प्रदेस म पचहत्तरवां गणतंत्र दिवस काली देसभक्ति भरे माहौल म बड़ उछाह संग मनाय जाही। मुख्य समारोह राजधानी रईपुर के पुलिस परेड मैदान म बिहनिया नौ बजे ले होही, जिहां राज्यपाल रमेन डेका ह तिरंगा फहराके परेड के सलामी लिही। ए समारोह के जम्मो तियारी पूरा होगे हे। ए दारी सत्रह सुरक्षा बल के टुकड़ी ह परेड म सामिल होही। स्कूल के लइका मन कोति ले देसभक्ति ले जुड़े सांस्कृतिक कारीकरम के प्रस्तुती घलो दे जाही।
उहें, मुख्यमंत्री विष्णुदेव साय ह सरगुजा जिला मुख्यालय म ध्वजारोहण करही। केंद्रीय राज्यमंत्री तोखन साहू ह कोरबा, उपमुख्यमंत्री अरूण साव ह रायगढ़, उपमुख्यमंत्री विजय शर्मा ह बस्तर, विधानसभा अध्यक्ष डॉक्टर रमन सिंह ह दुरूग, मंत्री रामविचार नेताम ह सूरजपुर, दयालदास बघेल ह महासमुंद, केदार कश्यप ह दंतेवाड़ा, लखनलाल देवांगन ह जशपुर, श्याम बिहारी जायसवाल ह गौरेला-पेण्ड्रा-मरवाही, ओपी चौधरी ह बिलासपुर, लक्ष्मी राजवाड़े ह बलरामपुर अउ टंकराम वर्मा ह राजनांदगांव जिला मुख्यालय म राखेगे समारोह म झंडा फहराही। अइसने प्रदेस के आने-आने जिला म क्षेत्रीय सांसद अउ विधायक मन ह समारोह के पहुना होही। जिहां ध्वजारोहण करके ओमन मुख्यमंत्री के संदेस ल पढ़के सुनाही।
राज्यपाल रमेन डेका, मुख्यमंत्री विष्णुदेव साय, प्रदेस भाजपा अध्यक्ष किरण सिंह देव अउ प्रदेस कांग्रेस अध्यक्ष दीपक बैज ह प्रदेसवासी मन ल गणतंत्र दिवस के बधई अउ सुभकामना दीन हे।
विधानसभा भवन ल आनी बानी के लाईट ले सुघ्घर सजाय गेहे। काली छब्बीस जनवरी के विधानसभा भवन ह लोगन मन बर बिहनिया दस बजे ले संझा पांच बजे तक खुले रइही।
पुलिस-पदक
गणतंत्र दिवस के मउका म छत्तीसगढ़ पुलिस के बाईस अधिकारी अउ कर्मचारी मन ल पदक ले सम्मानित करे जाही। केंद्रीय गृह मंत्रालय ह एखर घोसना करे हे। आदेस के अनुसार निरीक्षक महेश राम साहू ल राष्ट्रपति पदक ले सम्मानित करे जाही। संगेसंग ग्यारा अधिकारी मन ल वीरता पदक अउ दस अधिकारी मन ल उंखर विसिष्ट सेवा बर मेडल दे जाही।
राष्ट्रपति-संबोधन
राष्ट्रपति द्रौपदी मुर्मू ह अब ले थोरकुन बेरा म गणतंत्र दिवस के एक संझा पहिली देस ल संबोधित करहीं। एला संझा सात बजे ले आकाशवाणी के जम्मो राष्ट्रीय नेटवर्क उपर अउ दूरदर्शन के सबो चैनल म हिंदी अउ अंग्रेजी म परसारित करे जाही। दूरदर्शन म हिंदी अउ अंग्रेजी म परसारण के बाद दूरदर्शन के क्षेत्रीय चैनल मन म घलो एखर प्रसारण होही। आकाशवाणी ह अपन क्षेत्रीय नेटवर्क म रतिहा साढ़े नौ बजे ले एखर प्रसारण करही।
सुनइया मन ल बतादन कि आकाशवाणी अउ दूरदर्शन काली कर्तव्य पथ ले छिहत्तरवां गणतंत्र दिवस परेड के सीधा प्रसारण करही। एखर प्रसारण आकाशवाणी अउ दूरदर्शन के जम्मो नेटवर्क के संगेसंग प्रसार भारती के ओटीटी प्लेअफॉर्म-वेव्स म घलो करे जाही।
राष्ट्रीय मतदाता दिवस
आज राष्ट्रीय मतदाता दिवस मनाय जावत हे। नई दिल्ली म आज राष्ट्रपति द्रौपदी मुर्मू ह पंद्रहवां राष्ट्रीय मतदाता दिवस कारीकरम म गोठियात हुए राष्ट्रपति ह किहीन कि भारत ह लोकतंत्र के महतारी हे अउ देस म बहुत पाछू बेरा ले ही लोकतांत्रिक व्यवस्था हवय। ओमन किहीन कि अभी के दुनिया बर भारत के लोकतंत्र ह अनूठा उदाहरण हे।
ऐति, छत्तीसगढ़ म घलो राष्ट्रीय मतदाता दिवस म आने-आने कारीकरम राखे गीस। ए मउका म रईपुर के इंदिरा गांधी कृषि विश्वविद्यालय म राज्य स्तरीय समारोह आयोजित होइस। एमा राज्य निर्वाचन आयुक्त अजय सिंह ह पहुना के रूप म सामिल होइन, जिहां चुनई काम म बढ़िया काम करइया अधिकारी-कर्मचारी मन ल सम्मानित करे गीस।
