संसद के बजट सत्र काली इकतीस जनवरी ले सुरू होवत हे। एखर पहिली, आज सर्वदलीय बइठका बुलाय गीस। संसद भवन परिसर म राखे गे ए बइठका के दउरान सरकार ह सत्र के सुचारू संचालन बर सबो राजनीतिक दल ले सहयोग के अपील करीन। बइठका के बाद मीडिया ले बातचीत म संसदीय कार्यमंत्री किरेन रिजिजू ह बतईन कि राष्ट्रपति द्रौपदी मुर्मू बजट सत्र के पहिली दिन काली संसद के दूनों सदन ल संयुक्त रूप ले संबोधित करही। ओमन किहीन कि राष्ट्रपति के अभिभाषण के बाद आर्थिक सर्वेक्षण पेस करे जाही। श्री रिजिजू ह किहीन कि सनिवार एक फरवरी के केन्द्रीय बजट पेस करे जाही। ओमन बतईन कि सत्र के दउरान राष्ट्रपति के अभिभाषण उपर चर्चा होय के संगेच बजट उपर घलो चर्चा होही, जउन ह तेरह फरवरी तक जारी रइही। ओमन किहीन कि संसद म पहिलीच ले सोलह विधेयक अउ उन्नीस कार्य सूचीबद्ध हवय।
निकाय चुनाव-नामांकन
प्रदेस म होवइया नगरीय निकाय चुनाव म काली इकतीस जनवरी नाव वापिस लेके आखिरी दिन हे।
एखर पहिली, काली नामांकन पत्र के जांच करे गीस। प्रदेसभर म महापौर पद बर एक सौ नौ ठन नामांकन मिले रिहीस, जेमा ले दू ठन निरस्तर करे गीस। एक सौ सात ठन नामांकन ल वैद्य पाए गे हवय। उहें, अध्यक्ष पद बर सात सौ पच्यासी नामांकन के जांच के बाद अट्ठारह ठन नामांकन ल रद्द करे गीस अउ सात सौ पैंसठ ठन ल वैद्य पाए गीस। अइसने, पार्षद पद बर जमा करे गे दस हजार आठ सौ छह नामांकन पत्र म ले उनहत्तर ठन नामांकन ल निरस्तर करे गेहे अउ दस हजार सात सौ सैंतीस ठन नामांकन वैद्य पाए गेहे।
महौपार प्रत्याशी-नामांकन निरस्त
धमतरी नगर निगम म कांग्रेस के महापौर प्रत्याशी विजय गोलछा के नामांकन निरस्त कर दे गेहे। कांग्रेस प्रत्याशी के खिलाफ भारतीय जनता पार्टी ह आपत्ति जतावत आरोप लगाय रिहीस कि विजय गोलछा ह नगर निगम म ठेकेदार के तौर म लाभ लेवत हे। भाजपा ह किहीस कि अगर कोनों मनखे नगर निगम के प्रत्यक्ष या अप्रत्यक्ष रूप ले फायदा लेवत हे, त ओला महापौर के चुनाव बर योग्य नइ माने जा सकय। ए आरोप के बाद धमतरी के रिटर्निंग अधिकारी इंदिरा सिंह ह अपन पक्ष राखे बर कांग्रेस प्रत्याशी विजय गोलछा ल आज मंझनिया तक समय दे रिहीन। फेर, कांग्रेस प्रत्याशी डहार ले जवाब नइ दे जाय के बाद उंखर नामांकन ल निरस्त कर दे गीस।
इही बीच, दुरूग नगर निगम म वार्ड-इक्कीस ले कांग्रेस प्रत्याशी मीरा सिंह ह आज भाजपा के प्रत्याशी विद्यावती सिंह के समर्थन म अपन नाव वापिस ले लीन। एखर ले भाजपा प्रत्याशी विद्यावति सिंह ह निर्विरोध निर्वाचित होगे हे।
