छत्तीसगढ़ म नगरीय निकाय अउ त्रिस्तरीय पंचायत चुनई बर तारीख के घोसना कर दे गेहे अउ एखरे संग प्रदेस म आचार संहिता लागू होगे हे। एक चरण म होवइया नगरीय निकाय चुनई ग्यारा फरवरी के होही त उहे, त्रिस्तरीय पंचायत चुनई तीन चरण म सत्रह, बीस अउ तेईस फरवरी के होही। राज्य निर्वाचन आयुक्त अजय सिंह ह पत्रकारवार्ता म चुनई कारीकरम के घोसना करीन। ओमन बतइन कि नगरीय निकाय चुनई ईवीएम अउ त्रिस्तरीय पंचायत चुनई मतपेटी के माध्यम ले कराय जाही। नगरीय निकाय के चुनई दलीय आधार म होही त, उहें, पंचायत चुनई गैर-दलीय आधार म कराय जाही। एखरे संग एखर ले जुड़े जम्मो निकाय मन म नामांकन पत्र जमा करे के काम सुरू हो जही। अट्ठाईस जनवरी तक नामांकन पत्र भरे जा सकथे। नामांकन पत्र के जांच उनतीस जनवरी के होही। उम्मीदवार मन इकतीस जनवरी तक नांव वापिस ले सकथे। मतदान ग्यारा फरवरी के होही। वोट ल गिने के काम पंद्रह फरवरी के करे जाही।
नगरीय निकाय चुनई म प्रदेस के दस नगरपालिक निगम, उनचास ठिन नगरपालिका परिषद अउ एक सौ चौदह नगर पंचायत मन म चुनई होही। ए नगर पालिक निगम मन म जगदलपुर, दुरूग, राजनांदगांव, धमतरी, रईपुर, बिलासपुर, रायगढ़, कोरबा, अबिकापुर अउ चिरमिरी सामिल हे। त, उहें नगरपालिक निगम भिलाई के वार्ड क्रमांक चौबीस अउ पैंतीस, नगरपालिक निगम भिलाई चरौदा के वार्ड क्रमांक बत्तीस, नगरपालिक निगम रिसाली के वार्ड क्रमांक चौतीस अउ नगर पंचायत कोंटा के वार्ड क्रमांक तेरह म उपचुनई घलो कराय जाही।
नगरीय निकाय चुनाव-घोषणा-02
उहें, त्रिस्तरीय पंचायत चुनई म निर्वाचन के अधिसूचना तीन चरण बर एके संघरा सत्ताईस जनवरी के जारी करे जाही अउ एखर बाद नामांकन पत्र भरे के काम सुरू हो जही। नामांकन पत्र जमा करे के आखिरी तारीख तीन फरवरी राखे गेहे। नामांकन पत्र के जांच चार फरवरी के होही। नांव वापसी छै फरवरी तक ले जा सकथे। त्रिस्तरीय पंचायत चुनाव तीन चरण म सत्रह, बीस अउ तेईस फरवरी के होही। इही दिन वोट डारे के बाद संझा मतदान केंद्र म वोट ल गिने के काम करे जाही। जरूरी होय म खंड मुख्यालय म वोट के गिनती अट्ठारा, इक्कीस अउ चौबीस फरवरी के करे जाही। पंच-सरपंच अउ जनपद पंचायत के मामला म खंड स्तर म चुनई परिणाम के घोसना उन्नीस, बाईस अउ पच्चीस फरवरी के घोसित करे जाही।
अइसने, जिला पंचायत सदस्य के मामला म जिला मुख्यालय म बीस, तेईस अउ पच्चीस फरवरी के चुनाव परिणाम घोसित करे जाही।
नगरीय निकाय चुनाव-घोषणा-03
