केंद्रीय गृह अउ सहकारिता मंत्री अमित शाह काली छै फरवरी के छत्तीसगढ़ आही। श्री शाह नई दिल्ली ले रईपुर विमानतल म मंझनिया बारह बजके पच्चीस मिनट म पहुंचही। एखर बाद ओमन हेलीकॉप्टर ले प्रज्ञागिरी डोंगरगढ़ हेलीपेड जाही अउ उंहा ले चन्द्रगिरी तीर्थ जाही, जिहां आने-आने कारीकरम म संघरही। संगेसंग श्री शाह ह आचार्य विद्यासागर जी महाराज के प्रथम समाधी स्मृति महोत्सव अउ श्री एक हजार आठ सिध्दचक्र विधान विश्व सांति महायज्ञ म सामिल होही। पाछू विद्यायतन समाधी स्मारक चन्द्रगिरी तीर्थ डोंगरगढ़ म राखे गे विनयांजलि समारोह म संघरही। समारोह के बाद श्री शाह छोटे बम्लेश्वरी माता मंदिर म पूजा-पाठ करही अउ फेर मंझनिया तीन बजके पैंतालिस मिनट म प्रज्ञागिरी डांगरगढ़ हेलीपेड ले रईपुर एयरपोर्ट पहुंचही अउ इंहा ले दिल्ली बर रवाना हो जही।
कांग्रेस-घोषणा पत्र
नगरीय निकाय चुनाव बर कांग्रेस ह आज अपन घोसना पत्र जारी कर देहे। कांग्रेस ह एला जन घोसना पत्र के नांव देहे। अपन घोसना पत्र म कांग्रेस ह केहे हे कि तरिया के रख-रखाव अउ सौंदर्यीकरण के काम करे जाही। नंदिया के घाट अउ तरिया म माईलोगिन मन बर चेंजिग रूम बनाय जाही। सहरी व्यापारी क्षेत्र म महिला प्रशाधन के व्यवस्था होही। एखर संगेसंग सबो चौक-चौराहा, स्कूल कालेज तीर सीसीटीवी कैमरा लगाय जाही। कांग्रेस ह श्रध्दांजलि रासि योजना म बीपीएल कारडधारी मन ल पांच हजार रूपिया देके घोसना करे हे।
उहें, हरेक निकाय म प्रतियोगी परीक्षा के तियारी बर सबो सुविधा वाले लाइब्रेरी मुफत म खोले के बात केहे गेहे। जम्मो सरकारी स्कूल अउ आत्मानंद स्कूल म हुसियार पढ़ईया लइका मन ल प्रोत्साहन रासि ले सम्मानित करे जाही। पौनी-पसारी योजना म माईलोगन मन ल आगू करे अउ उंखर बइठे के जघा ल सुविधा वाले बनाय के घोसना करे गेहे। कांग्रेस ह भाजपा असन छोटे व्यावसाई मन बर वेंडिंग जोन बनाय के बात केहे हे। स्कूल अउ कालेज के नोनी मन ल मुफत म सेनेटरी नैपकीन दे, जन्म मृत्यु प्रमाण पत्र घर तक अमराय सबो निकाय क्षेत्र मन म यूथ हब बनाय अउ महिला स्व-सहायता समूह ल रोजगार दे समेत कतकोन आने घोसना करे गेहे।
कांग्रेस कोति ले जारी घोसना पत्र ल मुख्यमंत्री विष्णुदेव साय ह भाजपा के अटल संकल्प पत्र के नकल बताय हे। संगेसंग ओमन कांग्रेस म पाछू नगरीय निकाय चुनाव के बेरा करे गे वादा ल पूरा नइ करे के आरोप लगइन हे।
मुख्यमंत्री-कोरबा
