राज्य सरकार ह भारतीय पुलिस सेवा के अधिकारी अरूण देव गौतम ल छत्तीसगढ़ के नवा पुलिस महानिदेसक नियुक्त करे हे। श्री गौतम राज्य के बारहवां पुलिस महानिदेशक होही। ओमन ह निर्वतमान डीजीपी अशोक जुनेजा के जघा लीहीं। श्री जुनेजा के छह महीना के एक्सटेंसन आज सिरा गे। श्री गौतम उन्नीस सौ बयानवे बैच के अधिकारी हे। ओमन ल उत्कृष्ट सेवा बर संयुक्त राष्ट्र पदक अउ राष्ट्रपति पुलिस पदक ले सम्मानित करे गे हवय। ओमन ह बस्तर क्षेत्र के आईजी के रूप म घलो अपन सेवा दे हवय।
बीजापुर-जवान घायल
बीजापुर जिला म आज माओवादी मन डहार ले लगाय गे आईईडी के चपेट म आय ले तीन झिन जवान मन घायल होगे हवय। घायल जवान मन ल अस्पताल म भर्ती कराय गेहे। सबो जवान मनके हालत खतरा ले बाहिर बताय गे हवय। मिले जानकारी के अनुसार जिला के गंगालूर थाना क्षेत्र ले सुरक्षा बल के संयुक्त टीम ह तलाशी अभियान म निकले रिहीस। इही दउरान आईईडी विस्फोट होगीस। क्षेत्र म तलाशी अभियान जारी हे।
उहें, इही जिला के तर्रेम थाना क्षेत्र के ग्राम बुडगीचेरू म माओवादी मन ह दू झिन ग्रामीण मनके हत्या कर देहे। पुलिस अधीक्षक जितेन्द्र यादव ह घटना के पुष्टि करत बतईन कि माओवादी मन ह मुन्ना माड़वी अउ राजू कारम के हत्या करके सव के तीर पर्चा फेंके रिहीन। सूचना मिलते साथ पुलिस ह मउका म पहुंच के सव ल पोस्टमार्टम बर भेज दीस।
राज्य निर्वाचन आयुक्त-सुकमा
राज्य निर्वाचन आयुक्त अजय सिंह ह आज नगरीय निकाय अउ त्रिस्तरीय पंचायत चुनाव के तहत मतदान के पहिली के तैयारी के जायजा ले बर सुकमा पहुंचीन। ए दउरान ओमन ह वरिष्ठ अधिकारी मनके बइठका लेके जरूरी निरदेस दीन। एखर अलावा ओमन ह सुकमा के जनपदपारा मतदान केन्द्र के जायजा लीन। श्री सिंह ह शासकीय आईटीआई कॉलेज म बनाय गे स्ट्रांग रूम अउ मतगणना स्थल के घलो निरीक्षण करीन। ओमन ह अधिकारी मन ल स्ट्रांग रूम म सुरक्षा व्यवस्था, सीसीटीवी कैमरा संघरा जरूरी सुविधा ल समय के पहिली तैयार करे के निरदेस दीन। एखर बाद ओमन ह कुम्हाररास म ईवीएम जागरूकता सिविर के घलो अवलोकन करीन अउ ईवीएम मसीन के बारे म प्रचार-प्रसार के बात किहीन।
पंचायत चुनाव-नामांकन
प्रदेस म त्रिस्तरीय पंचायत चुनाव म आज नामांकन पत्र के जांच करे गीस। नाम वापसी के आखिरी तारीख छह फरवरी हे। संबंधित त्रिस्तरीय पंचायत म तीन चरण म – सत्रह, बीस अउ तेईस फरवरी के वोट डारे जाही अउ इही दिन मतदान केन्द्र म मतगणना होही।
राज्य निर्वाचन आयुक्त-सुकमा
