केंद्रीय गृह अउ सहकारिता मंत्री अमित शाह ह आज एक दिवसीय छत्तीसगढ़ के दउरा म रिहीस। ए बेरा म ओमन ह राजनांदगांव जिला के डोंगरगढ़ म स्थित चंद्रगिरी तीर्थ म आचार्य विद्यासागर जी महाराज के ‘‘प्रथम समाधी स्मृति महोत्सव और श्री एक हजार आठ सिध्दचक्र विधान विश्व शांति महायज्ञ‘‘ म सामिल होइन। ए बेरा म श्री शाह ह महामुनिराज के समाधी म पहुंचके ओमन ल श्रध्दांजलि दीन। केंद्रीय मंत्री ह चंद्रगिरी म आचार्य विद्यासागर जी के समाधी स्मारक के भूमिपूजन घलो करीन। महोत्सव ल संबोधित करत हुए श्री शाह किहीन कि आचार्य विद्यासागर जी महाराज ह तप अउ साधना ले भारत अउ भारतीय संस्कृति ल विश्व म पहिचान दिलाय हे।
श्री शाह ह ए मउका म आचार्य विद्यासागर जी महाराज के चित्रांकित सौ रूपिया के बिसेस स्मारक सिक्का के संगेसंग एक ठिन डाक टिकीट के घलो विमोचन करीन। ओमन ह किहीन हे कि ए सिक्का अउ डाक टिकिट ह सिरिफ एक सम्मान नइ, बल्कि एक युगदृष्टा संत के अमूल्य विरासत ल संजोय के कोसिस हवय।
ए बेरा म छत्तीसगढ़ के मुख्यमंत्री विष्णुदेव साय अउ उपमुख्यमंत्री विजय शर्मा के संगेसंग बड़का संख्या म जैन संत अउ अनुयायी मन मौजूद रिहीन।
डोंगरगढ़ प्रवास के बेरा म केंद्रीय मंत्री अमित शाह ह छोटे बम्लेश्वरी मंदिर पहुंचके दर्सन घलो करीन।
पंचायत चुनाव नामांकन
प्रदेस म त्रिस्तरीय पंचायत चुनई के चलत आज नांव वापसी के आखिरी दिन रिहीस। अंतिम तिथि तक जिला पंचायत सदस्य के चौदह ठिन पद बर निन्यानवे झिन अभ्यर्थी मन ह नामांकन दाखिल करे रिहीन। जांच के बाद सबो नामांकन ह विधिमान्य पाय गे रिहीस। ए सबो मन ल चुनई के चिन्हारी घलो आवंटित कर दे गेहे। त्रिस्तरीय पंचायत चुनई के चलत तीन चरण म सत्रह, बीस अउ तेईस फरवरी के वोट डाले जाही अउ इही दिन मतदान केंद्र म मतगणना घलो हो जही।
अजय सिंह-स्ट्रांग रूम निरीक्षण
प्रदेस म ग्यारा फरवरी के नगरीय निकाय चुनई होवइया हे, जेखर तियारी ल देखे बर राज्य निर्वाचन आयुक्त अजय सिंह ह आज रईपुर के सेजबहार म बनाय गे स्ट्रांग रूम म पहुंचिन। ए बेरा म ओमन ह स्ट्रांग रूम के सुरक्षा व्यवस्था समेत कतकोन आने जानकारी घलोक लीन। एखर बाद राज्य निर्वाचन आयुक्त ह स्ट्रांग रूम म तैनात अधिकारी-करमचारी मनके संग समीक्षा बइठका घलो करीन।
मतदाता जागरूकता
