प्रधानमंत्री नरेंद्र मोदी ह स्वामित्व योजना म आज संपत्ति मालिक मन ल वीडियो कॉन्फ्रेंसिंग के माध्यम ले पैंसठ लाख ले जादा संपत्ति कारड बांटिस। दस राज्य अउ दू केंद्रशासित प्रदेस के पचास हजार ले जादा गांव म संपत्ति कारड बांटे गेहे।
ए मउका म प्रधानमंत्री ह आज के दिन ल ग्रामीण अर्थव्यवस्था बर ऐतिहासिक दिन बतइन। ओमन किहीन कि स्वामित्व योजना लागू होय के बाद ले पाछू पांच बछर म दू करोड़ पच्चीस लाख ले जादा संपत्ति के कागज जारी करे गेहे। श्री मोदी ह किहीन कि संपत्ति के सही कागज नइ होना एक बड़का समस्या हे, जेखर सेति ही झगरा होथे। ओमन किहीन कि अब संपत्ति के सही लेखा जोखा होय ले बैंक ले लोन मिल पाही अउ अवैध अतिक्रमण ले निपटे जा सकही।
स्वामित्व योजना के उद्देस्य गांव-गंवई म संपत्ति मालिक मन ल स्वामित्व के अधिकार देना हे। सर्वे बर अत्याधुनिक ड्रोन तकनीक के माध्यम ले परिवार ल स्वामित्व के अधिकार देके ग्रामीण भारत के आर्थिक विकास ल आगू बढ़ाय बर बछर दू हजार बीस म स्वामित्व योजना सुरू होय रिहीस।
स्वामित्व योजना-छत्तीसगढ़
पीएम स्वामित्व योजना के तहत आज छत्तीसगढ़ के हितग्राही मन ल घलो स्वामित्व कारड बांटे गीस। प्रधानमंत्री नरेंद्र मोदी ए कारीकरम ले वर्चुअल रूप ले जुड़े रिहीस। महासमुंद जिला के मचेवा म राखेगे कारीकरम म मुख्यमंत्री विष्णुदेव सामिल होइन अउ एक सौ अट्ठाईस गांव के दस हजार ले जादा लाभार्थी मन ल स्वामित्व कारड प्रदान करीन।
एखरे संग कवर्धा, बलरामपुर-रामानुजगंज, बालोद अउ गरियाबंद जिला म घलो कारीकरम आयोजित करे गीस।
संसद-बजट सत्र
संसद के बजट सत्र इकतीस जनवरी ले सुरू होके चार अप्रैल तक चलही। सत्र के पहिली दिन राष्ट्रपति द्रौपदी मुर्मू ह लोकसभा अउ राज्यसभा के संयुक्त बइठका ल संबोधित करही। वित्त मंत्री निर्मला सीतारमन ह पहिली फरवरी के केंद्रीय बजट पेस करही। बजट सत्र ह दू चरण म होही। ए बजट सत्र के पहिली चरण तेरह फरवरी तक चलही अउ दूसइया चरण ह दस मार्च ले सुरू होके चार अप्रैल तक चलही।
पेंशनर्स-महंगाई राहत
राज्य सरकार ह नगरीय निकाय के पेंशनर्स अउ परिवार पेंशनर्स के महंगाई भत्ता म बढ़ोत्तरी करे हे। नगरीय प्रशासन अउ विकास विभाग ह सातवां वेतन मान म पेंसन पवइया मन के चार प्रतिसत अउ छठवां वेतनमान म पेंसन पवइया मन के महंगाई भत्ता म नौ प्रतिसत के बढ़ोत्तरी करे हे। दूनो वेतनमान के पेंसन अउ परिवार पेंसनर मन ल एखर फायदा पाछू एक अक्टूबर ले मिलही। ए बारे म विभाग ह आदेस घलो जारी कर देहे।
श्रमिक-राशि
श्रममंत्री लखनलाल देवांगन ह काली रईपुर म अठहत्तर हजार ले जादा मजदूर मनके बैंक खाता म इकतीस करोड़ इकयासी लाख रूपिया डीबीटी के माध्यम ले भेजिन। ए मउका म श्रम मंत्री ह किहीन कि अवइया शिक्षा सत्र ले अटल उत्कृष्ट शिक्षा योजना म श्रमिक मनके लइका मन ल भर्ती दिलाय जाही। जेखर पूरा खर्चा राज्य सरकार ह उठाही।
श्रम मंत्री ह बतइन कि श्रम विभाग के तीनो मंडल के माध्यम ले योजना मन के सफल संचालन करे जावत हे। अभी तक तीन लाख छब्बीस हजार मजदूर मन ल आने-आने योजना के माध्यम ले चार सौ तीस करोड़ रूपिया ले जादा के पइसा दे गेहे।
इही कारीकरम म श्रमिक परिवार के लइका मन ल छात्रवृत्ति अउ सहायता रासि के चेक घलो बांटे गीस।
मन की बात
प्रधानमंत्री नरेंद्र मोदी काली आकाशवाणी म ‘मन की बात‘ कारीकरम म देस-विदेस के लोगन संग अपन बिचार साझा करही। ए मासिक रेडियो कारीकरम के एक सौ अट्ठारवां कड़ी होही।