राज्य निर्वाचन आयुक्त अजय सिंह ह आज नगरीय निकाय अउ त्रिस्तरीय पंचायत चुनाव के तहत मतदान के पहिली के तैयारी के जायजा ले बर सुकमा पहुंचीन। ए दउरान ओमन ह वरिष्ठ अधिकारी मनके बइठका लेके जरूरी निरदेस दीन। एखर अलावा ओमन ह सुकमा के जनपदपारा मतदान केन्द्र के जायजा लीन। श्री सिंह ह शासकीय आईटीआई कॉलेज म बनाय गे स्ट्रांग रूम अउ मतगणना स्थल के घलो निरीक्षण करीन। ओमन ह अधिकारी मन ल स्ट्रांग रूम म सुरक्षा व्यवस्था, सीसीटीवी कैमरा संघरा जरूरी सुविधा ल समय के पहिली तैयार करे के निरदेस दीन। एखर बाद ओमन ह कुम्हाररास म ईवीएम जागरूकता सिविर के घलो अवलोकन करीन अउ ईवीएम मसीन के बारे म प्रचार-प्रसार के बात किहीन।
ईडी-संपत्ति अटैच
प्रवर्तन निदेशालय-ईडी ह अवैध कोयला लेवी घोटाला मामला म कारोबारी सूर्यकांत तिवारी के करीबन पचास करोड़ रूपिया के संपत्ति ल कुर्क कर दे हवय। एमा चल अउ अचल संपत्ति सामिल हे। ए कार्रवाई ल धनशोधन निवारण अधिनियम के प्रावधान के तहत करे गेहे। ईडी ह विज्ञप्ति जारी करके बताय गेहे कि प्रवर्तन निदेशालय के जांच म पता चले हे कि निजी व्यक्ति मनके एक ठिन समूह ह राज्य के बड़े नेता अउ नौकरसाह मनके संग मिलके कोयला ट्रांसपोर्टर मन ले वसूली म लगे रिहीस। ओमन ह जुलाई दू हजार बीस अउ जून दो हजार बाईस के बीच परिवहन करे गे कोयला के प्रति टन मात्रा उपर पच्चीस रूपिया के वसूली करे रिहीन।
एनआईए-गिरफ्तारी
राष्ट्रीय जांच एजेंसी-एनआईए के टीम ह आज कांकेर जिला म आने-आने जघा म दबिश देके चार झन ल गिरफ्तार करे हे। मिले जानकारी के अनुसार एनआईए के टीम ह जिला के ग्राम कलमुच्चा ले दू अउ उसेली अउ आमाबेड़ा ले एक-एक झन मनखे ल गिरफ्तार करे हे। एनआईए ह केहे हे कि गिरफ्तार सबो लोगन मन माओवादी गतिविधि ले जुड़े हे।
रेलवे-छत्तीसगढ़ प्रावधान
भारतीय रेलवे डहार ले पेश बजट म छत्तीसगढ़ बर छह हजार नौ सौ पच्चीस करोड़ रूपिया के प्रावधान करे गेहे। एखर ले राज्य म रेल नेटवर्क के विस्तार अउ आधुनिकीकरण ल बढ़ावा मिलही। बजट प्रावधान के अनुसार राज्य म चलत छब्बीस ठिन परियोजना म सत्ताईस सौ किलोमीटर ले जादा के नवा रेलपटरी बिछाय जाही। एखर बर अड़तीस हजार तीन सौ अठहत्तर करोड़ रूपिया के प्रावधान करे गेहे। उहें, हाल म मंजूर करे गे सैंतीस किलोमीटर के सरडेंगा-भालमुड़ा नवा डबल रेललाइन बर एक हजार तीन सौ साठ करोड़ रूपिया, बत्तीस ठन रेलवे स्टेसन के आधुनिकीकरण बर एक हजार छह सौ बहत्तर करोड़ रूपिया अउ कवज सुरक्षा प्रणाली बर घलो बजट म प्रावधान हे। अइसने, बजट म रईपुर स्टेसन बर चार सौ तिरसठ करोड़, दुरूग स्टेसन बर चार सौ छप्पन करोड़ अउ बिलासपुर स्टेसन बर चार सौ पैंतीस करोड़ रूपिया के प्रावधान करे गेहे।
बजट प्रतिक्रिया