नगरीय निकाय अउ त्रिस्तरीय पंचायत चुनई के चलत मतदाता मन ल वोट डारे बर जागरूक करे के उद्देस्य ले प्रदेसभर म जघा-जघा कतकोन कारीकरम होवत हे। इही कड़ी म बलरामपुर जिला म शंकरगढ़ विकासखंड म एसडीएम आनंदराम नेताम के नेतृत्व म इकतालीस स्कूल म मतदाता जागरूकता ले संबंधित कतकोन गतिविधि आयोजित करे गीस। ए कारीकरम म पढ़इया लइका मनके संगेसंग ओखर माता-पिता, शिक्षक अउ स्कूल प्रशासन के सक्रिय भागीदारी रिहीस। ए बेरा म लइका मन ह रंगोली बनाके लोगन मन ल वोट डारे बर जागरूक करीन। संगेसंग साइकिल रैली अउ पदयात्रा घलो निकाले गीस।
उहें, गौरेला-पेण्ड्रा-मरवाही जिला म जागव बोटर-जाबो के चलत बाईक रैली निकालके लोगन मन ल मतदान बर जागरूक करे गीस अउ ए रैली के बाद सबो लोगन मन ल सत-प्रतिसत वोट डारे बर सपथ दिलाय गीस।
माओवादी आत्समर्पण
मोहला-मानपुर- अंबागढ़ चौकी जिला म आज एक झिन इनामी माओवादी दंपत्ति ह आत्मसमर्पण कर देहे। ए दूनो माओवादी मन उपर पांच-पांच लाख रूपिया के इनाम रिहीस। ए माओवादी मन ह माड़ डिवीजन के प्रेस टीम कमांडर के रूप म सक्रिय रिहीन। आत्मसमर्पण करइया माओवादी मन ल राज्य सरकार के पुनर्वास नीति के लाभ दे जाही।
ओति, नारायणपुर जिला म छोटेडोंगर थाना क्षेत्र के अमदईघाटी म माओवादी मन कोति ले सुरक्षा बल मन ल नुकसान पहुंचाय बर लगाय गे आईईडी के चपेट म आय ले एक झिन ग्रामीण ह घायल होगे हे। उहें, ग्रामीण घायल के इलाज अस्पताल म चलत हे।
परीक्षा पे चर्चा
परीक्षा पे चर्चा कारीकरम के आठवां संस्करण के आयोजन नई दिल्ली के भारत मंडपम म दस फरवरी के बिहनिया ग्यारा बजे होवइया हे। ए बेरा म प्रधानमंत्री नरेंद्र मोदी ह पढ़इया लइका, ओखर माता-पिता अउ शिक्षक मन के संग गोठबात करही अउ परीक्षा के तियारी के तनाव ले बांचे के संगेसंग व्यक्तिगत विकास ल लेके मार्गदर्सन दीही। ए कारीकरम ल लेके एसो हरेक राज्य अउ केंद्रशासित प्रदेस ले छत्तीस झिन पढ़इया लइका मन ल चुने गे। ए सबो लइका मन सरकारी स्कूल, केंद्रीय विद्यालय, सैनिक स्कूल, एकलव्य मॉडल आवासीय विद्यालय, सीबीएससी अउ नवोदय विद्यालय ले हवय। एमा ले कुछ लइका मन प्रेरणा स्कूल कारीकरम के पूर्व छात्र, कला उत्सव अउ वीर गाथा के विजेता घलोक हरय। ए सबो लइका मन ल सीधा प्रधानमंत्री ले जुड़े बर चुने गेहे। प्रधानमंत्री के संग पहिली घांव के बातचीत सीधा दूरदर्सन, स्वयं, स्वयंप्रभा, पीएमओ यूट्यूब चैनल, शिक्षा मंत्रालय अउ सूचना तथा प्रसारण मंत्रालय के सोसल मीडिया चैनल म दिखाय जाही।
ए कारीकरम बर तीन करोड़ छै लाख पढ़इया लइका, शिक्षक अउ माता-पिता मन ह रजिस्ट्रेसन कराय हे। एमा ले ढाई हजार लोगन मन ल भारत मंडपम म प्रत्यक्ष कारीकरम बर बलाय जाही। जेमा ले शीर्ष दस झिन लीजेंड्री एग्जामिनेशन वारियर्स ल प्रधानमंत्री के आवास म जाय के मउका मिलही। ए कारीकरम म कक्षा छटवीं ले बारहवीं तक पढ़इया लइका मन भाग ले सकत हे।
