संसद के बजट सत्र आज ले सुरू होगे हे। राष्ट्रपति द्रौपदी मुर्मु ह लोकसभा अउ राज्यसभा के संयुक्त बइठका ल संबोधित करत किहीन कि विश्व भर म अस्थिरता के बीच भारत आर्थिक, समाजिक अउ राजनीतिक स्थिरता के एक ठिन स्तंभ के रूप म दुनिया के आगू उदाहरण पेस करत हे। ओमन ह विस्वास जतइन कि बछर दू हजार सैंतालिस तक देस के अवइया पीढ़ी, निश्चित रूप ले एक विकसित, सुदृढ़, सक्षम अउ समृध्द भारत बनके उभरही।
श्रीमती मुर्मु ह किहीन कि देसभर म प्रधानमंत्री आवास योजना के विस्तार के फइसला करे गेहे।
प्रधानमंत्री आवास योजना के विस्तार करत तीन करोड़ अतिरिक्त परिवार मन ल नवा घर देके निर्णय ले गेहे।
प्रधानमंत्री नरेंद्र मोदी ह विस्वास जताय हे कि संसद के बजट सत्र दू हजार सैंतालिस तक विकसित भारत के लक्ष्य ल पाय बर नवा आत्मविस्वास अउ ऊर्जा भरही। संसद के बजट के सत्र के सुरूआत पहिली मीडिया ल संबोधित करत श्री मोदी ह किहीन कि देस, विकसित भारत के अपन संकल्प ल पूरा करही।
आर्थिक सर्वेक्षण
केंद्रीय वित्त मंत्री निर्मला सीतारमण ह आज संसद म आर्थिक समीक्षा दू हजार चौबीस-पच्चीस पेस करीन। एमा चालू वित्त बछर म भारत के वास्तविक सकल घरेलू उत्पाद म छै दसमलव चार प्रतिसत के बढ़ोत्तरी होय के अनुमान लगाय गेहे। वित्त बछर दू हजार छब्बीस म ए बढ़ोत्तरी छै दसमलव तीन ले छै दसमलव आठ प्रतिसत के बीच रहे के संभावना हे। आर्थिक सर्वेक्षण म ए बात ल महत्ता दे गेहे कि घरेलू अर्थव्यवस्था के बुनियाद मजबूत बने हे, जेमा संतुलित राजकोषीय समेकन अउ स्थिर निजी खपत हे। एमा उल्लेख करे गेहे कि देस ह कृषि अउ सेवा क्षेत्र डहार ल समर्थित स्थिर आर्थिक विकास प्रदर्सित करे हे। सर्वेक्षण म बताय गेहे कि देस के जीडीपी वित्त बछर दू हजार पच्चीस के पहिली तिमाही म छै दसमलव सात प्रतिसत अउ दूसरा तिमाही म पांच दसमलव चार प्रतिसत बाढ़े हे। एखर मतलब हे कि चालू वित्त बछर के पहिली छैमाही म वास्तविक जीडीपी बढ़ोत्तरी छै प्रतिसत होही।
वित्त बछर दू हजार पच्चीस के पहिली छैमाही म कृषि विकास स्थिर रिहीस। उहें, दूसरा तिमाही म तीन दसमलव पांच प्रतिसत के बढ़ोत्तरी दर दर्ज करे गीस। वित्त बछर दू हजार पच्चीस के पहिली छैमाही म औद्योगिक क्षेत्र म छै प्रतिसत के बढ़ोत्तरी होइस। सेवा क्षेत्र डहार ले पहिली छैमाही म सात दसमलव एक प्रतिसत के बढ़ोत्तरी के संग अच्छा प्रदर्सन करीन।
माओवादी-आत्मसमर्पण