उहें, सक्ती जिला म टिकट नइ मिले ले नाराज कांग्रेस के जिला उपाध्यक्ष अउ पूर्व नगर पालिका अध्यक्ष श्यामसुंदर अग्रवाल ह कांग्रेस ले इस्तीफा दे दे हवय। ओमन ह अपन इस्तीफा जिला अध्यक्ष त्रिलोकचंद जायसवाल ल सौंपीन हे।
राज्यपाल-दंतेवाड़ा/जगदलपुर
राज्यपाल रमेन डेका ह अपन एक दिन के जगदलपुर प्रवास के दउरान आज कलेक्ट्रेट परिसर म अधिकारी मनके संग बइठका करीन। बइठका म राज्यपाल ह किहीन कि नवा पीढ़ी के सोच अउ आइडिया ल जिला म नवाचार के गतिविधि म उपयोग करे जा सकत हे, जेखर ले विकास के गतिविधि म उंखर मनके योगदान हो सकय। राज्यपाल ह जगदलपुर कलेक्टर कार्यालय परिसर म
‘एक पेड़ मां के नाम‘ अभियान के तहत रूद्राक्ष के पौधा लगईन।
अपन प्रवास के दउरान राज्यपाल ह दंतेवाड़ा म वन विभाग डहार ले बने वन मंदिर वाटिका के भ्रमण करीन। ए मउका म ओमन ह कदम के पौधा लगईन अउ वन मंदिर वाटिका म पर्यटन अउ पर्यावरण के दृष्टि ले करे गे पहल के तारीफ करीन। ए दउरान राज्यपाल ल वनमंडल अधिकारी ह वन मंदिर के संरचना अउ ओखर महत्व के बारे म जानकारी दीन।
माओवादी-गिरफ्तार
नारायणपुर जिला म सुरक्षा बल ह तीन झन माओवादी मन ल गिरफ्तार करे हे। ए माओवादी मन उपर पाछु बछर सत्रह अक्टूबर के कोडलियार के जंगल म सुरक्षा बल उपर आईईडी विस्फोट करके फायरिंग के घटना म सामिल रेहे के आरोप हे। ए घटना म आईटीबीपी के दू झन जवान मन मारे गे रिहीन। उहें, दू झन दूसर जवान मन घायल होय रिहीन। ए माओवादी मन ल सुरक्षा बल ह कोहकामेटा थाना क्षेत्र के कोडलियार के जंगल म घेराबंदी करके पकड़े हे। गिरफ्तार माओवादी ल न्यायिक रिमांड म भेजे दे गेहे।
कार्यशाला
उच्च सिक्षा विभाग डहार ले ‘‘गुणवत्ता पूर्ण सिक्षा बर रोडमैप‘‘ बिसय म रईपुर म दू दिन के राज्य स्तरीय कार्यशाला के आयोजन करे जावत हे। ए मउका म राज्यपाल रमेन डेका ह किहीन कि विश्वविद्यालय म अनुसंधान गतिविधि ल प्रोत्साहित करे ले ज्ञान आधारित अर्थव्यवस्था ल बढ़ावा मिलही।
अजय सिंह-सरगुजा
राज्य निर्वाचन आयुक्त अजय सिंह ह नगरीय निकाय अउ त्रिस्तरीय पंचायत चुनाव के पहिली तैयारी के जानकारी ले बर एक दिन के प्रवास म आज सरगुजा पहुंचीन। ए दउरान श्री सिंह ह सासकीय पॉलीटेक्निक कालेज म बनाय गे स्ट्रांग रूम अउ मतगणना स्थल के निरीक्षण करीन। ओमन स्ट्रांग रूम म सुरक्षा व्यवस्था, सीसीटीवी समेत जम्मों जरूरी सुविधा सुनिश्चित करे के निरदेस दीन। ए दउरान ओमन मतदान दल के प्रसिक्षण के घलो अवलोकन करीन अउ मास्टर ट्रेनर्स मन ल मतदान प्रक्रिया के जम्मों पहलु ले अवगत कराय बर कहिन।
महात्मा गांधी-पुण्यतिथि