महाकुंभ जनजाति सांस्कृतिक-समागम
प्रयागराज महाकुंभ म आज ले जनजाति सांस्कृतिक समागम के चलत युवा मन ह कुंभ के आयोजन करत हे। एमा देसभर ले आठ हजार ले जादा आदिवासी जवान लइका मन भाग लेवत हे। भगवान बिरसा मुंडा के एक सौ पचासवां जयंती के मउका म बछर दू हजार पच्चीस ल जनजातीय गौरव वर्ष घोसित करे गेहे। जेखर चलत पांच दिन तक चलइया जनजातीय सांस्कृतिक समागम के आयोजन होही। ए मउका म केंद्रीय राज्य जनजातीय मंत्री दुर्गादास उइके ह किहीन हे कि दुनिया म जतका बदलाव होय हे, ओ सबो मन युवा मन के सेति हो पाय हे। ओमन ह ए सबो युवा मन ले अनुरोध करे हे कि विकसित भारत बनाय के दिसा म काम करय।
ऑपरेशन-साइबर शील्ड
रईपुर रेंज के पुलिस महानिदेसक अमरेश मिश्रा के निरदेस म जारी ऑपरेसन साइबर सील्ड के चलत तेरह झिन लोगन मन ल गिरफ्तार करे गे हे। ए आरोपी मन साइबर ठगी बर म्यूल बैंक अकांउट खुलवाय अउ खाता ल आपरेट करे के काम करत रिहीस। फेर, ए मामला म अभू तक पचयासी झिन आरोपी मन ल गिरफ्तार करे जा चुके हे।
हाईकोर्ट-जीपी सिंह
छत्तीसगढ़ उच्च न्यायालय ह आईपीएस जीपी सिंह के खिलाफ केंद्रीय एजेंसी के ओ प्रवर्तन मामला सूचना रिपोर्ट ल निरस्त करे के आदेस दीन हे, जेमा उंखर उपर आय ले जादा संपत्ति के आरोप रिहीस। एखर संगेसंग हाइकोर्ट के मुख्य न्यायाधीश रमेश कुमार सिन्हा अउ न्यायाधीश रवीन्द्र अग्रवाल के डिवीजन बैंच ह पहिली जारी करे गे दूनो नोटिस ल घलो रद्द कर देहे।
अउ अब थोरकुन समाचार सार म –
– राज्य सरकार ह महतारी वंदन योजना के बारहवां किस्त के पइसा ल जारी कर देहे। एखर चलत करीबन उनहत्तर लाख चौव्वन हजार हितग्राही माईलोगिन मन के बैंक खाता म छै सौ पचास करोड़ रूपिया ले जादा के रासि अंतरित करे गेहे।
– मुख्यमंत्री बाल भविष्य सुरक्षा योजना के चलत संचालित प्रयास अवासीय विद्यालय म कक्षा नवमीं म प्रवेस बर ऑनलाइन आवेदन करे के तिथि ल बीस जनवरी ले आगू बढ़़ाके अब चौदह फरवरी कर दे गेहे।
– गरियाबंद जिला के देवभोग थाना क्षेत्र म ट्रक के टक्कर ले एक झिन सरपंच प्रत्यासी कुसुमा चंद्राकर के मउत होगे। ए घटना के बाद आरोपी ट्रक चालक ह अपन गाड़ी ल छोड़के भाग गे।
अउ
– कोरबा जिला के दर्री क्षेत्र म हसदेव नदी म तीन दिन पहिली बूड़े तीन झिन लइका मन ले एक झिन के शव ल बहत्तर घंटा के बाद बरामद कर ले हे। उहें, दू झिन आने लइका मन ल सरलग खोजे जात हे।