प्रदेस म नगरीय निकाय चुनाव म नामांकन जमा करे के आखिरी दिन आज भारतीय जनता पार्टी अउ कांग्रेस के महापौर अउ पार्षद प्रत्याशी मनके अलावा निर्दलीय उम्मीदवार मन ह घलो अपन नामांकन दाखिल करीन।
रायपुर नगर निगम म कांग्रेस के महापौर पद के प्रत्याशी दीप्ति दुबे ह आज अपन नामांकन दाखिल करीन। ए दउरान पूर्व मुख्यमंत्री भूपेश बघेल, पूर्व उपमुख्यमंत्री टी.एस. सिंहदेव, रायपुर सहर जिला कांग्रेस अध्यक्ष गिरीश दुबे अउ पूर्व निगम सभापति प्रमोद दुबे मौजूद रिहीन।
अइसने, दुरूग नगर निगम ले भाजपा के महापौर प्रत्याशी अलका बाघमार ह उपमुख्यमंत्री विजय शर्मा, राष्ट्रीय उपाध्यक्ष डॉक्टर सरोज पांडेय, विधायक गजेंद्र यादव संघरा वरिष्ठ नेता मनके मौजूदगी म अपन पर्चा जमा करीन।
ऐति, राजनांदगांव ले भाजपा के महापौर प्रत्याशी मधुसूदन यादव जब नामांकन जमा करे बर पहुंचीन, त उंखर संग विधानसभा अध्यक्ष डॉक्टर रमन सिंह अउ सांसद संतोष पांडेय मौजूद रिहीन। एखर पहिली, कांग्रेस प्रत्याशी निखिल द्विवेदी ह प्रदेस प्रवक्ता रूपेश दुबे, पूर्व अध्यक्ष दिनेश शर्मा अउ दूसर नेता मनके संग पहुंच के अपन नामांकन दाखिल करीन।
ओति, जगदलपुर म प्रदेस भाजपा अध्यक्ष किरण सिंह देव के अगुवई म महापौर प्रत्याशी संजय पांडेय ह रैली निकाल के नामांकन भरे बर पहुंचीन। उहें, कांग्रेस के मलकीत सिंह गैदू ह घलो नामांकन दाखिल करीन।
नामांकन पत्र के जांच काली उनतीस जनवरी के करे जाही। उम्मीदवार मन ह अपन नांव इकतीस जनवरी तक वापस ले सकत हे। उहें, ग्यारह फरवरी के वोट डारे जाही। मतगणना अउ चुनाव परिणाम के घोसना पंद्रह फरवरी के करे जाही।
मीनल चौबे-मुख्यमंत्री मुलाकात
नगरीय निकाय अउ त्रिस्तरीय पंचायत चुनाव बर जारी नामांकन के बीच मुख्यमंत्री विष्णुदेव साय ह ए चुनाव म जीत के दावा करीन हे। ओमन कहिन कि ए चुनाव लोकतंत्र के महत्वपूर्ण कड़ी हरय। ओमन कहिन कि प्रदेस के दस नगर निगम समेत, नगर पालिका, नगर पंचायत अउ त्रिस्तरीय पंचायत मन म घलो भाजपा ल सफलता मिलही।
भाजपा-चुनाव संचालक नियुक्ति
भारतीय जनता पार्टी ह नगरीय निकाय चुनाव ल देखत सांसद, मंत्री, पूर्व मंत्री अउ नेता मन ल जिम्मेदारी सौंपे हे। एखर बर भाजपा के प्रदेस अध्यक्ष किरण सिंह देव ह प्रदेस के जम्मों दस नगर निगम म चुनाव संचालक अउ समन्वयक मनके सूची जारी करे हे। रायपुर म चुनाव संचालन के जिम्मेदारी सांसद बृजमोहन अग्रवाल अउ पूर्व मंत्री राजेश मूणत ल दे गेहे। उहें, पूर्व मुत्री चंद्रशेखर साहू, प्रदेस प्रवक्ता सच्चिदानंद उपासने अउ श्रीचंद सुंदरानी ह समन्वयक के काम करही।
