मिले जानबा के मुताबिक जिला के नेशनल पार्क एरिया कमेटी क्षेत्र के जंगल म बड़ संख्या म माओवादी मन के मौजूद होय के सूचना मिले के बाद डी.आर.जी., एस.टी.एफ. अउ बस्तर फाइटर के मिले जुले टीम सर्च ऑपरेसन बर निकले रिहीन। इही दउरान सुरक्षा बल के संग माओवादी मन के मुठभेड़ होगिस। दूनो कोति ले होय गोलीबारी म सुरक्षा बल ह माओवादी मन ल भारी नुकसान पहुंचावत 31 झिन माओवादी मन ल मार गिराइन। घटना स्थल ले सुरक्षा बल ह एके-फोर्टीसेवन, एस.एल.आर., इंसास रायफल, बी.एल.जी. लॉन्चर समेत कई ठिन अत्याधुनिक हथियार अउ बिस्फोटक बरामद करीन हवय। मुठभेड़ म मारे गे माओवादी मनके पहिचान करे जावत हे।
केंद्रीय गृह मंत्री अमित शाह ह सोसल मीडिया प्लेटफॉर्म ‘एक्स‘ उपर सुरक्षा बल के जवान मनके ए सफलता म उंखर मन के सराहना करीन। उहें, दू झिन जवान मन के सहीद होय म लिखिन कि मानवता विरोधी नक्सलवाद के खात्मा करे म आज हमन अपन दू झिन जवान मन ल खो दे हन। देस ह ए वीर जवान मनके हमेसा ऋणी रइही।
उहें, छत्तीसगढ़ के मुख्यमंत्री विष्णुदेव साय ह सुरक्षा बल के सफलता म खुसी जतात किहीन कि जवान मनके ए कामयाबी सराहनीय हवय। ओमन मुठभेड़ म सहीद होय दू झिन जवान मनके परिवार बर संवेदना व्यक्त करत दुख जतइन हवय। उहें, घायल जवान मनके जल्दी स्वस्थ्य होय के कामना घलो करीन हवय। श्री साय ह एक घांव फेर दावा करीन हवय कि मार्च दू हजार छब्बीस तक प्रदेस, नक्सलवाद मुक्त हो जही।
परीक्षा पे चर्चा
प्रधानमंत्री नरेंद्र मोदी ह काली 10 फरवरी के ‘परीक्षा पे चर्चा‘ कारीकरम म पढ़इया लइका मनले गोठबात करही। ए कारीकरम नई दिल्ली के भारत मंडपम म आयोजित करे जाही। ए कारीकरम म हरेक राज्य अउ केंद्र शासित प्रदेस ले 36 झिन पढ़इया लइका मनके चुनई आने-आने स्कूल ले करे गीस हवय। कारीकरम के सीधा प्रसारण दूरदर्शन, स्वयं, स्वयं प्रभा, प्रधानमंत्री कार्यालय के युट्यूब चैनल, शिक्षा अउ सूचना प्रसारण मंत्रालय के सोसल मीडिया चैनल मन म करे जाही।
‘परीक्षा पे चर्चा‘ कारीकरम ल लेके छत्तीसगढ़ के स्कूल मन म घलो पढ़इया नोनी-बाबू मन म बड़ उछाह देखे जावत हे।
भिलाई के शंकराचार्य स्कूल के लइका कमल भोंसले ह प्रधानमंत्री के ए पहल के सराहना करीस हवय। उहें, एक आने छात्र सुयश कापसे ह किहीन कि ‘परीक्षा पे चर्चा‘ कारीकरम हमर मनोबल बढ़ाथे।
‘परीक्षा पे चर्चा‘ कारीकरम खातिर 3 करोड़ 6 लाख लइका मन, गुरूजी अउ दाई-ददा मन ह रजिस्ट्रेसन कराय हवय। ए कारीकरम म कक्षा छठवीं ले बारहवीं तक पढ़इया लइका मन भाग ले सकही।
महाकुंभ-राष्ट्रपति
राष्ट्रपति द्रौपदी मुर्मु काली 10 फरवरी के प्रयागराज के महाकुंभ म जाहीं। ओमन गंगा, यमुना अउ सरस्वती के त्रिवेणी संगम म पवित्र डुबकी लगाहीं। राष्ट्रपति ह अक्षयवट अउ बड़े हनुमान मंदिर के दर्शन घलो करहीं। ओमन डिजीटल महाकुंभ केंद्र म आधुनिक तकनीक के जरिया ले महाकुंभ के बारे म जानकारी घलो लिही। ए दउरान राष्ट्रपति 8 घंटा ले जादा बेरा तक प्रयागराज म रइहीं।
नगरीय निकाय चुनाव-प्रचार
