राष्ट्र आज छिहत्तरवां गणतंत्र दिवस मनावत हवय। ए मउका म नई दिल्ली म कर्तव्य-पथ म राष्ट्रपति द्रौपदी मुर्मू ह ध्वजारोहण करीन। ए समारोह म इंडोनेसिया के राष्ट्रपति प्रबोवो सुबियांटो मुख्य अतिथि के रूप म सामिल होइन। आज के परेड म देस के सभ्यता, संस्कृति अउ वैज्ञानिक प्रगति ल दर्साने वाला मनमोहक अउ सुघ्घर झांकी मन दिखाय गीस। परेड म 300 कलाकार मन ह देसभर के आने-आने बाजा के धुन म ‘‘सारे जहां से अच्छा‘‘ गीत ल बजाइन। समारोह के चलत हेलिकॉप्टर ह झंडा जइसन आकृति के फूलमाला बरसाइन। ए बछर के परेड म छत्तीसगढ़ समेत आने-आने राज्य ले 10 हजार बड़का पहुना मन ल नेवता दे गे रिहीस। एमा सरपंच, हथकरघा अउ हस्तसिल्प कारीगर, स्व-सहायता समूह के सदस्य, आशा अउ आंगनबाड़ी कार्यकर्ता अउ सड़क निर्माण ले जुड़े कामगार मन सामिल रिहीन।
एखर ले पहिली, प्रधानमंत्री नरेंद्र मोदी ह राष्ट्रीय समर स्मारक म जाके देस खातिर अपन पराण के आहुति देवइया शहीद मन ल पुष्पांजलि अर्पित करीन।
गणतंत्र दिवस-छत्तीसगढ़-01
छत्तीसगढ़ म घलो गणतंत्र दिवस बड़ उछाह के संग मनाय गीस। राज्यपाल रमेन डेका ह राजधानी रईपुर के पुलिस परेड मैदान म झंडा फहरा के परेड के सलामी लीन। परेड निरीक्षण के दौरान मुख्य सचिव अमिताभ जैन अउ पुलिस महानिदेसक अशोक जुनेजा घलो उपस्थित रिहीन।
अपन संबोधन म राज्यपाल ह किहीन कि आज के बेरा म छत्तीसगढ़ जउन तेजी ले विकास के रद्दा म बाढ़त हे अउ विकसित छत्तीसगढ़ के परिकल्पना उपर काम करत हवय, एखर पाछू पूर्व प्रधानमंत्री अटल बिहारी वाजपेयी के सुशासन के मंत्र अउ समावेसी विकास के सोच हरय। राज्यपाल ह किहीन कि बाबा साहेब डॉक्टर भीमराव अंबेडकर ह संविधान के जरिया ले एक अइसन गणतंत्र के निर्माण करीन, जेमा हरेक नागरिक अपन गरिमा के संग राष्ट्र निर्माण म अपन भागीदारी कर सकय। राज्यपाल ह अमर सहीद वीर नारायण सिंह के योगदान ल घलो याद करीन। संगेसंग ओमन छत्तीसगढ़ के भाजपा सरकार के बड़का उपलब्धि अउ आने-आने योजना मनके जिक्र घलो करीन। श्री डेका ह माओवाद के उल्लेख करत किहीन कि राज्य के भाजपा सरकार ह अपन कार्यकाल एक बछर के भीतर ही सघन अभियान चलाके माओवादी मन ल कमजोर करे के कठिन परिश्रम करीस हवय। ओमन नियद नेल्लानार योजना के उल्लेख करत किहीन कि एखर जरिया ले सरकार आने-आने विभाग मनके 53 ठिन कल्याणकारी योजना अउ 28 ठिन सामुदायिक सुविधा मनके लाभ गांव वाला मन तक पहुंचात हवय। ओमन बस्तर ओलंपिक के सफलता के घलो उल्लेख करत किहीन कि ए बात ह संकेत हवय कि बस्तर म सांति के दौर लहुटत हवय।
गणतंत्र दिवस-छत्तीसगढ़-02
समारोह म राज्यपाल ह राज्य के पुलिस अधिकारी मन ल पुलिस वीरता पदक, विशिष्ट सेवा खातिर राष्ट्रपति के पुलिस पदक, सराहनीय सेवा खातिर पुलिस पदक, सराहनीय सुधार सेवा पदक अउ गृह रक्षक के संगेसंग नागरिक सुरक्षा सराहनीय सेवा पदक प्रदान करीन। संगेसंग ओमन पोषण जायसवाल, कुणाल कोशले अउ जयंत कुमार मरकाम ल राज्य वीरता पुरस्कार दीन।
उहें, मुख्यमंत्री विष्णुदेव साय ह सरगुजा जिला मुख्यालय अंबिकापुर म राष्ट्रीय झंडा फहरा के परेड के सलामी लीन। ए मउका म मुख्यमंत्री ह अपन संबोधन म स्वतंत्रता संग्राम सेनानी मनके बलिदान अउ संविधान निर्माता मनके योगदान ल याद करीन। ओमन किहीन कि सशक्त अउ विकसित छत्तीसगढ़ बने के दिसा म राज्य सरकार आगू बाढ़त हवय। मुख्यमंत्री ह किहीन कि बस्तर म माओवाद अब आखिरी सांस गिनत हवय। जल्दीच बस्तर- नक्सल आतंक ले पूरा तरह मुक्त हो जही। सुरक्षा बल ह एक बछर के भीतर ही माओवादी कैडर के दू सौ आठ ले जादा माओवादी मन ल मार गिराइन हवय। ओमन किहीन कि सरकार के नीति मन के बदौलत ही आज माओवाद प्रभावित क्षेत्र मन म बड़ बछर बाद स्कूल मन म घंटी के आवाज गुंजिन अउ पानी-बिजली के जम्मो इंतजाम करे गीस। आधार अउ आयुष्मान कारड घलो बनाय गीस अउ अब बस्तर उछाह ले भरे हुए हे। बस्तर ओलंपिक जइसन सफल आयोजन नवा बस्तर के पहिचान बनगे हवय।
