भारतीय जनता पार्टी ह किरण सिंह देव ल फेर छत्तीसगढ़ के प्रदेस अध्यक्ष नियुक्त करे हे। भाजपा के राष्ट्रीय महासचिव विनोद तावड़े ह पार्टी के राज्य मुख्यालय कुशाभाऊ ठाकरे परिसर म आयोजित प्रदेस अध्यक्ष चुनाव कारीकरम के दौरान ए घोसना करीन।
मुख्यमंत्री विष्णुदेव साय, भाजपा के प्रदेस प्रभारी नितिन नबीन, पर्यवेक्षक गजेंद्र पटेल, पूर्व राज्यपाल रमेश बैस, उपमुख्यमंत्री अरूण साव अउ विजय शर्मा, क्षेत्रीय संगठन महामंत्री अजय जामवाल, संगठन महामंत्री पवन साय ह श्री सिंह देव ल अध्यक्ष चुने जाय म बधई दीन हे। मुख्यमंत्री विष्णुदेव साय ह किहीन हे कि श्री सिंह देव के अगुवई म भाजपा नवा कीर्तिमान बनाही।
कारीकरम ल संबोधित करत किरण सिंह देव ह किहीन कि अवइया नगरीय निकाय अउ त्रिस्तरीय पंचायत चुनई कार्यकर्ता मन ल नेतृत्वकर्ता बनाय के चुनई हे। एखर बर समन्वय के संग काम करना होही।
श्री तावड़े ह इही दौरान राष्ट्रीय परिषद बर सत्रह सदस्य मनके नांव के घलो घोसना करीन। ए सबो झन राष्ट्रीय अध्यक्ष चुनाव बर वोट करही।
माओवादी-मुठभेड़
बीजापुर म काली होय मुठभेड़ म सुरक्षा बल ह बारह माओवादी मन ल मार गिराय हे। घटना स्थल ले माओवादी मनके सव बरामद कर ले गेहे। ए मुठभेड़ काली जिला के पामेड़ अउ बासागुड़ा इलाका म होय रिहीस।
पुलिस के अनुसार ए इलाका म माओवादी मनके पी.एल.जी.ए. बटालियन नंबर वन अउ सेंट्रल रीजनल कमेटी मौजूद रिहीस। मुठभेड़ के बाद मउका ले माओवादी मनके कुछेक हथियार घलो बरामद करे गेहे। पुलिस डहार ले मारे गे नक्सली मनके शिनाख्त करे जात हे। ए मुठभेड़ के दौरान सुरक्षाबल के तीन झिन जवान घलो घायल होय हे। घायल जवान मनके हालत खतरा ले बाहिर हे।
उपमुख्यमंत्री विजय शर्मा ह बीजापुर के पुतकेल म होय माओवादी हमला म घायल होय दू झिन जवान मन ले आज रईपुर के अस्पताल म भेंट करीन। ओमन डॉक्टर अउ अधिकारी मन ले जवान के इलाज के प्रगति के जानकारी लीन अउ ए सुनिश्चित करे के निरदेस दीन कि ओखर इलाज म कोनो भी प्रकार के कमी झन होवय।
इही बीच, बीजापुर जिला के मिरतुर थाना क्षेत्र अंतर्गत ग्राम हल्लूर म माओवादी मन पुलिस मुखबिरी के आरोप लगावत एक ग्रामीण के अपहरण करके हत्या कर देहे। पुलिस मामला के जांच करत हे।
बायोगैस उत्पादन-एमओयू
मुख्यमंत्री विष्णुदेव साय के मौजूदगी म आज नगरीय ठोस अपसिष्ट ले कंप्रेस्ड बायोगैस उत्पादन बर एमओयू करे गेहे। छत्तीसगढ़ बायो फ्यूल विकास प्राधिकरण, गेल इंडिया लिमिटेड, भारत पेट्रोलियम अउ प्रदेस के छै ठिन नगर निगम के बीच समझौता ज्ञापन उपर हस्ताक्षर करे गेहे। ए एमओयू के माध्यम ले छै ठिन नगर पालिक निगम के लगभग तीन सौ पचास मीट्रिक टन हरेक दिन नगरीय ठोस अपसिष्ट अउ लगभग पांच मीट्रिक टन अधिसेस बायोमास के उपयोग जैव ईंधन उत्पादन बर करे जाही। ए छै संयंत्र मन ले हरेक दिन लगभग सत्तर मीट्रिक टन कंप्रेस्ड बायोगैस के उत्पादन होही। ए परियोजना मन म लगभग छै सौ करोड़ रूपिया के निवेस गेल इंडिया लिमिटेड अउ भारत पेट्रोलियम डहार ले करे जाही। अइसने संयंत्र ले होवइया उत्पादन अउ बिक्री ले राज्य ल हर साल लगभग छै करोड़ रूपिया के जीएसटी प्राप्त होही। एमओयू के तहत संयंत्र मन के स्थापना ले उत्पन्न सह-उत्पाद ले जैविक खेती ल बढ़ावा मिलही। कचरा के प्रभावी निपटान ले ग्रीनहाउस गैस के उत्सर्जन म कमी आही अउ छत्तीसगढ़ नेट जीरो एमिसन पाय के दिसा म आगू होही।
कारीकरम ल संबोधित करत मुख्यमंत्री विष्णुदेव साय ह किहीन कि छत्तीसगढ़ ह स्वच्छ पर्यावरण अउ नेट जीरो एमिसन के लक्ष्य ल पाय के दिसा म बड़का पहल करे हे। ओमन किहीन कि ए कदम स्वच्छता, ऊर्जा उत्पादन अउ सतत विकास के क्षेत्र म छत्तीसगढ़ ल एक नवा पहिचान दिलाही।
