उपराष्ट्रपति-दीक्षांत समारोह
बिलासपुर के गुरूघासीदास केंद्रीय विश्वविद्यालय के ग्यारहवां दीक्षांत समारोह आज आयोजित करे गीस। ए समारोह के अगुवई उपराष्ट्रपति जगदीप धनखड़ करीन। उपराष्ट्रपति ह समारोह के बेरा बने प्रदर्सन करइया विद्यार्थी मन ल स्वर्ण पदक दीन। ए मउका म छत्तीसगढ़ के राज्यपाल रमेन डेका अउ मुख्यमंत्री विष्णुदेव साय मौजूद रिहीन। कारीकरम म बोलत मुख्यमंत्री ह किहीन कि गुरूघासीदास केंद्रीय विश्वविद्यालय ह शिक्षा ल आधुनिक युग के चुनौती अउ मउका संग जोड़त एक नवा पहिचान बनाय हे। दीक्षांत समारोह म बछर दू हजार बाईस-तेईस चौबीस म आने-आने परीक्षा म बने प्रदर्सन करइया एक सौ सत्तर विद्यार्थी मन ल स्वर्ण पदक दे गीस। उहें एक सौ बाईस विद्यार्थी मन ल पीएचडी उपाधि मिलिस।
उहें, दू छात्रा ल गुरूघासीदास पदक ले सम्मानित करे गीस। कारीकरम म उपराष्ट्रपति श्री धनखड़ ह गुरूघासीदास केंद्रीय विश्वविद्यालय के नवा बने भवन के उद्घाटन करीन। ए मउका म उपराष्ट्रपति ह विश्वविद्यालय परिसर म अपन स्वर्गीय मां श्रीमती केशरी देवी के सुरता म पउधा रोपण करीन।
खबर के मुताबिक सराब घोटाला मामला म अट्ठाईस दिसंबर के ईडी ह पूर्व मंत्री कवासी लखमा अउ ओखर बेटा हरीश लखमा के ठिकाना म छापामार कार्रवाई करे रिहीन। छापामार कार्रवाई म ईडी ह नगद लेन-देन के सबूत मिले के जानकारी दे रिहीन। सराब घोटाला मामला म ईडी ह एक आईएएस समेत चार झिन ल पहिलीच गिरफ्तार करे हे।
थल सेना-दिवस
सतहत्तरवां थल सेना दिवस आज गरब अउ उछाह के संग मनाय जात हे। राष्ट्रपति द्रोपदी मुर्मू, प्रधानमंत्री नरेंद्र मोदी, गृह मंत्री अमित शाह अउ प्रमुख रक्षा अध्यक्ष जनरल अनिल चौहान ह ए मउका म सैनिक करमचारी अउ पूर्व सेनिक मन ल सुभकामना दीन हे। प्रधानमंत्री ह सोसल मीडिया पोस्ट म किहीन कि सरकार आने-आने सुधार अउ आधुनिकीकरण म धियान देवत हे अउ सशस्त्र बल अउ उंखर परिवार वाले मन के कल्याण बर प्रतिबध्द हवय।
‘‘स्वस्थ माता-तंदुरूस्त बच्चा‘‘ अभियान
मुख्यमंत्री विष्णुदेव साय ह आज जशपुर जिला के बगिया म आईआईटी बॉम्बे- जशपुर पोषण मिसन म ‘‘स्वस्थ माता तंदुरूस्त बच्चा‘‘ अभियान के सुभारंभ करीन। ए मउका म मुख्यमंत्री ह किहीन कि महतारी अउ लइका मनके बने स्वास्थ्य प्रदेस के बढ़वार अउ खुसहाली के आधार बनही। ए अभियान के मुख्य उद्देस्य जशपुर जिला म कुपोषण ल खतम करना अउ महतारी लइका मनके स्वास्थ्य म सुधार लाना हे। संगेसंग गर्भवती महतारी नान्हे लइका के महतारी अउ छै बछर तक के लइका मन ल कुपोषण ले मुक्त कराय के लक्ष्य हवय। अभियान म नौ हजार ले पांच सौ ले जादा स्वास्थ्य अउ आंगनबाड़ी कार्यकर्ता, आईआईटी बॉम्बे कोति ले पोषण संबंधी ऑनलाइन प्रसिक्षण दे जाही।
