करीबन पांच साल बाद भारतीय रिजर्व बैंक ह नीतिगत रेपो रेट म पच्चीस आधार अंक के कमी करे हे अउ एला साढ़े छै प्रतिसत ले घटाके सवा छै प्रतिसत कर देहे। रेपोरेट ओ ब्याज दर हे, जेमा भारत म वाणिज्यिक बैंक रिजर्व बैंक ले धन उधार लेथे। केंद्रीय बैंक के गर्वनर संजय मल्होत्रा ह मौद्रिक नीति समिति-एमपीसी के तीन दिन तक चले बइठका के बाद आज मुंबई म ए घोसना करीन। एखर परिणाम स्वरूप स्थाई जमा सुविधा-एसडीएफ के दर छै प्रतिसत अउ मार्जिनल स्थायी सुविधा- एमएसएफ दर अउ बैंक दर साढ़े छै प्रतिसत रिही।
ए निर्णय के औचित्य स्पष्ट करत श्री मल्होत्रा ह बतइन कि महंगाई म कमी आय हे अउ दू हजार पच्चीस-छब्बीस के दउरान एमा अउ सुधार होय के अनुमान हे। ओमन किहीन कि प्रथम अग्रिम अनुमान के अनुसार चालू बछर बर सकल घरेलू उत्पाद-जीडीपी के वृध्दि दर छै दसमलव चार प्रतिसत रहे अउ अवइया बछर म आर्थिक गतिविधि म सुधार आय के संभावना हे।
बैंकिंग धोखाधड़ी ले बांचे बर श्री मल्होत्रा ह यहू घोसना करीन कि रिजर्व बैंक भारतीय बैंक मन बर एक बिसेस इंटरनेट डोमेन-‘बैंक डॉट इन‘ लागू करही। ए डोमेन नाम के पंजीकरण ए साल अप्रैल ले सुरू होही। एखर बाद वित्तीय क्षेत्र बर ‘फिन डॉट इन‘ डोमेन लागू करे जाही।
आरबीआई यहू निर्णय लेहे कि ए साल वित्तीय साक्षरता हफ्ता म वित्तीय निर्णय लेहे अउ घरेलू बजट बनाय म महिला मनके भूमिका उपर जोर दे जाही। एखर सुरूआत चौबीस फरवरी ले होही।
नगरीय निकाय चुनाव-प्रचार
प्रदेस म नगरीय निकाय चुनाव बर ग्यारा फरवरी के मतदान होही। मतदान म अब करीबन तीन दिन बांचे हे। जम्मो प्रमुख दल मनके संघरा निर्दलीय प्रत्यासी मन अपन प्रचार तेज कर देहे।
इही, कड़ी म मुख्यमंत्री विष्णुदेव साय ह आज चिरमिरी म चुनावी सभा ल संबोधित करत लोगन मन ल भाजपा प्रत्यासी मनके पक्ष म वोट देके अपील करीन।
एखर पहिली मुख्यमंत्री ह काली राजनांदगांव म विजय संकल्प सभा ल संबोधित करीन। ए मउका म ओमन किहीन कि अटल जी के नांव म भाजपा कोति ले तियार करे गे ‘‘अटल विश्वास पत्र‘‘ के एक-एक ठन वादा ल पूरा करे जाही। ए दउरान मुख्यमंत्री ह नगर निगम राजनांदगांव ले भाजपा के महापौर प्रत्यासी मधुसूदन यादव अउ जम्मो वार्ड के पार्षद पद बर भाजपा प्रत्यासी मनके पक्ष म चुनावी प्रचार करीन। सभा म विधानसभा अध्यक्ष डॉक्टर रमन सिंह, कैबिनेट मंत्री दयालदास बघेल, महापौर प्रत्यासी मधुसूदन यादव समेत दूसर वरिष्ठ नेता, पदाधिकारी अउ कार्यकर्ता मौजूद रिहीन।
