प्रधानमंत्री नरेंद्र मोदी ह किहीन कि भारत, प्रखर वैज्ञानिक मन के सेति अंतरिक्ष प्रौद्योगिकीय के क्षेत्र म नवा मानदंड बनावत हे, जेखर ले अवइया चुनौती के समाधान मिलही। आज आकाशवाणी ले ‘‘मन की बात‘‘ कारीकरम के एक सौ अट्ठारवां कड़ी म ओमन ह अंतरिक्ष के क्षेत्र म देस के हाल के उपलब्धि के तारिफ करीन। प्रधानमंत्री ह अंतरिक्ष म उपग्रह के डॉकिंग म मिले सफलता के बारे म किहीन कि ए तकनीक अंतरिक्ष केंद्र मनके सामग्री के पूर्ति अउ अंतरिक्ष म यात्री भेजे बर महत्वपूर्ण हे।
प्रधानमंत्री ह देसवासी मन ल पचहत्तरवां गणतंत्र दिवस के घलो अग्रिम सुभकामना दीन हे। ओमन ह पचीस जनवरी के मनाय जाने वाला राष्ट्रीय मतदाता दिवस के महत्व के घलो चर्चा करीन। देस म निर्वाचन आयोग के स्थापना इही दिन होय रिहीस। प्रधानमंत्री ह देस म निस्पक्ष चुनाव कराय बर निर्वाचन आयोग के प्रतिबध्दता अउ मतदान प्रक्रिया ल आधुनिक बनाय बर तकनीक के उपयोग के तारिफ करीन।
मन की बात-02
उत्तर प्रदेस म प्रयागराज म चलत कुंभ मेला के बारे म प्रधानमंत्री ह किहीन कि ए ह समता-समरसता के असाधारण संगम हे। ओमन किहीन कि ए बखत कुंभ म बड़े पैमाना म डिजीटल तकनीक के उपयोग होवत हे अउ कुंभ के ए वैष्विक लोकप्रियता हर भारतीय बर गर्व के बिसय हे।
प्रधानमंत्री ह वन्य प्राणी मनके संग मानव के जुड़ाव के बारे म किहीन हे कि भारतीय संस्कृति अउ विरासत आस-पास के पशु-पक्षी मन संग प्यार से रहना सिखाथे।
मन की बात कारीकरम म श्री मोदी ह छत्तीसगढ़ के बिलासपुर जिला के गुरूघासीदास तमोर पिंगला टाइगर रिजर्व के चर्चा घलो करीन।
स्टार्ट-अप इंडिया कारीकरम के नौ बछर पूरा होय म प्रधानमंत्री ह किहीन कि ए कारीकरम सिरिफ बड़े सहर तक सीमित नइ हे, ओमन ह नेता जी सुभाष चंद्र बोस के योगदान ल सुरता करत किहीन कि तेईस जनवरी के नेता जी के जयंती ल पराक्रम दिवस के रूप म मनाय जाही।
स्टार्टअप इंडिया-विशेष कार्यक्रम
सुनइया मन ल बतादन स्टार्टअप इंडिया के नौ बछर पूरा होय के मउका म प्रादेसिक समाचार एकांश रईपुर डहार ले एक ठन बिसेस कारीकरम बनाय गे हवय। एखर प्रसारण आकाशवाणी रईपुर ले काली बीस जनवरी के बिहनिया नौ बजे ले नौ बजके पांच मिनट तक करे जाही। ए कारीकरम ल छत्तीसगढ़ के सबो आकाशवाणी केंद्र मन ह एके संघरा रिले करही।
मन की बात-छत्तीसगढ़
प्रधानमंत्री नरेंद्र मोदी के रेडियोवार्ता ‘‘मन की बात‘‘ ल छत्तीसगढ़ म घलो सुने गीस। मुख्यमंत्री विष्णुदेव साय ह आज मंत्रालय म अपन मंत्रिमंडल के सदस्य मन संग मन की बात कारीकरम के प्रसारण ल सुनिन। ए मउका म मुख्यमंत्री ह किहीन कि ‘मन की बात‘ कारीकरम ले हर बखत कुछ नया सीखे बर मिलथे। ए कारीकरम देसवासी मन के उपलब्धि, मानवता के सेवा के काम अउ नवाचार के जानकारी के अनूठा संगम हे।
