केंद्रीय वित्त मंत्री निर्मला सीतारमण ह आज अवइया वित्तीय बछर बर केंद्रीय बजट पेस करीन। ए बजट ह एनडीए सरकार के तीसर कार्यकाल के पहिली बजट हरय। बजट पेस करत केंद्रीय मंत्री ह किहीन कि देस के विकास के इंजन के रूप म चार क्षेत्र के पहिचान करे गेहे। जेमा कृषि, लघु अउ मध्यम उद्योग-एमएसएमई, निवेश अउ निर्यात। अपन बजट भाषण के दउरान वित्त मंत्री ह आने-आने क्षेत्र बर कतकोन घोसना करीन।
बजट म किसान मन बर पीएम धन-धान्य कृषि योजना के घोसना करे गीस। जेमा देस के अइसन सौ जिला ल ले जाही, जिहां कृषि उत्पादन ए बेरा कमती होवत हे। ए योजना ले डेढ़ करोड़ ले जादा किसान मन ल फायदा मिलही। राहेर, उरीद अउ मसूर उपर बिसेस धियान देबर दलहन फसल म आत्मनिर्भरता मिसन सुरू करे जाही। अवइया चार बछर के दउरान केंद्रीय एजेंसी मन ह किसान मनले ए दाल ल खरीदही। बजट म किसान क्रेडिट कार्ड के ऋण सीमा तीन लाख रूपिया ले बढ़ाके पांच लाख रूपिया कर दे गेहे।
एमएसएमई क्षेत्र के गारंटी कवर के संग दे जाय ऋण ल पांच करोड़ रूपिया ले बढ़ाके दस करोड़ रूपिया करे के घोसना होइस। एखर अलावा अनुसूचित जाति अउ जनजाति के पहिली घांव उद्यम सुरू करइया पांच लाख माईलोगिन मन ल दू करोड़ रूपिया तक के कर्जा दे जाही।
केंद्रीय बजट-02
नवा कर व्यवस्था के तहत बजट म केहे गीस कि एक लाख रूपिया तक हरेक महिना के औसत आय उपर अब कोनो प्रकार के कर नइ लगय। उहें, वेतनभोगी करदाता मन बर ए सीमा पचहत्तर हजार रूपिया के मानक कटौती के सेति बारह लाख पचहत्तर हजार रूपिया होही। वरिष्ठ नागरिक मन बर ब्याज दर कटौती के सीमा पचास हजार रूपिया ले बढ़ाके एक लाख रूपिया कर दे गेहे। किराया उपर टीडीएस बर वार्षिक सीमा दू लाख चालीस हजार रूपिया ले बढ़ाके छै लाख रूपिया करे गेहे। संशोधित आयकर रिटर्न के बेरा ल दू ले बढ़ाके चार साल कर दे गेहे। त उहें, टीसीएस भुगतान म देरी ल अब अपराध नइ माने जाय।
सरकारी स्कूल मन म अवइया पांच बछर के दउरान पचास हजार अटल टिंकरिंग प्रयोगशाला बनाय जाही। भारत नेट परियोजना के तहत गांव-गवई वाले क्षेत्र के जम्मो सरकारी माध्यमिक विद्यालय अउ प्राथमिक स्वास्थ्य केंद्र मन म ब्रॉडबैंड कनेक्टिविटी दे जाही। गिग वर्कर मन ल पहिचान पत्र दे जाही अउ पीएम जनआरोग्य योजना के तहत ई-श्रम पोर्टल अउ स्वास्थ्य देखभाल बर उंखर पंजीकरण करे जाही। कैंसर के संगेसंग आने गंभीर रोग मनके इलाज बर छत्तीस ठिन जीवनरक्षक औषधी मन ल बुनियादी सीमा सुल्क ले छूट दे गेहे।
वित्त मंत्री ह माईलोगिन अउ लइका मनके पुष्टई ल मजबूत बनाय बर सक्षम आंगनबाड़ी अउ पोषण स्कीम के घोसना करे हे।
बजट-प्रतिक्रिया
