मिले खबर के मुताबिक सुरक्षा बल मन ल गरियाबंद के कुल्हाड़ीघाट वन क्षेत्र म बड़ संख्या म माओवादी मनके मौजूदगी के खुफिया सूचना मिले रिहीस। एखर बाद छत्तीसगढ़-ओडिसा पुलिस अउ सीआरपीएफ डहार ले एक सामलात अंतर राज्यीय अभियान सुरू करे गीस। ए ऑपरेसन छत्तीसगढ़ के गरियाबंद जिला अउ ओडिशा के नुआपाड़ा जिला के सीमावर्ती इलाका म चलाय गीस। पाछु चौबीस घंटा ले सुरक्षा बल अउ माआवोदी मनके बीच रूक-रूक के गोलीबारी चलत रिहीस। ए दउरान कुल्हाड़ीघाट ले काली संझा दू महिला माओवादी मनके सव बरामद करे गे रिहीस। उहें, आज बिहनिया घटनास्थल ले बारह अउ माओवादी मनके सव बरामद करे गेहे। मउका ले सुरक्षा बल मन ह एक सेल्फ लोडिंग राइफल समेत बड़ मात्रा म हथियार, गोला-बारूद अउ आईईडी बरामद करे हे। सुरक्षा बल मन डहार ले इलाका म तलाशी अभियान चलाय जावत हे।
केन्द्रीय गृहमंत्री अमित शाह ह सुरक्षा बल के ए सफलता म ओमन ल बधाई दीन हे। ओमन सोशल मीडिया प्लेटफॉर्म ‘एक्स‘ म लिखे हे कि देस म नक्सल अपन आखिरी सांस गिनत हे।
उहें, मुख्यमंत्री विष्णुदेव साय ह कहिन कि सुरक्षा बल मनके जवान मन ल माओवादी मनके खिलाफ मिले सफलता सराहनीय हवय। ओमन कहिन कि राज्य सरकार नक्सलवाद के ताबूत उपर आखिरी खिला ठोंके के काम करत हे।
सीबीआई-पीएससी मामला
राज्य सासन ह सीजी पीएससी के परीक्षा कंट्रोलर आरती वासनिक अउ गणवीर के गिरफ्तारी के मंजूरी दे देहे। राजभवन ले अनुमोदन के बाद सामान्य प्रसासन विभाग ह सीबीआई ल गिरफ्तारी ले जुड़े चिट्ठी भेजे हे। सीबीआई अब कोनों भी बेरा दूनों के गिरफ्तारी कर सकत हे। सीबीआई ह अपन रिपोर्ट म पीएससी के पर्चा लीक करे म दूनों के भूमिका ल महत्वपूर्ण बताय हे।
खबर के मुताबिक मनी लॉड्रिंग मामला म प्रवर्तन निदेशालय-ईडी ल सरकार ले बिना मंजूरी ले सरकारी कर्मचारी या अधिकारी ल गिरफ्तार करे के अधिकार हे, फेर सीबीआई ल नइ रिहीस। एखर सेती, सीबीआई ह आरती वासनिक अउ गणवीर के गिरफ्तारी बर सरकार ले मंजूरी मांगे रिहीस।
नगरीय निकाय-भाजपा कांग्रेस
नगरीय निकाय चुनाव के घोसना के बाद आज भारतीय जनता पार्टी के रायपुर स्थित प्रदेस मुख्यालाय म आयोजित एक पत्रकारवार्ता म उपमुख्यमंत्री अरूण साव ह किहिन कि भारतीय जनता पार्टी ह प्रदेस के जनता के सपना ल पूरा करही अउ नगरीय निकाय म विकास के नवा अध्याय लिखही। ओमन कहिन कि ए चुनाव नगर निगग म सिर्फ प्रतिनिधि चुने के मउका नइ हे, बल्कि राज्य के सहर के भविष्य ल संवारे के एक मउका हवय।
दूसर कोति, प्रदेस कांग्रेस मुख्यालय म राखे गे पत्रकारवार्ता म प्रदेस कांग्रेस अध्यक्ष दीपक बैज ह कहिन कि कांग्रेस ह राज्य निर्वाचन आयोग ल चिट्ठी लिखके मांग करे हे कि नगरीय निकाय अउ पंचायत चुनाव के परिणाम एक संग चौबीस फरवरी के घोसित करे जाय। ओमन किहिन कि ए बेरा चुनाव कराय ले बोर्ड परीक्षा के विद्यार्थी मन ल परेसानी हो सकत हे। श्री बैज ह कहिन कि कांग्रेस डहार ले ए चुनाव म सबले बड़े मुद्दा भाजपा सरकार के नाकामी अउ वादाखिलाफी रइही।