प्रदेस म होवत नगरीय निकाय चुनाव म प्रमुख पार्टी समेत आने राजनीतिक दल के नेता मन ह प्रचार अभियान तेज कर दे गेहे। एमा मुख्यमंत्री विष्णुदेव साय ह घलो आज ले चुनाव प्रचार अभियान के सुरूआत कर दीन। ओमन कोरबा म राखे आमसभा म बोलत कोरबा नगर-निगम के महापौर बर उम्मीदवार संजूदेवी राजपूत अउ पार्षद बर लोगन ले वोट डारे के अपील करीन। ए मउका म मुख्यमंत्री ह किहीन कि भारतीय जनता पार्टी कोति ले जारी अटल विश्वास पत्र के एक-एक वादा पूरा करे जाही। ओमन यहू किहीन कि दू-तीन दिन म किसान मन ल धान के अंतर के रकम जारी कर दे जाही।
उहें, रईपुर के प्रदेस कार्यालय एकात्म परिसर म नगरीय निकाय चुनाव बर अपन थीम सॉन्ग लॉन्च करीन। ए गाना ल छत्तीसगढ़ी, रैप सॉन्ग आने-आने सैली म बनाय गेहे, जेमा भाजपा सरकार के उपलब्धि के संग नगर अउ गांव के विकास ल बताय गेहे।
दंतेवाड़ा जिला म पांच महिला समेत छै माओवादी मन ह आत्मसमर्पण करीन हे। ए सबो माओवादी मलांगेर एरिया कमेटी के सदस्य बताय जात हे। एखर मन उपर कतकोन माओवादी घटना म सामिल रेहे के आरोप हे। समर्पण करइया माओवादी मन ल राज्य सरकार के पुनर्वास नीति म पच्चीस-पच्चीस हजार रूपिया के सहायता रासि दे गेहे।
उहें, इही जिला के अरनपुर थाना क्षेत्र म माओवादी मन ह ककाड़ी गांव के रहइया एक मनखे के हत्या कर दीन।
चिकित्सा महाविद्यालय-सीट मंजूरी
विश्व कैंसर दिवस म केंद्रीय स्वास्थ्य मंत्रालय ह रईपुर के पंडित जवाहर लाल नेहरू स्मृति चिकित्सा महाविद्यालय के कैंसर विभाग बर तीन सीट मंजूर करे हे। एखर ले सर्जिकल आन्कोलॉजी बिसय म सुपर स्पेसलाइजेसन म पाठ्यक्रम के पढ़ई म इही, शैक्षणिक सत्र ले सुरू करे जा सकही।
कुंभ मेला-स्पेशल ट्रेन
प्रयागराज म चलत महाकुंभ मेला म जवइया श्रध्दालू मन बर दक्षिण पूर्व मध्य रेलवे कोति ले सात अउ आठ फरवरी के टूण्डला-नेताजी सुभाषचंद्र बोस कुंभ मेला स्पेसल ट्रेन चलाय जाही।
अइसने, नौ अउ दस फरवरी के रईपुर- टूण्डला कुंभ मेला स्पेसल ट्रेन चलाय जाही, जउन रईपुर-दुरूग-राजनांदगांव, गोंदिया बालाघाट होत प्रयागराज पहुंचही।
उहें, दस अउ सत्रह फरवरी के घलो दुरूग टूण्डला कुंंभमेला स्पेसल ट्रेन चलही। ए सबो ट्रेन एक-एक फेरा बर चलाय जाही।
बलौदाबाजार-धोखाधड़ी
बलौदाबाजार जिला के एक शिक्षक के मोबाइल ले दू झन मनखे मन ह फोन-पे करके एक लाख रूपिया के रकम अपन अकांउट म धोखाधड़ी करके भेज दीन। सिकायत मिलते ए मामला म गिधौरी पुलिस कोति ले तुरते कार्रवाई करत दू घंटा के भीतरी दूनो आरोपी ल गिरफ्तार करके उंखर तीर ले अस्सी हजार रूपिया ले जादा के रकम बरामद कर लेहे।
दिलीप मिरी-जमानत