निर्वाचक नामावली
प्रदेस म होवइया नगरीय निकाय अउ पंचायत चुनई बर निर्वाचक नामावली के आखिरी प्रकासन अट्ठारा जनवरी के करे जाही। ए संबंध म राज्य निर्वाचन आयोग के सचिव डॉक्टर सर्वेश्वर नरेंद्र भुरे ह दू आने-आने आदेस जारी करे हे। आदेस के मुताबिक सबो नगरीय निकाय अउ ग्राम पंचायत के मतदाता सूची के प्रकासन अट्ठारा जनवरी के करे जाही।
खबर के मुताबिक अट्ठारा जनवरी के बाद नगरीय निकाय चुनाव अउ त्रिस्स्तरीय पंचायत चुनाव बर आदर्स आचार संहिता प्रभावी हो सकत हे।
भाजपा अध्यक्ष-कांग्रेस जिलाध्यक्ष
भारतीय जनता पार्टी के नवा प्रदेस अध्यक्ष के घोसना अवइया सत्रह जनवरी के होही। एखर बर काली सोलह जनवरी के संझा पांच ले सात बजे तक नामांकन होही। ए जानकारी प्रदेस संगठन चुनाव प्रभारी खूबचंद पारख ह दीन। ओमन बतइन कि प्रदेस अध्यक्ष पद के चुनई पूरा कराय बर भाजपा के राष्ट्रीय महामंत्री अउ प्रदेस अध्यक्ष चुनाव के प्रभारी विनोद तावड़े बिसेस रूप ले रईपुर आवत हे। चुनाव के दउरान श्री तावड़े के संग भाजपा प्रदेस प्रभारी नितिन नबीन अउ चुनाव पर्यवेक्षक गजेन्द्र पटेल घलो मौजूद रिहीन।
दूसर कोति, कांग्रेस ह तीन जिला म कांग्रेस नवा जिलाध्यक्ष के नियुक्ति करे हे। एमा मुंगेली, बस्तर ग्रामीण अउ रायगढ़ सामिल हे। कांग्रेस ह बस्तर ग्रामीण म प्रेमशंकर शुक्ला, रायगढ़ ग्रामीण म नागेन्द्र नेगी अउ मुंगेली म घनश्याम वर्मा ल जिलाध्यक्ष बनाय हे।
मुख्यमंत्री-वयोवृध्द दिवस
मुख्यमंत्री विष्णुदेव साय ह काली जशपुर जिला के पगुराबहार गांव म राखे गे नौवां सशस्त्र सेना वयोवृध्द दिवस म सेना के वीर जवान मनके साहस अउ बलिदान ल नमन करीन। ए मउका म ओमन उन्नीस सौ इकहत्तर के भारत-पाकिस्तान युध्द म अपन वीरता ल देखात राष्ट्रपति कोति ले सेना मेडल ले सम्मानित भागलपुर के रहवइया इक्यासी बछर के अरूण कुमार के सम्मान करीन। मुख्यमंत्री ह ओमन ल सॉल, नरियर अउ प्रशस्ति पत्र भेंट करके ओखर हिम्मत के प्रशंसा करीन।
कारीकरम म मुख्यमंत्री ह जिला के तीन सहीद सेनानी मन के परिवार ल घलो सम्मानित करीन। एमा सहीद सिपाही शिमोन केरकेट्टा के घर गोसइन तेरेसा केरकेट्टा ल चले म होवत मुस्कल ल देखत मुख्यमंत्री ह ओमन ल व्हील चेयर दीन।