मंत्रिपरिषद निर्णय-01
मुख्यमंत्री विष्णुदेव साय के अगुवई म आज मंत्रालय म राज्यमंत्री मंडल के बइठका होइस, जेमा किसान मनके हित म बड़े फइसला करे गेहे। बइठका के बाद मीडिया ले गोठबात म कैबिनेट मंत्री अरूण साव ह बतइन कि धान खरीदी बर प्रति कुंटल अंतर के रासि आठ सौ रूपिया राज्य सरकार ह किसान मन ल आदान सहायता के रूप म एकमुस्त फरवरी महिना म दीही। ओमन बतइन कि ए बछर प्रदेस के करीबन सत्ताईस लाख किसान मनले केंद्र सरकार डहार ले तय करे गे समर्थन मूल्य म तेईस सौ रूपिया प्रति कुंटल के दर ले धान खरीदे जात हे। श्री साव ह बतइन कि कैबिनेट ह चालू खरीफ विपणन बछर म उपार्जित धान म अतिसेस धान के नीलामी ऑनलाइन करे के फइसला घलो लेहे।
बइठका म मिनी स्टील प्लांट अउ स्टील उद्योग ल बढ़ावा देबर बिसेस राहत पैकेज म ऊर्जा प्रभार म एक अक्टूबर दू हजार चौबीस ले इकतीस मार्च दू हजार पच्चीस तक अधिकतम एक रूपिया हर यूनिट छूट दे जाय के फइसला ले गे हवय। उहें, राज्य के कलाकार मन ल दे जाने वाला आर्थिक सहायता रासि पचीस हजार रूपिया ले बढ़ाके अब पचास हजार रूपिया करे गेहे। संगेसंग कलाकार के मउत होय म एक लाख रूपिया के आर्थिक मदद दे जाही। छात्र स्किलिंग प्रोग्राम म नेशनल स्टॉक एक्सचेंज के संग एमओयू करे के फइसला ले गे हवय। ए प्रसिक्षण स्कूल अउ कॉलेज के विद्यार्थी मन बर चलाय जाही। बइठका म नवा रईपुर अटल नगर म श्री सत्य सांई हेल्थ अउ एजुकेशन ट्रस्ट ल उपराहा पांच एकड़ जमीन निसुल्क अउ आर्ट ऑफ लिविंग के स्थापना बर चालीस एकड़ जमीन रियायती दर म आबंटित करे के फइसला ले गे हवय।
मंत्रिपरिषद निर्णय-02
बइठका म प्रधानमंत्री आवास योजना सहरी म एक लाख बत्तीस हजार हितग्राही मन बर पांच सौ अड़तीस करोड़ रूपिया के उपराहा राज्यांश के अनुमोदन करे गेहे। कैबिनेट ह रेडी टू ईट बनाय के जिम्मेदारी महिला स्व-सहायता समूह ल देके फइसला लेहे। पहिली चरण म पांच जिला के महिला स्व-सहायता समूह ल ए काम दे जाही। बइठका म त्रिस्तरीय पंचायती राज संस्था म अन्य पिछड़ा वर्ग के प्रतिनिधित्व अउ आरक्षण ले जुड़े प्रावधान म संशोधन करके अध्यादेस के समयावधि ल आगू बढ़ाय के फइसला करे गेहे।
मुख्यमंत्री-सक्ती/सारंगढ़-बिला
राज्य के ग्रामीण भूमिहीन श्रमिक मन ल अब दस-दस हजार रूपिया के रासि सालाना दे जाही। ए घोसना मुख्यमंत्री विष्णुदेव साय ह आज सक्ती जिला म राखे गे कारीकरम म करीन। ओमन किहीन कि एखर ले प्रदेस के पांच लाख बांसठ हजार श्रमिक मन ल फायदा मिलही। कारीकरम म श्री साय ह जिला म एक सौ अड़सठ करोड़ रूपिया के विकास काम के लोकार्पण अउ भूमिपूजन करीन। ए मउका म मुख्यमंत्री ह जिला के दमऊदरहा ल पर्यटन स्थल के रूप म विकसित करे के ऐलान करीन। एखर बाद श्री साय ह मुख्यमंत्री कन्या विवाह योजना म पंद्रह ठन जोड़ा ल अपन आसिर्वाद दीन।
