प्रधानमंत्री नरेन्द्र मोदी ह देस ल मौसम के हर स्थिति ले निपटे म सक्षम अउ क्लाइमेट स्मार्ट राष्ट्र बनाय बर ‘‘मिशन मौसम‘‘ के आज सुभारंभ करीन। ए कार्यक्रम नई दिल्ली के भारत मंडपम म भारतीय मौसम विभाग के एक सौ पचासवां स्थापना दिवस म राखे गीस। ए मउका म प्रधानमंत्री ह कहिन कि मिशन मौसम एक स्थायी अउ भविष्य बर तैयार राष्ट्र के निर्माण के दिसा म भारत के प्रतिबद्धता के प्रमाण हरय।
तातापानी महोत्सव
बलरामपुर जिला म आज ले तातापानी महोत्सव के सुरूआत होइस। मुख्यमंत्री विष्णुदेव साय ह तीन दिवसीय ए महोत्स्व के सुभारंभ करीन। ए मउका म मुख्यमंत्री ह जिला म एक सौ ससत्तर करोड़ रूपिया ले जादा के एक सौ अंठानवे विकास काम के लोकार्पण अउ भूमिपूजन करीन। कारीकरम म मुख्यमंत्री ह कई ठिन घोसना करीन।
मुख्यमंत्री ह तातापानी स्थित तपेश्वर महादेव मंदिर म पूजापाठ करीन। एखर बाद ओमन मुख्यमंत्री कन्या विवाह योजना के अंतर्गत सामूहिक विवाह कारीकरम म सामिल होइन। संगेसंग ओमन आने-आने विभाग डहार ले लगाय गे विकास काम के प्रदर्सनी ल घलो देखीन।
उपराष्ट्रपति-दीक्षांत समारोह
गुरू घासीदास केन्द्रीय विश्वविद्यालय के दीक्षांत समारोह म सामिल होय बर उपराष्ट्रपति जगदीप धनखड़ काली पन्द्रह जनवरी के बिलासपुर पहुंचही। उपराष्ट्रपति ह गुरू घासीदास विश्वविद्यालय के ग्यारहवां दीक्षांत समारोह म माईपहुना के रूप म सामिल होही। ए दउरान विश्वविद्यालय के कुलपति प्रोफेसर आलोक कुमार चक्रवाल विश्वविद्यालय के सालाना प्रतिवेदन प्रस्तुत करही। समारोह म अति विशिष्ट अतिथि के रूप म राज्यपाल रमेन डेका अउ विशिष्ट अतिथि के रूप म मुख्यमंत्री विष्णुदेव साय सामिल होही।
दीक्षांत समारोह म बछर दू हजार बाईस-तेईस अउ तेईस-चौबीस म आने-आने परीक्षा म पास होय एक सौ सत्तर विद्यार्थी मन ल स्वर्ण पदक दे जाही। उहें, दू छात्रा मन ल गुरू घासीदास पदक ले सम्मानित घलो करे जाही।
बिजली मितान बॉट
छत्तीसगढ़ स्टेट पावर डिस्ट्रीब्यूशन कंपनी लिमिटेड डहार ले उपभोक्ता मन बर ‘‘बिजली मितान बॉट‘‘ के सुविधा सुरू करे जावत हे। वितरण कंपनी के प्रबंध निदेशक भीमसिंह कंवर ह जम्मों उपभोक्ता मन ले ए सुविधा के लाभ उठाय के अपील करे हे।
वाट्सऐप बॉट के उपयोग करइया पावर कंपनी के वाट्सऐप बॉट नंबर – नौ चार दू पांच पांच पांच एक नौ एक दू म हाय लिखके भेजना होही। उहें, वेब बॉट के उपयोग करे बर डिस्ट्रीब्यूशन कंपनी के वेबसाइट सीएसपीडीसीएल डॉट को डॉट इन म विजिट करना होही। बिजली मितान बॉट के माध्यम ले उपभोक्ता बिजली आपूर्ति, ट्रांसफार्मर खराबी अउ बिजली दुर्घटना ले जुड़े सिकायत आसानी ले दर्ज करा सकत हे। कोनों उपभोक्ता ल अपन बकाया राशि, अंतिम बिल अउ अंतिम भुगतान के बारे जानना हे त ओमन घलो बिजली मितान बॉट के माध्यम ले जानकारी ले सकत हे।
