नगरीय निकाय चुनई बर भारतीय जनता पार्टी ह आज अपन घोसना पत्र ‘‘अटल विश्वास पत्र‘‘ जारी करे हे। भाजपा के प्रदेस अध्यक्ष किरण सिंह देव, मुख्यमंत्री विष्णुदेव साय, उपमुख्यमंत्री अरूण साव, घोसना पत्र समिति के संयोजक अमर अग्रवाल, सदस्य सुनील सोनी अउ महामंत्री संजय श्रीवास्तव ह प्रदेस मुख्यालय म ए घोसना पत्र ल जारी करीन।
भाजपा ह अपन घोसना पत्र म केहे हे कि बाजार वाले जघा म माईलोगिन मन बर पिंक टायलेट बनाय जाही। एखर अलावा विद्यालय अउ महाविद्यालय म मुफ्त वाईफाई के सुविधा दे जाही। संगेसंग छात्रा मन ल मुफ्त म सैनेटरी नैपकीन उपलब्ध कराय जाही। सहर भर म स्मार्ट वंेडिंग जोन अउ फूड स्ट्रीट बनाय जाही।
नजूल जमीन के स्वामित्व बर नवा कानून बनाय के संगेसंग सबो पट्टाधारक मन ल भू-स्वामी बनाय जाही। एखर अलावा माईलोगिन मनके नांव म दरज संपत्ति के प्रापर्टी कर म पच्चीस प्रतिसत के बिसेस छूट दे जाही। उहें, हर माईलोगिन मन के सात तारीख ले पहिली संपत्ति कर के भुगतान करइया मन ल दस प्रतिसत के बिसेस छूट दे जाही। समाधान योजना के माध्यम ले बिना जुर्माना या ब्याज लगाय पुराना संपत्ति कर बर एकमुस्त निपटान दे जाही।
भाजपा घोसना पत्र-02
घोसना पत्र म भाजपा ह हरेक नगर निगम म महापौर सम्मान निधि के स्थापना करे के बात केहे हे। एखर चलत यूपीएससी के मुख्य परीक्षा उत्तीर्ण करइया उम्मीदवार मन ल एक लाख रूपिया के प्रोत्साहन रासि दे जाही। उहें, नगरीय निकाय के व्यावसायिक केंद्र म बिजली, सड़क, सौचालय अउ पेयजल जइसे जरूरी सुविधा के व्यवस्था करे जाही। घोसना पत्र के अनुसार भाजपा कोति ले स्व-सहायता समूह बर हर नगर निगम म बर्तन बैंक के स्थापना करे जाही। एखर चलत महतारी वंदन योजना के लाभार्थी मन ल ढाई लाख रूपिया तक के ऋण अउ मुफ्त प्रसिक्षण दे जाही। ताकि ओमन ह आर्थिक रूप ले सशक्त अउ आत्मनिर्भर बन सकय।
पंचायत चुनाव-नामांकन
प्रदेस म त्रिस्तरीय पंचायत चुनई के चलत नामांकन पत्र जमा करे के आज आखिरी दिन रिहीस। काली चार फरवरी के नामांकन पत्र के जांच करे जाही। फेर नांव वापसी के आखिरी तारीख छै फरवरी हवय। बतादन कि त्रिस्तरीय पंचायत चुनई ह तीन चरण म होही, जेखर बर सत्रह, बीस अउ तेईस फरवरी के वोट डारे जाही अउ इही दिन मतदान केंद्र म वोट के गिनती घलो हो जही।
रेल मंत्री-छत्तीसगढ़ प्रावधान
