संसद के बजट सत्र इकतीस जनवरी ले सुरू होही। सत्र के पहिली दिन राष्ट्रपति द्रौपदी मुर्मु लोकसभा अउ राज्यसभा के संयुक्त बइठका ल संबोधित करही। केंद्रीय वित्त मंत्री निर्मला सीतारमन एक फरवरी के केंद्रीय बजट पेस करही। बजट सत्र के पहिली चरण तेरह फरवरी तक चलही। उहें, दूसरइया चरण दस मार्च ले चार अप्रैल तक होही।
निकाय चुनाव-नामांकन
छत्तीसगढ़ म होवत नगरीय निकाय चुनाव के तहत आज नामांकन पत्र मनके जांच करे गीस। नामांकन वापिस ले के आखिरी तिथि इकतीस जनवरी हरय। काली अट्ठाईस जनवरी के नामांकन दाखिल करे के आखिरी दिन तक प्रदेस के नगरीय निकाय मन म महापौर पद बर कुल एक सौ नौ नामांकन दाखिल करे गीस। सबले जादा अट्ठाईस नामांनक रईपुर म जमा करे गेहे। एखर अलावा अध्यक्ष पद बर आठ सौ सोलह अभ्यर्थी मन ह नामांकन दाखिल करे हे। उहें, पार्षद पद बर दस हजार सात सौ छिहत्तर उम्मीदवार मन ह नामांकन पत्र जमा करे हे।
एखर अलावा छत्तीसगढ़ म होवत त्रिस्तरीय पंचायत चुनाव बर घलो ए दिन म नामांकन दाखिल करे के सिलसिला चलत हे। राज्य निर्वाचन आयोग ले मिल जानकारी के अनुसार काली संझा तक पंच पद बर अट्ठाईस हजार ग्यारह, सरपंच बर दू हजार आठ सौ अठासी, जनपद पंचायत सदस्य बर चार सौ सोलह अउ जिला पंचायत सदस्य बर उनसठ अभ्यर्थी मन म ह नामांकन दाखिल करे हे।
नगरीय निकाय चुनाव-विशेष कार्यक्रम
छत्तीसगढ़ म होवत नगरीय निकाय चुनाव म ए बखत इलेक्ट्रानिक वोटिंग मसीन के इस्तेमाल करे जाही। एखर पहिली बछर दू हजार चौदह म होय चुनाव म ईव्हीएम के परयोग होय रिहीस। फेर, पाछू चुनाव मतपेटी के आधार म होय रिहीस।
नगरीय निकाय चुनाव म परयोग होवइया ईव्हीएम, भारत निर्वाचन आयोग डहार ले विधानसभा या लोकसभा चुनाव म इस्तेमाल होवइया ईव्हीएम ले अलग हे। ग्यारा फरवरी के होवइया मतदान म मतदाता मन ल एक संग दू वोट डाले बर पड़ही। एक वोट महापौर या अध्यक्ष पद के प्रत्यासी बर होही। उहें, दूसर वोट वार्ड पार्षद पद के प्रत्यासी बर। राज्य निर्वाचन आयुक्त अजय सिंह आकाशवाणी समाचार ले गोठबात करत बतइन कि ए इलेक्ट्रानिक वोटिंग मसीन के बारे म मतदाता मन ल जागरूक करे बर अभियान चलाय जात हे। एखर तहत हर वार्ड म ईव्हीएम के प्रदर्सन करके लोगन ल इंखर माध्यम ले मतदान करे के जानकारी दे जाही। एखर बर डमी मतपत्र के परयोग करे जाही।