भाजपा-प्रेसवार्ता
भारतीय जनता पार्टी के रायपुर स्थित प्रदेस कार्यालय कुशाभाऊ ठाकरे परिसर म आज प्रेसवार्ता आयोजित करे गीस। मीडिया ल संबोधित करत प्रदेस भाजपा अध्यक्ष किरण सिंह देव ह किहीन कि पार्टी अनारक्षित सीट म पिछड़ा वर्ग ल जादा मउका दीहीं। ओमन कहिन कि एखर ले पहिली के स्थिति बहाल रइही अउ पिछड़ा वर्ग के प्रतिनिधित्व म कोनों प्रकार के कोनों कमी नइ आही। ए दउरान प्रदेस भाजपा अध्यक्ष ह आने-आने मुद्दा ल लेके कांग्रेस उपर निसाना साधीन।
मुख्यमंत्री-पत्रकार सहायता
मुख्यमंत्री विष्णुदेव साय ह बीजापुर के पत्रकार मुकेश चंद्रकार के मउत के बाद उंखर परिवार वाले मन ल दस लाख रूपिया के सहायता रासि देके के घोसना करीन हे। संगेसंग ओमन उंखर नाम म पत्रकार भवन बनाय के घलो बात कहिन।
महाकुंभ मकर संक्रांति स्नान
प्रयागराज के महाकुंभ म मकर संक्रांति म आज करोड़ों श्रद्धालु मन ह अमृत स्नान करीन अउ त्रिवेणी संगम म आस्था के डुबकी लगईन। पवित्र स्नान के बाद श्रद्धालु मन ह घाट म पूजापाठ अउ अनुष्ठान करीन। आज मकर संक्रांति होय के सेती बिहनिया ले बड़ संख्या म लोगन मन ह गंगा आरती भाग लीन।
प्रधानमंत्री नरेन्द्र मोदी ह आज मकर संक्रांति के परब म महाकुंभ म पहिली अमृत स्नान म भाग ले बर श्रद्धालु मन ल बधाई दीन।
महाकुंभ-स्पेशल ट्रेन
महाकुंभ के दउरान प्रयागराज जवइया यात्री मन ल सुविधा दे बर दक्षिण पूर्व मध्य रेलवे डहार ले अट्ठाईस फेरा बर पांच जोड़ी कुंभ मेला स्पेशल ट्रेन चलाय जावत हे। दुर्ग-टूंडला कुंभ मेला स्पेशल ट्रेन दुर्ग ले टूंडला के बीच रायपुर, उसलापुर, पेण्ड्रा रोड होवत प्रयागराज तक चलाय जावत हे। ए ट्रेन उन्नीस जनवरी के संझा सात बजके बीस मिनट म दुर्ग ले रवाना होही अउ बीस जनवरी के ग्यारह बजके दस मिनट म प्रयागराज पहुंचही। अइसने, इक्कीस अउ बाईस जनवरी अउ पन्द्रह, सोलह, सत्रह अउ अट्ठारह फरवरी के ए ट्रेन मैहर-कटनी के रद्दा होवत दुर्ग पहुंचही।
मकर संक्रांति
सूर्य के उत्तरायण के परब मकर संक्रांति आज छत्तीसगढ़ समेत देसभर म मनाय जावत हे। मकर संक्रांति के परब हेमंत ऋतु के सिराते अउ शिशिर ऋतु के आय के प्रतीक हरय। आजे ले दिन ह बड़े हो जथे। ए तिहार ल देस के आने-आने भाग म अलग-अलग नाम ले जाने जाथे। तमिलनाडु म एला पोंगल, गुजरात म उत्तरायण, असम म भोगाली बिहू अउ पश्चिम बंगाल म पौष संक्रांति के रूप म एला मनाय जाथे।
