राज्य म नगरीय निकाय चुनाव के तहत नामांकन जमा करे के काली अट्ठाईस जनवरी के आखिरी दिन हरय। नामांकन पत्र मन के जांच ल उनतीस जनवरी के करे जाही। उम्मीदवार मन ह अपन नांव ल वापस इकतीस जनवरी तक ले सकत हे। उहें, ग्यारा फरवरी के वोट डारे जाही। मतगणना अउ चुनाव परिणाम के घोसना ल पंद्रह फरवरी के करे जाही।
उहें, भारतीय जनता पार्टी अउ कांग्रेस डहार ले जम्मो दस ठन नगर निगम मन बर महापौर प्रत्यासी के घोसना कर दे गेहे। रईपुर ले भाजपा ह मीनल चौबे त कांग्रेस ह दीप्ती प्रमोद दुबे ल अपन प्रत्यासी घोसित करे हे। वइसने दुरूग म भाजपा ह अलका बाघमार, त कांग्रेस ह प्रेमलता पोषण साहू ल अपन प्रत्यासी बनाय हे। बिलासपुर ले भाजपा ह पूजा विधानी, त कांग्रेस ह प्रमोद नायक, राजनांदगांव ले भाजपा ह मधुसूदन यादव, उहें कांग्रेस ह निखिल द्विवेदी ल अपन प्रत्यासी घोसित करे हे। अंबिकापुर ले भाजपा ह मंजूषा भगत, त कांग्रेस ह अजय तिर्की, जगदलपुर म भाजपा ह संजय पांडेय ल, त कांगेस ह मलकीत िंसंह गैदू ल चुनाव मैदान म उतारे हे। धमतरी नगर निगम म भाजपा ह जगदीश रामूरोहरा ह, त कांग्रेस ह विजय गोलछा ल, रायगढ़ सीट म भाजपा ह जीवर्धन चौहान, त कांग्रेस ह जानकी काटजू ल चुनाव मैदान म उतारे हे। कोरबा म भाजपा ह संजूदेवी राजपूत, त कांग्रेस ह उषा तिवारी ल अपन प्रत्यासी बनाय हे। चिरमिरी सीट म भाजपा ह रामनरेश राय, त कांग्रेस ह डॉक्टर विनय जायसवाल ल अपन प्रत्यासी घोसित करे हे।
खबर के मुताबिक भारतीय जनता पार्टी अउ कांग्रेस ए दूनो ठन प्रमुख पार्टी मन ह नगर पालिका अउ नगर पंचायत म घलो अध्यक्ष अउ पार्षद प्रत्यासी मन के घोसना कर देहे।
पंचायत चुनाव-अधिसूचना
राज्य निर्वाचन आयोग ह राज्य म त्रिस्तरीय पंचायत चुनई के तहत तीनो चरण बर निर्वाचन के अधिसूचना ल जारी कर दे गेहे। एखर संगेसंग नामांकन पत्र भरे के काम ल घलो सुरू कर दे गेहे। नामांकन पत्र जमा करे के आखिरी तारीख तीन फरवरी तक तय करे गेहे। नामांकन पत्र मन के जांच ल चार फरवरी के करे जाही अउ नांव वापसी के आखिरी तारीख ल छै फरवरी के राखे गेहे। त्रिस्तरीय पंचायत मन म तीन चरण म सत्रह, बीस अउ तेईस फरवरी के वोट डारे जाही अउ इही दिन मतदान केंद्र मन म वोट के गिनती करे जाही।
उहें, जरूरत पड़े म खंड मुख्यालय मन म वोट के गिनती ल अट्ठारा, इक्काईस अउ चौबीस फरवरी के करे जाही।
ईओडब्ल्यू/एसीबी-छापा
छत्तीसगढ़ मेडिकल कार्पोरेसन म होय गड़बड़ी के मामला म आर्थिक अपराध अन्वेषन ब्यूरो अउ एंटी करप्सन ब्यूरो के टीम ह आज रईपुर, दुरूग के संगेसंग कई ठन जिला मन म सप्लायर मनके जघा म छापामार कार्रवाई करीन। मिले खबर के मुताबिक ए टीम डहार ले दुरूग के पुलगांव चौक म बनाय गे मोक्षित कार्पोरेसन के ऑफिस अउ दुरूग कोर्ट के पीछू खंडेलवाल कालोनी के तीर सप्लायर सिध्दार्थ चोपड़ा के घर के संगेसंग उंखर जम्मो भाई मनके ठिकाना म घलो दस्तावेज मनके जांच करे जात हे।
खबर के मुताबिक ए कार्रवाई पाछू कांग्रेस सरकार के कार्यकाल म होय सौ करोड़ रूपिया ले जादा के दवा अउ उपकरण के सप्लाई म गड़बड़ी ल लेके करे जात हे। विधानसभा सत्र के दउरान जब ए मामला ल उठात गीस त, स्वास्थ्य मंत्री ह ईओडब्ल्यू ल जांच के आस्वासन दे रिहीन।