प्रदेस म होवइया नगरीय निकाय चुनई के चलत आज रतिहा 12 बजे के बाद प्रचार अभियान थम जही। एखर बाद प्रत्यासी मन घर-घर जाके लोगन मन ले जनसंपर्क कर सकही। राज्य निर्वाचन आयोग ह दिसा-निरदेस दीन हे कि आज रतिहा 10 बजे के बाद चुनई प्रचार खातिर ध्वनि विस्तारक यंत्र के अनुमति नइ रइही। फेर, 10 बजे ले 12 बजे तक बिना लाउड स्पीकर के प्रचार करे जा सकत हे। एखर बाद कोनो भी तरह के चुनई प्रचार नइ करे जा सकही। रतिहा 12 बजे के बाद चुनई प्रचार खातिर सार्वजनिक सभा, जुलूस, नुक्कड़सभा अउ लाउड स्पीकर के परयोग को के पूरा तरह ले रोकटोक रइही।
एखर पहिली, चुनई प्रचार के आखिरी दिन मुख्यमंत्री विष्णुदेव साय ह आज धमतरी अउ दुरूग म भाजपा प्रत्यासी मनके पक्ष म रोड-सो करीन।
उहें, कांग्रेस ह नगर निगम चुनाव ल लेके आज रईपुर म एक ठिन पत्रकारवार्ता आयोजित करीस। ए दउरान महापौर पद के प्रत्यासी दीप्ति प्रमोद दुबे, पूर्व महापौर प्रमोद दुबे अउ कांग्रेस संचारप्रमुख सुशील आनंद शुक्ला ह भाजपा उपर आने-आने मुद्दा ल लेके निसाना साधिन।
मतदाता जागरूकता
मतदाता जागरूकता कारीकरम के तहत कोंडागांव जिला के आने-आने वार्ड मन म ‘‘जागो बोटर‘‘ अभियान चलाय जावत हे। इही कड़ी म बाजार पारा वार्ड म मतदाता मन ल मतदान कइसे करे जाथे ओखर बारे म जानकारी दे गीस। संगेसंग ओमन ल सबो झन के पूरा-पूरा मतदान करे खातिर जागरूक करे गीस। ए दउरान ई.व्ही.एम. ल देखाके ओमन ल अध्यक्ष पद अउ पार्षद पद बर मतदान करे के जानकारी दे गीस।
निकाय चुनाव-विशेष कार्यक्रम
सुनइया मन ल बतादन कि प्रदेस म नगरीय निकाय चुनई के चलत 11 फरवरी के मतदान होही। ए चुनई म इस्तेमाल होवइया इ.र्व्ही.एम. अउ एखर ले जुड़े आने-आने पहलू उपर आकाशवाणी समाचार ह राज्य निर्वाचन आयुक्त अजय सिंह ले गोठबात करीन हवय। ए भेंटवार्ता के प्रसारण आकाशवाणी केंद्र, रईपुर डहार ले काली 10 फरवरी के बिहनिया 9 बजे ले करे जाही। एला छत्तीसगढ़ के जम्मो आकाशवाणी केंद्र मन ह एके संघरा रिले करही।
दुर्घटना
उत्तर प्रदेस के सोनभद्र म होय एक सड़क हादसा म छत्तीसगढ़ के 4 लोगन मनके मउत होगिस हवय। उहें, 6 झिन आने लोगन मन गंभीर रूप ले घायल होगिन हवय, जेमन ल अस्पताल म भर्ती कराय गे हवय। जानबा के मुताबिक ए जम्मो लोगन मन प्रयागराज म चलत महाकुंभ ले वापस रईपुर लहुटत रिहीन। इही दउरान सोनभद्र जिला के दरनखाड़ के तीर उंखर चारपहिया गाड़ी एक ट्रेलर ले टकरा गीस। टक्कर अतका भयंकर रिहीस कि चारपहिया गाड़ी के चिथरा उड़ागे।
मुख्यमंत्री विष्णुदेव साय ह ए हादसा म दुख जतावत रायगढ़ जिला प्रशासन ल सोनभद्र जिला प्रशासन के संग गोठबात कर घायल श्रध्दालु मनके इलाज खातिर सुघ्घर बेवस्था करे के निरदेस दीन हवय।
निशा यादव-किलिमंजारो पर्वत
बिलासपुर जिला के पर्वतारोही निशा यादव ह अफ्रीका महाद्वीप के किलिमंजारो पर्वत ल फतह कर तिरंगा फहराइस हवय। निशा यादव के ए सफलता म मुख्यमंत्री विष्णुदेव साय ह खुसी जतावत किहीन कि निशा के ए उपलब्धि प्रदेस के बहुत अकन युवा मन बर प्रेरणा स्त्रोत रइही।
जानबा के मुताबिक कुछू महिना पहिली मुख्यमंत्री ले निशा ह बिलासपुर म मुलाकात करे रिहीन। इही दउरान मुख्यमंत्री ह ओला 3 लाख 35 हजार रूपिया के चेक प्रदान करे रिहीस।