दूसर कोति, कांग्रेस के वरिष्ठ नेता घलो बहुत अकन जघा मन म चुनावी सभा लेके कांग्रेस प्रत्यासी मन पक्ष म चुनाव प्रचार करत हे।
मुख्यमंत्री-ई-ऑफिस
मुख्यमंत्री विष्णुदेव साय ह जम्मो मंत्री मन ल पत्र लिखके ई-ऑफिस के माध्यम ले फाइल निपटाय के निरदेस दीन हे। मुख्यमंत्री ह पत्र म लिखे हे कि उंखर डहार ले सामान्य प्रशासन विभाग के अधिकतर फाइल ई-ऑफिस के माध्यम ले संपादित करे जात हे। ओमन जम्मो विभाग अउ कार्यालय मन म ई-ऑफिस के क्रियान्यवन बर इकतीस मार्च तक के लक्ष्य दे हे। मुख्यमंत्री ह किहीन हे कि जम्मो लोगन मन के कुशल मार्गदर्सन म विभाग मन म घलो ई-ऑफिस के प्राथमिकता के संग क्रियान्यवन करे जाय। जेखर ले फाइल मनके तुरते निराकरण हो सकय।
एसईसीएल-नोटिस
बिलासपुर एसडीएम ह कलेक्टर के निरदेस म जिला म रूख-राई के अवैध कटाई के मामला म एसईसीएल के सीएमडी ल कारण बताओ नोटिस जारी करके तीन दिन के अंदर जवाब देबर केहे हे।
बतादन कि एसईसीएल डहार ले पेड़ मनके कटाई करे के सिकायत ल गंभीरता ले लेवत कलेक्टर ह बिलासपुर एसडीएम ल जांच कराय के निरदेस दे रिहीन। जांच म सिकायतकर्ता के आरोप ल सही पाय गीस। पटवारी ह जांच रिपोर्ट म एक सौ छियालिस ले जादा पेड़ के कटाई के पुष्टि करे हे।
उत्तराखंड-राष्ट्रीय खेल
उत्तराखंड म चलत राष्ट्रीय खेल म आज छत्तीसगढ़ ह तीरंदाजी म दू ठिन पदक हासिल करे हे। आकाशवाणी समाचार ले गोठबात करत दल के प्रमुख साही राम जाखड़ ह बतइन कि महासमुंद के चांदनी साहू ह तीरंदाजी के व्यक्तिगत स्पर्धा म रजत पदक पाय हे। उहें, तीरंदाजी म ही ग्रुप टीम ह कांस्य पदक हासिल करे हे।
अड़तीसवां राष्ट्रीय खेल म छत्तीसगढ़ ह अब तक कुल चौदह पदक पाय हे।
बातों-बातों में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत प्रदेस म होवत नगरीय निकाय अउ पंचायत चुनाव ल लेके राज्य निर्वाचन आयुक्त अजय सिंह ले लेगे भेंटवार्ता के दूसरइया कड़ी प्रसारित करे जाही। ए कारीकरम काली आठ फरवरी के बिहनिया साढ़े दस बजे आकाशवाणी केन्द्र रायपुर ले प्रसारित होही। एला छत्तीसगढ़ के सबो आकाशवाणी केंद्र मन रिले करही।
सैन्य अधिकारी-मुख्यमंत्री मुलाकात
मुख्यमंत्री विष्णुदेव साय ले आज ओखर निवास कार्यालय म नेशनल डिफेंस कालेज के अट्ठारा सैन्य अउ सिविल सर्विस के अधिकारी मनके दल ह भेंट करीन। ए दउरान ओमन अपन अनुभव ल साझा करत किहीन कि छत्तीसगढ़ बहुत सुंदर प्रदेस हे, अउ नैसर्गिक सुंदरता, सांस्कृतिक धरोहर अउ समृध्द जैव विविधता एला खास पहिचान देथे।
