छत्तीसगढ़ विधानसभा के बजट सत्र चौबीस फरवरी ले सुरू होही। इक्कीस मार्च तक चलइया ए सत्र के दउरान कुल सत्रह ठन बइठका होही। ए संबंध म विधानसभा सचिव दिनेश शर्मा ह आज अधिसूचना जारी कर देहे। सत्र के पहिली दिन राज्यपाल रमेन डेका के अभिभाषण होही। उहें, सत्र के दउरान वित्तीय काम के संग दूसर सरकारी काम घलो करे जाही। विधानसभा म बछर दू हजार पच्चीस-छब्बीस के बजट घलो पेस करे जाही।
नगरीय निकाय चुनाव-अधिसूचना
प्रदेस म होवइया नगरीय निकाय चुनाव बर ए बखत दस ठन नगरीय निकाय म नामांकन पत्र दाखिल कराय के सिलसिला चलत हे। नामांकन भरे के आखिरी तारीख अट्ठाईस जनवरी हे।
राज्य निर्वाचन आयोग ह सबो जिला निर्वाचन अधिकारी मन ल पत्र जारी करके काली पच्चीस जनवरी शनिवार अवकास के दिन घलो नाम निरदेसन पत्र लेके कार्रवाही करे बर किहीन हे। सामान्य प्रशासन विभाग डहार ले शनिवार के अवकास घोसित नइ करे गेहे।
इही बीच, राज्य निर्वाचन आयोग ह प्रदेस के नगर पालिका अउ त्रिस्तरीय पंचायत के आम चुनाव अउ प्रेक्षण काम बर आने-आने विभाग के तैंतीस झन सचिव मन ल प्रेक्षक नियुक्त करे गेहे। राज्य निर्वाचन आयोग डहार ले जारी आदेस के अनुसार इफ्फत आरा ल रईपुर, विनीत नंदनवार ल बिलासपुर, जगदीश सोनकर ल दुरूग, शिखा राजपुत तिवारी ल बस्तर अउ डॉक्टर संतोष देवांगन ल सरगुजा के प्रेक्षक बनाय गे हवय। उहें, दूसर जिला म घलो प्रेक्षक नियुक्त कर दे गेहे।
निर्वाचन आयुक्त-बैठक
छत्तीसगढ़ राज्य निर्वाचन आयुक्त अजय सिंह के अध्यक्षता म आज नवा रईपुर के राज्य निर्वाचन आयोग कार्यालय म नगर पालिका अउ त्रिस्तरीय पंचायत चुनाव के प्रेक्षण काम के बारे म बइठका होइस। ए बइठका वीडियो कॉन्फ्रेंसिंग के माध्यम ले होइस, जेमा प्रेक्षक मन ल चुनाव प्रक्रिया के पारदर्सिता अउ निष्पक्षता निश्चित करे बर निरदेस दे गीस।
भाजपा/कांग्रेस-चुनाव बैठक
भारतीय जनता पार्टी के प्रदेस मुख्यालय म आज भाजपा के वरिष्ठ नेता मनके बइठका करे गीस, जेमा कोर कमेटी, प्रदेस चुनाव समिति अउ संभागीय चुनाव समिति के सदस्य मन सामिल होइन। बइठका म नगरीय निकाय अउ त्रिस्तरीय पंचायत चुनाव बर प्रत्यासी मनके चयन के बारे म चर्चा करे गीस। बइठका म मुख्यमंत्री विष्णुदेव साय, छत्तीसगढ़ के प्रदेस प्रभारी नितिन नबीन, भाजपा अध्यक्ष किरण सिंह देव, राष्ट्रीय सह संगठन महामंत्री शिवप्रकाश अउ दूसर बड़े नेता मन सामिल होइन।
भारतीय जनता पार्टी के प्रदेस मीडिया प्रभारी अमित चिमनानी ह आकाशवाणी समाचार ल बतइन कि भाजपा जल्दीच अपन सबो प्रत्यासी मनके घोसना करही।