सुनइया मन ल बतादन कि नगरीय निकाय चुनाव म उपयोग होवइया ईव्हीएम अउ ए चुनाव ले जुड़े आने-आने बिसय उपर आकाशवाणी समाचार ह राज्य निर्वाचन आयुक्त अजय सिंह ले बिस्तार ले गोठबात करे हे। ए भेंटवार्ता के प्रसारण आकाशवाणी केंद्र रईपुर डहार ले आज रतिहा नौ बजके पंद्रह मिनट म करे जाही। एला छत्तीसगढ़ स्थित आकाशवाणी के सबो केंद्र ले एके संघरा रिले करही।
सीजीएमएसपी-शशांक चोपड़ा गिरफ्तार
छत्तीसगढ़ मेडिकल सर्विसेस कार्पोरेशन-सी.जी.एम.एस.सी. घोटाला मामला म एंटी करप्सन ब्यूरो-एसीबी अउ आर्थिक अपराध अन्वेसन ब्यूरो-ईओडब्ल्यू ह एक मोक्षित कार्पोरेसन के डायरेक्टर शशांक चोपड़ा ल गिरफ्तार कर लेहे। ओला आज रईपुर के बिसेस अदालत म पेस करे जाही। न्यायालय ह आरोपी ल सात दिन के रिमांड म एसीबी ल सौंप देहे। ए मामला म अवइया सुनवाई चार फरवरी के होही।
खबर के मुताबिक हाले म एसीबी अउ ईओडब्ल्यू के टीम ह सी.जी.एम.एस.सी. म होय गड़बड़ी के मामला म रईपुर, दुरूग संग कतकोन जिला म गवर्मेंट सप्लायर के ठिकाना मन म दबिस दे रिहीस। ए दउरान शशांक चोपड़ा, सिध्दार्थ चोपड़ा अउ उंखर भाई मनके ठिकाना म छापा मारके कतकोन दस्तावेज बरामद करे रिहीन।
एक भारत श्रेष्ठ भारत
आज रईपुर स्थित राजभवन म ‘एक भारत श्रेष्ठ भारत‘ के तहतआंध्रप्रदेश, केरल, उत्तरप्रदेस, मणिपुर, मेघालय, त्रिपुरा, दादर नगर हवेली अउ दमन द्वीव के स्थापना दिवस मनाय गीस। ए कारीकरम के अध्यक्षता राज्यपाल रमेन डेका ह करीन। ए मउका म संबंधित राज्य मनके कलाकार मन डहार ले लोक नृत्य के प्रस्तुति करे गीस। संगेसंग कारीकरम के दउरान छत्तीसगढ़ के पंडवानी गायन अउ सूफी गायन के प्रस्तुती घलो दे गीस। ए मउका म राज्यपाल ह किहीन कि ‘एक भारत श्रेष्ठ भारत‘ कारीकरम के तहत आने-आने राज्य मनके भाषा, संस्कृति, परंपरा अउ प्रथा मन के ज्ञान के आपस म आदान
-प्रदान होथे। जेखर ले भारत के एकता अउ अखंडता मजबूत होथे।
माओवादी-आत्मसमर्पण
नारायणपुर जिला म आज सात माईलोगिन संग उनतीस माओवादी मन ह पुलिस अधीक्षक के आगू आत्मसमर्पण करे हे। ए सबो माओवादी कुतुल एरिया कमेटी-गट्टाकाल अउ भटनार के सदस्य बताय जात हे। आत्मसमर्पण करइया सबो माओवादी ल राज्य सरकार के पुनर्वास नीति के तहत पच्चीस-पच्चीस हजार रूपिया के चेक दे गीस। संगेसंग ओमन ल नक्सल उन्मूलन नीति के तहत मिलइया सबो सुविधा दे जाही।
आयकर विभाग-छापा