रेल मंत्री अश्वनी वैष्णव ह ऑनलाइन पत्रकार मनले गोठ करत हुए बतइन कि छत्तीसगढ़ बर बजट म रेलवे ह छै हजार नौ सौ पचीस करोड़ रूपिया के प्रावधान करे हे। छत्तीसगढ़ म सत-प्रतिसत विद्युतीकरण के काम पूरा होगे हे। पाछू मोदी सरकार के दस बछर म छत्तीसगढ़ म इकचालीस हजार रेलवे म निवेस होय हे। छत्तीसगढ़ म एक हजार एक सौ पचीस किलो मीटर नवा रेलवे लाइन बनाय गेहे। संगेसंग छत्तीसगढ़ म एक हजार एक सौ पांच किलो मीटर रेलवे कवच दुर्घटना ल रोके बर लगाय जाही।
रेल मंत्री ह बतइन कि ओमन ह छत्तीसगढ़ के मुख्यमंत्री विष्णुदेव साय ले सरलग गोठबात करत हे, अउ आदिवासी बहुल क्षेत्र म रेलवे सुविधा म विस्तार होवय, एखर बर केंद्र सरकार ह सरलग कोसिस करत हे।
माओवादी मुठभेड़
कांकेर जिला म आज सुरक्षा बल अउ माओवादी मनके बीच होय मुठभेड़ म एक झिन माओवादी ह मारे गेहे। पुलिस के अनुसार मुठभेड़ म कतकोन अउ माओवादी मनके मारे जाय अउ घायल होय के संभावना हे।
जानबा के अनुसार माओवादी मनके उंहा रहे के सूचना म कांकेर, नारायणपुर के तीर-तखार ले जुड़े जघा म डीआरजी अउ बीएसएफ के टीम ह उत्तर बस्तर माड़ डिवीजन के माओवादी विरोधी अभियान बर निकले रिहीन। फेर इही बेरा म जवान मन अउ माओवादी मनके बीच मुठभेड़ होगे रिहीस, जेखर बाद घटना स्थल म ही एक झिन वर्दीधारी पुरूष माओवादी के शव मिलिस अउ एखर संग एक ठिन एसएलआर रायफल अउ आने नक्सली जिनिस ल जब्त करे गीस।
महाकुंभ-अमृत स्नान
प्रयागराज के महाकुंभ म आज बसंत पंचमी के मउका म तीसर अमृत स्नान बिहनिया ले चलत हे। अभू तक लाखो श्रध्दालु मन ह ए संगम म डूबकी लगा लेहे। अभू घलो श्रध्दालु मन सरलग इंहा पहुंचत हे। उहें, बिहनिया बड़का संख्या म लोगन मन ह गंगा आरती म घलो सामिल होइन।
राजेश अवस्थी-निधन
छत्तीसगढ़ी फिलिम के जाने-माने अभिनेता अउ भारतीय जनता पार्टी के सांस्कृतिक प्रकोष्ठ के प्रदेस संयोजक अउ छत्तीसगढ़ फिल्म विकास निगम के पूर्व अध्यक्ष राजेश अवस्थी के गरियाबंद म दिल के दउरा आय ले निधन होगे। राजेश अवस्थी ह गरियाबंद जिला के अमलीपदर के रहइया रिहीस, फेर राजेश अवस्थी ह न सिरिफ छत्तीसगढ़ी बल्कि भोजपुरी फिलिम म घलो काम करे रिहीन। राजेश के बड़े भाई प्रकाश अवस्थी ह घलो छत्तीसगढ़ी सिनेमा के अभिनेता अउ निर्देसक हवय। बछर दू हजार अट्ठारा म तत्कालीन मुख्यमंत्री डॉक्टर रमन सिंह ह छत्तीसगढ़ फिल्म विकास निगम के गठन करे रिहीन अउ राजेश अवस्थी ल फिल्म विकास निगम के पहिली अध्यक्ष बनाय गे रिहीस।
राजेश अवस्थी के अंतिम संस्कार आज रईपुर के महादेव घाट मुक्तिधाम म होइस। ओखर निधन म मुख्यमंत्री विष्णुदेव साय ह दुख जतइन हे। ओमन ह किहीन हे कि राजेश अवस्थी के लोककला, संस्कृति अउ परंपरा के संवर्धन म अनुकरणीय योगदान रहे हे। मुख्यमंत्री ह श्री अवस्थी के निधन ल छत्तीसगढ़ी फिल्म उद्योग बर अपूरणीय क्षति बताय हे।