अइसने, बिलासपुर म अमर अग्रवाल अउ धरमजीत सिंह चुनाव संचालन करही। उहें, मंत्री विजय शर्मा, गजेन्द्र यादव अउ राजीव अग्रवाल ह दुरूग म चुनाव संचालन के जिम्मा संभालही। कोरबा म मंत्री लखनलाल देवांगन अउ विकास रंजन महतो ल चुनाव संचालक बनाय गे हवय। राजेश अग्रवाल, प्रबोध मिंज अउ प्रशांत त्रिपाठी ह अंबिकापुर म चुनाव संचालन करही। एखर अलावा चिरमिरी म मंत्री श्यामबिहारी जायसवाल अउ पूर्व मंत्री भैयालाल राजवाड़े मोर्चा संभालहीं। धमतरी म पूर्व मंत्री अजय चंद्राकर अउ राजेन्द्र शर्मा के निगरानी म चुनाव संचालन होही। उहें, पूर्व सांसद अभिषेक सिंह अउ संतोष अग्रवाल ह राजनांदगांव म चुनाव संचालन करही। जगदलपुर म चुनाव संचालन के जिम्मा मंत्री केदार कश्यप, शरद अवस्थी अउ श्रीनिवास राव ल सौंपे गेहे। त उहें, रायगढ़ म मंत्री ओ.पी. चौधरी अउ विजय अग्रवाल ह निकाय चुनाव के संचालन करही।
प्रत्याशी चयन-असंतोष
नगरीय निकाय चुनाव म टिकट वितरण अउ प्रत्याशी मनके घोषणा के बाद भारतीय जनता पार्टी अउ कांग्रेस म कतकोन दावेदार म असंतोष नजर आवत हे। जउन मन ल टिकट नइ मिले हे, ओ नेता मन ह पार्टी के बड़े नेता मनके आगू अपन नाराजगी जतावत हे।
रायपुर ले बिलासपुर, सक्ती, सुकमा संघरा कतकोन जिला म भाजपा के ओ नेता अउ कार्यकर्ता मन ह इस्तीफा दे दे हंवय, जउन मन ह टिकट के दावेदारी करे रिहीन।
उहें, कांग्रेस म चिरमिरी के महापौर प्रत्याशी के विरोध करत कांग्रेस नेत्री ह पार्टी ल अपन इस्तीफा सौंप देहे। संगेसंग रईपुर संघरा कतकोन जिला मुख्यालय म कांग्रेस के असंतुष्ट दावेदार मन ह विरोध प्रदर्शन करत दिखत हे। असंतोष के संका के सेती रईपुर नगर निगम बर भाजपा प्रत्याशी मन ल लेके रतिहा देर तक चले मंथन के बाद घलो कुछेक वार्ड म प्रत्याशी तय नइ हो सके रिहीस।
ऐति, दूनों दल म असंतुष्ट मन ल समझाय के अउ डैमेज कंट्रोल के प्रयास ल तेज कर दे गेहे।
मुख्य निर्वाचन आयुक्त-भेंटवार्ता
सुनइया मन ल बतादन कि प्रादेशिक समाचार एकांश डहार ले नगरीय निकाय चुनाव उपर राज्य निर्वाचन आयुक्त अजय सिंह ले, लेगे भेंटवार्ता के प्रसारण काली रतिहा नौ बजके पन्द्रह मिनट ले होही, जेला छत्तीसगढ़ के सबो आकाशवाणी केन्द्र मन ह एके संघरा रिले करही।
पंचायत चुनाव-अधिसूचना
प्रदेस म त्रिस्तरीय पंचायत चुनाव म तीनों चरण बर नामांकन पत्र भरे के प्रक्रिया चलत हे। उम्मीदवार मन ह तीन फरवरी तक नामांकन पत्र जमा कर सकही। जेखर जांच चार फरवरी के करे जाही। नाम वापसी के आखिरी तारीख छह फरवरी हे। संबंधित त्रिस्तरीय पंचायत म तीन चरण म सत्रह, बीस अउ तेईस फरवरी के वोट डारे जाही अउ इही दिन मतदान केन्द्र म मतगणना होही।
चिकित्सा अधिकारी-सेवा समाप्त