बलौदाबाजार अग्निकांड म पाछू सत्तर दिन म जेल म बंद छत्तीसगढ़िया क्रांति सेना के प्रदेस अध्यक्ष दिलीप मिरी ल काली सत्र न्यायालय ले जमानत मिलगे। ओमन जमानत बर सत्र न्यायालय म अर्जी दाखिल करे रिहीन। उंखर वकील कोति ले प्रस्तुत दस्तावेज के बाद सत्र न्यायालय ह दिलीप मिरी ल जमानत दे देहे।
दुर्घटना
प्रदेस म आज होय आने-आने रद्दा दुर्घटना म छै झिन के मउत होगे। उहें, चार झिन घायल होगे हे। खबर के मुताबिक धमतरी जिला के गांव चर्रा के एग्रीकल्चर कालेज तीर ट्रेक्टर पलटे ले, ओमा बइठे एक नाबालिक समेत तीन मनखे के घटना स्थल म मउत होगे। एमा ले मउत होय दू झन एके गांव के बताय जात हे। उहें, ए घटना म एक आने मनखे घायल होय हे, जेला अस्पताल म भर्ती कराय गेहे।
उहें, बलौदाबाजार जिला के खैंदा गांव म आज होय रद्दा दुर्घटना म दू झन के मउत होगे हे। खबर के मुताबिक ट्रैक्टर गिट्टी खाली करके गांव खैंदा कोति लहुटत रिहीस, तभे ट्रैक्टर अंतेतंते होके पलटगे। जेखर ले ट्राली म बइठे एक नाबालिक अउ एक युवा के मउकच म मउत होगे। मउत होय मनखे पलारी थाना क्षेत्र के गांव नारी के रहवइया रिहीस।
उहें, सक्ति जिला के आमागोलाई के तीर हाईवा ह दू फटफटी सवार ल अपन चपेट म ले लीस। ए हादसा ह एक मनखे के मउत होगे। उहें, तीन झिन आने मनखे घायल होय हे, जउन ल इलाज बर सक्ति के अस्पताल म भर्ती कराय गेहे।
भारत रंग महोत्सव
खैरागढ़ के इंदिरा कला संगीत विश्व विद्यालय के ऑडिटोरियम म काली ले भारत रंग महोत्सव के सुरूआत होगे हे। ए महोत्सव के सुभारंभ विश्वविद्यालय के कुलपति सत्यनारायण राठौर ह करीन। उहें, माई-पहुना के रूप म एनएसडी अउ बीएनए के पूर्व निदेसक दिनेश खन्ना मौजूद रिहीन। काली पहिली दिन नर-नारी, थैंकू बाबा लोचनदास नाटक के मंचन करे गीस। ए महोत्सव म आज गिरीश करनाड के लिखे बांग्ला नाटक हयवदन के प्रस्तति दे जाही।
लेजेन्ड-90 क्रिकेट लीग
रईपुर के सहीद वीरनारायण सिंह अंतर्राष्ट्रीय क्रिकेट स्टेडियम म काली छै फरवरी ले लेजेन्ड-90 क्रिकेट लीग टूर्नामेंट खेले जाही। अट्ठारा फरवरी तक चलइया ए क्रिकेट टूर्नामेंट म कतकोन राष्ट्रीय अउ अंतर्राष्ट्रीय स्तर के खिलाड़ी भाग लिही।
स्थानीय अवकाश-घोषणा
राज्य सरकार ह नवा रईपुर अटल नगर अउ रईपुर सहर के सबो सरकारी कार्यालय अउ संस्था बर स्थानीय अवकास के घोसना कर देहे। सामान्य प्रशासन विभाग कोति ले जारी आदेस के मुताबिक गणेश चतुर्थी म सत्ताईस अगस्त, महाअष्टमी म तीस सितंबर अउ गोर्वधन पूजा के दिन इक्कीस अक्टूबर के छुट्टी रइही। ए छुट्टी बैंक, कोषालय अउ उपकोषालय कार्यालय बर लागू नइ होही।