त्रिस्तरीय पंचायत चुनाव के नामांकन पत्र जमा करे के आखिरी तारीख काली हरय। उहें, परन दिन चार फरवरी के नामांकन पत्र मनके जांच करे जाही, फेर नांव वापसी के आखिरी तारीख छै फरवरी हे। संबंधित त्रिस्तरीय पंचायत मन म तीन चरण म सत्रह, बीस अउ तेईस फरवरी के वोटिंग होही अउ इहीच दिन मतदान केंद्र मन म वोट के गनती घलो होही।
कांग्रेस-आरोप पत्र
प्रदेस कांग्रेस कमेटी ह नगरीय निकाय चुनाव ल देखत राज्य सरकार के खिलाफ पचीस बिन्दु वाले आरोप पत्र जारी करे हे। ए आरोप पत्र म राज्य सरकार के एक बछर के कार्यकाल ल दिसाहीन बतावत केहे गेहे कि सरकार ह जनता के उम्मीद उपर खरा उतरे म विफल रेहे हे। प्रदेस कांग्रेस अध्यक्ष दीपक बैज ह आज रईपुर स्थित प्रदेस कांग्रेस कार्यालय म राखे गे एक ठिन पत्रकारवार्ता म आरोप पत्र जारी करीन।
उहें, कांग्रेस ह नगरीय निकाय चुनाव के चलत उनचास नगर पालिका मन बर चुनाव प्रभारी के नियुक्ति कर देहे।
रायपुर-नगर निगम
प्रदेस म नगरीय निकाय चुनई ल लेके दूनो प्रमुख दल भाजपा अउ कांग्रेस के प्रचार अभियान जोरदरहा चलत हे। राज्य के सबले महत्वपूर्ण रईपुर नगर निगम म महापौर पद बर सोलह झिन उम्मीदवार मैदान म हे। फेर मुख्य मुकाबला भाजपा के प्रत्यासी मीनल चौबे अउ कांग्रेस के प्रत्यासी दीप्ति दुबे के बीच देखे जात हे।
भाजपा प्रत्यासी मीनल चौबे ह आकाशवाणी समाचार ले गोठबात करत बतइन कि ओ ह बुनियादी सहूलियत के मुद्दा ल लेके चुनाव मैदान म उतरे हे।
उहें, कांग्रेस प्रत्यासी दीप्ति दुबे ह बतइन कि राजधानी के ट्रैफिक सिस्टम ल व्यवस्थित बनाना अउ माईलोगिन मनके सशक्तिकरण उंखर मुख्य मुद्दा होही।
सत्तर ठिन वार्ड वाले रईपुर नगर निगम म दस लाख छत्तीस हजार ले जादा वोटर हे, जेमा पांच लाख पंद्रह हजार ले जादा पुरूष वोटर अउ पांच लाख बीस हजार ले जादा महिला वोटर। उहें, दू सौ चौवन झिन थर्ड जेंडर के मतदाता हे। चुनाव आयोग ह मतदान बर एक हजार पंचानवे ठिन केंद्र बनाय हे।
इही बीच, निगम चुनाव ल लेके मतदाता मन म भारी उछाह देखे जात हे। बाल गंगाधर तिलक वार्ड के मतदाता ब्रजेश सिंह ह रईपुर के ट्रैफिक सिस्टम ल सुघ्घर बनाय के सलाह दीन।
अइसने, एक झिन आने मतदाता गोपाल मरोड़िया ह रईपुर नगर निगम के विकास ल राजधानी के मुताबिक करे के बात किहीन।
विश्व कप-महिला क्रिकेट
भारत ह आईसीसी अंडर-नाइंटीन महिला टी-ट्वेंटी क्रिकेट विश्व कप के खिताब सरलग दूसरइया बेर जीत लेहे। क्वालालाम्पुर म आज फाइनल म भारत ह दक्षिण अफ्रीका ल नौ विकेट ले हराइस। जेमा भारत ह तिरासी रन के लक्ष्य ल बावन गेंद शेष राहत आसानी ले हासिल कर लीस।
मुख्यमंत्री विष्णुदेव साय ह महिला टी-ट्वेंटी क्रिकेट टीम के सुघ्घर जीत उपर बधई अउ सुभकामना दीन हे। ओमन किहीन कि ए उपलब्धि ह भारत के जवान लइका मनके आत्मविस्वास अउ संकल्प ल मजबूत करही।
माओवादी-मुठभेड़
बीजापुर म काली सुरक्षा बल मन संग होय मुठभेड़ म मारे गे सबो आठ झिन माओवादी मन के सिनाख्त कर ले गेहे। मारे गे माओवादी मन उपर सोलह लाख रूपिया के इनाम घोसित रिहीस, जेमा एक झिन पांच लाख रूपिया के इनामी माओवादी घलो सामिल हे। उहें, मुठभेड़ म दू झिन जवान घलो घायल होय हे। जिखर हालत खतरा ले बाहर बताय जात हे। मुठभेड़ बाद घटना जघा ले इन्सास रायफल, तीन ठिन मैग्जीन, दू ठिन बारह बोर के रायफल अउ एक बैरल ग्रेनेड लॉन्चर समेत अब्बड़ अकन माओवादी जिनिस बरामद करे गेहे।
ओति, इही जिला म आज सुरक्षा बल के टीम ह उसूर- आवापल्ली रद्दा म माओवादी मन डहार ले लगाय गे पचीस किलो के आईईडी बरामद करे हे, जेला बम निरोधक दस्ता के टीम ह निष्क्रिय कर देहे।