राष्ट्रपिता महात्मा गांधी के सतहत्तरवां पुण्यतिथि म आज बिहनिया नई दिल्ली म राजघाट म गांधीजी के समाधि म सर्वधर्म प्रार्थना के आयोजन करे गीस। ए दउरान राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेन्द्र मोदी अउ विपक्ष के नेता राहुल गांधी ह महात्मा गांधी के समाधि म पुष्पांजलि अर्पित करीन। प्रधानमंत्री ह सोशल मीडिया पोस्ट म किहीन कि महात्मा गांधी के आदर्स देसवासी मन ल विकसित भारत के निर्माण बर प्रेरित करथे।
राष्ट्रपिता महात्मा गांधी के पुण्यतिथि सहीद दिवस म आज स्वतंत्रता संग्राम म अपन प्राण के आहुति देवइया वीर सहीद मन ल रईपुर के राजभवन म दू मिनट के मौन रखके श्रद्धांजलि दे गीस।
उहें, मुख्यमंत्री विष्णुदेव साय ह मुख्यमंत्री निवास कार्यालय म महात्मा गांधी के चित्र म फूल चढ़ाके ओमन ल अपन श्रद्धांजलि दीन। श्री साय ह किहीन कि गांधीजी ह सत्य, अहिंसा अउ सत्याग्रह के माध्यम ले भारत ल आजादी देवाय म बड़े भूमिका निभईन।
ठगी-आरोपी गिरफ्तार
सीजीपीएससी घोटाला मामला म जेल म बंद पीएससी के पूर्व अध्यक्ष टामन सिंह सोनवानी के साला देवेन्द्र जोशी अउ उंखर पत्नी झंगीता जोशी ल रायपुर के सिविल लाईन थाना पुलिस ह गिरफ्तार कर लेहे। ए दूनों उपर नौकरी लगाय के नाव म नौ झन लोगन ले करीबन डेढ़ करोड़ रूपिया के ठगी करे के आरोप हे। ए दूनों आरोपी मन ह अपन आप ल बड़े अधिकारी के रिश्तेदार बताके पीड़ित मन ल विशेष अनुसंसा म फूड इंस्पेक्टर, लेक्चरर अउ पटवारी के पद म नौकरी देवाय के लालच देवत रिहीन। उहें, पइसा लेके बाद फर्जी नियुक्ति प्रमाण पत्र देके पीड़ित मन ले रकम लेवत रिहीन।
तोता-बरामद
गरियाबंद म तोता के तस्करी करे के मामला म वन विभाग ह एक झिन मनखे ल छब्बीस ठन तोता के संग पकड़े हे। आरोपी गंगा सिंह बघेल ह गरियाबंद के रहइया हे। तोता ल बेचे के फिराक म आरोपी ह छुरा ले रईपुर जावत रिहीस। इही बीच, दिल्ली के अधिकारी मन ले वन विभाग ल तोता बेचे के सूचना मिलीस, जेखर बाद वन विभाग के अधिकारी मन ह तोता के खरीददार बनके कार्रवाई करीन।
प्रोफेसर हमला-थाना प्रभारी एफआईआर
भिलाई म प्रोफेसर विनोद शर्मा उपर होय जानलेवा हमला के मामला म मुख्य आरोपी के पत्नी ल बिना कारण के गिरफ्तार करे अउ करीबन पन्द्रह घंटा तक पूछताछ करे के मामला म न्यायालय ह संबंधित दू थाना प्रभारी के खिलाफ एफ.आई.आर. दर्ज करे के निरदेस देहे।
ए मामला के मुख्य आरोपी प्रोबीर शर्मा के पत्नी डॉक्टर पूर्णिमा शर्मा ह न्यायालय म एक ठिन याचिका दायर करके आरोप लगईन कि पुलिस ह ओमन ल बिना कारण के पूछताछ करीन। खबर के मुताबिक ए मामला म पुलिस ह अब तक आठ आरोपी मन ल गिरफ्तार कर चुके हे।