प्रधानमंत्री नरेंद्र मोदी ह आज नई दिल्ली म ‘‘परीक्षा पे चर्चा‘‘ के आठवां संस्करण म विद्यार्थी मन ले गोठबात करीन। प्रधानमंत्री ह समग्र विकास उपर जोर देवत शिक्षा के महत्व के बारे म बतइन। आज जारी एक ठन वीडियो म प्रधानमंत्री ह परीक्षा के दउरान तनाव अउ चिंता उपर काबू पाय के उपाय के बारे म विद्यार्थी मन ले गोठबात करीन।
प्रधानमंत्री मोदी ह पोषण अउ आरोग्य के महत्व के बारे म घलो बतइन। ओमन विद्यार्थी मन ल स्वस्थ रहे बर मोटा अनाज अउ साग खाय के सलाह दीन। ओमन किहीन कि नींद पोषण उपर निर्भर हे।
प्रधानमंत्री ह लइका मन ल परीक्षा के दबाव ले तनाव मुक्त होके तियारी करे के अउ खुद ल चुनौती देवत रहय के सलाह दीन।
परीक्षा पे चर्चा-02
ऐति, छत्तीसगढ़ म घलो परीक्षा पे चर्चा कारीकरम ल शिक्षक, विद्यार्थी अउ उंखर पालक मन सुनिन। ए कारीकरम म प्रधानमंत्री नरेंद्र मोदी ह छात्र, शिक्षक अउ अभिभावक मन संग परीक्षा के डर ले होवइया तनाव ले निपटे के तरीका के बारे म गोठबात करके अपन सुझाव दीन। ओमन ह लइका मन ल परीक्षा बर सकारात्मक दुष्टिकोण अपनाय के अउ पढ़ाई-लिखई ल एक ठन रोचक प्रक्रिया माने बर प्रेरित करीन।
मुख्यमंत्री विष्णुदेव साय ह आज रईपुर के पंडित दीनदयाल उपाध्याय ऑडिटोरियम म राखे गे परीक्षा पे चर्चा कारीकरम ल विद्यार्थी मन संग सुनिन। ए मउका म ओमन किहीन कि परीक्षा पे चर्चा कारीकरम विद्यार्थी मन ल हिम्मत देवइया कारीकरम हे।
आज प्रदेस के दूसर जिला मन म घलो केंद्रीय विद्यालय, नवोदय विद्यालय अउ सरकारी अउ निजी स्कूल म परीक्षा पे चर्चा कारीकरम ल लाइव सुने गीस। इही कड़ी म दुरूग के पीएमश्री केंद्रीय विद्यालय म परीक्षा पे चर्चा कारीकरम ल लइका मन सुनिन अउ अपन बिचार साझा करीन।
नगरीय निकाय चुनाव-मतदान-01
नगरीय निकाय चुनाव म ए बखत महापौर- अध्यक्ष अउ पार्षद पद बर इलेक्ट्रानिक वोटिंग मसीन मतदान करे जाही। मतदान के दिन मतदाता मन ल दू घांव बटन दबाके अपन वोट देना होही। एक ठन वोट महापौर या अध्यक्ष पद के प्रत्यासी बर होही, उहें, दूसर वोट पार्षद पद के प्रत्यासी बर होही। महापौर अध्यक्ष पद बर ईव्हीएम के सफेद लेबल म अपन पसंद के अभ्यर्थी के नांव के आगू खुले बटन ल दबाके मतदान करना होही। एखर बाद पुष्टि बर बीप के आवाज आही। उहें, पार्षद पद बर गुलाबी लेबल म अपन पसंद के अभ्यर्थी के नांव के आगू खुले बटन ल दबाके मतदान करना होही।
नगरीय निकाय चुनाव-मतदान-02
राज्य निर्वाचन आयोग ह नगरीय निकाय चुनाव म मतदान के दउरान मतदाता मनके पहिचान बर मतदाता परिचय पत्र, आधार कार्ड, ड्राईविंग लाइसेंस संघरा अट्ठारा ठन वैकल्पिक पहिचान पत्र ल मान्यता दे गे हवय। मतदाता मन ह एमा ले कोनो भी एक ठन पहिचान पत्र ल देखाके मतदान कर सकत हे।
राज्य निर्वाचन आयोग ह सॉफ्टवेयर डहार ले ऑनलाइन जनरेटेड मतदाता पहिचान पर्ची ल घलो मतदान म पहिचान पत्र के रूप म मान्य करे हे। ए पर्ची ल आयोग के वेबसाइट म देगे लिंक ले डाउनलोड करे जा सकत हे। एखर बर सीजीएसईसी डॉट जीओवी डॉट इन म जाके वोटर मन ह सर्च एंड प्रिंट अर्बन अउ वोटर सर्च एंड प्रिंट-रूरल सर्च करके अपन मतदान केंद्र के विवरण देख के पहिचान पत्र ल प्रिंट कर सकत हे।
इही बीच, राज्य निर्वाचन आयोग ह नगरीय निकाय चुनाव म काली ग्यारा फरवरी के संबंधित निर्वाचित क्षेत्र म सार्वजनिक अवकास के घोसना करे हे।