ए दउरान मुख्यमंत्री ह अधिकारी मनके दल ल प्रदेस म नक्सल उन्मूलन ल लेके करे जात प्रयास के जानकारी दीन। दल के अगुवई करत एडमिरल संदीप सिंह संधु ह बतइन कि नेशनल डिफेंस कालेज डहार ले हर साल एक वर्षीय कोर्स संचालित करे जात हे, जेमा सेना, सिविल सेवा अउ अंतर्राष्ट्रीय रक्षा अधिकारी मन ल रणनीतिक बिसय मन उपर प्रसिक्षित करे जात हे। ए साल एक सौ चौबीस अधिकारी ए कोर्स म सामिल हे, जेमा तेरह भारतीय अउ पांच झिन दूसर देस के अधिकारी हवय। ए जम्मो छत्तीसगढ़ के सांस्कृतिक अउ प्रशासनिक मोर्चा ल समझे बर घूमे बर आय हे।
एखर पहिली ए दल ह दंतेवाड़ा पहुंच के जिला म संचालित सामाजिक अउ आर्थिक उत्थान ले जुड़े आने-आने योजना मनके अवलोकन करीन अउ जिला प्रशासन अउ पुलिस विभाग डहार ले करे जात प्रयास मनके सराहना करीन। अधिकारी मन गीदम स्थित डेनेक्स फैक्ट्री, कारली स्थित नक्सल पीड़ित पुनर्वास केंद्र अउ एजुकेसन सिटी जावंगा के घलो अवलोकन करीन।
युवक मौत
कोरबा जिला के दर्री थाना के अंतर्गत हसदेव नदिया म डूबे तीसरा युवक के शव घटना स्थल ले छै किलोमीटर दूर दर्री डेम म मिले हे। नगर सेना के जिला प्रभारी पीबी सिदार ह बतइन कि तीन दिन पहिली तीन झन युवक दर्री स्थित हसदेव नदी म नहाय के दउरान डूब गे रिहीन। घटना के सूचना मिले के बाद गोताखोर मनके टीम अउ एसडीआरएफ के टीम युवक के तलास म जुटे रिहीस। एखर पहिली काली मंझनिया दू झिन दूसर युवक मनके सव घलो बरामद कर ले गे रिहीस।
महाकुंभ-एक दिशा मूवमेंट
महाकुंंभ म श्रध्दालु मनके बाढ़त संख्या ल देखत यात्री मनके सुरक्षा अउ सुगमता ले प्रवेस अउ निकासी बर प्रयागराज जंक्सन म आज ले अग्रिम आदेस तक एकल दिसा मूवमेंट लागू रिही। ए दउरान प्रवेस केवल सिटी साइड-प्लेटफॉर्म नंबर-एक कोति ले दे जाही अउ निकास केवल सिविल लाइन साइड कोति ले होही। अनारक्षित यात्री मन ल दिसावार यात्री आश्रय के माध्यम ले प्रवेस दे जाही। टिकट के व्यवस्था यात्री आश्रय म अनारक्षित टिकिट काउंटर, एटीवीएम अउ मोबाइल टिकटिंग के रूप म होही।
आरक्षित यात्री मन प्रवेस गेट संख्या-पांच के माध्यम ले दे जाही अउ ओला गाड़ी आय के आधा घंटा पहिली ही प्लेटफॉर्म म जाय के अनुमति होही। ए दउरान स्टेसन के दूनो कोति आय-जाय बर परयाप्त साधन मौजूद रिही।
बीएसपी-अवॉर्ड
दुर्ग स्थित भिलाई इस्पात संयंत्र स्टील उद्योग म मानव संसाधन के क्षेत्र म उत्कृष्ट योगदान बर ‘गोल्डन पीकॉक एचआर एक्सीलेंस अवार्ड-दू हजार चौबीस‘ ले सम्मानित करे गेहे।