उहें, भाजपा के प्रदेस अध्यक्ष किरण सिंह देव ह दुख जतात हुए किहीन हे कि पार्टी ह एक झिन समर्पित कार्यकर्ता ल खो डरे हे। जेखर भरपाई कभू नइ हो सकही।
उत्तराखंड-राष्ट्रीय खेल
उत्तराखंड म चलत राष्ट्रीय खेल के सातवां दिन म आज छत्तीसगढ़ ह तैराकी म कांस्य पदक पाय हे। ए पदक ल कोरबा के भूमि गुप्ता ह दू सौ मीटर स्पर्धा म हासिल करे हे। राष्ट्रीय खेल म तैराकी म छत्तीसगढ़ ह पहिली घांव पदक जीते हे।
आकाशवाणी समाचार ले बात करत हुए दल के प्रमुख साहीराम जाखड़ ह बतइन कि अभू तक छत्तीसगढ़ ह पांच ठिन स्वर्ण अउ सात ठिन कांस्य पदक समेत बारह ठिन पदक पाय हे।
दुर्घटना
बलरामपुर जिला ले महाकुंभ जात एक कार ल तेज रफ्तार ट्रेलर ह टक्कर मार दीस अउ ए घटना के बाद कार ह एक ठिन घर म जाके खुसर गे। ए घटना म प्रधान आरक्षक समेत छै झिन लोगन मनके मउका म ही मउत होगे अउ तीन झिन के हालत ह गंभीर हवय। ए हादसा ह काली रतिहा उत्तर प्रदेस के सोनभद्र जिला म होय हे। दुर्घटना ग्रस्त कार म सात झिन लोगन मन रिहीन।
ऐति, मृतक मन म बलरामपुर के करौंदा थाना म पदस्थ प्रधान आरक्षक रवि प्रकाश मिश्रा ह घलो सामिल हवय।
उत्तर प्रदेस के सोनभद्र जिला के हाथीनाला थाना क्षेत्र के रानीताली म ए घटना ह तभ होय हे, जब एक ठिन ट्रक ह अनियंत्रित होके डिवाइडर पार करत हुए दूसर लाइन म आगू रिहीस अउ कार ल ठोकर मार दे रिहीस।
फर्जी अनुभव प्रमाण पत्र
बीएसएनएल कोति ले जारी करे गे निविदा म भाग लेबर फर्जी अनुभव प्रमाण पत्र प्रस्तुत करे के मामला आगू आय हे। ए मामला म दिनेश इंजीनियरिंग लिमिटेड के खिलाफ छत्तीसगढ़ इन्फोटेक प्रमोसन सोसायटी-चिप्स के मुख्य कार्यपालन अधिकारी ह सिविल लाइन थाना म एफआईआर दर्ज कराय के निरदेस दीन हे।
अउ अब थोरकुन समाचार सार म –
– राष्ट्रीय नाट्य विद्यालय-एनएसडी कोति ले खैरागढ़ म काली चार फरवरी
ले भारत रंग महोत्सव के आयोजन करे जाही।
– जांजगीर-चांपा जिला म भारतीय जनता पार्टी के कार्यकर्ता मन बर सम्मेलन के आयोजन करे गीस। ए कार्यकर्ता सम्मेलन म उपमुख्यमंत्री विजय शर्मा, वित्त मंत्री ओपी चौधरी, पूर्व नेता प्रतिपक्ष नारायण चंदेल ह घलो सामिल होइन।
अउ
– बेमेतरा जिला म नगरीय निकाय चुनई के चलत मतदान दल मन ल दे जात प्रसिक्षण म अनुपस्थिति अउ निर्वाचन काम म लापरवाही बरते के आरोप म कलेक्टर रणबीर शर्मा ह छै झिन शिक्षक मन ल निलंबित कर देहे।