ए कारीकरम ल आकाशवाणी अउ दूरदर्शन के जम्मो नेटवर्क, एआईआर न्यूज वेबसाइट अउ न्यूज ऑन ए आई आर मोबाइल ऐप म घलो परसातिर करे जाही।
छत्तीसगढ़ के युवा मन ल रोजगार अउ कौसल विकास के क्षेत्र म नवा संभावना देके उद्देस्य ले आज तकनीकी शिक्षा विभाग के संग तीन ठन निजी संस्थान के समझौता होइस। ए मउका म उपमुख्यमंत्री विजय शर्मा अउ कौसल विकास मंत्री केदार कश्यप ह घलो मौजूद रिहीन। उपमुख्यमंत्री ह किहीन कि सरकार ह पक्का करही कि हर छात्र फेर ओ ह आईआईटी के हो, इंजीनियरिंग कॉलेज के हो या पॉलिटेक्निक के, ओखर पास रोजगार के सही मउका हो। रोजगार बर पंजीकृत छात्र मनके डेटा सुरक्षित रइही अउ बस राज्य के हित म ही उपयोग होही। ओमन युवा मन ले सीजी रोजगार पोर्टल म पंजीयन करे के अपील करीन।
केंद्रीय मंत्री-गिरिराज सिंह-दौरा
केंद्रीय वस्त्र मंत्री गिरिराज सिंह काली उन्नीस जनवरी ले तीन दिनी छत्तीसगढ़ प्रवास म रइही। अपन प्रवास म बीस जनवरी के केंद्रीय मंत्री ह रईपुर के एक रेसम उद्योग संस्थान के निरीक्षण करही। एखर बाद श्री सिंह भिलाई बर रवाना होही, जिहां आईआईटी भिलाई कोति ले प्रस्तुत प्रेजेंटेसन ल देखही अउ अधिकारी मन संग बइठका करही।
केंद्रीय मंत्री इक्कीस जनवरी के रईपुर म कपड़ा क्षेत्र के पदाधिकारी मन संग भेंट करही अउ इही दिन संझा कन नई दिल्ली लहुट जही।
रिपब्लिक डे एट होम-अतिथि
नई दिल्ली म गणतंत्र दिवस के मउका म ‘‘रिपब्लिक डे एट होम 2025‘‘ म सामिल होय बर देसभर के दू सौ पचास पहुना अउ सरकारी योजना के लाभार्थी मन ल राष्ट्रपति कोति ले नेवता दे गेहे। एमन म छत्तीसगढ़ ले चुने गे पहुना घलो सामिल हे, जेमन ल डाक विभाग कोति ले नेवता पत्र बांटे गेहे। ए निमंत्रण कारड ल अशोक चक्र के संग एक डब्बा म पेक करे गेहे जउन राष्ट्रपति के नेवता के चिन्हा हे, एमा हाथ ले बने कुछू समान घलो हे। ए कारीकरम म सामिल होय बर रईपुर के कमलनारायण साहू, जांजगीर-चांपा जिला के नवागढ़ के हेमलता मनहार, राजनांदगांव जिला के पनेका गांव के मधुलिका रामटेके अउ कबीरधाम जिला के पंडरिया गांव के जगतीन बाई सामिल हे।
अधिकारी-निलंबित
लोक निर्माण विभाग ह बीजापुर जिला म नेलसना-कोडोली-मिरतुर-गंगालूर सड़का बनाय म गड़बड़ी अउ खराब काम के आरोप म ओ समय के कार्यपालन अभियंता, अनुविभागीय अधिकारी, उप अभियंता समेत एखर ले जुड़े अधिकारी मनके खिलाफ एफआईआर लिखे के निरदेस देहे। उहें, विभाग ह अनुविभागीय अउ उप अभियंता ल तुरते निलंबित करत हुए ओमन के मुख्यालय ल नवा रईपुर के लोक निर्माण विभाग कार्यालय म निर्धारित करे हे। ए मामला म बीजापुर के सेवानिवृत्त प्रभारी कार्यपालन अभियंता ल कारण बताओ नोटिस जारी करके ओखर जवाब पंद्रह दिन म दे बर केहे गेहे।
विभाग ह रईपुर के मोवा ओवरब्रिज के मरम्मत म खराब काम अउ अनियमितता म घलो बड़का कार्यवाही करे हे। जांच के बाद विभाग ह पांच अधिकारी मन ल निलंबित कर देहे। ए मन म कार्यपालन अभियंता, अनुविभागीय अधिकारी अउ उप अभियंता स्तर के अधिकारी सामिल हे। उहें, विभाग ह गुणवत्ताहीन काम बर ठेकेदार ल कारण बताओ नोटिस जारी करत हुए ओखर पंजीयन ल निलंबित करे के अनुशंसा घलो करे हे।
सुनइया मन ल बतादन कि उपमुख्यमंत्री अउ लोक निर्माण विभाग के मंत्री अरूण साव ह मरम्मत काम ल देखके ए मामला म जांच के आदेस दे रिहीन।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए दारी के अंक म ‘‘नारायणपुर‘‘ जिला के गतिविधि के बारे म जानकारी दे जाही।