राज्य निर्वाचन आयुक्त-बैठक
राज्य निर्वाचन आयुक्त अजय सिंह के पगरइति म आज रायपुर म राजनीतिक दल के प्रतिनिधि मनके संग बइठका आयोजित करे गीस। ए दउरान श्री सिंह ह जम्मों राजनीतिक दल मन ल प्रदेस म लागू आदर्श आचार संहिता के पालन सुनिश्चित करे के निरदेस दीन। बइठका म ओमन मतदान प्रक्रिया ल निष्पक्ष अउ पारदर्शी बनाय अउ ईवीएम के उपयोग के बारे म बतईन। संगेसंग नामांकन प्रक्रिया, मतदान केन्द्र के व्यवस्था अउ मतगणना के पारदर्सिता म चर्चा करे गीस।
उपराष्ट्रपति-रायपुर
उपराष्ट्रपति जगदीप धनखड़ अपन एकदिवसीय छत्तीसगढ़ प्रवास म आज रायपुर पहुंचीन। राज्यपाल रमेन डेका ह माना स्थित स्वामी विवेकानंद विमानतल म उपराष्ट्रपति ल राजकीय गमछा पहना के अउ पुष्प गुच्छ भेंट करके उंखर स्वागत करीन। ए मउका म उपमुख्यमंत्री अरूण साव, केन्द्रीय आवास अउ सहरी विकास राज्यमंत्री तोखन साहू अउ विधायक मौजूद रिहीन।
कवासी लखमा-पेशी
सराब घोटाला मामला प्रवर्तन निदेशालय-ईडी ह पूर्व मंत्री कवासी लखमा के रिमांड बेरा खतम होय के बाद आज ओमन ल रायपुर के बिसेस न्यायालय म पेस करीन, जिहां ओमन ल कोर्ट ह चार फरवरी तक के न्यायिक रिमांड म जेल भेज देहे। ईडी के वकील ह कोर्ट म अपन दलील पेस करत कहिन कि कवासी लखमा जांच म मदद नइ करत हे।
ठगी-आरोपी गिरफ्तार
एक इंजीनियर ल बिटक्वाइन म निवेस के झांसा देके करीबन छत्तीस लाख रूपिया के ठगी करे के आरोप म दुरूग पुलिस ह नागपुर ले एक आरोपी ल गिरफ्तार करे हे। भिलाई नगर के सीएसपी सत्यप्रकाश तिवारी ह बतईन कि पीड़ित मनखे ह पाछु बछर सितंबर महीना म अपन संग ठगी होय के रिपोर्ट दर्ज कराय रिहीस। एमा केहे गेहे कि आरोपी तन्मय विनोद कोहड़ ह बछर दू हजार बीस ले बाईस तक बिटक्वाईन म रकम निवेस करे के नाम म छत्तीस लाख रूपिया ले जादा के ठगी करे हे। आरोपी के तलास के दउरान मुखबिर ले सूचना मिलीस कि आरोपी नागपुर म अपन घर म बाहिर ले ताला बंद करके अंदर लुका के राहत रिहीस। एखरे आधार म पुलिस ह कार्रवाई करत आरोपी ल गिरफ्तार करे हे।
उहें, भिलाई स्टील प्लांट के एक अधिकारी ले शेयर ट्रेडिंग के नाम म इक्कीस लाख ले जादा के ठगी के मामला आगू आय हे। पीड़ित ह सेयर खरीदे बर वाट्सऐप गु्रप अउ फोन म दे गे लिंक म क्लिक करके एक महीना के भीतर अलग-अलग बैंक खाता म इक्कीस लाख रूपिया ले जादा के रासि ट्रांसफर करीन।
नकली पनीर-जब्त
खाद्य विभाग के टीम ह रायपुर रेलवे स्टेशन अउ भाठागांव बस स्टैंड ले करीबन इंक्यावन सौ किलो नकली पनीर जब्त करे हे। खाद्य विभाग के अधिकारी मन ह बतईन कि डालडा, स्किम मिल्क पाउडर अउ पाम ऑयल ल मिलाके नकली पनीर बनाय गे रिहीस। विभाग ल सूचना मिले रिहीस कि रायपुर रेलवे स्टेसन म मध्यप्रदेश ले उनचास बॉक्स अउ बस के माध्यम ले पुणे के एक डेयरी ले तिरपन बॉक्स म पनीर लाय गे रिहीस। जब्त पनीर ल जांच बर लैब भेजे गेहे। रिपोर्ट आय के बाद आगू के कार्रवाई करे जाही।