बीजापुर जिला म आज छै लाख रूपिया के इनामी संग दस माओवादी मन ह पुलिस के आगू आत्मसमर्पण करे हे। आत्मसमर्पित माओवादी मन ह एओबी के पार्टी सदस्य, सीएनएम अध्यक्ष, डी.ए.के.एम.एस अध्यक्ष, पीएलजीए सदस्य, जनताना सरकार के सदस्य, कुटीर शाखा अउ कृषि शाखा के अध्यक्ष संग सदस्य सामिल हे। ए माओवादी मन ल राज्य सरकार के पुनर्वास नीति के तहत पचीस-पचीस हजार रूपिया के प्रोत्साहन रासि दे गीस।
उहें, कांकेर जिला म आज सात इनामी माओवादी मन ह पुलिस के आगू आत्मसमर्पण करे हे। एमा ले तीन माओवादी मन उपर आठ-आठ लाख रूपिया, एक झिन माओवादी उपर पांच लाख रूपिया अउ तीन माओवादी मन उपर एक-एक लाख रूपिया के इनाम घोसित रिहीस। ए माओवादी मन ह सीमा सुरक्षा बल बीएसएफ के उप महानिरीक्षक विपुल मोहन बाला, अतिरिक्त पुलिस अधीक्षक संदीप पटेल अउ दिनेश सिन्हा के आगू आत्मसमर्पण करे हे। ए सबो माओवादी उत्तर बस्तर डिवीजन के रावघाट, परतापुर एरिया कमेटी अउ गढ़चिरौली डिवीजन म सक्रिय रिहीस। आत्मसमर्पित ए माओवादी मन ल राज्य सरकार के पुनर्वास नीति के तहत पच्चीस-पच्चीस हजार रूपिया के प्रोत्साहन रासि दे गीस।
इही बीच, राष्ट्रीय जांच एजेंसी-एनआईए ह आज गरियाबंद जिला ले दू माओवादी सहयोगी मन ल गिरफ्तार करे हे। ए दूनों माओवादी मन उपर बड़े गोबरा इलाका म आईडी बिस्फोट म सामिल रहे के आरोप हे। गिफ्तार माओवादी सहयोगी मन ह सत्रह नवंबर दू हजार तेईस के मतदान संपन्न करवा के वापस लहूटत मतदान दल उपर हमला करे रिहीन। ए बिस्फोट म आईटीबीपी के एक झिन जवान के मउत होगे रिहीस।
उहें, गरियाबंद जिला के भालू डिग्गी के जंगल ले सुरक्षा बल मन ह आज सर्चिंग के दउरान माओवादी मन डहार ले लगाय गे आईईडी बरामद करे हे। जेला बम निरोधक दस्त के टीम ह मउका म ही निष्क्रिय कर दीस। एखर संगेसंग माओवादी जिनिस घलो जब्त करे हे।
निकाय चुनाव-नामांकन
प्रदेस म होवत नगरीय निकाय के चुनाव के तहत आज नांव वापसी के आखिरी दिन रिहीस। नांव वापसी के आखिरी दिन बसना नगर पंचायत म अध्यक्ष पद बर कांग्रेस, आम आदमी पार्टी अउ निदर्लीय प्रत्यासी मन ह अपन नांव वापस ले लेहे। एखर बाद ए नगर पंचायत म अध्यक्ष पद के भाजपा प्रत्यासी डॉक्टर खुशबू अग्रवाल निर्विरोध निर्वाचित होगे हे। फिंगेश्वर म घलो कांग्रेस के पार्षद प्रत्यासी ह अपन नांव वापस ले लेहे।
अइसने, भिलाई के शारदा पारा वार्ड क्रमांक पैंतीस म नगर निगम के उपचुनाव म कांग्रेस के प्रत्यासी मनोज सिन्हा ह कांग्रेस ले इस्तीफा देके भाजपा म प्रवेस करत हुए अपन नामांकन वापस ले लेहे।
निकाय चुनाव-अवकाश