माओवादी-आत्मसमर्पण
नारायणपुर जिला म चार झिन इनामी माओवादी मन ह आज आत्मसमर्पण करीन हे। ए सबो झन उपर बत्तीस लाख रूपिया ले जादा के इनाम घोसित रिहीस हे। ए माओवादी मन ह नारायणपुर के पुलिस अधीक्षक प्रभात कुमार अउ अतिरिक्त पुलिस अधीक्षक रॉबिनसन गुड़िया के आगू आत्मसमर्पण करीन। आत्मसमर्पण करइया माओवादी नारायणपुर, बीजापुर, सुकमा अउ ओखर ले लगे जिला म, समीवर्ती क्षेत्र म ताड़मेटला मुठभेड़ समेत आने-आने माओवादी घटना म सामिल रहे हे। आत्मसमर्पण करइया माओवादी मन ल राज्य सरकार के पुनर्वास नीति म पच्चीस-पच्चीस हजार रूपिया के चेक दे गीस।
ऐति, कोंडागांव जिला के पुंगारपाल थाना के सुरक्षा बल मन ह बड़ मात्रा म बिस्फोटक अउ हथियार बरामद करीन हे। डीआरजी अउ बस्तर फाइटर के संयुक्त टीम सर्चिंग अभियान म निकले रिहीन। इही दउरान गांव तुमड़ीवाल के जंगल ले चौदह ठिन भरमार बंदूक, चौदह ठिन टिफिन बम, दू कुकर माओवादी साहित्य अउ आने जिनिस बरामद करे गेहे।
महादेव सट्टा ऐप-आरोपी गिरफ्तार
महादेव ऑनलाइन सट्टा ऐप मामला म फरार आरोपी रविकांत मिश्रा ल सुपेला पुलिस ह काली रतिहा गिरफ्तार कर लेहे। उहें, एक आने आरोपी गोविंदा चौहान अभी घलो फरार हे। पुलिस के मुताबिक रविकांत मिश्रा अउ गोविंदा चौहान के खिलाफ सितंबर दू हजार चौबीस म मामला दरज करे गे रिहीस, तब ले दूनो आरोपी फरार रिहीन।
मुखबिर ले पुलिस ल रविकांत मिश्रा अउ गोविंदा चौहान के भिलाई म लुकाय रेहे के सूचना मिले रिहीस, जेखर आधार म पुलिस ह काली रतिहा जुनवानी ले रविकांत मिश्रा ल गिरफ्तार करीन।
कांग्रेस-प्रदर्शन
प्रदेस म होवइया नगरीय निकाय अउ पंचायत चुनाव म अन्य पिछड़ा वर्ग के आरक्षण के कटौती के विरोध म आज कांग्रेस ह सबो जिला मुख्यालय म धरना प्रदर्सन करीन। रईपुर सहर कांग्रेस कमेटी ह सुभाष स्टेडियम के आगू फायर ब्रिगेड चौक म भाजपा सरकार के खिलाफ धरना प्रदर्सन करीन।
कैश कलेक्शन वाहन-लूट
जांजगीर-चांपा जिला के खोखरा गांव के सराब दुकान म केश कलेक्सन बर पहुंचे गनमैन ल अज्ञात मनखे मन ह गोली मारके घायल कर दीन अउ गाड़ी म रखाय अठहत्तर लाख इकतालिस हजार रूपिया लूट के फरार होगे। गंभीर रूप ले घायल गनमैन शैलेन्द्र सिंह ल पहिली जिला अस्पताल म भर्ती कराय गीस, जिहां ले ओला बिलासपुर भेजे गेहे। पुलिस अधीक्षक विवेक शुक्ला ह किहीन कि आरोपी मनके पतासाजी बर सात ठिन टीम बनाय गेहे अउ सीसीटीवी घलो खंगाले जात हे।