आयकर विभाग के टीम ह आज रईपुर, दुरूग, भिलाई अउ बिलासपुर म राईस मिलर संग कतकोन आने कारोबारी मनके ठिकाना म छापा मारे हे। ए टीम म छत्तीसगढ़ के संगेसंग मध्यप्रदेस, महाराष्ट्र, ओडिसा संग तेलांगाना के करीबन एक सौ पचास अधिकारी सामिल हे। जेखर इंहा छापा मारे गेहे। ओमा रईपुर के एक झन उद्योगपति के राजीव नगर स्थित निवास, जवाहर मार्केट के ऑफिस, राठौर चौक स्थित गोदाम अउ कमिसन एजेंट्स के कार्यालय सामिल हे। एखर संगेसंग टीम ह रिंगरोड स्थित उद्योगपति के कार शो-रूम अउ भनपुरी के राईस मिल म घलो छापा मारे हे। बताय जात हे कि ए कार्रवाई टैक्स चोरी के मामला म करे जात हे। टीम डहार ले अभी घलो कार्रवाई जारी हे।
अकाउंटेंट-गिरफ्तार
भ्रष्टाचार निरोधक ब्यूरो-एसीबी के टीम ह आज कोंडागांव जिला म एक अकांउटेंट ल रिस्वत लेवत रंगेहाथ गिरफ्तार करे हे। आरोप हे कि समग्र शिक्षा के प्रभारी लेखापाल अरूण सेठिया ह एक झिन दिव्यांग शिक्षक दिलीप कुमार ले पोस्टिंग बर रिस्वत के मांग करे रिहीस। ओ ह ए दिव्यांग शिक्षक ले तीस हजार रूपिया रिस्वत मांगत रिहीस। एखर बाद शिक्षक ह जगदलपुर एसीबी म एखर सिकयत करीन। आज एसीबी के टीम ह लेखापाल ल रिस्वत लेत रंगेहाथ पकड़ लीन।
उत्तराखंड राष्ट्रीय-खेल
उत्तराखंड म काली ले राष्ट्रीय खेल सुरू होगे हे। प्रधानमंत्री नरेंद्र मोदी ह उत्तराखंड के देहरादून म एक भव्य समारोह म अड़तीसवां राष्ट्रीय खेल मनके उद्घाटन करीन। ए मउका म ओमन ह किहीन कि राष्ट्रीय खेल सिरिफ आयोजन नो हय, भलूक ‘एक भारत श्रेष्ठ भारत‘ के भावना ल प्रदर्सित करे के एक अच्छा मंच हरय।
छत्तीसगढ़ ले घलो करीबन दू सौ तीस खिलाड़ी ए राष्ट्रीय खेल मनके आने-आने स्पर्धा मन म भाग लेवत हे। छत्तीसगढ़ दल के प्रमुख शाहीराम जाखड़ ह आकाशवाणी समाचार ले गोठबात करत बतइन कि छत्तीसगढ़ के टीम ह कल्लारी पयट्टू स्पर्धा म स्वर्ण पदक जीते हे। उहें, बीच हैंडबॉल स्पर्धा म छत्तीसगढ़ ह सेमीफाइनल मुकाबला बर क्वालीफाई कर लेहे। एखर अलावा छत्तीसगढ़ ह वुशू अउ हैंडबॉल के स्पर्धा मन म घलो मैच खेले हे।
भारत रंग महोत्सव
राष्ट्रीय नाट्य विद्यालय-एनएसडी डहार ले भारत रंग महोत्सव के आयोजन खैरागढ़ म चार ले नौ फरवरी तक करे जाही। ए महोत्सव ल ‘‘भारंगम‘‘ के नांव ले घलो जाने जाथे। ए विश्व के सबले बड़का रंगमंच महोत्सव म ले एक हरय। एनएसडी डहार ले एखर आयोजन इंदिराकला संगीत विश्व विद्यालय, खैरागढ़ के सहयोग ले करे जात हे।
खैरागढ़ म महोत्सव के उद्घाटन चार फरवरी के संझा छै बजे डॉक्टर नरेंद्र देव वर्मा, ऑडिटोरियम म नर नारी उर्फ थैंकू बाबा लोचनदास नाटक के संग होही। ए बछर के भारत रंग महोत्सव के थीम ‘‘एक अभिव्यक्ति, सर्वोच्च सृजन‘‘ हे।