दूसर कोति, अखिल भारतीय कांग्रेस कमेटी के महासचिव सचिन पायलेट काली रईपुर पहुंच के कांग्रेस के नेता मन संग बइठका करही। ए बइठका रईपुर ेके प्रदेस कांग्रेस पार्टी कार्यालय राजीव भवन म होही। बइठका म नगरीय निकाय अउ त्रिस्तरीय पंचायत चुनाव के बारे म चर्चा करे जाही।
प्रदेस कांग्रेस कमेटी के संचार विभाग के अध्यक्ष सुशील आनंद शुक्ला ह आकाशवाणी समाचार ल बतइन कि प्रत्यासी मनके चयन ल लेके मंथन जारी हे।
पटवारी-हड़ताल
प्रदेस के पटवारी मन ह अपन हड़ताल खतम करे के फइसला ले हवय। पाछू सोलह दिसंबर ले पटवारी मन ह अनिश्चिकालीन हड़ताल म रिहीन, जेखर ले राजस्व के काम प्रभावित होवत रिहीस। लोगन के परेसानी ल देखत पटवारी मन ह काम म वापिस लहुटे के फइसला लीन हे।
खबर के मुताबिक पटवारी मन ह ऑनलाइन अउ नेट भत्ता के मांग ल लेके अपन हड़ताल सुरू करे रिहीन। प्रदर्सन के दउरान पटवारी मन ह अपन विरोध देखावत काला पट्टी लगाके काम करत रिहीन।
बातों-बातों में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत प्रदेस म होवइय नगरीय निकाय अउ पंचायत चुनाव के बारे म राज्य निर्वाचन आयुक्त अजय सिंह ले लेगे भेंटवार्ता के प्रसारण करे जाही। ए कारीकरम काली पच्चीस जनवरी के बिहनिया साढ़े दस बजे आकाशवाणी केन्द्र रायपुर ले प्रसारित होही। एला छत्तीसगढ़ के सबो आकाशवाणी केंद्र मन ह एके संघरा रिले करही।
राष्ट्रीय मतदाता दिवस
काली राष्ट्रीय मतदाता दिवस हे। ए मउका म रईपुर के इंदिरा गांधी कृषि विश्वविद्यालय म राज्य निर्वाचन आयोग के अजय सिंह के मुख्य आतिथ्य म राष्ट्रीय मतदाता दिवस के आयोजन करे जाही। कारीकरम म निर्वाचन काम म बड़े योगदान देवइया अधिकारी-कर्मचारी मन ल सम्मानित करे जाही।
मुख्य निर्वाचन पदाधिकारी रीना बाबा साहेब कंगाले ह बतइन कि रायगढ़ कलेक्टर कार्तिकेय गोयल अउ दुरूग कलेक्टर ऋचा प्रकाश चौधरी ल बछर दू हजार चौबीस के लोकसभा चुनाव म सर्वाधिक मतदान कराय बर अउ दंतेवाड़ा कलेक्टर मयंत चुतर्वेदी ल नक्सल प्रभावित क्षेत्र म उत्कृष्ट जिला निर्वाचन अधिकारी के रूप म काम करे बर सम्मानित करे जाही।
उहें, रईपुर कलेक्टर गौरव कुमार सिंह ल लोकसभा चुनाव के दउरान मतदान दल ल बेहतर तरीका ले प्रसिक्षण देबर सम्मानित करे जाही। एखर अलावा राजनांदगांव जिला के मुख्य निर्वाचन पदाधिकारी सुरूचि सिंह अउ मुंगेली जिला के जिला पंचायत मुख्य कार्यपालन अधिकारी प्रभाकर पांडे ल स्वीप गतिविधि बर बिसेस पुरस्कार दे जाही।