उहें, मुख्यमंत्री ह आज सारंगढ़-बिलाईगढ़ जिला म लगभग एक सौ सैंतीस करोड़ रूपिया के लागत के आने-आने विकास काम के भूमिपूजन सिलान्यास अउ लोकार्पण करीन। ए मउका म मुख्यमंत्री ह जिला म उद्योग लगाय बर अलग जमीन देके, पचास सीटर छात्रावास अउ विश्राम भवन बनाय के घोसना करीन। कारीकरम म मुख्यमंत्री ह किसान मन ल सिंचाई बर दे जाने वाला बिजली म छूट ल डॉक्टर खूबचंद बघेल विद्युत सहायता योजना के नांव दीन।
विधानसभा अध्यक्ष-प्रधानमंत्री
छत्तीसगढ़ विधानसभा के अध्यक्ष डॉक्टर रमन सिंह ह आज नई दिल्ली म प्रधानमंत्री नरेंद्र मोदी ले मुलाकात करीन। ए दौरान डॉक्टर सिंह ह प्रधानमंत्री ले प्रदेस के रजत जयंती वर्ष अउ छत्तीसगढ़ ले जुड़े महत्वपूर्ण बिसय उपर चर्चा करीन। संगेसंग ओमन ह प्रधानमंत्री ल छत्तीसगढ़ आय के नेवता घलो दीन। विधानसभा अध्यक्ष ह प्रधानमंत्री ल माता बम्लेश्वरी के फोटो घलो भेंट करीन।
आकांक्षा भारद्वाज-बर्खास्त
महासमुंद म पदस्थ कनिष्ठ न्यायिक सेवा अधिकारी आकांक्षा भारद्वाज के सेवा ल विधि अउ विधायी विभाग ह छत्तीसगढ़ उच्च न्यायलय के अनुसंसा म समाप्त कर देहे। पाछू महिना आकांक्षा भारद्वाज ह सिंगल बेंच म अपन बर्खास्तगी के खिलाफ दायर मुकदमा जीते के बाद फेर बहाली हासिल करे रिहीन।
खबर के मुताबिक आकांक्षा भारद्वाज ल सात बछर पहिली बर्खास्त कर दे गे रिहीस, फेर उंखर याचिका म सुनवाई के बाद सिंगल बेंच ह बर्खास्तगी आदेस ल रद्द कर दे रिहीस। ओखर बाद ओमन ल सिनियर सिविल जज के पद म फेर नियुक्त करके तीन दिसंबर के महासमुंद म पदस्थ करे गे रिहीस।
माओवादी गिरफ्तार
सुकमा जिला के चिंतागुफा थाना क्षेत्र ले पुलिस ह दू झन इनामी संघरा तीन झन माओवादी मन ल गिरफ्तार करे हे। एमा ले एक झन माओवादी उपर दू लाख रूपिया के अउ एक झन उपर एक लाख रूपिया के इनाम रिहीस। पुलिस के अनुसार गिरफ्तार माओवादी मन ह पाछू बछर दुलेड़ तीर एक ठन पिकअप गाड़ी म होय लूटपाट अउ आगजनी के घटना म सामिल रिहीन।
कोंडागांव-गांजा बरामद
कोंडागांव जिला के कोतवाली पुलिस ह मुखबिर ले मिले सूचना के आधार म गांजा के बिक्री करत ग्यारा झन आरोपी मन ल गिरफ्तार करीन हे। उहें, दू झन नाबालिक मन उपर घलो कार्रवाई करे गेहे। ए पहिली घांव हे कि नसा उपर रोक लगाय बर जिला म नार्कोटिक्स एक्ट म ग्यारा झन आरोपी मन के खिलाफ मामला दर्ज करे गेहे। पुलिस ह आरोपी मनके तीर ले बड़े मात्रा म गांजा बरामद करे हे।