केन्द्रीय राज्यमंत्री तोखन साहू ह छत्तीसगढ़ बर रेलवे बजट म छह हजार नौ सौ पच्चीस करोड़ रूपिया के प्रावधान ल ऐतिहासिक बताय हे। ओमन किहीन कि एखर ले छत्तीसगढ़ म रेलवे के बुनियादी ढांचा म बदलाव होही। कनेक्टिीविटी म सुधार के संग यात्री सुविधा बाढ़ही अउ राज्य म आर्थिक विकास ल बल मिलही। श्री साहू ह किहीन कि ए बजट विकसित छत्तीसगढ़ के दिसा म मिल के पत्थर साबित होही।
उहें, रईपुर के इंदिरा गांधी कृषि विश्वविद्यालय के कुलपति डॉक्टर गिरीश चंदेल ह बजट ल कृषि के विकास के दिसा म क्रांतिकारी बतईन हे। ओमन किहीन कि देस के सौ ठिन जिला म प्रधानमंत्री धन-धान्य कृषि योजना सुरू करे के प्रस्ताव ह खास हे। एखर ले देस म कृषि उत्पादन बढ़ही अउ खाद्य सुरक्षा सुनिश्चित हो सकही। संगेसंग कृषि के दसा अउ दिसा म बड़े परिवर्तन देखे बर मिलही।
धान खरीदी-रिकॉर्ड
छत्तीसगढ़ ह एक खरीफ सीजन म न्यूनतम समर्थन मूल्य म एक सौ उनचास लाख मीटरिक टन ले जादा के धान खरीदी करके नवा रिकॉर्ड बनाय हे। महासमुंद जिला म सबले जादा ग्यारह लाख मीटरिक टन ले जादा धान के खरीदी करे गेहे। धान खरीदी के एवज म किसान मन ल बैंक लिकिंग व्यवस्था म इकतीस हजार नवासी करोड़ रूपिया के भुगतान करे गे हवय।
मुख्यमंत्री-बलरामपुर
मुख्यमंत्री विष्णुदेव साय ह काली बलरामपुर के श्रीकोटा आश्रम म संत गहिरा गुरू के धर्मपत्नी पूर्णिमा जी के विग्रह के प्राण-प्रतिष्ठा समारोह म सामिल होइन। ए मउका म श्री साय ह किहीन कि पूर्णिमा जी के जीवन त्याग, तपस्या अउ समाजसेवा के अद्वितीय मिसाल हे। उखर विग्रह समाज के कल्याण बर उंखर अडिग समर्पण के प्रतीक हे।
आयकर-छापा
आयकर विभाग के टीम ह आज धमतरी म एक झन ज्वेलर्स के ठिकाना म छापामार कार्रवाई करीस। ए कार्रवाई म धमतरी अउ रईपुर के टीम सामिल हे। छापा के दउरान ज्वेलर्स के संग संबंधित मनखे मनके घर म घलो छानबीन करे जावत हे। महिला अधिकारी संघरा करीब तेरह झिन अधिकारी मनके टीम ह टैक्स चोरी के सिकायत के आधार म दस्तावेज के जांच करत हे।
सीजीएमएससी घोटाला
छत्तीसगढ़ मेडिकल सर्विसेस कार्पोरेशन-सीजीएमएससी घोटाला मामला म आरोपी मोक्षित कॉर्पोरेशन के डायरेक्टर शशांक चोपड़ा ल आर्थिक अपराध अन्वेषण ब्यूरो-ईओडब्ल्यू के बिसेस कोर्ट ह छह दिन के पुलिस रिमांड म भेज देहे। एखर पहिली, सात दिन के रिमांड खतम होय शशांक चोपड़ा ल न्यायालय के बिसेस न्यायाधीश निधि शर्मा तिवारी के कोर्ट म पेस करे गीस। अब ए मामला के सुनवाई दस फरवरी के होही।
अउ अब थोरकुन समाचार सार म –
– नई दिल्ली म आज राष्ट्रपति द्रौपदी मुर्मू ले राज्यपाल रमेन डेका ह सौजन्य भेंट करीन। एखर अलावा श्री डेका ह केन्द्रीय गृहमंत्री अमित शाह ले घलो भेंट करीन।
– बलरामपुर जिला के रामानुजगंज म आज मधुमक्खी के हमला म एक झिन मनखे के मउत होगे। उहें, तीन झिन दूसर लोगन घायल होगे हे। घायल मन ल अस्पताल म भर्ती कराय गेहे।