गणतंत्र दिवस-बस्तर
बस्तर संभाग के बीजापुर, सुकमा, नारायणपुर अउ कांकेर जिला के अंदरूनी गांव मन म काली गणतंत्र दिवस ल हंसी खुसी के संग मनाय गीस। बस्तर संभाग म गणतंत्र दिवस के कारीकरम ल ए दारी इतिहास म दरज कराय गेहे। खबर के मुताबिक छब्बीस ठन गांव जिहां कभू माओवादी मन के डर सताय जात रिहीस हे। अब उहां सांति अउ विकास गढ़हत हवय। राज्य सरकार डहा ले चलाय जात माओवादी उन्मूलन अभियान के सफलता के चलत गांव मन म सुरक्षा अउ विकास के नवा दउर सुरू होगे हे। बस्तर संभाग के अतिसंवेदन सील माओवाद प्रभावित क्षेत्र मन म छब्बीस जनवरी दू हजार चौबीस के बाद ले अभी वर्तमान म छब्बीस ठन नवा सुरक्षा सिविर बनाय गेहे। बस्तर के क्षेत्र मन म जिहां पहिली माओवादी मन ह लोकतंत्र के विरोध करत रिहीन, उहां छब्बीस जनवरी के दिन गांव वाले मन ह सुरक्षा बल के टीम मन संग मिल के गणतंत्र दिवस ल उछाह के संग मनाय गीस। बिहनिया स्कूल के लइका मन ह प्रभात फेरी निकालिन। ए दउरान वंदे मातरम अउ जय हिंद के नारे लगाय गीस।
उहें, माओवादी हिंसा म सहीद होय जवान मन ल सुरता घलो करे गीस। बस्तर रेंज के पुलिस महानिरीक्षक सुंदरराज पी. ह किहीन कि राज्य सरकार अउ सुरक्षा बल के टीम मनके प्रयास ले बस्तर संभाग म सांति अउ खुसहाली आय हे।
माओवादी-ग्रामीण हत्या
बीजापुर जिला के केशामुण्डी गांव म काली रतिहा माओवादी मन ह मुखबिरी के आरोप लगावत एक झन गांव वाले के हत्या कर दीन। सूचना के आधार म भैरमगढ़ थाना के पुलिस टीम ह मामला दर्ज करके लास ल पोस्टमार्टम बर भेज देहे अउ घटना के जांच करे जात हे।
खबर के मुताबिक ए मृतक ल केशामुण्डी गांव के निवासी बताय जात हे।
दुर्घटना
बालोद जिला के डौंडी थाना क्षेत्र म काली रतिहा एक ठन कार हादसा म एक झिन माईलोगिन के मउत होगे। उहें, तीन साल के लइका अउ ओखर पिता ह गंभीर रूप ले घायल होगे। ए दूनो झन घायल मन ल इलाज खातिर अस्पताल म भर्ती कराय गेहे। उहें, लइका के हालत ल गंभीर बताय जात हे।
मिले खबर के मुताबिक पाछू रतिहा ए जम्मो झन मनखे मन ह कार म बइठ के लाटाबोड़ ले घोठिया आवत रिहीस, उही समय कार ह अनियंत्रित होके एक ठन गाड़ी ले टकरा गे।
ओति, गौरेला-पेण्ड्रा-मरवाही जिला के पीपरखूंटी गांव के तीर यात्री मन ल लेगत एक ठन माल वाहक गाड़ी ह अंते-तंते होके पलट गे। ए हादसा म ग्यारा झन मनखे मन ह घायल होगे। ए जम्मो झन घायल मनखे मन ल पेण्ड्रा के जिला अस्पताल म भर्ती कराय गेहे।
अउ अब पेस हे मौसम के हाल…
मौसम विभाग ले मिले जानकारी के मुताबिक राज्य के तापमान म बढ़ोत्तरी होय के संभावना हे। तीन ले चार डिग्री सेल्सियस तक तापमान बाढ़े के अनुमान लगाय गेहे। मौसम विभाग ह बतइन कि पश्चिमी विक्षोभ के सेति उक्तीमुड़ा ले ठंडा अउ सुष्क हवा के अवई ह बंद होवत हे, जेखर सेति राज्य म तापमान म बढ़ोत्तरी हो सकत हे।
अउ अब थोरकुन समाचार सार म –
– राज्यपाल रमेन डेका ह गरियाबंद जिला प्रवास के दउरान संयुक्त जिला कार्यालय परिसर म ‘एक पेड़ मां नांव‘ अभियान के तहत रूद्राक्ष के पेड़ लगाइन।
अउ
– जांजगीर-चांपा जिला बोरदा फाल गांव के तीर नहर म बुड़े ले एक झन जवान लइका के मउत होगे। एला राहौद नगर के रहइया बताय जात हे।