उहें, राज्य के आने-आने जिला म घलो मतदाता मन ल जागरूक करे बर कतकोन कारीकरम करे गीस अउ बिना भय अउ लालच के वोट डाले के सपथ देवाय गीस।
निकाय चुनाव-नामांकन
प्रदेस म नगरीय निकाय चुनई के नामांकन पत्र भरे के काम सुरू होगे हे। नामांकन जमा करे के चौथइयां दिन आज आने-आने नगरीय निकाय म महापौर, अध्यक्ष अउ पार्षद पद बर अब्बड़ अकन उम्मीदवार मन फारम बिसाइन अउ जमा करीन। नामांकन फारम जमा करे के आखिरी तारीख अट्ठाईस जनवरी हे।
भाजपा-उम्मीदवार
इही बीच, भारतीय जनता पार्टी ह राजनांदगांव, कबीरधाम अउ गरियाबंद जिला के नगरीय निकाय के अध्यक्ष अउ पार्षद प्रत्यासी मन के सूची जारी कर देहे। राजनांदगांव जिला के छुरिया नगर पंचायत के अध्यक्ष पद बर अजय पटेल अउ लाल बहादुर नगर पंचायत के अध्यक्ष पद बर देवेन्द्र साहू ल भाजपा ह अपन उम्मीदवार बनाय हे। एखरे जइसन डोंगरगढ़ नगर पालिका परिषद के पार्षद प्रत्यासी मनके लिस्ट घलो जारी कर दे गेहे।
उहें, कबीरधाम जिला के बोड़ला नगर पंचायत ले अध्यक्ष पद बर विजय कुमार पाटिल अउ पिपरिया ले अध्यक्ष पद बर घुरूवाराम साहू ल भाजपा उम्मीदवार बनाय गेहे। एखर अलावा बोड़ला, पिपरिया अउ सहसपुर-लोहारा नगर पंचायत के पार्षद प्रत्यासी मनके सूची जारी करे गेहे।
ऐति, गरियाबंद जिला के नगर पालिका ले अध्यक्ष पद बर प्रशांत मानिकपुरी, नगर पंचायत राजिम ले महेश यादव, छुरा ले लुकेश्वरी निषाद, कोपरा ले रूपनारायण साहू, फिंगेश्वर ले उत्तम राजवंशी अउ देवभोग ले अध्यक्ष पद बर अनिता विकास उपाध्याय ल भाजपा उम्मीदवार बनाय गेहे।
ओति, रायगढ़ जिला के नगर पंचायत लैलूंगा ले अध्यक्ष पद बर कपिल सिंघानिया, घरघोड़ा ले सुनील सिंह ठाकुर अउ किरोड़ीमल ले अध्यक्ष पद बर सुनीता मोहन विश्वकर्मा ह भाजपा प्रत्यासी होही।
अइसने, बिलासपुर जिला के नगर पंचायत मल्हार, बिल्हा अउ कोटा के पार्षद पद बर भाजपा प्रत्यासी मनके लिस्ट जारी करे गेहे।
माओवादी-गिरफ्तार
सुकमा जिला म सुरक्षा बल ह जगरगुंडा थाना क्षेत्र ले छै माओवादी मन ल गिरफ्तार करे हे। एमा दू झिन इनामी महिला माओवादी घलो सामिल हे। दूनो झन उपर दू-दू लाख रूपिया के इनाम घोसित रिहीस। एमन उपर कतकोन नक्सली घटना म सामिल होय के आरोप हे। नक्सल उन्मूलन अभियान म जगरगुंड थाना ले सीआरपीएफ अउ जिला बल के टीम ह एकट्ठा एरिया डोमिनेसन बर निकले रिहीस। इही बीच, सुरक्षा बल ह कुंदेड़ गांव के जंगल तीर घेराबंदी करके ए माओवादी मन ल पकड़िन।
उहें, कोंडागांव जिला बल अउ बीडीएस के एकट्ठा टीम ह धनोरा थाना क्षेत्र के बिन्झे गांव तीर रद्दा म लगाय गे तीन किलो के टिफिन बम ल बरामद करे हे, जेला निष्क्रिय करे गीस।
अउ अब थोरकुन समाचार सार म –
– एंटी करप्शन ब्यूरो के टीम ह सारंगढ़-बिलाईगढ़ जिला म सरसींवा थाना के प्रधान आरक्षक सुमंत डहरिया अउ आरक्षक कमल किशोर ल दस हजार रूपिया के रिस्वत लेत रंगेहाथ पकड़े हे।
– बिलासपुर जिला के लमनी वन परिक्षेत्र म एक बाघिन के शव मिले हे। मउत के कारण पता करे बर वन विभाग के टीम ह मामला के जांच सुरू कर देहे।
– रईपुर जिला के तिल्दा-नेवरा म एक केमिकल फैक्ट्री म आगी लग गे। जेखर ले लाखो रूपिया के सामान जर के राख होगे। ए घटना म एक मजदूर के घायल होय के खबर घलो मिले हे।
– बलौदाबाजार जिला मुख्यालय म पाछू कुछेक महिना पहिली होय आगजनी अउ तोड़फोड़ के मामला म गिरफ्तार कांग्रेस विधायक देवेन्द्र यादव के जमानत याचिका म उच्चतम न्यायालय ह राज्य सरकार ल नोटिस जारी करके जवाब देके निरदेस दीस हे।
अउ
– राज्य सरकार ह सत्ताईस जनवरी ले तीन फरवरी तक होवइया विभागीय परीक्षा ल नगरीय निकाय अउ त्रिस्तरीय पंचायत चुनई के कारण थिरा देहे। परीक्षा के नवा तारीख बाद म घोसित करे जाही।