केंद्रीय बजट उपर अपन बिचार राखत प्रधानमंत्री नरेंद्र मोदी ह किहीन कि किसान मन बर जउन घोसना होय हे, ओ ह कृषि क्षेत्र अउ जम्मो ग्रामीण अर्थव्यवस्था म नवा क्रांति के आधार बनही।
ऐति, केंद्रीय बजट उपर छत्तीसगढ़ के मुख्यमंत्री विष्णुदेव साय ह एला देस के हर लोगन मनके सपना ल पूरा करइया बजट बतइन। ओमन किहीन कि ए बजट भारत के सुनहरा भविष्य के दस्तावेज हरय। ए ह देस के किसान, युवा अउ माईलोगिन मन ल समर्पित बजट हरय। एखर ले रोजगार के नवा रद्दा खुलही।
त उहें, प्रदेस भाजपा अध्यक्ष किरण सिंह देव ह किहीन कि ए बजट ले तय होगे हे कि भारत ह विश्व के अगुवई करही। ओमन किहीन कि बजट ह गरीब किसान अउ मध्यम वर्ग के जिनगी ल संवारही।
उहें, दूसर कोति, कांग्रेस नेता अउ पूर्व मुख्यमंत्री भूपेश बघेल ह किहीन कि ए बजट ले जनता के उम्मीद उपर पानी फिर गेहे। लोगन मन ल उम्मीद रिहीस कि ए बजट म रोजगार बाढ़े अउ महंगाई कम करे बर प्रयास करे जाही, फेर अइसे कोनो प्रकार के बात नइ केहे गेहे।
ऐति, प्रदेस कांग्रेस अध्यक्ष दीपक बैज ह एला झूठा वादा अउ खोखला दावा के बजट बतइन।
माओवादी-मुठभेड़
बीजापुर म आज सुरक्षा बल के संग होय मुठभेड़ म आठ माओवादी मारे गेहे। ए माओवादी मनके सव ल बरामद कर ले गेहे। सुरक्षा बल ह मउका ले इंसास राइफल अउ बैरेल ग्रेनेड लांचर के संगेसंग कतकोन हथियार बरामद करे हे। पुलिस डहार ले दे गे जानबा के मुताबिक गंगालूर क्षेत्र म माओवादी मनके होय के सूचना मिले के बाद रिजर्व गार्ड, स्पेसल टास्क फोर्स, सीआरपीएफ अउ कोबरा बटालियन के संयुक्त टीम ह माओवादी विरोधी अभियान बर निकले रिहीन। आज बिहनिया ले सुरक्षा बल अउ माओवादी मनके बीच रूक-रूक के गोलाबारी होइस। पुलिस ह ए मुठभेड़ म कतकोन अउ माओवादी मनके मारे जाय के संसो जताय हे। क्षेत्र म सर्च अभियान चलत हे।
निकाय चुनाव-उम्मीदवार
प्रदेस म होवइया नगरीय निकाय चुनाव के तहत नाम वापसी के बाद राज्य के आने-आने नगर निगम, नगर पालिका परिषद अउ नगर पंचायत मन म महापौर अउ अध्यक्ष पद बर कुल सात सौ छियानवे झिन प्रत्यासी मन मैदान म रहि गेहे। काली नाम वापसी के आखिरी दिन एक सौ अट्ठाईस प्रत्यासी मन अपन नाम वापिस लीन। प्रदेस के दस नगर पालिक निगम, उनचास नगर पालिका अउ एक सौ चौदह नगर पंचायत मन म ग्यारा फरवरी के वोट डारे जाही। चुनाव के परिणाम पंद्रह फरवरी के करे जाही।
त उहें, त्रिस्तरीय पंचायत चुनई बर ए बेरा नामांकन जमा करे के काम चलत हे। नामांकन जमा करे के आखिरी तारीख तीन फरवरी हवय।