राज्य निर्वाचन आयुक्त ह बतइन कि प्रदेस के नगरीय निकाय अउ त्रिस्तरीय पंचायत चुनई स्वतंत्र निष्पक्ष अउ सांतिपूर्ण ढंग ले संपन्न कराय बर आयोग डहार ले पूरा तियारी करे गेहे। नगरीय निकाय मन म कुल चौवालिस लाख चौहत्तर हजार दू सौ उनहत्तर मतदाता हे। जेमा बाईस लाख पांच सौ पचीस पुरूष अउ बाईस लाख तिहत्तर हजार दू सौ बत्तीस महिला मतदाता के संगेसंग पांच सौ बारह आने मतदाता सामिल हे। नगरीय निकाय चुनाव बर कुल पांच हजार नौ सौ सत्तर मतदान केंद्र बनाय गेहे, जेमा ले एक हजार पांच सौ इकतीस संवेदनसील अउ एक सौ बत्तीस अतिसंवेदनसील मतदान केंद्र हे।
उहें, त्रिस्तरीय पंचायत चुनई म जिला पंचायत सदस्य के चार सौ तैंतीस, जनपद पंचायत सदस्य के दू हजार नौ सौ तिहत्तर अउ सरपंच के ग्यारा हजार छै सौ बहत्तर अउ वार्ड पंच के एक लाख साठ हजार एक सौ अस्सी पद के चुनई बर मतदान कराय जाही।
उपराष्ट्रपति-छत्तीसगढ़
उपराष्ट्रपति जगदीप धनखड़ ह काली एक दिन के दउरा म छत्तीसगढ़ के राजधानी रईपुर आही। उपराष्ट्रपति ह अपन यात्रा के दउरान राष्ट्रीय प्रौद्योगिकी संस्थान- एनआईटी रईपुर, भारतीय प्रौद्योगिकी संस्थान-आईआईटी भिलाई, भारतीय प्रबंधन संस्थान-आईआईएम रईपुर के छात्र मनके संग ‘बेहतर भारत के निर्माण के लिए विचार‘ बिसय उपर एक ठिन संवाद सत्र के अध्यक्षता करही।
माओवादी-मुठभेड़
गरियाबंद जिला के कुल्हाड़ी घाट के भालू डिग्गी जंगल म आज सुरक्षा बल अउ माओवादी मनके बीच मुठभेड़ होय के समाचार मिले हे। ए मुठभेड़ म दू झिन माओवादी के मारे जाय के खबर मिले हे। मउका ले एक ठिन आटोमेटिक एसआरएल घलो बरामद करे गेहे। उहें, कोबरा बटालियन के एक झिन जवान घायल होय हे। घायल जवान मन ल एयरलिफ्ट करके राजधानी रईपुर लाय गीस।
हमर संवाददाता ले मिले जानबा के मुताबिक छत्तीसगढ़ अउ ओडिसा के सुरक्षा बल मनके जवान ह संयुक्त रूप ले सर्चिंग बर निकले रिहीन। इही दौरान कुल्हाड़ी घाट के जंगल म ए मुठभेड़ होइस। क्षेत्र म तालासी अभियान जारी हे।
भूमिहीन कृषि मजदूर कल्याण योजना
मुख्यमंत्री विष्णुदेव साय ह आज रईपुर म पंडित दीनदयाल उपाध्याय भूमिहीन कृषि मजदूर कल्याण योजना के सुभारंभ करीन। ए योजना म जउन मजदूर तीर खेति करे के भूंईया नइ हे, ओमन ल हर साल दस हजार रूपिया के आर्थिक मदद दे जाही। ए मउका म मुख्यमंत्री ह किहीन कि कुल पांच लाख बैंसठ हजार एक सौ बारह हितग्राही मन ल ए योजना के फायदा मिलही। ए योजना म पांच सौ बांसठ करोड़ ग्यारा लाख बीस हजार रूपिया भूमिहीन कृषि मजूर मन ल दे जाही।
मुख्यमंत्री-सोपान कार्यक्रम