मुख्यमंत्री विष्णुदेव साय ह प्रदेसवासी मन ल मकर संक्रांति के बधाई अउ सुभकामना दीन हे। ओमन कहिन हे कि जम्मों के जीवन म सुख, सांति अउ समृद्धि के मिठास घुलत राहय।
माओवादी-आत्मसमर्पण
कोंडागांव जिला म आज एक लाख रूपिया के इनामी महिला माओवादी ह पुलिस के आगू आत्मसमर्पण करे हे। ए माओवादी बछर दू हजार पांच ले दू हजार सोलह तक जनमिलिशिया सदस्य अउ दू हजार सोलह ले चौबीस तक एलओएस पार्टी सदस्य के रूप म सक्रिय रिहीस। ए मओवादी उपर कोंडागांव, बस्तर अउ नारायणपुर म होय माओवादी घटना म सामिल रेहे के आरोप हे।
एनटीए-परीक्षा
राष्ट्रीय परीक्षा एजेंसी-एनटीए ह काली होवइया यूजीसी-नेट परीक्षा दिसंबर-दू हजार चौबीस स्थगित कर देहे। एजेंसी ह कहिन कि ओमन ल पन्द्रह जनवरी के पोंगल, मकर संक्रांति अउ आने-आने तिहार के सेती परीक्षा स्थगित करे बर आवेदन मिले हे। परीक्षा के नवा तारीख के घोसना बाद म करे जाही। एनटीए ह बतईन हे कि सोलह जनवरी के होवइया परीक्षा पहिली ले तय कारीकरम के मुताबिक ही राखे जाही।
होईकोर्ट-निर्देश
कोरिया जिला म बाघ के मौत अउ बलरामपुर म करंट लगाके हाथी ल मारे के मामला म छत्तीसगढ़ उच्च न्यायालय ह नाराजगी जताय हे। कोर्ट ह केहे हे कि वन्यजीव संरक्षण म लापरवाही करइया मन उपर कड़ा कार्रवाई करे जाय। वन विभाग के अतिरिक्त सचिव ऋचा शर्मा ह ए घटना ल लेके हाईकोर्ट म सपथ पत्र पेस करीन। मुख्य न्यायाधीश रमेश कुमार सिन्हा अउ उंखर डिवीजीन बेंच ह ए मामला के सुनवाई करके जांच के निरदेस दीन हे। ए मामला के सुनवाई अवइया महीना होही।
खबर के मुताबिक कोरिया जिला म पाछु आठ नवंबर के होय बाघ के मउत म कोर्ट ह खुदे संज्ञान लेवत चिन्ता जताय हे अउ राज्य सरकार ल निरदेस देके बाघ मनके मउत के कारण के निष्पक्ष जांच कराय बर कहिन हे। उहें, बलरामपुर जिला म हाथी के मौत म नाराजगी जतावत वन विभाग ल निरदेस जारी करे हे।
अउ अब थोरकुन समाचार सार म –
– मकर संक्रांति के मउका म मुख्यमंत्री विष्णुदेव साय ह आज रायपुर म छत्तीसगढ़ के रजत जयंती बछर दू हजार पच्चीस के सासकीय कैलेंडर के विमोचान करीन।
– छत्तीसगढ़ स्टेट क्रिकेट संघ के पूर्व अध्यक्ष प्रभतेज सिंह भाटिया ल भारतीय क्रिकेट कंट्रोल बोर्ड-बीसीसीआई के कोषाध्यक्ष बनाय गेहे।
अउ
– कोरबा जिला म स्मॉल फाइनेंस माइक्रो कंपनी मन डहार ले जुड़े सात एजेंट ल पुलिस ह गिरफ्तार करे हे। पुलिस ह बतईन कि ए एजेंट मन निवेसक मन डरा-धमका के पइसा मांगत रिहीन।