राज्यपाल रमेन डेका ह राष्ट्रीय मतदाता दिवस के मउका म मतदाता मन ले अपील करीन हे कि लोकतंत्र बर अपन कर्तव्य अउ जिम्मेदारी बर सचेत राहय। ओमन किहीन कि सफल लोकतंत्र बर ए जरूरी हे कि भारत के युवा नागरिक मन अपन आप ल मतदाता के रूप म पंजीकृत करावय अउ समय-समय म होवइया चुनाव म अपन मताधिकार के प्रयोग करय।
उहें, राष्ट्रीय मतदाता दिवस के मउका म आज राजभवन के अधिकारी अउ कर्मचारी मन ह मताधिकार के प्रयोग करे के सपथ लीन।
माओवादी -गिरफ्तार
बीजापुर जिला म सुरक्षा बल ह चौदह झिन माओवादी मन ल गिरफ्तार करे हे। एमा ले आठ झन माओवादी मन उपर करीबन छत्तीस लाख रूपिया के इनाम रिहीस। ए माओवादी मन ल उसूर थाना क्षेत्र के टेकमेटला, नड़पल्ली, मल्लेमपेंटा के जंगल ले पकड़े गे हवय। मिले जानकारी के अनुसार माओवादी विरोधी अभियान म डीआरजी, सीआरपीएफ अउ कोबरा बटालियन के जवान मन ह ए इलाका म सर्च अभियान म निकले रिहीन। ए दउरान ए माओवादी मन पकड़े गे हवय। पकड़े गे माओवादी मन ले मिले जानकारी के आधार म जंगल म लुका के राखे तीस ले जादा लकड़ी अउ लोहा के स्पाइक अउ दूसर औजार मिले हे। गिरफ्तार माओवादी मन उपर उसूर-नड़पल्ली रद्दा म आईईडी लगाय के आरोप हे।
दुर्घटना
महासमुंद जिला के सरायपाली म आज एक यात्री बस अउ ट्रक के बीच टक्कर होय ले एक झिन लइका के मउत होगे। उहें, तैंतालिस झन घायल होइन हे। जेखर मनके इलाज सरायपाली सामुदायिक स्वास्थ्य केंद्र म चलत हे। ए घटना उपर मुख्यमंत्री ह दुख जतइन। उहें, राजनांदगांव जिला म बस हादसा म पंद्रह यात्री घायल होगे हे।
अउ अब थोरकुन समाचार सार म –
– गणतंत्र दिवस के मउका म होवइया परेड बर आज रईपुर संघरा प्रदेस के सबो जिला म फुल ड्रेस रिहर्सल करे गीस।
– बलौदाबाजार म होय आगजनी अउ तोड़फोड़ के आरोप म करीबन आठ महिना ले जेल म बंद नारायण मीरी ल सुप्रीम कोर्ट ले जमानत मिल गेहे।
– सक्ती जिला के कुटराबोड़ म पदस्थ आरआई बद्रीनारायण जांगड़े ल एंटी करप्सन ब्यूरो एसीबी ह तीस हजार रूपिया के रिस्वत लेवत पकड़े हे।
– दुरूग जिला म होय साइबर फ्राड के मामला म फ्रीज करे गे एक सौ ग्यारा ठन बैंक खाता के धारक मन ले पुलिस ह पूछताछ करही।
– बलौदाबाजार भाटापारा जिला के खपराडीह के सरकारी स्कूल म लइका मनके तबीयत बिगड़े के मामला म कलेक्टर ह सीमेंट कंपनी ल नोटिस जारी करे हे।
– साइबर ठगी करइया बैंसठ आरोपी मनके फोटो पुलिस ह जारी करे हे। ए आरोपी मन म आठ महिला समेत तीन नाइजीरिया के नागरिक मन सामिल हे।
अउ
– दक्षिण-पूर्व-मध्य रेलवे ह आज उनहत्तरवां विसिष्ट रेल सेवा पुरस्कार समारोह के तहत रेल कर्मी मन ल सम्मानित करीस।