मुख्यमंत्री विष्णुदेव साय ह आज रईपुर के पंडित दीनदयाल उपाध्याय ऑडिटोरियम म होय नगरीय विकास के सोपान कारीकरम म सामिल होइन। ए मउका म मुख्यमंत्री ह आने-आने नगरीय निकाय मन म एक सौ पचपन करोड़ अड़तीस लाख रूपिया के आठ सौ तेरह विकास काम के सिलान्यास अउ पंद्रह करोड़ पचीस लाख रूपिया के सत्तर ठिन विकास काम के लोकार्पण करीन।
ए मउका म मुख्यमंत्री ह स्वच्छता दीदी मनके मानदेय म आठ सौ रूपिया के बढ़ोत्तरी करे के घोसना करीन। अब स्वच्छता दीदी मन ल हर महिला आठ हजार रूपिया मानदेय मिलही। कारीकरम म मुख्यमंत्री ह एक सौ तीन परिवार मन ल अनुकम्पा नियुक्ति के चिट्ठी सौंपिन। संगेसंग मुख्यमंत्री ह क्लीन टायलेट कैम्पेन म बढ़िया काम करइया वाले प्रदेस अंबिकापुर, छुरा, छूरिया, डोंगरगढ़, कोरबा, महासुमंद, रईपुर, राजनांदगांव अउ बिलासपुर के संगेसंग चौदह ठिन नगरीय निकाय मन ल सम्मानित करीन।
सुप्रीम कोर्ट-एसबीआर कॉलेज मैदान
सुप्रीम कोर्ट ह बिलासपुर के एसबीआर कॉलेज मैदान के भुंइया उपर जरूरी फइसला सुनावत किहीन कि ए भूमि उपर ट्रस्ट के नइ भलूक शासन के अधिकार हे। कोर्ट ह बिलासपुर हाईकोर्ट के डिवीजन बेंच डहार ले देगे फइसला ल जस के तस राखत एसबीआर कॉलेज मैदान के खरीददार डहार ले दायर करे गे दूनो याचिका ल खारिज कर दीन। संगेसंग कोर्ट ह खरीददार मन ल आदेस देहे कि ओमन चाहे त, बेचइया मन ले अपन पइसा वापिस ले सकथे।
दुर्घटना
कोंडागांव जिला म आज एक ठिन स्कूल बस अउ टरक के बीच होय टक्कर म बस ड्राइवर अउ शिक्षक के मउत होगे। उहें, बस म बइठे तीस झिन लइका मन घायल होगे। हमर संवाददाता ले मिले जानबा के मुताबिक राष्ट्रीय राजमार्ग क्रमांक तीस उपर चिखलपुटी नवा बस स्टैंड के तीर रतिहा स्कूल के लइका मन ल लेके बस ह आगू ले आवत टरक ले टकरा गे। ए स्कूली लइका मन ह अपन शिक्षक के संग मोहला-मानपुर ले बस्तर घूमे बर गे रिहीन। लहुटत खानी ए दुर्घटना होगे।
मुख्यमंत्री ह दुर्घटना म बस चलइया ड्राइवर अउ शिक्षक के मउत उपर दुख जताय हे। ओमन जिला प्रशासन ले घायल मनके इलाज बर बने बेवस्था करे के निरदेस देहे।
खो-खो-खिताब
खो-खो विश्व कप म भारत के महिला अउ पुरूष टीम ह विश्व कप खिताब जीत के इतिहास बना लेहे। काली नई दिल्ली के इंदिरागांधी इंडोर स्टेडियम म भारतीय पुरूष अउ महिला टीम ह बढ़िया खेल के प्रदर्सन करके ए विश्व कप के खिताब ल अपन नांव कराइन। भारतीय पुरूष टीम ह नेपाल के खिलाफ फाइनल मैच म चौव्वन-छत्तीस के स्कोर ले जीत दर्ज करीन त, उहें, भारतीय महिला टीम ह फाइनल म नेपाल ल अठहत्तर-चालीस ले हरा दीन।
मुख्यमंत्री विष्णुदेव साय ह ए जीत उपर भारतीय पुरूष अउ महिला टीम ल बधई देहे।