ए मउका म उपमुख्यमंत्री अउ नगरीय प्रशासन मंत्री अरूण साव घलो मौजूद रिहीन।
महाकुंभ-सुविधा
केंद्र सरकार ह महाकुंभ म श्रध्दालू अउ तीर्थयात्री मन ल बेहतर चिकित्सा सेवा देबर बिसेस व्यवस्था करे हे। प्रयागराज मेला प्राधिकरण ह श्रध्दालू मनके स्वास्थ्य संबंधी जरूरत मन ल पूरा करे बर महाकुंभ मेला क्षेत्र के परेडग्राउण्ड म सौ बिस्तर वाला केंद्रीय अस्पताल बनाय हे। केंद्रीय अस्पताल के अलावा संक्रामक रोग प्रबंधन बर मेला क्षेत्र म दू ठिन समर्पित अस्पताल घलो बनाय गेहे। ताकि देस-विदेस ले अवइया श्रध्दालू मनके स्वास्थ्य अउ सुरक्षा सुनिश्चित करे जा सकय।
मेला के आने-आने क्षेत्र मन म बीस-बीस बेड के क्षमता वाला आठ ठिन छोटे अस्पताल घलो संचालित हवय। अस्पताल म दे जाने वाला जम्मो चिकित्सा सेवा निसुल्क हरय।
केंद्रीय मंत्री-गिरिराज सिंह-दौरा
केन्द्रीय वस्त्र मंत्री गिरिराज सिंह उन्नीस जनवरी ले तीन दिन के छत्तीसगढ़ प्रवास म रिही। अपन प्रवास के दौरान बीस जनवरी के केंद्रीय मंत्री रायपुर के भनपुरी स्थित एक ठिन रेसम उद्योग संस्थान के भ्रमण करही। एखर बाद श्री सिंह ह इही दिन भिलाई बर रवाना होही, जिहां ओमन आईआईटी भिलाई डहार ले प्रस्तुत प्रजेंटेसन के अवलोकन के संघरा अधिकारी मन संग बइठका म सामिल होही।
केंद्रीय मंत्री इक्कीस जनवरी के रायपुर म टेक्सटाइल के क्षेत्रीय पदाधिकारी मनके बइठका लिही।
निलंबन
छत्तीसगढ़ गृह निर्माण मंडल जगदलपुर के कार्यपालन अभियंता सी.के. ठाकुर अउ सहायक अभियंता नीरज ठाकुर ल निर्माण कार्य म अनियमितता पाय जाय म तुरते निलंबित कर दे गेहे। उहें, निर्माण कार्य ले जुड़े ठेकेदार मेसर्स एन.के. कंस्ट्रक्शन दुरूग ल घलो ब्लैकलिस्ट करे बर नोटिस जारी करे गेहे। वित्त मंत्री ओपी चौधरी के निरदेस म छत्तीसगढ़ गृह निर्माण मंडल के आयुक्त कुंदन कुमार ह कार्यपालन अभियंता अउ सहायक अभियंता के निलंबन आदेस जारी करे हे।
बतादन कि बीजापुर जिला के भैरमगढ़, भोपालपट्टम अउ उसूर-आवापल्ली ब्लॉक मन म जीएडी आवास भवन के निर्माण कार्य म मिले सिकायत मनके बाद मुख्यालय स्तर म जांच करे गे रिहीस।
बातों-बातों में
हत्या-आरोपी गिरफ्तार
कोरबा पुलिस ह उपसरपंच ल मारे के योजना बनाय वाला छै आरोपी मन ल गिरफ्तार करे हे। पुलिस अधीक्षक ह बतइन कि छै जनवरी के उपसरपंच रामकुमार अपन रोजगार सहायक कृष्ण पांडेय के संग मोटर साइकिल म जात रिहीन। इही दौरान आरोपी मन उपसरपंच ल मारे के नियत ले गोली चलइन जउन ओखर संग बइठे रोजगार सहायक कृष्ण पांडेय के पीठ म लगिस। पुलिस के मुताबिक घटना के दौरान गोली लगे ले घायल कृष्ण पांडेय के इलाज के दौरान बिलासपुर म मउत होगे रिहीस। मामला के गंभीरता ल देखत साइबर सेल अउ पुलिस टीम ह संयुक्त रूप ले जांच सुरू करीस अउ जम्मो छै आरोपी मन ल गिरफ्तार कर लेहे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म उन्नीस जनवरी के बिहनिया साढ़े ग्यारा बजे कैबिनेट के बइठक मंत्रालय नवा रईपुर म आयोजित करे जाही।
– मुख्यमंत्री विष्णुदेव साय काली अट्ठारा जनवरी के सक्ती जिला के प्रवास म रिही। ए दौरान ओमन आने-आने विकास कार्य मनके लोकार्पण अउ सिलान्यास करही।
– गौरेला-पेण्ड्रा-मरवाही जिला के एंटी नारकोटिक्स टास्क फोर्स ह पांच अंतर्राज्यीय गांजा तस्कर मन ले तिहत्तर किलो गांजा बरामद करे हे, जेखर कीमत सात लाख पैंतीस हजार रूपिया बताय गेहे। गिरफ्तार जम्मो आरोपी मध्यप्रदेस के अनूपपुर के रहइया हे।
अउ
– कोरिया जिला के गौरघाट जलप्रपात म डूबे युवक के खोजबीन जारी हे। नगर सेना के रेस्क्यू टीम काली ले ऑपरेसन म जुटे हे।