गणतंत्र दिवस-छत्तीसगढ़-03
मुख्यमंत्री ह किहीन कि डबल इंजन के सरकार, किसान मन ल फसल के उचित मूल्य देवाय के संगेसंग खेती ल हाईटेक करे के काम बूता घलो करत हवय। अब खेत मन म कीटनासक के छिड़काव ड्रोन दीदी के हाथ होवत हवय। मुख्यमंत्री ह दीनदयाल उपाध्याय भूमिहीन कृषि मजदूर कल्याण योजना के जिक्र करत किहीन कि एमा सरकार ह अब 5 लाख 62 हजार भूमिहीन कृषि मजदूर मन ल हर बछर 10 हजार रूपिया देवत हवय। श्री साय ह किहीन कि छत्तीसगढ़ म घलो सरकार ह श्वेत क्रांति के रद्दा खोल दीस हवय। एखर खातिर राष्ट्रीय डेयरी विकास बोर्ड के संग सरकार ह एक ठिन एम.ओ.यू. घलो करीन हवय। ए एम.ओ.यू. करे के बाद सवा लाख ले जादा किसान मन दूध उत्पादक समिति मन ले जुड़ही। मुख्यमंत्री ह नवा औद्योगिक नीति के घलो जिक्र करत किहीन कि सरकार ह 5 बछर म ढाई लाख करोड़ रूपिया के निवेस के लक्ष्य राखे हे। श्री साय ह किहीन कि प्रधानमंत्री आवास योजना के चलत राज्य म तेजी ले कामबूता होवत हवय। सरकार ह विकसित छत्तीसगढ़ बर रोड-मैप तियार कर लीन हवय। बछर दू हजार 47 म जब आजादी के 100 बछर पूरा हो जही, तब विकसित भारत के संगेसंग विकसित छत्तीसगढ़ के बड़का स्वरूप सबो झिन के आगू होही।
गणतंत्र दिवस-छत्तीसगढ़-04
एखर अलावा मंत्री केदार कश्यप ह दंतेवाड़ा म, सांसद महेश कश्यप ह कांकेर म, भोजराज नाग ह सुकमा म अउ देवेन्द्र प्रताप सिंह ह कोंडागांव म झंडा फहराइन। उहें, विधायक लता उसेंडी ह नारायणपुर अउ भाजपा अध्यक्ष- किरण सिंह देव ह बीजापुर जिला म झंडा फहराइन। अइसनेच, प्रदेस के आने जिला मन म राज्य के मंत्री, सांसद अउ विधायक मन ह गणतंत्र दिवस समारोह म मुख्य अतिथि के रूप म सामिल होइन।
पद्म पुरस्कार
राष्ट्रपति द्रौपदी मुर्मू ह बछर दू हजार पचीस बर एक सौ उनचालिस पद्म पुरस्कार देवय के मंजूरी दीन हवय। ए सूची म 7 ठिन पद्म विभूषण 29 ठिन पद्म भूषण अउ 113 ठिन पद्मश्री पुरस्कार सामिल हवय।
छत्तीसगढ़ के नारायणपुर जिला के रहइया पंडीराम मंडावी ल पद्मश्री सम्मान खातिर चुने गे हवय।
निकाय चुनाव-प्रत्याशी ऐलान
नगरीय निकाय चुनाव के मद्देनजर भारतीय जनता पार्टी ह प्रदेस के 10 नगर निगम के महापौर प्रत्यासी मन के ऐलान कर दे हवय। एमा 5 झिन महिला प्रत्यासी घलो सामिल हवय। रईपुर ले भाजपा ह निगम के नेता प्रतिपक्ष मीनल चौबे ल अपन प्रत्यासी बनाय हवय। उहें, दुरूग म अलका बाघमार, बिलासपुर म पूजा विधानी, राजनांदगांव म मधुसूदन यादव, अंबिकापुर ले मंजूषा भगत, जगदलपुर ले संजय पांडेय, धमतरी ले जगदीश रामू रोहरा, रायगढ़ ले जीवर्धन चौहान, कोरबा ले संजू देवी राजपूत अउ चिरमिरी ले रामनरेश राय ल भाजपा ह अपन प्रत्यासी बनाय हवय।
उहें, भाजपा ह 47 नगर पालिका अध्यक्ष पद बर प्रत्यासी मनके नांव के घोसना कर दीन हवय। ए सबो नांव पार्टी के प्रदेस अध्यक्ष किरण सिंह देव ह जारी करीन हवय।
प्रदेस म त्रिस्तरीय पंचायत चुनाव के तहत तीन चरण बर निर्वाचन के अधिसूचना एके संग काली 27 जनवरी के जारी होही। एखरे संग नामांकन पत्र भरे के प्रक्रिया घलो सुरू हो जही।