स्वास्थ्य विभाग ह लंबा बेरा ले अनाधिकृत रूप ले अनुपस्थित सत्ताईस झन चिकित्सा अधिकारी अउ बिसेसज्ञ चिकित्सक मनके सेवा ल समाप्त कर देहे। संगेसंग इक्कीस झन चिकित्सा अधिकारी मनके विरूद्ध विभागीय जांच के आदेस जारी करे हे। ए चिकित्सा अधिकारी अउ बिसेसज्ञ चिकित्सक मन तीन बछर ले जादा समय तक अनाधिकृत रूप ले अनुपस्थित रहि के छत्तीसगढ़ सिविल सेवा अवकाश निमय के उल्लंघन करे रिहीन।
हाईकोर्ट-स्कूल सौचालय
छत्तीसगढ़ उच्च न्यायालय ह प्रदेस के स्कूल मन म सौचालय नइ होय के अउ सौचालय के दुर्दसा ल लेके नाराजगी जतईन हे। स्वतः संज्ञान वाले जनहित याचिका उपर सुनवाई के दउरान उच्च न्यायालय ह स्कूल सिक्षा विभाग के सचिव ल नोटिस जारी करके सपथ पत्र के संग जवाब पेस करे के निरदेस दीन हे। ए मामला के सुनवाई मुख्य न्यायाधीश रमेश सिन्हा अउ न्यायाधीश रविन्द्र अग्रवाल के डिवीजन बेंच म होइस। सुनवाई के दउरान कोर्ट ह किहीस कि स्कूल मन म सिक्षक अउ विद्यार्थी मन बर बुनियादी सुविधा काबर नइ दे जावत हे। ए मामला के अगला सुनवाई अब दस फरवरी के होही।
युवा आदान-प्रदान कार्यक्रम
युवा कार्यक्रम अउ खेल मंत्रालय के अंतर्गत नेहरू युवा केन्द्र संगठन अउ केन्द्रीय गृह मंत्रालय डहार ले चलत ‘‘युवा आदान-प्रदान कार्यक्रम‘‘ म कश्मीर के युवा मन ह आज राजभवन म राज्यपाल रमेन डेका ले भेंट करीन। श्रीनगर, कुपवाड़ा, बारामुला, अनंतनाग, पुलवामा अउ बड़गांव के स्कूल अउ महाविद्यालय म पढ़ईया एक सौ बत्तीस झन युवा मन ह छब्बीस जनवरी ले छत्तीसगढ़ के छह दिन के दउरा म हवय। ए दउरा म ओमन ह छत्तीसगढ़ विधानसभा संघरा धमतरी जिला गंगरेल बांध, एडवेंचर पार्क अउ यूथ क्लब जइसन जघा ल देखहीं। इही कड़ी म युवा मनके दल ह राजभवन म राज्यपाल रमेन डेका ले भेंट करीन। ए मउका म राज्यपाल ह किहीन कि जम्मू-कश्मीर म उद्योग अउ व्यवसाय के क्षेत्र म कतकोन संभावना हे। युवा मन ह आने-आने क्षेत्र म स्टार्टअप बर आगू आय। कश्मीर के युवा मन ह देस म सांति बर काम करयं अउ दू हजार सैंतालीस तक विकसित भारत बनाय के प्रधानमंत्री नरेन्द्र मोदी के सपना ल साकार करे म अपन योगदान देवय।
राज्यपाल-गरियाबंद
गरियाबंद दौरा म राज्यपाल रमेन डेका ह जिला स्तरीय अधिकारी मन ले गोठबात करीन। ए दउरान राज्यपाल ह स्वास्थ्य सिक्षा, रोजगार अउ सुपोषण ले जुड़े योजना के बारे म जानकारी लीन। राज्यपाल ह जिला म कौशल विकास म करे जावत काम के जानकारी लेके माईलोगिन मन ल स्वरोजगार ले जोड़े के बात कहिन। ओमन जिला म अवैध नसीला पदार्थ के रोकथाम बर चलाय जावत अभियान के जानकारी लेके मादक पदार्थ के रोकथाम बर अधिकारी मन ल बिसेस अभियान चलाय के निरदेस दीन। बइठका म गरियाबंद कलेक्टर दीपक अग्रवाल ह जिला प्रसासन डहार ले करे जावत काम अउ आयोजन के बारे म राज्यपाल ल जानकारी दीन।
अपन दउरा म राज्यपाल ह गरियाबंद लाईवलीहुड कालेज के निरीक्षण करीन। ए मउका म ओमन ह युवा मन बर चलत कौशल विकास कार्यक्रम के जानकारी लीन।