सिविल जज-आवेदन तिथि
छत्तीसगढ़ लोक सेवा आयोग ह सिविल जज भर्ती बर ऑनलाइन आवेदन के तिथि ल तेईस फरवरी तक बढ़ा देहे। एखर पहिली आवेदन के आखिरी तारीख चोबीस जनवरी रिहीस। आयोग डहार ले निकले सूचना म केहे गे हे कि सिविल जज भर्ती बर अब लॉ डिग्री वाले मन घलो आवेदन दे सकत हे। एखर बर आगू स्नातक होय के संगे वकील के रूप म नामांकित होना जरूरी रिहीस, फेर हाईकोर्ट के अंतरिम आदेस के परिपालन म ए सर्त ल हटाय गेहे।
इंहा ए बतादन कि प्रदेस म सिविल जज के संतावन ठिन पद बर भर्ती होही, जेखर बर पाछू छब्बीस दिसंबर ले आवेदन भरे जात हे।
फर्जी हस्ताक्षर-गिरफ्तारी
सक्ती जिला के बाराद्वार पुलिस ह गैर कानूनी ढंग ले फ्लाईएस डंपिंग मामला के मुख्य आरोपी ल गिरफ्तार करके न्यायिक रिमांड म भेज देहे। आरोपी ह रायगढ़ जिला के खरसिया के रहवइया हरय। ओखर उपर आरोप हे कि ओहर अपन सहयोगी मन संग मिलके फर्जी सील बनवाय बाद कलेक्टर अउ खनिज अधिकारी के फर्जी सिग्नेचर करके फ्लाईएस डंपिंग बर आदेस निकाले रिहीस। आरोपी के खिलाफ रायगढ़ अउ बिलासपुर म मारपीट, धोखाधड़ी अउ सरकारी काम म बाधा डारे समेत कई ठिन अपराध दर्ज हे। उहें, ए मामला म पहिली भी तीन झिन आरोपी के गिरफ्तारी करे जा चुके हे।
तेंदुआ हमला-मौत
धमतरी जिला म मगरलोड इलाका के गांव बेंद्राचुआ म आज तेंदुआ के हमला ले एक झिन सियनहा के मउत होगे। मिले जानकारी के मुताबिक ए सियान ह रद्दा तीर बइठे रिहीस, तभे तेंदुआ ह हुरहा ओखर उपर हमला कर दीस। घटना के खबर मिले बाद वन अधिकारी अउ मगरलोड पुलिस के टीम ह मउका म पहुंचिस अउ मउका म पहुंचके जांच सुरू कर देहे।
ओति, दंतेवाड़ा जिला म बारसूर थाना क्षेत्र के बेडमा के जंगल भीतरी भालू ह एक झिन गंवई के मनखे उपर हमला कर दीस। जेखर ले ओ मनखे ह गंभीर रूप ले घायल होगे हे।
बसंत पंचमी
बसंत पंचमी अउ सरसती पूजा आज छत्तीसगढ़ समेत देस के कतकोन जघा म श्रध्दा, उल्लास अउ आस्था के संग मनाय जात हे। ए मउका म ज्ञान, बुध्दि अउ विद्या के देवी मां सरसती के पूजा-अर्चना करे गीस। राष्ट्रपति द्रौपदी मुर्मु अउ प्रधानमंत्री नरेंद्र मोदी ह लोगन मन ल बसंत पंचमी अउ सरस्वती पूजा के सुभकामना दीन हे।
मुख्यमंत्री-विद्यासागर महाराज स्मृति महोत्सव
मुख्यमंत्री विष्णुदेव साय काली राजनांदगांव जिला के डोंगरगढ़ के चंद्रगिरी तीरीथ जघा म जैन मुनि विद्यासागर जी महाराज के पहलइया समाधि स्मृति महोत्सव म सामिल होइन। ए मउका म मुख्यमंत्री ह किहीन कि संत सिरोमनि आचार्य विद्यासागर जी महाराज आध्यात्मिक चेतना के पुंज रिहीन। ओमन किहीन कि छत्तीसगढ़ के सौभाग्य हरे कि आचार्य जी ह संलेखना बर प्रदेस के, ए भुंईया ल चुनिन। मुख्यमंत्री ह यहू बतइन कि आचार्य विद्यासागर जी महाराज ह धरमचर्या बर अपन जीवन के लंबा बेरा डोंगरगढ़ के ए चंद्रगिरी तीर्थ जघा म बिताइन।
अउ अब पेस हे मौसम के हाल…
प्रदेस म जाड़ ह थोर-थोर कमती होय ल लग गेहे। मौसम विभाग ले मिले जानकारी मुताबिक एक ठिन पश्चिमी विक्षोभ के सेति काली ले हवा के दिसा म बदल सकत हे। उहें, दिन के लंबाई बाढ़े के सेति अधिकतम तापमान ह घलो थोर बहुत बाढ़ही।
अउ अब थोरकुन समाचार सार म –
– कोरबा जिला के दीपका पुलिस ह नौकरी बर लुचपत दे के मामला म संजय दास के खिलाफ एफआईआर दर्ज करे हे।
– कोंडागांव जिला के माकड़ी पुलिस ह अवैध गांजा तस्करी के मामला म एक झिन मनखे ले गिरफ्तार करे हे।
अउ
– दुरूग पुलिस ह आज बिहनिया तलपुरी कॉलोनी म छापा मारिस। ए दउरान पंद्रह सौ ले जादा घर मनके तलासी ले गीस।