छत्तीसगढ़ राज्य निर्वाचन आयोग ह नगरीय निकाय अउ त्रिस्तरीय पंचायत चुनाव के तहत प्रदेस म तीन अलग-अलग तारीख मन म सार्वजनिक अवकास के घोसना करे हे। आयोग कोति ले जारी आदेस के अनुसार ग्यारह, सत्रह अउ बीस फरवरी के सार्वजनिक अवकास रइही। ए अवकास ओ क्षेत्र म लागू होही, जिहां मतदान होही।
उच्च न्यायालय-सुनवाई
छत्तीसगढ़ हाईकोर्ट ह राष्ट्रीय राजमार्ग म बाढ़त दुर्घटना उपर चिंता जताय हे। मुख्य न्यायाधीश रमेश कुमार सिन्हा अउ न्यायाधीश रविन्द्र कुमार अग्रवाल के खंडपीठ म काली एक जनहित याचिका उपर सुनवाई होइस। डबल बेंच ह राष्ट्रीय राजमार्ग प्राधिकरण ल निरदेस दे हे कि दुर्घटना म कमी लाय बर प्रभावी योजना तियार करे जाय अउ एला अदालत के आगू प्रस्तुत करे जाय। मामला के अगला सुनवाई चौबीस मार्च के होही।
उहें, कैश फार जॉब मामला म छत्तीसगढ़ उच्च न्यायालय ह मुख्य न्यायाधीस रमेश सिन्हा के डिवीजन बेंच ह कैश फार जॉब मामला म महत्वपूर्ण फइसला सुनाय हे। ए मामला म आरोपी ह सिकायतकर्ता ल पांच लाख रूपिया ले जादा के बदला म हाईकोर्ट म उंखर अउ उंखर दोस्त बर नौकरी देवाय के वादा करके धोखा दीस। कोर्ट ह आरोपी ल जमानत दे ले इन्कार करत कड़ा टिप्पणी करीन, जेमा भारतीय दंड संहिता के धारा चार सौ बीस अउ चौतीस के तहत मामला दर्ज करे गे रिहीस। मामला के सुनवाई के दउरान कोर्ट ह किहीन कि रजिस्ट्रार जनरल डहार ले कतकोन चेतावनी के बाद घलो आम लोगन ह हाईकोर्ट अउ जिला अदालत मन म नौकरी सुरक्षित करे बर दलाल मनके झांसा म आसानी ले आ जथे। कोर्ट ह किहीन कि सिकायतकर्ता ह घलो ए मामला म निरदोष नइ हे, काबर कि ओ ह खुद हाईकोर्ट म नौकरी पाय बर पइसा दे रिहीस। कोर्ट ह अपन फइसला म छत्तीसगढ़ हाईकोर्ट के रजिस्ट्रार जनरल ल निरदेस दीन कि सिकायतकर्ता के खिलाफ घलो कानून के अनुसार कदम उठाय जाय।
धान खरीदी
उप मुख्यमंत्री अरूण साव ह किहीन कि राज्य सरकार धान खरीदी के तारीख ल आगू नइ बढ़ावय। धान खरीदी के आज आखिरी दिन रिहीस। उप मुख्यमंत्री ह मीडिया ले चर्चा म धान खरीदी के तारीख आगू नइ बढ़ाय जाय के संगेसंग किहीन कि काटे गे टोकन के ही धान खरीदी होही।
इही, बीच प्रदेस कांग्रेस ह धान खरीदी के अवधि बढ़ाय के मांग करे हे।
खबर के मुताबिक प्रदेस म समर्थन मूल्य उपर चौदह नवंबर ले धान खरीदी करे जात रिहीस।
उत्तराखंड-राष्ट्रीय खेल
उत्तराखंड म चलत अड़तीसवां राष्ट्रीय खेल मन म छत्तीसगढ़ ह अब तक चार स्वर्ण अउ चार कांस्य पदक जीते हे। आज चौंथा दिन वुशू खेल म छत्तीसगढ़ के डी. पार्थ ह ताऊ लू जियानशू खेल म कांस्य पदक पाय हे।