रईपुर के इंदिरा गांधी कृषि विश्वविद्यालय के दसवां दीक्षांत समारोह म आज राज्यपाल रमेन डेका अउ मुख्यमंत्री विष्णुदेव साय ह सामिल होइन। समारोह म सोलह झिन हुसियार छात्र मन ल स्वर्ण अट्ठारा झिन ल रजत अउ चार झिन छात्र मन ल कांस्य पदक दे गीस। संगेसंग करीबन चार हजार दू सौ छात्र मन ल ग्रेजुएसन, पोस्ट ग्रेजुएसन अउ पीएचडी के उपाधि दे गीस।
समारोह म राज्यपाल ह नवा शिक्षा नीति के जिकर करत किहीन कि एमा डिग्री के संग कौसल विकास ल प्राथमिकता दे गेहे। त, उहें, मुख्यमंत्री ह किहीन कि राज्य सरकार ह विकसित छत्तीसगढ़ बनाय बर विजन डाक्यूमेंट बनाय हे।
धान खरीदी
राज्य म एसो किसान मन ले समर्थन मूल्य म रिकॉर्ड एक सौ उनचास लाख मीट्रिक टन ले जादा धान बिसाय गेहे। चौदह नवंबर ले इकतीस जनवरी तक चले धान खरीदी अभियान म करीबन साढ़े पच्चीस लाख किसान मन ह धान बेचिन। जेखर एवज म किसान मन ल बैंक लिंकिंग के माध्यम ले इकतीस हजार नवासी करोड़ रूपिया के भुगतान करे गीस। मुख्यमंत्री ह किहीन कि राज्य सरकार ह धान खरीदी के अंतर के रासि ल जल्दीच किसान मनके खाता म भेज दे जाही।
उत्तराखंड चलत राष्ट्रीय खेल म आज छत्तीसगढ़ के एक ठिन अउ स्वर्ण पदक मिलिस।
योगासन के आर्टिस्टिक पेयर इवेंट के फाइनल राउंड म प्रदेस के प्रकाश साहू अउ प्रभाकर सिंह ह जोरदरहा प्रदर्सन करत पहिली स्थान बनइन अउ स्वर्ण पदक जीतिन। उहें, बैडमिंटन म छत्तीसगढ़ के पुरूष टीम ल कांस्य पदक मिलिस।
छत्तीसगढ़ ह अब तक ए राष्ट्रीय खेल म पांच ठिन स्वर्ण पदक जीत चुके हे।
महाकुंभ-स्पेशल ट्रेन
दक्षिण पूर्व मध्य रेलवे डहार ले प्रयागराज जवइया श्रध्दालु मनके सुविधा बर कुंभ मेला बिसेस रेलगाड़ी चलाय जात हे। जेमा विशाखापट्टनम-गोरखपुर कुंभ मेला स्पेसल ट्रेन चार फरवरी के विशाखापट्टनम ले प्रयागराज बर छुटही। त उहें, ए रेलगाड़ी ह सात फरवरी के गोरखपुर ले विशाखापट्टनम बर छुटही। रेलगाड़ी ह रायगढ़, चांपा, बिलासपुर, पेण्ड्रा रोड, अनूपपुर, शहडोल अउ उमरिया स्टेसन म रूकही।
अइसने, दू फेरा बर दुरूग-टुंडला महाकुंभ मेला स्पेसल रेलगाड़ी घलो पांच अउ उन्नीस फरवरी के दुरूग ले रवाना होही। वापसी म ए रेलगाड़ी ह छै अउ बीस फरवरी के टुंडला ले दुरूग बर रवाना होही। ए रेलगाड़ी ह रईपुर, भाटापारा, उसलापुर, पेण्ड्रारोड, अनूपपुर, इटावा स्टेसन म रूकही।
अउ अब थोरकुन समाचार सार म –
– मुख्यमंत्री विष्णुदेव साय ह रायगढ़ जिला म बर्ड फ्लू के पुष्टी होय के बाद राज्य भर म बर्ड फ्लू के रोकथाम बर दिसा-निरदेस देहे। एला रोके बर रेपिड रिस्पांस टीम के संगेसंग राज्य अउ जिला स्तर म कंट्रोल रूम बनाय गेहे।
अउ
– अग्निवीर वायु सेना म भर्ती बर काली दू फरवरी तक ऑनलाइन आवेदन अर्जी करे जा सकथे।