स्वास्थ्य विभाग ह आयुष्मान भारत प्रधानमंत्री जन आरोग्य योजना अउ सहीद वीर नारायण सिंह आयुष्मान स्वास्थ्य योजना म फर्जी दावा उपर कड़ा कार्रवाई करत रईपुर, दुरूग अउ बिलासपुर के अट्ठाईस ठन अस्पताल के निरीक्षण करीस, जेखर बाद पंद्रह ठन अस्पताल के पंजीयन ल एक बछर बर निरस्त कर दे गीस, चार अस्पताल ल छै महिना बर, चार अस्पताल ल तीन महिना बर निलंबित करे गेहे। एखर अलावा पांच ठन अस्पताल ल चेतावनी पत्र जारी करे गेहे।
आरोपी गिरफ्तार
छत्तीसगढ़ एंटी टेररिजम स्क्वाड-एटीएस अउ महाराष्ट्र एटीएस ह फर्जी भारतीय नागरिकता के दस्तावेज जइसे पासपोर्ट, आधार कार्ड अउ वोटर आईडी के इस्तेमाल करइया तीन झन संदिग्ध बांग्लादेस के नागरिक मन ल रईपुर ले गिरफ्तार करे हे। एमन सबो झन पाछू पांच बछर ले रईपुर म राहत रिहीन। मोहम्मद स्माईल, शेख अकबर अउ शेख साजन ल रईपुर ले मुंबई जावत गिरफ्तार करे गीस। ए तीनो झन उपर आरोप हे कि, एमन ह ईराक जाय बर फर्जी दस्तावेज के इस्तेमाल करत रिहीन।
पुलिस ह बतइस कि ए आरोपी मन ह दस्तावेज ल एक झन स्थानीय आपरेटर मोहम्मद आरिफ के मदद ले बनवाय रिहीन, जउन ह फर्जी दस्तावेज के रैकेट चलावत रिहीस।
माओवादी शिनाख्त/जवान-श्रध्दांजलि
बीजापुर जिला के नेशनल पार्क एरिया म काली पुलिस अउ माओवादी मन के बीच होय मुठभेड़ म मारे गे पांच झन माओवादी मन के सिनाख्त कर ले गेहे। ए पांचो माओवादी मन उपर कुल पच्चीस लाख रूपिया के इनाम रिहीस, जेमा वेस्ट बस्तर डिवीजन म सक्रिय हुंगा कर्मा उपर आठ लाख, प्लाटून कमाण्डर मंगु हेमला, सुभाष ओयाम अउ सन्न उपर पांच-पांच लाख रूपिया अउ नेशनल पार्क एरिया के पार्टी सदस्य रमेश उपर दू लाख रूपिया के इनाम रिहीस। बांकी बांचे माओवादी मनके पहिचान करे जावत हे।
इही बीच, मुठभेड़ म सहीद होय जवान मन ल आज रक्षित केंद्र बीजापुर म ‘गार्ड ऑफ ऑनर‘ दे गीस। ए मउका म सहीद जवान मन ल श्रध्दांजलि दे गीस। पुलिस महानिदेसक अरूण देव गौतम, सीआरपीएफ के डीजी, बस्तर रेंज के पुलिस महानिदेसक सुंदरराज पी., स्पेसल डीजी जितेन्द्र यादव संघरा पुलिस अउ सीआरपीएफ के अधिकारी मन मौजूद रिहीन। भाजपा के पूर्व मंत्री महेश गागड़ा, जिला अध्यक्ष घासीराम नाग, कांग्रेस विधायक विक्रम मंडावी अउ दूसर नेता मन घलो श्रध्दांजलि कारीकरम म सामिल होइन।
एखर बाद सहीद जवान मन के शव ल उंखर गृह ग्राम बर रवाना करे गीस।
खबर के मुताबिक बीजापुर जिला म काली सुरक्षा बल संग होय मुठभेड़ म इकतीस झिन माओवादी मन मारे गे रिहीन। ए मुठभेड़ म सुरक्षा बलके दू झन जवान घलो सहीद होगे रिहीन। उहें, दू झन दूसर जवान मन घायल होय रिहीन, जिंखर इलाज रईपुर म चलत हे।
महाकुंभ-श्रध्दालु
प्रयागराज जिला प्रशासन ह केहे हे कि महाकुंभ क्षेत्र म अवइया आठ रेलवे स्टेसन प्रयागराज छिवकी, नैनी, प्रयागराज जंक्शन, सूबेदारगंज, प्रयाग, फाफामऊ, प्रयागराज रामबाग अउ झूसी ले नियमित अउ स्पेसल ट्रेन चलाय जावत हे। प्रशासन ह स्पष्ट करे हे कि उत्तर रेलवे लखनऊ मंडल के प्रयागराज संगम स्टेसन नौ ले चौदह फरवरी रतिहा बारह बजे तक अवई-जवई बर बंद रइही।
हुक्का उत्पाद-छापा
एंटी क्राइम एंड साइबर युनिट के टीम ह आज रईपुर म ऑनलाइन सॉपिंग के एक ठन निजी कंपनी के तीन ठन आने-आने गोदाम उपर एक साथ छापेमार कार्रवाई करीन। टीम ह सिविल लाइन, तेलीबांधा अउ देवेन्द्र नगर थाना क्षेत्र के तीन ठन गोदाम ले भारी मात्रा म प्रतिबंधित हुक्का उत्पाद के अलावा कम्प्यूटर, लैपटाप, प्रिंटर, बारकोड स्टीकर मसीन संघरा पंद्रह लाख रूपिया के समान जब्त करे हे।