ए बछर विश्व रेडियो दिवस के बिसय हे – रेडियो और जलवायु परिवर्तन। प्रधानमंत्री नरेन्द्र मोदी ह विश्व रेडियो दिवस म लोगन ल सुभकामना दीन हे। सोशल मीडिया पोस्ट म प्रधानमंत्री ह कहिन कि समाचार अउ संस्कृति से लेके संगीत अउ कहानी कहे तक रेडियो एक ठन सक्तिसाली माध्यम हे।
उहें, सूचना अउ प्रसारण सचिव संजय जाजू ह कहिन कि रेडियो सूचना, शिक्षा अउ मनोरंजन के विश्वसनीय स्त्रोत हे। विश्व रेडियो दिवस म आज नई दिल्ली म रेडियो महोत्सव के उद्घाटन करत श्री जाजू ह कहिन कि प्रधानमंत्री नरेन्द्र मोदी के मासिक रेडियो कार्यक्रम ‘‘मन की बात‘‘ अब एक ठन परिवर्तनकारी मंच बन गे हवय, जिहां आम लोगन के आवाज़ सुने जाथे।
विश्व रेडियो दिवस म अपन संदेस म प्रसार भारती के अध्यक्ष नवनीत कुमार सहगल ह कहिन कि समाचार अउ सूचना के प्रसार करत रेडियो ह राष्ट्र के सांस्कृतिक अउ आर्थिक विकास म महत्वपूर्ण भूमिका निभाथे।
उहें, श्रोता मनके अभिवादन करत प्रसार भारती के मुख्य कार्यकारी अधिकारी गौरव द्विवेदी ह किहीन कि आकाशवाणी जिहां भारत के समृद्ध संस्कृति अउ परंपरा के वाहक रेहे हे। उहें, रेडियो ह भारत म वैज्ञानिक प्रगति के यात्रा ले घलो लोगन ल जोड़े हे। ओमन किहीन कि दैनिक जीवन के शायद कोनों अइसन चीज़ होही, जउन ह आकाशवाणी ले अछूता होही।
ए मउका म आकाशवाणी के महानिदेशक डॉक्टर प्रज्ञा पालीवाल गौड़ ह किहीन कि लगभग नौ दसक ले आकाशवाणी ह सुनइया मन तक सूचना, सिक्षा अउ मनोरंजन पहुंचावत हे।
विश्व रेडियो दिवस म आज छत्तीसगढ़ म घलो कतकोन कार्यक्रम कराय गीस। रईपुर के वृंदावन हॉल म ओल्ड लिसनर्स ग्रुप डहार ले आयोजित कार्यक्रम म आकाशवाणी रायपुर के कार्यक्रम प्रमुख पंकज मेश्राम अउ आकाशवाणी के पूर्व कार्यक्रम प्रमुख लखनलाल भौर्य सामिल होइन।
रायपुर डकैती-खुलासा
रईपुर के अनुपम नगर इलाका म दू दिन पहिली होय करीब पैंसठ लाख रूपिया के डकैती के खुलासा पुलिस ह कर दे हवय। ए मामला म पुलिस ह दुरूग अउ राजनांदगांव ले दस झन आरोपी मन ल गिरफ्तार करे हे। सबो आरोपी मन ल आज बिहनिया रईपुर लाय गीस।
रईपुर रेंज के पुलिस महानिरीक्षक अमरेश मिश्रा ह आज एक ठन पत्रकारवार्ता म बतईन कि डकैती के ए घटना ल पीड़ित के पड़ोसी ह अंजाम दे रिहीस। श्री मिश्रा ह पुलिस के सफलता म किहीन कि रईपुर के वरिष्ठ पुलिस अधीक्षक डॉक्टर लाल उमेद सिंह के अगुवई म करीबन छत्तीस घंटा के भीतर ए घटना के सबो आरोपी मन ल गिरफ्तार करे गीस।
दुर्घटना
रायगढ़ जिला के नेतनागर गांव तीर पाछु रतिहा एक ठन तेज रफ्तार ट्रेलर ह फटफटी म बइठे दू झिन युवक मन ल अपन चपेट म ले लीस। ए हादसा म दूनों युवक के मउकाच म मउत होगे। घटना के बाद ट्रेलर चालक ह फरार होगीस।
उहें, दुरूग जिला के खुर्सीपार थाना क्षेत्र के राष्ट्रीय राजमार्ग म तेलहा नाला तीर एक ठन डंपर के चपेट म आय ले फटफटी म बइठे एक झिन युवक के मउत होगीस।
उहें, कोंडागांव जिला म राष्ट्रीय राजमार्ग क्रमांक-तीस म कोसागांव म होय सड़क दुर्घटना म एक झन युवक के मउत होगीस।